ជនជាតិដើមភាគតិចខេត្តមណ្ឌលគិរី ប្រតិកម្មនឹងអភិបាលខេត្តមណ្ឌលគិរី ដែលថា គ្មានបទល្មើសព្រៃឈើទ្រង់ទ្រាយធំនៅខេត្តនេះ
2018.11.08
ជនជាតិដើមភាគតិចព្នង (ពូនង) និងសកម្មជនបរិស្ថាន ប្រតិកម្មចំពោះ ការលើកឡើងរបស់អភិបាលខេត្តមណ្ឌលគិរី លោក ស្វាយ សំអ៊ាង និងប្រធានមន្ទីរកសិកម្ម លោក សុង ឃាង ដែលអះអាងថា គ្មានបទល្មើសព្រៃឈើទ្រង់ទ្រាយធំ នៅខេត្តនេះទេ។ ពួកគេចាត់ទុកការលើកឡើងនេះថា ជាលេសយករួចខ្លួន និងមិនបានកែតម្រូវចំណុចខ្វះខាតរបស់ខ្លួនឲ្យប្រសើរឡើយ។ ផ្ទុយទៅវិញនាំឲ្យក្រុមឧក្រិដ្ឋជន និងមន្ត្រីខិលខូចនៅតែប្រព្រឹត្តបទល្មើសដដែល។
ជនជាតិដើមភាគតិចព្នងរស់នៅឃុំប៊ូស្រា ស្រុកពេជ្រាដា និងសកម្មជនការពារព្រៃឈើសង្កេតឃើញថា អភិបាលខេត្តមណ្ឌលគិរី និងប្រធានមន្ទីរសិកម្មខេត្ត ហាក់ខ្វះភាពទទួលខុសត្រូវក្នុងកិច្ចគាំពារធនធានធម្មជាតិ ក្នុងដែនសមត្ថកិច្ចរបស់ខ្លួន និងមិនបានទទួលយកទុក្ខកង្វល់របស់ពលរដ្ឋទៅដោះស្រាយនោះទេ។
ជនជាតិដើមភាគតិចព្នង រស់នៅឃុំប៊ួស្រា លោក ក្រើង តុលា ឲ្យដឹងនៅថ្ងៃទី៨ វិច្ឆិកាថា ពលរដ្ឋមានភស្តុតាងជាច្រើន ដែលពួកគេប្រទះឃើញបទល្មើសព្រៃឈើទ្រង់ទ្រាយធំ និងបានថតរួបបង្ហោះតាមបណ្តាញសង្គមហ្វេសបុក ដើម្បីឲ្យមានដំណោះស្រាយ។ លោកថា ថ្មីៗ នេះ ពួកគេបង្ហោះរូបភាពឃ្លាំងស្តុកឈើរបស់ជនជាតិវៀតណាម ដែលទទួលទិញឈើ ពីព្រៃអភិរក្សនៅខេត្តមណ្ឌលគិរី ដែលឈ្មូញដឹកទៅលក់ឲ្យជនជាតិវៀតណាម។ លោកអំពាវនាវឲ្យរដ្ឋមន្ត្រីក្រសួងមហាផ្ទៃលោក ស ខេង និងរដ្ឋមន្ត្រីក្រសួងបរិស្ថានលោក សាយ សំអាល់ ជំរុញឲ្យអភិបាលខេត្តនេះយកចិត្តទុកដាក់បន្ថែមទៀត អនុវត្តច្បាប់ព្រៃឈើឲ្យម៉ឹងម៉ាត់ ដូចការប្តេជ្ញាចិត្តមុនចូលកាន់តំណែង៖ «យ៉ាងយូរតែមួយអាទិត្យចាប់ផ្តើមកក្រើកលើសដើម។ គាត់មើលតែបទបញ្ជាទេ ដល់ពេលគេទៅក្រសួងអស់ហើយ គាត់ចាប់ផ្តើមធ្វើទៀត។ នេះមានន័យថា គាត់មិនមានការទទួលខុសត្រូវលើ។ សូមរដ្ឋមន្ត្រីក្រសួងបរិស្ថាន លោក សាយ សំអាល់ និងលោក ស ខេង ជួយជំរុញអភិបាលខេត្តហ្នឹងផង»។
លោកក្រើង តុលា បន្ថែមថា រយៈពេលជាង ២ឆ្នាំហើយ ដែលអភិបាលរូបនេះចូលកាន់ដំណែង។ ក៏ប៉ុន្តែបទល្មើសព្រៃឈើមិនថយចុះនោះទេ រហូតដល់មានរថយន្តដឹកឈើខ្លះបើកបុកពលរដ្ឋ និងសត្វពាហនៈជាច្រើនករណី។
រីឯជនជាតិដើមភាគតិចម្នាក់ទៀតរស់នៅ ភូមិពូរាំង ឃុំប៊ូស្រា លោក ប្រូប ថាញ់ ឲ្យដឹងថា ស្ទើរជាងរៀងរាល់យប់ៗ មានរថយន្តដឹកជញ្ជូនឈើចេញពីព្រៃអភិរក្សក្នុងខេត្តមណ្ឌលគិរី ឆ្ពោះទៅប្រទេសវៀតណាម។ លោកបារម្ភថា រថយន្តដឹកជញ្ជូនឈើភាគច្រើនបើកលឿន បង្កហានិភ័យខ្ពស់ដល់អ្នកដំណើរ។ ជាក់ស្តែងថ្មីៗ នេះ រថយន្តដឹកឈើក្រឡាប់គាប លោក និងប្រពន្ធបាក់ជើងម្ខាង ហើយបច្ចុប្បន្នលោកកំពុងសម្រាកព្យាបាលនៅមន្ទីរពេទ្យរាជធានីភ្នំពេញ៖ «រាល់ថ្ងៃគេដឹកឈើជាង ២០ឡានយកទៅប្រទេសវៀតណាម។ គេដឹកពីប៊ូស្រា ពីកែវសីមា និងប៊ូជ្រៃ ទៅប្រទេសវៀតណាមច្រើន»។
មន្ត្រីនាំពាក្យសាលាខេត្តមណ្ឌលគិរី លោក សុខ សូរ៉ា ទទួលស្គាល់ថា បទល្មើសព្រៃឈើកើតមានដោយតិចតូច តាមម៉ូតូលក្ខណៈគ្រួសារដែលប្រព្រឹត្តឡើងដោយពលរដ្ឋនៅមូលដ្ឋាន។ លោកបដិសេធចំពោះព័ត៌មានថា មានបទល្មើសព្រៃឈើទ្រង់ទ្រាយធំនៅខេត្តនេះ ព្រោះក្នុងអាណត្តិអភិបាលខេត្ត ស្វាយ សំអ៊ាង គឺគ្មានបទល្មើសព្រៃឈើដឹកតាមរថយន្តប៉ាកុងនោះទេ៖ «ឈើមានជាការលួចដាក់តិចតួច បើទ្រង់ទ្រាយធំគ្មានទេ។ មន្ត្រីទាំងអស់ជាមន្ត្រីក្របខណ្ឌរដ្ឋ។ គាត់ទទួលខុសត្រូវចំពោះមុខច្បាប់។ បើចៅហ្វាយខេត្តធ្វើការម្នាក់ឯង មិនបាច់គ្មានជំនាញទេ តែខេត្តក៏មិនព្រងើយកន្តើយដែរ ហើយខេត្តនឹងប្រឹងធ្វើកិច្ចការនេះបន្តទៀត»។
សកម្មជនការពារព្រៃឈើលោក ហេង ស្រស់ ដែលតែងចុះឃ្លាំមើលពីបទល្មើសព្រៃឈើយល់ថា ពុំមែនជារឿងចម្លែកទេ ដែលអាជ្ញាធរឆ្លើយយករួចខ្លួន និងព្យាយាមបិទបាំងបទល្មើសឧក្រិដ្ឋកម្មព្រៃឈើ។ លោកសង្កេតឃើញថា កន្លងទៅនៅខេត្តមណ្ឌលគិរី មានការកាប់រំលំឈើមូលដឹកទៅលក់នៅក្រៅប្រទេសរាប់ម៉ឺនម៉ែត្រគូប ក៏ប៉ុន្តែអាជ្ញាធរខេត្តនៅតែបដិសេធថា គ្មានបទល្មើសព្រៃឈើ។ ចំណែកទំហំព្រៃឈើក្នុងព្រៃអភិរក្សកំពុងទទួលរងវិនាសមហន្តរាយយ៉ាងខ្លាំងក្លានៅគ្រប់តំបន់៖ «រាល់ព្រៃឈើ ដែលចេញទៅប្រទេសវៀតណាមទាំងអស់។ រាល់មន្ត្រីទាំងអស់ មិនដែលទទួលស្គាល់ថា ខ្លួនធ្វើការអន់ទេ។ ព្យាយាមតែការពារខ្លួនឯងថា មិនមានការកាប់ព្រៃឈើ តែព្រៃឈើរលាយហិនហោចដោយសារក្រុមឧក្រិដ្ឋជន និងរលាយដោយសារមន្ត្រីមួយចំនួនព្យាយាមការពារតំណែងរបស់ខ្លួន»។
កាលពីពេលថ្មីៗនេះ លោក ស ខេង រដ្ឋមន្ត្រីក្រសួងមហាផ្ទៃ បានព្រមានអភិបាលខេត្តមណ្ឌលគិរី លោក ស្វាយ សំអ៊ាង ថា ត្រូវពិនិត្យមើលបទល្មើសព្រៃឈើក្នុងដែនសមត្ថកិច្ចរបស់ខ្លួន និងដោះស្រាយបញ្ហានេះជាបន្ទាន់។ បើពុំដូច្នេះទេនឹងត្រូវមានរឿង៖ «សូមផ្តាំទៅអភិបាលខេត្តមណ្ឌលគិរី ត្រូវដោះស្រាយ បើមិនអ៊ីចឹងមានរឿងហើយ។ វាកន្លងទៅមានបញ្ហាច្បាប់ព្រៃឈើ។ បើធ្វើអ៊ីចឹង អន្តរាយហើយអត់ឲ្យអំណាចទៅគណៈបញ្ជាការឯកភាព ដែលមានកម្លាំងគ្រប់គ្រាន់ គាត់យកអំណាចដាច់ទៅរដ្ឋបាលព្រៃឈើ»។
សកម្មជនបរិស្ថាន និងជនជាតិដើមភាគតិច ទទួចឲ្យអភិបាលខេត្តមណ្ឌលគិរីនិងស្ថាប័នពាក់ព័ន្ធ ភ្ញាក់ខ្លួនឡើងវិញ និងត្រូវអនុវត្តការប្តេជ្ញាចិត្តរបស់ខ្លួនមុនចូលកាន់តំណែងឲ្យមានប្រសិទ្ធភាព ទាក់ទិនការអនុវត្តគោលនយោបាយការពារធនធានធម្មជាតិ មិនត្រូវអនុវត្តច្បាប់បានតែមួយឆាវ ឬភ្លើងចំបើង អំឡុងពេលដែលមានការព្រមានពីថ្នាក់លើនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។