ប្រទេស​តំបន់​ទន្លេ​មេគង្គ​ពិភាក្សា​អំពី​ធនធាន​ថាមពល​អគ្គិសនី​នៅ​សៀមរាប

ដោយ ហង្ស សាវយុត
2013-10-24
Share
meeting-610.jpg លោក សាត សាមី រដ្ឋលេខាធិការ​ក្រសួង​ឧស្សាហកម្ម រ៉ែ និង​ថាមពល កម្ពុជា (កណ្ដាល) ជួប​ពិភាក្សា​អំពី​ថាមពល​ព្រះ​អាទិត្យ នៅ​ខេត្ត​សៀមរាប នៅ​ថ្ងៃ​ទី​២៤ តុលា ឆ្នាំ​២០១៣។
RFA/Hang Savyouth

បណ្ដា​​ប្រទេស​ទន្លេ​មេគង្គ មាន កម្ពុជា វៀតណាម ឡាវ ប្រទេស​ថៃ និង​មីយ៉ានម៉ា ឬ​ភូមា កំពុង​ពិភាក្សា​គ្នា​លើ​ប្រធានបទ​ស្ដីពី ថាមពល​ព្រះ​អាទិត្យ ក្នុង​បំណង​ស្រូប​យក​ថាមពល​នេះ​មក​ពង្រីក​​ការ​ប្រើ​ប្រាស់​នៅ​ក្នុង​តំបន់ ដើម្បី​ធានា​ដល់​និរន្តរភាព​នៃ​បរិស្ថាន ​និង​ត្រៀម​ខ្លួន​ទុក​ជា​ស្រេច​នៅ​ពេល​ណា​ដែល​ថាមពល​អគ្គិសនី​ដើរ​ដោយ​ប្រេង​ឥន្ធនៈ​អស់​​ធនធាន​ទៅ។

រដ្ឋ​លេខាធិការ​ក្រសួង​ឧស្សាហកម្ម រ៉ែ និង​ថាមពល​របស់​ប្រទេស​កម្ពុជា គឺ​លោក សាត សាមី។ លោក​បាន​មាន​ប្រសាសន៍​នៅ​ព្រឹក​​ថ្ងៃ​ព្រហស្បតិ៍ ទី​២៤ ខែ​តុលា ថា វេទិកា​នេះ​មាន​គោល​បំណង ៤​យ៉ាង​ដែល​សំខាន់ គឺ​កំណត់​​​និង​ដោះស្រាយ​បញ្ហា​នានា ដើម្បី​ផ្សព្វផ្សាយ​ឱ្យ​ទូលំទូលាយ​អំពី​ថាមពល​ពន្លឺ​ព្រះ​អាទិត្យ ដែល​ជា​ផ្នែក​មួយ​នៃ​ថាមពល​កកើត​ឡើង​វិញ។ ជាមួយ​គ្នា​នេះ បណ្ដា​ប្រទេស​​នៃ​​ទន្លេ​មេគង្គ​ទាំង​​អស់ នឹង​ចងក្រង​ប្រមូល​យក​​គម្រោង​ជា​ច្រើន​ដែល​ទាក់ទង​នឹង​ផ្នែក​ឯកជន ឬ​ក៏​អ្នក​​វិនិយោគ​ទុន​ដែល​កំពុង​មាន​នៅ​ក្នុង​តំបន់​ផង​ដែរ។

លោក សាត សាមី៖ «ហេតុ​អ្វី​បាន​យើង​ចង់​ជំរុញ​ឱ្យ​បណ្ដា​ប្រទេស​ទន្លេ​មេគង្គ គាត់​ជួយ​យើង​ផ្នែក​ជំនាញ​ថាមពល​ពន្លឺ​ព្រះ​អាទិត្យ ពីព្រោះ​ជា​ការ​ជំរុញ និង​អភិវឌ្ឍន៍​វិស័យ​ថាមពល​កកើត​ឡើង​វិញ គឺ​មាន​គោល​បំណង​ទី​១ ធំ​បំផុត ដើម្បី​បន្ថយ​ការ​ប្រើ​ប្រេង​ឥន្ធនៈ​ធំ​បំផុត​នៅ​លើ​ពិភពលោក មិន​មែន​តែ​ស្រុក​យើង​ទេ។ ដោយសារ​ប្រេង​ឥន្ធនៈ​លើ​ពិភពលោក​វា​ជា​ធនធាន​ធម្មជាតិ​មួយ ប្រើ​យូរៗ​ទៅ​ខ្លាច​អស់​ផុត។ ទន្ទឹម​នឹង​នោះ យើង​ចាប់​ផ្ដើម​ពី​ឥឡូវ​ទៅ ដើម្បី​យើង​សន្សំ ​ធនធាន​ធម្មជាតិ​ផង ហើយ​យើង​លើក​កម្ពស់​ថាមពល​ព្រះ​អាទិត្យ​ផង ដូច្នេះ​ហើយ​ឆ្នាំ​២០៥០-​២១០០ គេ​ខ្លាច​ថា​ប្រេង​វា​អស់​ទៅ វា​នឹង​ធ្វើ​ឱ្យ​បញ្ហា​ដល់​ពិភពលោក។ ឯ​ណា​ទៅ​ថាមពល​បន្ត...?»

ប្រទេស​ហ្វាំងឡង់ (Finland) គឺ​ជា​អ្នក​​​​សកម្ម​ក្នុង​ការ​ផ្ដល់​មូលនិធិ​មក​ឱ្យ​បណ្ដា​ប្រទេស​ទន្លេ​មេគង្គ​ទាំង ៥ ឱ្យ​​ផ្ដួចផ្ដើម​គម្រោង​នានា​ទៅ​លើ​ការ​ប្រើប្រាស់​ថាមពល​អគ្គិសនី ដែល​បាន​ពី​ពន្លឺ​ព្រះ​អាទិត្យ និង​ជីវឧស្ម័ន​នានា​នោះ។

ឯកអគ្គ​រដ្ឋ​ទូត​ប្រទេស​ហ្វាំងឡង់ដ៍ ប្រចាំ​ទីក្រុង​បាងកក (Bang Kok) អ្នកស្រី គ្រីស្ទី វេសផាឡិន (Cristi West Phalen) បាន​ថ្លែង​ថា ប្រទេស​ហ្វាំងឡង់ ដែល​គាំទ្រ​ឱ្យ​បណ្ដា​ប្រទេស​ទន្លេ​មេគង្គ​ចាប់​ផ្ដើម​ងាក​ទៅ​រក​ការ​ប្រើប្រាស់​ថាមពល​ពន្លឺ​ព្រះ​អាទិត្យ និង​ជីវឧស្ម័ន​ជា​ដើម​នោះ គឺ​វា​មាន​សារសំខាន់​យ៉ាង​ខ្លាំង​ក្នុង​ការ​ជួយ​ដល់​បរិស្ថាន​ឱ្យ​មាន​និរន្តរភាព ព្រម​ទាំង​អាច​ជួយ​ទប់ស្កាត់​ដល់​ការ​ប្រែប្រួល​អាកាស​ធាតុ​នៅ​លើ​ពិភពលោក​ផង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល