អាជីវករផ្សារស្ទឹងត្រែងត្អូញថាពិបាករកប្រាក់ចំណូលដោយសារការតាំងពិព័រណ៍ទំនិញថៃ
2017.07.20
ក្រុមអាជីវករផ្សារស្ទឹងត្រែង ត្អូញថា អាជ្ញាធរពាក់ព័ន្ធមិនបានយកចិត្តទុកដាក់លើកកម្ពស់ផលិតផលក្នុងស្រុកទេ បែរជាបណ្តោយឲ្យមានលក់ផលិតផលចល័តរបស់ថៃ ច្រើនស្អេកស្កះ ក្រោមរូបភាពតាំងពិព័រណ៍លក់ផលិតផលដែលនាំឲ្យប្រាក់ចំណូលរបស់អាជីវករធ្លាក់ចុះយ៉ាងគំហុក។
ក្រុមអាជីវករផ្សារស្ទឹងត្រែង អំពាវនាវឲ្យរាជរដ្ឋាភិបាល និងស្ថាប័នពាក់ព័ន្ធ សិក្សាពីស្ថានភាពអាជីវករក្នុងស្រុកជាមុនសិន មុននឹងអនុញ្ញាតឲ្យពាណិជ្ជករថៃ ចូលមកលក់ផលិតផល។ ការអំពាវនាវនេះ ធ្វើឡើងនៅថ្ងៃទី១៩ កក្កដា ក្រោយពីអាជ្ញាធរពាក់ព័ន្ធបានអនុញ្ញាតឲ្យពាណិជ្ជករថៃ តាំងពិព័រណ៍លក់ទំនិញនៅក្រុងស្ទឹងត្រែង ក្នុងមួយឆ្នាំៗពី ៣ ទៅ ៥ដង។
អាជីវករលក់សម្លៀកបំពាក់ លោកស្រី តាន់ សោភា ត្អូញថា មុនពេលមិនទាន់មានការតាំងលក់ផលិតផលថៃ គ្រួសារលោកស្រីអាចរកប្រាក់ចំណូលបានគិតជាមធ្យម ៥០ម៉ឺនរៀលក្នុងមួយថ្ងៃ ក៏ប៉ុន្តែនៅគ្រាដែលមានការតាំងលក់ផលិតផលថៃ លោកស្រីមិនអាចលក់ផលិតផលសូម្បីតែ ៥ម៉ឺនរៀល។ លោកស្រីរអ៊ូថា ក្រុមអាជីវករមួយចំនួនជំពាក់បំណុលធនាគារវ័ណ្ឌក ព្រោះគ្មានប្រាក់បង្វិលសងម្ចាស់បំណុល។ លោកស្រីបន្តថា ពុំសូវមានអតិថិជន ដោយគេបែរទៅទិញផលិតផលថៃ វិញ ព្រោះមានតម្លៃថោកជាង៖ «ផ្សារថៃ ចូលមកទៀត កាន់តែលក់អត់ដាច់។ ដល់ពេលចឹង ពិបាកណាស់។ ប្រឈមមុខធនាគារដូចគ្នាទាំងអស់។ ដល់ពេលចឹង ចង់សំណូមពរដល់សម្ដេច គាត់ជួយគិតគូររឿងហ្នឹងឡើងវិញផង»។
លោកស្រី តាន់ សោភា បន្ថែមថា កន្លងទៅ អាជីវករជាង ១ពាន់គ្រួសារ ធ្លាប់រងគ្រោះដោយសារភ្លើងឆេះផ្សារស្ទឹងត្រែង ហើយពួកគាត់ម្នាក់ៗត្រូវខាតប្រាក់រាប់ម៉ឺនដុល្លារ និងត្រូវបង្ខំចិត្តខ្ចីប្រាក់ពីធនាគារ និងមីក្រូហិរញ្ញវត្ថុ ដើម្បីធ្វើដើមទុនរកស៊ីសាជាថ្មី។
អ្នកនាំពាក្យសាលាខែត្រស្ទឹងត្រែង លោក ម៉ែន គុង បដិសេធមិនផ្តល់បទសម្ភាសន៍ដល់អាស៊ីសេរីទេ ដោយលោកជំរុញឲ្យសួររដ្ឋបាលក្រុងស្ទឹងត្រែង វិញ៖ «សួរទៅក្រុងទៅ ការងារនេះរដ្ឋបាលក្រុងជាអ្នកគ្រប់គ្រង»។
ចំណែកអភិបាលក្រុងស្ទឹងត្រែង លោក ប៊ុន ណារី ក៏បដិសេធមិនអធិប្បាយរឿងនេះដែរ ដោយជំរុញឲ្យអាស៊ីសេរីសួរខាងមន្ទីរពាណិជ្ជកម្ម៖ «សួរខាងមន្ទីរពាណិជ្ជកម្ម ទៅវិញទៅ ជាអ្នកសម្រេច ព្រោះក្រុងរឿងលក់ដូរគ្មាននៅលើក្រុងទេ»។
ដោយឡែកប្រធានមន្ទីរពាណិជ្ជកម្ម លោក អ៊ុន សុខា ក៏បដិសេធមិនផ្តល់បទសម្ភាសន៍ដល់អាស៊ីសេរីដែរ ដោយលោកបញ្ជាក់យ៉ាងខ្លីថា កំពុងជាប់រវល់ប្រជុំ៖ «សុំទោសដោយសារខ្ញុំជាប់រវល់ប្រជុំនៅក្រសួងហិរញ្ញវត្ថុ»។
ពាណិជ្ជករថៃ បានតាំងលក់ផលិតផលរបស់ខ្លួនរាប់រយតូបនៅខាងមុខផ្សារស្ទឹងត្រែង និងលើសួនច្បារប្រហែល ២សប្ដាហ៍មកហើយ និងមានប្រគំតន្ត្រីលក់ស្រាបៀផង។ ពិព័រណ៍នោះ អាជីវករថៃ លក់សម្ភារៈផ្ទះបាយ សម្ភារៈកីឡា សម្លៀកបំពាក់ ស្បែកជើង និងអាហារហូបចុក ជាដើម។
ប្រធានអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា មុនអនុញ្ញាតឲ្យពាណិជ្ជករថៃ តាំងពិព័រណ៍លក់ផលិតផលនៅតំបន់ណាមួយ អាជ្ញាធរចាំបាច់ត្រូវសិក្សាពីស្ថានភាពអាជីវករក្នុងស្រុកជាមុនសិន ដើម្បីស្វែងយល់ពីសុខទុក្ខរបស់អាជីវករ។ លោកយល់ថា បើការតាំងពិព័រណ៍ដោយពុំបានកំណត់ចំនួនឲ្យច្បាស់លាស់ទេ វានឹងក្លាយជាមធ្យោបាយមួយ ដើម្បីកម្ទេចរបរលក់ដូររបស់ពលរដ្ឋនៅមូលដ្ឋាន៖ «មានន័យថា លក្ខខណ្ឌតាំងពិព័រណ៍គេត្រូវកំណត់។ កំណត់ថា តើដាក់ទំនិញលក់ហ្នឹងប៉ុន្មានភាគរយជាការប្រមូលសិន (promotion) លើផលិតផល ជាការធ្វើប្រមូលសិន។ បើការការតាំងពិព័រណ៍លក់ពេញទំហឹងតែម្តង ខ្ញុំគិតថា នោះហើយជាផលពិបាក ឬក៏ជាគ្រោះមហន្តរាយមួយសម្រាប់អាជីវករក្នុងមូលដ្ឋានហ្នឹងដែរ»។
លោក សន ជ័យ ចំណាំថា កន្លងទៅក៏មានទំនិញគេចពន្ធជាច្រើនបានចរាចរលក់ក្នុងប្រទេសកម្ពុជា តាមរយៈការតាំងពិព័រណ៍ ហើយដំណឹងនេះលោករំពឹងថា គឺជាតម្រុយមួយអាជ្ញាធរគួរមានវិធានការបន្ទាន់ បំណងទប់ស្កាត់ផលប៉ះពាល់នានា។ លោកបារម្ភថា ប្រសិនបើការតាំងពិព័រណ៍លក់ទំនិញមិនបង់ពន្ធ នឹងនាំឲ្យប៉ះពាល់ដល់អាជីវករក្នុងស្រុក និងខាតប្រយោជន៍ដល់ការបង់ពន្ធគយផង៕