ក្រុមយុវជនព្រមានធ្វើបាតុកម្មបើរបបក្រុងភ្នំពេញអនុញ្ញាតឱ្យចាយលុយយ័នចិនក្នុងស្រុកខ្មែរ
2019.04.27
ក្រុមយុវជន ព្រមានធ្វើបាតុកម្ម ប្រសិនបើរបបក្រុងភ្នំពេញអនុញ្ញាតឱ្យចាយលុយយ័នចិន ក្នុងទីផ្សារក្នុងស្រុក ដូចប្រាក់រៀលខ្មែរ និងប្រាក់ដុល្លារ។ ការព្រមាននេះ ក្រោយពីប្រធានសមាគមទំនាក់ទំនងអន្តរជាតិចិនថ្មីៗនេះ បានស្នើឱ្យរដ្ឋាភិបាលកម្ពុជាជួយសម្រួល ឱ្យមានការចរាចរណ៍ប្រើប្រាស់រូបិយប័ណ្ណចិននៅទីផ្សារកម្ពុជា ដើម្បីសម្រួលការធ្វើពាណិជ្ជកម្ម។
ក្រុមយុវជនចាត់ទុក ការចរាចរណ៍រូបិយប័ណ្ណបរទេសដោយសេរី បង្កប៉ះពាល់ដល់អធិបតេយ្យភាពជាតិ និងខាតចំណូលសេដ្ឋកិច្ចជាតិ។ ពួកគេស្នើឱ្យរបបក្រុងភ្នំពេញ ត្រូវសិក្សាពីគោលបំណង និងមហិច្ឆតារបស់ចិន ឱ្យជាក់លាក់បញ្ហានេះ ស្របពេលដែលប្រជាជនចិនរាប់សែននាក់ កំពុងសម្រុកមករស់នៅ និងរកស៊ីជួញដូរក្នុងប្រទេសកម្ពុជា។
យុវជនរស់នៅរាជធានីភ្នំពេញ លោក ជុំ ហួត ប្រាប់អាស៊ីសេរី នៅថ្ងៃទី២៧ មេសាថា ពួកគេបានពិភាក្សាគ្នារួចហើយ និងត្រៀមតវ៉ា នៅមុខក្រសួងសេដ្ឋកិច្ច និងហិរញ្ញវត្ថុ ប្រសិនបើរដ្ឋាភិបាល អនុញ្ញាតឱ្យចរាចរណ៍រូបិយប័ណ្ណចិន ដោយសេរីក្នុងប្រទេសកម្ពុជា ដូចប្រាក់ដុល្លារដែរនោះ៖ «ពួកយើងនឹងមានការតវ៉ា នៅមុខក្រសួងសេដ្ឋកិច្ច ទី២ យើងតវ៉ានៅមុខធនាគារជាតិ ព្រោះធនាគារជាតិ ផលិតលុយខ្មែរ ហេតុអ្វីមិនព្រមចាយលុយខ្មែរ បែរជាទទួលលុយទី៣ គឺចិន ហើយពួកគេមានការប្រមូលផ្តុំយុវជនមួយចំនួន ដើម្បីដាស់ដល់ស្មារតីរដ្ឋាភិបាល គិតពីបញ្ហាហ្នឹង»។
យុវជនម្នាក់ទៀត ឈ្មោះ គង់ រ៉ៃយ៉ា បានប្រកាសជំហរ តាមបណ្ដាញសង្គមហ្វេសបុករបស់ខ្លួនថា ប្រសិនបើរដ្ឋាភិបាលអនុញ្ញាតឱ្យធ្វើចរាចរណ៍រូបិយប័ណ្ណចិន ក្នុងប្រទេស លោកនឹងចេញមុខតវ៉ា ដើម្បីបង្ហាញពីការមិនពេញចិត្ត និងមិនគាំទ្រ។
កាលពីថ្ងៃទី២៤ មេសា ប្រធានសមាគមទំនាក់ទំនងអន្តរជាតិចិន លោក ឈិន យន់ និងលោកនាយករដ្ឋមន្ត្រី ហ៊ុន សែន បានពិភាក្សានៅវិមានសន្តិភាព ក្នុងរាជធានីភ្នំពេញ។ កិច្ចប្រជុំនោះ លោក ឈិន យន់ បានស្នើឱ្យលោក ហ៊ុន សែន ជួយសម្រួលឱ្យមានការធ្វើចរាចរណ៍ប្រើប្រាស់រូបិយប័ណ្ណចិន នៅទីផ្សារកម្ពុជា ដើម្បីទាក់ទាញអ្នកវិនិយោគចិនមកកម្ពុជាកាន់តែច្រើនឡើង។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី ប្រកាសជំហរថា លោកនឹងស្ម័គ្រចិត្តចូលរួមបាតុកម្ម ប្រឆាំងដាច់ខាត ប្រសិនបើរដ្ឋាភិបាល អនុញ្ញាតឱ្យចរាចរណ៍រូបិយប័ណ្ណចិន ក្នុងប្រទេសកម្ពុជា បើទោះបីជារងការគំរាមកំហែងក្ដី។ លោកទទូចឱ្យរដ្ឋាភិបាល និងស្ថាប័នពាក់ព័ន្ធ ត្រូវសិក្សាឱ្យបានច្បាស់លាស់ ពីផលប៉ះពាល់វិជ្ជមាន និងអវិជ្ជមាន ទាក់ទិនការប្រើប្រាស់លុយយ័នចិន ក្នុងប្រទេសកម្ពុជា ដោយតម្កល់ផលប្រយោជន៍ជាតិជាធំ និងទទួលយកកង្វល់របស់ពលរដ្ឋពិចារណាដោះស្រាយ៖ «ការប្រើប្រាស់លុយដុល្លារ វាខាតបង់ច្រើនណាស់ ទៅប្រទេសអាមេរិក ហើយប្រសិនបើកម្ពុជាសម្រេចបន្ថែមការប្រើប្រាស់លុយយ័ន វានឹងប៉ះពាល់បន្ថែម ទៅដល់ការប្រើប្រាស់ប្រាក់រៀលរបស់ជាតិយើងដែរ ព្រោះយើងឃើញថា ជនជាតិចិនទៅថ្ងៃអនាគតវា នឹងមានចំនួនច្រើនឡើងក្នុងប្រទេសកម្ពុជាយើងបន្ថែមទៀត។ ប្រទេសជាច្រើននៅលើពិភពលោក ជាពិសេសនៅតំបន់អាស៊ីយើង គេប្រឹងប្រែងណាស់ មិនឱ្យប្រើប្រាស់លុយបរទេសសេរី»។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន យល់ថា ការព្រមានតវ៉ារបស់យុវជន ធ្វើឡើងតាមអារម្មណ៍ដោយពុំបានយល់គ្រប់ជ្រុងជ្រោយ ពីការចរាចរណ៍ពាណិជ្ជកម្មរូបិយប័ណ្ណចិន ក្នុងប្រទេសកម្ពុជា។ លោកបញ្ជាក់ថា ការដាក់ឱ្យចាយលុយយ័នចិន ជាសេរីភាពពាណិជ្ជកម្ម។ លោកថា កម្ពុជាបានបើកជំហរទទួលលុយទាំងអស់ ហើយបានរៀបចំគោលការណ៍សម្របសម្រួល មិនរាំងស្ទះដល់ការចរាចរណ៍ប្រាក់របស់ពាណិជ្ជករឡើយ៖ «បើយើងមិនពេញចិត្តលុយរបស់ចិន យើងប្រើលុយរបស់អាមេរិកាំងទៅ បើយើងមិនពេញចិត្តលុយអាមេរិកាំងយើងប្រើលុយបាត បើយើងមិនពេញចិត្តលុយបាត យើងប្រើលុយដុង។ អាហ្នឹងជាសេរីភាព ដែលគ្មានឧបសគ្គ គួរតែយុវជនយល់ កុំឱ្យយកនិន្នាការមនោគមវិជ្ជា និងនយោបាយមកឡូកឡំ។ នេះជាប្រសិទ្ធភាព និងភាពងាយស្រួលដល់ទម្រង់ពាណិជ្ជកម្ម ចំពោះយើងធម្មតាយើងអាចប្រើអីក៏បានស្រេចតែចិត្ត»។
ប្រធានសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា នៅពេលដែលប្រទេសចិន មានឥទ្ធិពលផ្នែកសេដ្ឋកិច្ចលើកម្ពុជា ប្រទេសនេះអាចស្នើសុំប្រើប្រាស់រូបិយប័ណ្ណរបស់គេ ប៉ុន្តែចំណុចសំខាន់ តើយន្តការគ្រប់គ្រងប្រព័ន្ធរូបិយប័ណ្ណទាំងនោះ របស់រដ្ឋាភិបាលអនុវត្តបានកម្រិតណា? លោកថា រដ្ឋាភិបាលគួរគិតគូរពីផលប៉ះពាល់រូបិយប័ណ្ណជាតិ និងហានិភ័យនានា ដែលអាចនឹងប៉ះពាល់ជាយថាហេតុ៕