ក្រសួង​មហាផ្ទៃ​នឹង​ជូន​ដំណឹង​ដល់​លោក អាឡិក ឲ្យ​រៀបចំ​ខ្លួន​ចាក​ចេញ​ពី​កម្ពុជា

ដោយ ប្រាជ្ញ ចេវ
2015-02-21
អ៊ីម៉ែល
មតិ
Share
បោះពុម្ព
ស្ថាបនិក​ចលនា​មាតា​ធម្មជាតិ លោក អាឡិចហាន់ដ្រូ ហ្គន់ហ្សាឡេស ដេវិតសឹន
ស្ថាបនិក​ចលនា​មាតា​ធម្មជាតិ លោក អាឡិចហាន់ដ្រូ ហ្គន់ហ្សាឡេស ដេវិតសឹន
Photo​ courtesy of Mother Nature

មន្ត្រី​ជាន់​ខ្ពស់​ក្រសួង​មហាផ្ទៃ ឲ្យ​ដឹង​ថា អគ្គនាយកដ្ឋាន​អន្តោប្រវេសន៍​កំពុង​រៀបចំ​លិខិត​មួយ​ច្បាប់​ជូន​ដំណឹង​ទៅ លោក អាឡិក ស្ថាបនិក​អង្គការ​មាតា​ធម្មជាតិ ឲ្យ​រៀបចំ​ខ្លួន​ចាក​ចេញ​ពី​ប្រទេស​កម្ពុជា។

ទោះ លោក អាឡិក កំពុង​រស់នៅ​ប្រទេស​កម្ពុជា ក្នុង​នាម​ជា​ជន​អន្តោប្រវេសន៍​ខុស​ច្បាប់​ក្តី ប៉ុន្តែ​ក្រសួង​មិន​ទាន់​បញ្ជាក់​ថា នឹង​មាន​វិធានការ​បែប​ណា​លើ​ជន​បរទេស​រូប​នេះ​នៅ​ឡើយ​ទេ។

លិខិត​របស់​ក្រសួង​មហាផ្ទៃ ជូន​ដំណឹង​ដល់ លោក អាឡិក ឲ្យ​បាន​ដឹង​ថា គេ​កំពុង​រស់នៅ​ខុស​ច្បាប់​ក្នុង​ប្រទេស​កម្ពុជា ហើយ។ ក្នុង​ករណី​នេះ អ្នក​នាំ​ពាក្យ​ក្រសួង​មហាផ្ទៃ អះអាង​ថា នឹង​ចាប់​ផ្ដើម​ផាក​ពិន័យ​ជា​ប្រាក់​ចំពោះ​ការ​រស់នៅ​ខុស​ច្បាប់​នេះ​ដាក់​ចូល​ក្នុង​ថវិកា​ជាតិ។

អ្នក​នាំ​ពាក្យ​ក្រសួង​មហាផ្ទៃ លោក​នាយ​ឧត្តមសេនីយ៍ ខៀវ សុភ័គ ថ្លែង​ឲ្យ​ដឹង​នៅ​ថ្ងៃ​ទី​២១ កុម្ភៈ ថា នៅ​ពេល​នេះ​អគ្គនាយកដ្ឋាន​អន្តោប្រវេសន៍ កំពុង​ព្រាង​លិខិត​មួយ​ច្បាប់​ជូន​ដំណឹង​ឲ្យ លោក អាឡិក បាន​ដឹង​ថា ពេល​នេះ​គាត់​កំពុង​រស់នៅ​ក្នុង​ប្រទេស​កម្ពុជា ខុស​ច្បាប់​ហើយ។ លោក​បន្ត​ថា លិខិត​ធ្វើ​រួច ក្រសួង​នឹង​ផ្ញើ​ចេញ​ភ្លាមៗ៖ «ប្រសិន​គ្មាន​ការ​ប្រែប្រួល​ទេ នាយកដ្ឋាន​អន្តោប្រវេសន៍​នឹង​ផ្ញើ​លិខិត​ជូន លោក អាឡិក ដើម្បី​ឲ្យ​រៀបចំ​ខ្លួន»

ក្រសួង​មហាផ្ទៃ បាន​លើក​ឡើង​ថា លោក អាឡិក បាន​ប្រព្រឹត្ត​ខុស​នឹង​លក្ខន្តិកៈ​របស់​អង្គការ​មាតា​ធម្មជាតិ ដែល​តម្កល់​ទុក​ក្នុង​ក្រសួង​មហាផ្ទៃ ដោយ​ញុះញង់​ប្រជាពលរដ្ឋ​បិទ​ផ្លូវ​សាធារណៈ និង​មិន​ឲ្យ​ក្រុម​ការងារ​របស់​អាជ្ញាធរ​ចុះ​ជួប​ប្រជាពលរដ្ឋ ក្នុង​ស្រុក​ថ្មបាំង ខេត្ត​កោះកុង។ ទិដ្ឋាការ​ស្នាក់នៅ​កម្ពុជា របស់​លោក​បាន​ផុត​កំណត់​កាល​ពី​ថ្ងៃ​ទី​២០ ខែ​កុម្ភៈ។

លោក ខៀវ សុភ័គ បញ្ជាក់​ថា ចំណាត់​ការ​របស់​ក្រសួង​មហាផ្ទៃ នៅ​ពេល​នេះ គឺ​ក្រសួង​មាន​ការ​យោគយល់​ច្រើន​ចំពោះ​អ្នក​ការពារ​ធនធាន​ធម្មជាតិ​រូប​នេះ ហើយ​លោក​ក៏​មិន​ទាន់​បញ្ជាក់​ឲ្យ​ដឹង​ថា ក្រសួង​នឹង​មាន​ចំណាត់​ការ​យ៉ាង​ណា​ចំពោះ លោក អាឡិក ដែរ។ ទោះ​បែប​នេះ​ក្តី លោក ខៀវ សុភ័គ ធ្លាប់​ថ្លែង​ប្រាប់​វិទ្យុ​អាស៊ីសេរី ថា អាជ្ញាធរ​មាន​សមត្ថកិច្ច មិន​មែន​សំពះ​អង្វរ​សុំ​ឲ្យ អាឡិក ចាក​ចេញ​ពី​ប្រទេស​កម្ពុជា នោះ​ទេ។

ទន្ទឹម​នឹង​ការ​ប្រកាស​ចំណាត់​ការ​របស់​ក្រសួង​មហាផ្ទៃ ដូច​នេះ លោក អ៊ូ វីរៈ  ប្រធាន​អង្គការ​វេទិកា​អនាគត និយាយ​ថា ក្រសួង​ធ្វើ​ដូច​នេះ​មិន​ខុស​ច្បាប់​ទេ។ ប៉ុន្តែ​ក្រសួង​មហាផ្ទៃ មិន​គួរ​ធ្វើ​ទង្វើ​បែប​នេះ​ឡើយ។ លោក អ៊ូ វីរៈ យល់​ថា សកម្មភាព​ការងារ​របស់ លោក អាឡិក កន្លង​មក មិន​សម​អាជ្ញាធរ​ខ្មែរ​បណ្ដេញ​លោក​ចេញ​ពី​ប្រទេស​ឡើយ ទោះ​ក្នុង​រូបភាព​ផុត​ទិដ្ឋាការ​ក៏ដោយ៖ «តាម​ខ្ញុំ​យល់ កំហុស លោក អាឡិក មិន​ទាន់​ដល់​ថ្នាក់​ត្រូវ​បណ្ដេញ​ចេញ​ពី​កម្ពុជា ទេ ទោះ​ក្នុង​រូបភាព​ណា​ទេ»

សំណុំ​រឿង​ជន​បរទេស​ការពារ​បរិស្ថាន​ប្រទេស​កម្ពុជា នេះ បាន​ឡើង​ដល់​ប្រធាន​រដ្ឋសភា និង​ស្ថាប័ន​ព្រះមហាក្សត្រ​ហើយ ដោយ​អនុប្រធាន​ទី​១​រដ្ឋសភា និង​ជា​អនុប្រធាន​គណបក្ស​សង្គ្រោះ​ជាតិ លោក កឹម សុខា បាន​ថ្វាយ​លិខិត​មួយ​ច្បាប់​ទៅ​ព្រះមហាក្សត្រ សុំ​ព្រះរាជ​អន្តរាគមន៍​អនុញ្ញាត​ឲ្យ លោក អាឡិក បន្ត​រស់នៅ​ប្រទេស​កម្ពុជា បាន​ស្រប​ច្បាប់។ គិត​មក​ទល់​ថ្ងៃ​សៅរ៍ ទី​២១ ខែ​កុម្ភៈ លោក កឹម សុខា ឲ្យ​ដឹង​ថា លោក​មិន​ទាន់​ទទួល​បាន​ការ​ឆ្លើយ​តប​នៅ​ឡើយ​ទេ។

លោក អាឡិកហ្សង់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ស្ថាបនិក​អង្គការ​មាតា​ធម្មជាតិ ឲ្យ​ដឹង​ថា លោក​មិន​ទាន់​ទទួល​បាន​លិខិត​ពី​ក្រសួង​មហាផ្ទៃ បញ្ជាក់​ពី​ការ​ជូន​ដំណឹង​នេះ​នៅ​ឡើយ​ទេ។ អ្នក​ការពារ​ធនធាន​ធម្មជាតិ​រូប​នេះ នៅ​តែ​អះអាង​ថា លោក​មិន​ចាក​ចេញ​ពី​ប្រទេស​កម្ពុជា ទេ ព្រោះ​លោក​រង់ចាំ​ការ​លិខិត​ឆ្លើយ​ពី​ព្រះមហាក្សត្រ និង​ប្រធាន​រដ្ឋសភា ឆ្លើយ​តប​នឹង​លិខិត​របស់ លោក កឹម សុខា សិន៖ «ជំហរ​របស់​ខ្ញុំ គឺ​មិន​ចាក​ចេញ​ពី​ប្រទេស​កម្ពុជា ទេ»

លោក អាឡិក សញ្ជាតិ​អេស្ប៉ាញ ដែល​មក​រស់នៅ​ប្រទេស​កម្ពុជា ជាង ១២​ឆ្នាំ​មក​ហើយ ជា​អ្នក​ដែល​ហ៊ាន​បញ្ចេញ​សកម្មភាព​ខ្លាំងៗ​ប្រឆាំង​នឹង​ការ​អភិវឌ្ឍ​នៅ​តំបន់​អារ៉ែង ឲ្យ​ទៅ​ជា​តំបន់​វារីអគ្គិសនី​របស់​ក្រុមហ៊ុន​ចិន ឈ្មោះ ស៊ីណូ ហាយដ្រូ (Sino Hydro)។ លោក អាឡិក ថា លោក​នឹង​បង់​ប្រាក់​ពិន័យ​នៃ​ការ​រស់នៅ​ផុត​ទិដ្ឋាការ​ជូន​ទៅ​រដ្ឋ ដើម្បី​បន្ត​រស់នៅ​ប្រទេស​កម្ពុជា ដរាប​ណា​សមត្ថកិច្ច​មិន​ប្រើ​ហិង្សា​បញ្ជូន​លោក​ចេញ​ពី​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (12)
Share

អ្នក​អាន​អនាមិក

មើ៎ក្ទបប៉្មានក្បាលពេញស្រុកខ្មែរវ៉ី! ម៉េចចេញកាតឲ្យហ្វូងចោរព្រៃស្រួលម៉េះវ៉ី!

Feb 23, 2015 04:27 AM

អ្នក​អាន​អនាមិក

Alejandro! Your great achievement and dedication for humanity are well recognized and appreciated by the people of Cambodia, as well as international communities. You have been part of Cambodia long enough to learn to ignore these headless chickens that seem a bit lost and are infected by a number of incurable diseases with disastrous impact on innocent citizens.

Feb 23, 2015 01:02 AM

អ្នក​អាន​អនាមិក

សូមសួរទៅរដ្ឋាភិបាលថា តើច្បាប់អន្តោប្រវេសន៍កម្ពុជាអនុវត្តសំរាប់​ជនជាតិណា? ហេតុអ្វីបានជារដ្ឋាភិបាល លោក ហ៊ុនសែន កើត ទុកមិនសុខចិត្តតែជាមួយអ្នកដែលគិតគូរពីប្រយោជន៍ខ្មែរ ហើយ ធ្វើមិនដឹងមិនឭជាមួយជនជាត់យួនដែលកំពុងរៀបផែនការលេបទឹក ដីខ្មែរ ឧទាហរណ៍ ដូចជានៅកំពូលភ្នំបូកគោជាដើម

Feb 22, 2015 09:03 PM

អ្នក​អាន​អនាមិក

ខំរៀបចំឯកសារបណ្តេញអ្នកថែរក្សាការពារព្រៃឈើ មមាញឹកខ្លាំងហើយមើលទៅ ត្រៀមឡានដឹកឈើហើយរឺនៅ បើតាមតែដឹងអ្នកទាំងហ្នឹងធ្វើអ្វីរៀបចំម្មតចត់់ណាស់ អាមនសិការពាលព្យាយាមទៅអស់លោកប្រទេសខ្មែរជិតរលាយដោយសារអស់លោកអំណាចកំពស់ចុងត្នោតរបស់ពួកអ្នកឯងហ្នឹងហើយ។ពូកែរកលែស ពូកែចោទ ពូកែ.............។ល។

Feb 22, 2015 08:37 AM

អ្នក​អាន​អនាមិក

យើងខ្ញុំទាំងអស់គ្នាពិតជាចង់អោយលោកអេឡិចរស់នៅប្រទេសកម្ពុជាជារឿងរហូត។​ប៉ុន្តែបើពពួកមន្រ្តីគ្មានមនសិការបណ្តេញយ៉ាងនេះ​ជៀសពុំរួចដូចនេះគឺមិនអាចរារាំងចំពោះពពួកនោះបានឡើយ ពីព្រោះបើគេចង់អោយរស់នៅ មន្រ្តីគ្រប់ថានៈដល់កំពូលចុងត្នោតទាំងអស់នោះនឹងខិតខំជួយជ្រំជ្រែងលោកអេឡិចហើយ។ធ្វើដូចមេ្តចបើគេកំពុងស្រវឹងអំណាចយ៉ាងនេះ ប្រហែលពួកគេទាំងអស់នោះគិតថាមិនងាប់ទេមើលទៅ?បានជាមិនគិតពីផលលំបាករបស់មនុស្សជំនាន់ក្រោយទាល់តែសោះ លោកអាឡិចគិតថា៖ មនុស្សពាលបានអាចរស់នៅជាមួយពាលដូចគ្នាបាន។ដូច្នេះលោកអេឡិចមិនដូចគេធ្វើម្តេចនឹងបានរស់នៅសុខ តែទោះជាយ៉ាងណាសូមអរគុណលោកអេឡិចយ៉ាងខ្លាំង នូវការងារការពារតំបន់អារ៉ែងដែលមិនមែនជាប្រទេសរបស់ខ្លួនផងខិតខំយ៉ាងនេះពិតជាសាកសមជាមាតាធម្មជាតិណាស់​ ប្រសើរជាងមនុស្សមួយចំនួនសំលឹងឃើញតែលុយ និង​​ អំណាចជាធំមិនចេះខ្មាស់គេ ខ្លួនឯងជាខ្មែរសោះបែរជាមិនថែរក្សាចង់តែបំផ្លាញ តើទាល់តែងាប់អាចចេះភ្ញាក់ខ្លួនខ្លះរឺក៏អត់សោះនោះ?បើនាំគ្នាសក់ស្កូវអស់ហើយហ្នឹង (សក់ខ្មៅលាបពណ៌សោះហ្នឹង)។បើគេអោយអាឡិចទៅក៏ទៅតាមគេ កុំអោយគេរវល់ច្រើនរាល់ថ្ងៃនេះគេខិតខំរៀបចំយ៉ាងហ្នឹង ប្រយត្ន័ពួកគេឆាប់ងាប់ដោយសារលោក។ប្រយត្ន័អ្នកទាំងអស់នោះស្លាប់ គេចោទអាឡិចថាជាអ្នកសម្លាប់ ដោយសារខំរៀបចំឯកសារអោយចេញអត់ចេញ។ជូនពរលោកអេឡិចជួបតែសំណាងល្អ​ ៖បើយើងជាមនុស្សល្អ ទោះដល់ទីណាក៏ជួបតែមនុស្សល្អ មានគេគោរពចំពោះគុណធម៌ និងមនសិការ ទោះគ្មានទ្រព្យសម្បត្តិ និងអំណាចក៏ដោយហើយចងចាំជាប់ក្នុងចិត្តរបស់ពលរដ្ឋជានិច្ច។បើយើងមានតែអំណាច ប្រើ់តែអំណាចអ្នកនៅជិតខ្លួនយើងសុទ្ធតែមនុស្សដែលអែបអប និងខ្លាចតែអំណាច គោរពតែអំណាច ដល់ពេលអស់អំណាច គឺមិនស្មើហ្នឹងព្រះសង្ឃមួយព្រះអង្គផង។
សូមអរគុណដល់បុគ្គលិកគ្រប់ផ្នែករបស់វិទ្យុអាស៊ីសេរីដែលផ្សព្វផ្សាយពត៌មានក្នុងសង្គមជាក់ស្តែង ជាគុណធម៌ក្នុងការចែករំលែកពត៌មាន ប្រជាពលរដ្ឋកម្ពុជា បើគ្មានអាស៊ីសេរីខ្ញុំប្រហែលលឺតែភាពសរសើរ និងពត៌មានគ្រោះថ្នាក់ចរាចរទេ ឥឡូវខ្ញុំមិនចង់មើលទូរទស្សន៍ទេ ពេលមើលទៅដដែលៗដូចខ្ញុំបានសរសេរខាងលើអញ្ចឹង។សូមអ្នកបុគ្គលិកទាំងអស់ជួបតែសំណាងល្អ សុខភាពល្អគ្រប់គ្នាជារៀងរហូត

Feb 22, 2015 08:18 AM

មើល​មតិ​ទាំង​អស់.

គេហទំព័រ​ទាំងមូល