"កម្ពុជា​រំលោភ​អនុសញ្ញា​អង្គការ​សហប្រជាជាតិ​ស្ដីពី​ការ​នាំចេញ​ឈើ​ប្រណីត"

ដោយ សាន សែល
2016-06-24
អ៊ីម៉ែល
មតិ
Share
បោះពុម្ព
២៣-ឧសភា-២០១៦៖ រថយន្ត​ធំ ឬ​ហៅ​ថា​រថយន្ត​យីឌុប​ដឹក​ឈើ​ប្រណិត​ដែល​កម្លាំង​អាវុធហត្ថ​បាន​ឃាត់​ទុក​ក្នុង​បន្ទាយ​អាវុធហត្ថ​ខេត្ត​ក្រចេះ។ Photo Provided
២៣-ឧសភា-២០១៦៖ រថយន្ត​ធំ ឬ​ហៅ​ថា​រថយន្ត​យីឌុប​ដឹក​ឈើ​ប្រណិត​ដែល​កម្លាំង​អាវុធហត្ថ​បាន​ឃាត់​ទុក​ក្នុង​បន្ទាយ​អាវុធហត្ថ​ខេត្ត​ក្រចេះ។ Photo Provided
Photo Provided

របាយការណ៍អន្តរជាតិមួយ​ទើប​ចេញផ្សាយ បង្ហាញថា អំពើ​ពុករលួយ និង​បទឧក្រិដ្ឋ ជា​កត្តា​នាំ​ឲ្យ​មាន​ការ​នាំចេញ​ឈើ​ប្រណីត​ជិត​ផុត​ពូជ ពី​ប្រទេស​កម្ពុជា។ ការ​នាំចេញ​ឈើ​ប្រណីត​ជិត​ផុត​ពូជនេះ បាន​រំលោភ​លើ​យុទ្ធការ​ការពារ​របស់​អង្គការ​សហប្រជាជាតិ ស្ដី​ពាណិជ្ជកម្ម​អន្តរជាតិ អម្បូរ​ធនធាន​ជិត​ផុត​ពូជ (CITES)។

របាយការណ៍​មាន​ចំណងជើង​ថា​កណ្ដឹង​ក្រហម (Red Alert) របស់​ទីភ្នាក់ងារ​ស៊ើបអង្កេត​បរិស្ថានអន្ដរជាតិ (EIA) បង្ហើប​ឲ្យ​ដឹង​ថា ប្រទេស​កម្ពុជា បាន​ចេញ​លិខិត​អនុញ្ញាត​​ដោយ​មិន​ត្រឹមត្រូវ ឬ​ខុសច្បាប់ ដោយ​បំពាន​លើ​អនុសញ្ញា​ពាណិជ្ជកម្ម​អន្តរជាតិ ស្តីពីអម្បូរ​ធនធាន​ជិត​ផុត​ពូជ (CITES) ដើម្បី​នាំចេញ​ឈើប្រណិត​ ចំនួន​ប្រមាណ​ជាង​១​ម៉ឺន២ពាន់​ម៉ែត្រ​គូប ((12 202m3​) ក្នុង​រយៈពេល​ចន្លោះ​ពី​ខែ​មិថុនា ឆ្នាំ​២០១៣ ដល់​ខែ​ធ្នូ​ ឆ្នាំ​២០១៤។

របាយការណ៍​នេះ ក៏​រាប់​បញ្ជូល​ប្រទេស​ក្បែរ​កម្ពុជា គឺ​ប្រទេស​ឡាវ​ចូល​ផង​ដែរ។ ស្ថានភាព​ប្រទេសឡាវ កាន់​តែ​អាក្រក់​ និង​ធ្ងន់ធ្ងរ​ ដោយ​ក្នុង​ឆ្នាំ​២០១៣​ និង​២០១៤ ឡាវ​បាន​នាំចេញ​ឈើ​ប្រណីត​ជិត​៦ម៉ឺន​៤ពាន់​ម៉ែត្រ​គូប (63,530 m3)។

ឈើ​ប្រណីត​ដែល​ប្រទេស​ឡាវ​នាំ​ចេញ ត្រូវ​គេ​កាប់​មក​ពី​តំបន់​លាង​បាត​អាង​សំណង់​ទំនប់​វារី​អគ្គីសនី ហើយ​ឈើប្រណិត​ខ្លះ​ទៀត ត្រូវ​គេ​យក​ពីតំបន់​ផ្សេង តែ​យក​ដាក់​បន្លំ​ជា​ឈើ​លាង​បាត​អាង។

ការ​នាំ​ចេញ​នេះ កើតឡើង​ខណៈ​តម្រូវ​ការ​ផ្នែក​គ្រឿងសង្ហារឹម​ឈើ​ប្រណីត​នៅ​ប្រទេស​ចិន​ កើនឡើង ដែល​របាយការណ៍​នេះ​បាន​ហៅ ការ​វិវត្តន៍​នេះ​ថា ជា​គ្រោះថ្នាក់​ដល់​ប្រភេទឈើ​ប្រណីត​ដែល​កំពុង​ហិនហោច។ ឈើប្រណិត​ដែល​ហៀប​នឹង​ផុតពូជ​ទាំង​នេះ ត្រូវ​បាន​ការពារ​ដោយអនុសញ្ញា​​ពាណិជ្ជកម្ម​អន្តរជាតិ ស្តីពីអម្បូរធនធាន​ជិត​ផុត​ពូជ (CITES) ដែល​ប្រទេស​កម្ពុជាបាន​ចុះ​ហត្ថលេខាទទួលស្គាល់ នៅ​ថ្ងៃ​ទី​៤ ខែ​កក្កដា ឆ្នាំ​១៩៩៧

អនុសញ្ញា​នេះ​ចែងថា ការ​ធ្វើ​ពាណិជ្ជកម្ម​អន្តរជាតិ​លើ​អម្បូរធនធាន​ជិត​ផុត​ពូជ​​បាន​ លុះត្រាតែ​ផលិតផល​នោះ​ត្រូវ​បាន​អនុញ្ញាត​ជា​ផ្លូវការ តាម​រយៈ​លិខិត​នាំចេញ ឬ​លិខិត​នាំចេញ​ឡើងវិញ ឬ​មួយ​ក៏​អាជ្ញាធរ​ពាក់ព័ន្ធ ពិនិត្យ​ឃើញ​ថា ការ​ជួញដូរ​ប្រភេទ​នេះ នឹង​មិន​ប៉ះពាល់​ដល់​ការ​វិនាស ​នៃ​ធនធាន​ព្រៃ​ជិតផុតពូជ ហើយ​ឈើ​ដែល​នាំចេញ​នោះ គឺ​ត្រឹមត្រូវ​តាម​ច្បាប់។

ទីភ្នាក់ងារ​ស៊ើបអង្កេតបរិស្ថាន​អន្ដរជាតិ (EIA) ដែល​ជា​អ្នកផលិត​របាយការណ៍ អំពាវនាវ​ឲ្យ​ភាគី​ដែល​ពាក់ព័ន្ធ បញ្ឈប់​ជា​បន្ទាន់​រាល់​ការ​ជួញដូរ​ឈើប្រណិត​ ពី​ប្រទេស​កម្ពុជា និង​ឡាវ រហូត​ដល់​មាន​ការ​ធានា​ថា រាល់​ឈើ​ដែល​នាំ​ចេញ មិន​ប៉ះពាល់​ដល់​ការ​វិនាស​ហិចហោច​ដល់​ព្រៃឈើ និង​ធានា​ថា​ជា​ឈើ​ស្របច្បាប់។

រថយន្ត​ដឹក​ឈើ​បម្រុង​ឆ្លង​ដែន​ទៅ​វៀតណាម ក្រឡាប់​នៅ​ឃុំ​ទ្រៀក ក្បែរ​ច្រក​ព្រំដែន​ដូនរ័ត្ន ក្នុង​ស្រុក​មេមត់ ខេត្ត​ត្បូងឃ្មុំ កាល​ពី​ថ្ងៃ​ទី​២៧ វិច្ឆិកា ឆ្នាំ​២០១៥។ RFA/Saut Sokprathna
រថយន្ត​ដឹក​ឈើ​បម្រុង​ឆ្លង​ដែន​ទៅ​វៀតណាម ក្រឡាប់​នៅ​ឃុំ​ទ្រៀក ក្បែរ​ច្រក​ព្រំដែន​ដូនរ័ត្ន ក្នុង​ស្រុក​មេមត់ ខេត្ត​ត្បូងឃ្មុំ កាល​ពី​ថ្ងៃ​ទី​២៧ វិច្ឆិកា ឆ្នាំ​២០១៥។ RFA/Saut Sokprathna RFA/Saut Sokprathna

មន្ត្រី​ជាន់ខ្ពស់​ផ្នែក​យុទ្ធនាការ​ព្រៃឈើ ​នៃ​ទីភ្នាក់ងារ​ស៊ើបអង្កេត​បរិស្ថាន​អន្ដរជាតិ (EIA) លោក ចាហ្គូ វ៉ាដ្លី (Jago Wadley) បញ្ជាក់ថា ភស្តុតាង ឬ​សុចនាករ​ទាំងឡាយ បង្ហាញ​ថា វប្បធម៌​អភិបាល​កិច្ច​ល្អ និងនីតិរដ្ឋ ត្រូវ​បាន​ជំនួស​ដោយ​អំពើឧក្រិដ្ឋ​ ដែល​មាន​រដ្ឋាភិបាល​នៅ​ពី​ក្រោយ​ខ្នង គឺ​ពី​ក្រសួង​សំខាន់ៗ​ដែល​មាន​ឥទ្ធិពល​ក្នុង​ការ​អនុវត្ត​អនុសញ្ញា​របស់​អង្គការ​សហប្រជាជាតិ ដូចជា​អនុសញ្ញា​ពាណិជ្ជកម្ម​អន្តរជាតិ អម្បូរធនធាន​ជិត​ផុត​ពូជ (CITES) នេះ ជាដើម។

ក្រសួង​កសិកម្ម ដែល​ជា​ក្រសួង​មួយ​ដែល​ទទួល​ភារៈ​អនុវត្ត​អនុសញ្ញា​នេះ មិនអាចទាក់ទង​បាន​ទេនៅ​ល្ងាច​ថ្ងៃ​ទី​២៤ ខែ​មិថុនា។

ទោះបីជាយ៉ាងណា អ្នកនាំពាក្យ​ក្រសួង​បរិស្ថាន លោក សៅ សុភាព ច្រានចោល​រាល់​ការ​ចោល​របាយការណ៍​របស់EIA​នេះ។ លោក​ថា ក្រសួង​បរិស្ថាន​ ធ្វើ​ការងារ​យ៉ាង​សកម្ម​លើ​ការងារ​អភិរក្ស​ព្រៃឈើ ទាំង​ឈើ​ប្រណីត​ផង«រដ្ឋាភិបាល​ បាន​កាត់បន្ថយ​ចំនួន​រយៈ​ផ្ដល់​ដី​សម្បទាន​សេដ្ឋកិច្ច ពី​៩០​ឆ្នាំ មក​ត្រឹម​៥០​ឆ្នាំ។ ការ​នេះ​គឺ​ធ្វើ​យ៉ាងណា ដើម្បី​ធានា​ប្រសិទ្ធភាព​វិនិយោគ​អភិវឌ្ឍពី​ផ្នែក​ឯកជន និង​ជួយ​ដោះស្រាយ​បទល្មើស និង​ទំនាស់​ផ្សេងៗ​រវាង​ប្រជាពល​រដ្ឋ និង​ប្រជាសហគមន៍»

លោក អះអាងបន្ដ​ថា ករណី​កាប់​ឈើ​ខុស​ច្បាប់ បាន​ថយ​ចុះ ក្នុង​រយៈពេល​ចុងក្រោយ បន្ទាប់​ពី​មាន​ក្រុម​កំចាត់​បទល្មើស​ព្រៃឈើ និង​អនុក្រឹត​ដាក់​តំបន់​ព្រៃឈើ​មួយ​ចំនួន ជា​ព្រៃ​ការពារ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

Yes you are right from 1997 since you sighed it reduced from 90 years to 50 years it is means down 90 percent to 50 percent during 19 years.So 19 more years will down from 50 percent to 25 percent and the next 19 years will be downed to zero percent and have no more wood to cut.Bravo Bravo you did,do and will do a best job in the world.

Jun 24, 2016 02:07 PM

គេហទំព័រ​ទាំងមូល