តំណាងរាស្ត្របក្សប្រឆាំងគ្រោងស្នើសុំសភាសិង្ហបុរីឲ្យផ្ដល់ឯកសារពាក់ព័ន្ធនឹងពាណិជ្ជកម្មខ្សាច់
2017.04.02
សាឡង់បូមខ្សាច់របស់ក្រុមហ៊ុន អេ.អេស.ខេ.អ៊ិល (ASKL) នៅតាមចំណុចព្រែក៣ ឃុំទំនប់រលក ស្រុកស្ទឹងហាវ ខេត្តព្រះសីហនុ កាលពីថ្ងៃទី៨ ខែកុម្ភៈ ឆ្នាំ២០១៧។
RFA/Den Ayuthyea
បញ្ហាចម្រូងចម្រាសនៃការនាំចេញខ្សាច់ទៅបរទេស បានវិវឌ្ឍន៍ដល់ដំណាក់កាលថ្មីមួយទៀតហើយ។ ក្រុមតំណាងរាស្ត្រគណបក្សសង្គ្រោះជាតិ គ្រោងផ្ញើលិខិតទៅសភាជាតិសិង្ហបុរី នៅពេលឆាប់ៗខាងមុខ ដើម្បីដាក់សម្ពាធលើរដ្ឋាភិបាលសិង្ហបុរី ឲ្យផ្តល់ព័ត៌មានលម្អិត និងឯកសារផ្លូវការនានាពាក់ព័ន្ធនឹងការនាំចូលខ្សាច់ពីកម្ពុជា ដែលពួកគេ និងអង្គការសង្គមស៊ីវិលផ្នែកបរិស្ថានសង្ស័យថា មានការប្រព្រឹត្តអំពើពុករលួយដ៏ធំ ដែលធ្វើឲ្យកម្ពុជា ខាតបង់ទឹកប្រាក់រាប់រយលានដុល្លារពីវិស័យមួយនេះ។
ប្រធានក្រុមសមាជិកសភាគណបក្សសង្គ្រោះជាតិ លោក សុន ឆ័យ បញ្ជាក់ប្រាប់អាស៊ីសេរី នៅថ្ងៃទី២ ខែមេសា ថា ពួកលោកនឹងស្វះស្វែងរកអន្តរាគមន៍ពីរដ្ឋសភាសិង្ហបុរី ក្នុងការជំរុញឲ្យរដ្ឋាភិបាលប្រទេសមួយនេះឲ្យផ្តល់ឯកសារផ្លូវការទាំងឡាយ ពាក់ព័ន្ធនឹងពាណិជ្ជកម្មខ្សាច់រវាងប្រទេសសិង្ហបុរី និងកម្ពុជា។
គម្រោងរបស់តំណាងរាស្ត្រគណបក្សសង្គ្រោះជាតិ នេះ ធ្វើឡើងបន្ទាប់ពីរដ្ឋាភិបាលសិង្ហបុរី តាមរយៈស្ថានទូតសិង្ហបុរី ប្រចាំក្រុងភ្នំពេញ បដិសេធសំណើរបស់ក្រុមតំណាងរាស្ត្រកម្ពុជា ពីខាងគណបក្សប្រឆាំងដែលស្នើសុំឯកសារផ្លូវការនានាពាក់ព័ន្ធនឹងការទិញខ្សាច់ពីកម្ពុជា៖ «យើងនឹងទាក់ទងទៅខាងរដ្ឋសភាម្តង ព្រោះខ្ញុំធ្លាប់បានជួបម្តងរួចមកហើយជាមួយអនុប្រធានសភាសិង្ហបុរី ហើយខ្ញុំនឹងរកពេលជួបទៀតក្នុងឱកាសណាមួយ ដើម្បីសុំឲ្យខាងសភាហ្នឹងសួរដេញដោល ឬក៏ជំរុញឲ្យរដ្ឋាភិបាល (សិង្ហបុរី) ជួយផ្តល់ឯកសារ»។
លោក សុន ឆ័យ បញ្ជាក់ថា លោកបានជួបជាមួយលេខាទីមួយនៃស្ថានទូតសិង្ហបុរី ប្រចាំកម្ពុជា កាលពីថ្ងៃទី២៨ មីនា កន្លងទៅ ដើម្បីជជែកអំពីសំណើនោះ។ លោកថា ខាងស្ថានទូតសិង្ហបុរី បញ្ជាក់ថា ពួកគេមិនអាចផ្តល់ឯកសារទាំងនោះបានឡើយ ព្រោះកុំឲ្យប៉ះពាល់ដល់ពាណិជ្ជកម្មខ្សាច់របស់ខ្លួន។ ទោះជាយ៉ាងណា លោកថា ខាងស្ថានទូតសិង្ហបុរី អះអាងថា តួលេខ និងតម្លៃខ្សាច់ដែលសិង្ហបុរី ទិញពីកម្ពុជា និងត្រូវបានផ្សព្វផ្សាយជាសាធារណៈនៅលើគេហទំព័រពាណិជ្ជកម្មរបស់អង្គការសហប្រជាជាតិ (UN Comtrade) នោះ គឺជាតួលេខ និងតម្លៃដែលត្រឹមត្រូវ។ ប៉ុន្តែមន្ត្រីស្ថានទូតសិង្ហបុរី រូបនោះមិនធ្វើអត្ថាធិប្បាយចំពោះទិន្នន័យដែលកម្ពុជា នាំចេញទៅសិង្ហបុរី នោះទេ។
អាស៊ីសេរី មិនទាន់អាចទាក់ទងស្ថានទូតសិង្ហបុរី ប្រចាំកម្ពុជា បានទេនៅថ្ងៃទី២ មេសា ដើម្បីសុំការបកស្រាយបន្ថែមអំពីរឿងនេះ។
កាលពីថ្ងៃទី៧ ខែមីនា កន្លងទៅ ក្រុមតំណាងរាស្ត្រគណបក្សសង្គ្រោះជាតិ តាមរយៈស្ថានទូតសិង្ហបុរី ប្រចាំកម្ពុជា បានផ្ញើលិខិតមួយច្បាប់ទៅក្រសួងអភិវឌ្ឍន៍ជាតិ និងអាជ្ញាធរពាក់ព័ន្ធរបស់សិង្ហបុរី ស្នើសុំព័ត៌មានលម្អិតអំពីចំនួនកប៉ាល់ដឹកខ្សាច់ពីកម្ពុជា ទៅសិង្ហបុរី ដែលរួមបញ្ចូលកាលបរិច្ឆេទដែលដឹកទៅដល់សិង្ហបុរី ឈ្មោះកប៉ាល់ ចំណុះ និងតម្លៃខ្សាច់ ឈ្មោះក្រុមហ៊ុនដឹកជញ្ជូន និងក្រុមហ៊ុនពាក់ព័ន្ធក្នុងដំណើរការផ្គត់ផ្គង់ខ្សាច់នេះ។ ក្រុមតំណាងរាស្ត្រគណបក្សសង្គ្រោះជាតិ ក៏ស្នើសុំឯកសារផ្លូវការពាក់ព័ន្ធនានា ដែលចេញដោយភ្នាក់ងាររបស់រដ្ឋាភិបាលកម្ពុជា ដូចជាអាជ្ញាប័ណ្ណនាំចេញ បញ្ជីទំនិញ និងវិក្កយបត្រដឹកជញ្ជូន ជាដើម។ ក្រៅពីនេះ ពួកគេក៏ស្នើសុំតួលេខសរុបនៃបរិមាណខ្សាច់ដែលសិង្ហបុរី នាំចូលពីកម្ពុជា ផងដែរ។
រាល់ព័ត៌មាន តួលេខ និងទិន្នន័យទាំងអស់ដែលក្រុមតំណាងរាស្ត្រគណបក្សសង្គ្រោះជាតិ ស្នើសុំនេះ គឺជាពាណិជ្ជកម្មខ្សាច់រវាងសិង្ហបុរី និងកម្ពុជា ចន្លោះពីឆ្នាំ២០០៧ ដល់ចុងឆ្នាំ២០១៦។
លោក សុន ឆ័យ បញ្ជាក់ថា សំណើទៅរដ្ឋាភិបាលសិង្ហបុរី នេះ គឺជាផ្នែកមួយនៃការស៊ើបអង្កេតជុំវិញភាពមិនប្រក្រតីនៃការនាំចេញខ្សាច់ពីកម្ពុជា ទៅសិង្ហបុរី៖ «ការដែលបាត់ថវិកាជាតិនេះ ត្រូវតែរកដើមចមឲ្យឃើញ។ ការឆ្លើយរបស់មន្ត្រីក្រសួងរ៉ែ និងថាមពល ម្តងថាមកពីមានកប៉ាល់បរទេសដោតទង់ជាតិខ្មែរមួយចំនួនអាចមកពីទីណាដទៃ ការឆ្លើយបែបនេះ គឺជាការឆ្លើយយករួចខ្លួន ដូច្នេះហើយបានជាខ្ញុំចង់បានការបញ្ជាក់ឡើងវិញពីខាងរដ្ឋាភិបាលសិង្ហបុរី»។
ទាក់ទងនឹងការស្នើសុំឯកសារពីសិង្ហបុរី នេះ អ្នកនាំពាក្យក្រសួងរ៉ែ និងថាមពល លោក ឌិត ទីណា យល់ឃើញថា វាជាសិទ្ធិរបស់ក្រុមតំណាងរាស្ត្រគណបក្សសង្គ្រោះជាតិ។ លោកគិតថា វាជារឿងនយោបាយច្រើនជាង ពីព្រោះក្រសួងរ៉ែ និងថាមពល ធ្លាប់បានបកស្រាយជាច្រើនលើកច្រើនសាមកហើយអំពីការនាំចេញខ្សាច់ទៅបរទេស ពិសេសទៅសិង្ហបុរី៖ «រឿងចប់ម្តងជាពីរដង ប៉ុន្តែគាត់ព្យាយាមយករឿងនេះមកបន្ថែម មករុញឲ្យទៅជារឿងមិនប្រក្រតីនៅពេលដែលយើងពន្យល់ថា អ្វីៗសុទ្ធតែប្រក្រតីអស់ហើយ ប្រហែលជាបរិបទជិតបោះឆ្នោតហើយដែលជំរុញឲ្យគាត់ធ្វើការងារនេះច្រើនជាង»។
ភាពចម្រូងចម្រាសនៃការនាំខ្សាច់ចេញទៅប្រទេសសិង្ហបុរី នេះ បានផ្ទុះឡើងក្រោយពេលទិន្នន័យពាណិជ្ជកម្មរបស់អង្គការសហប្រជាជាតិ បង្ហាញថា សិង្ហបុរី នាំចូលខ្សាច់ពីកម្ពុជា ជាង ៧៣លានតោន ដែលគិតជាទឹកប្រាក់ប្រមាណ ៧៥២លានដុល្លារអាមេរិក (៧៥២.៧៦១.៩៧៨ដុល្លារ) ក្នុងរយៈពេល ៨ឆ្នាំ ពីឆ្នាំ២០០៧ ដល់ឆ្នាំ២០១៥ ប៉ុន្តែទិន្នន័យដដែលនេះបង្ហាញថា កម្ពុជា នាំចេញខ្សាច់ទៅប្រទេសសិង្ហបុរី តែជិត ៣លានតោន (២.៧៧៤.៦១៣តោន) ប៉ុណ្ណោះ ដែលគិតជាទឹកប្រាក់ជាង ៥លានដុល្លារអាមេរិក (៥.៥៥៧.៣៦៩ដុល្លារ) ក្នុងរយៈពេលដូចគ្នានេះ។
ក្រោយផ្ទុះរឿងអាស្រូវដ៏រសើបនេះ រដ្ឋាភិបាលបានសម្រេចផ្អាកការនាំចេញខ្សាច់ទៅក្រៅប្រទេសនៅខែវិច្ឆិកា ឆ្នាំ២០១៦ ចំណែកឯសិង្ហបុរី ក៏ប្រកាសឈប់ទិញខ្សាច់ពីកម្ពុជា ដែរ។ រហូតមកទល់នឹងពេលនេះ រដ្ឋាភិបាលកម្ពុជា មិនទាន់កំណត់ពេលវេលាជាក់លាក់នៃការនាំចេញខ្សាច់ទៅបរទេសសាជាថ្មីវិញនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ