ពលរដ្ឋថា ជនជាតិវៀតណាមបន្តធ្វើនេសាទខុសច្បាប់នៅបឹងទន្លេសាបខេត្តបាត់ដំបងដោយគ្មានអាជ្ញាធរទប់ស្កាត់
2019.04.30
មងនេសាទដែលច្បាប់ហាម ត្រូវអ្នកនេសាទនៅតំបន់ចុងឃ្នាស បឹងទន្លេសាបប្រើ នៅថ្ងៃទី ២១ ធ្នូ ២០១១។
ប្រជាពលរដ្ឋនៅតំបន់ទន្លេសាបស្រុកឯកភ្នំ ខេត្តបាត់ដំបង អះអាងថា ទូកនេសាទធំៗ ជាច្រើនគ្រឿងរបស់ជនជាតិវៀតណាមនៅបន្តធ្វើនេសាទខុសច្បាប់នៅបឹងទន្លេសាប ដោយពុំមានអាជ្ញាធរណាទប់ស្កាត់នោះទេ។ មន្ត្រីសង្គមស៊ីវិលលើកឡើងថា ការនេសាទខុសច្បាប់ជាមូលហេតុធ្វើឱ្យហិនហោចត្រី ហើយបានប៉ះពាល់ដល់របរធ្វើនេសាទជាលក្ខណគ្រួសាររបស់ពលរដ្ឋនៅជុំវិញបឹងទន្លេសាប។
ពលរដ្ឋរស់នៅឃុំកោះជីវាំង ស្រុកឯកភ្នំ អ្នកស្រី ម៉ៅ រ៉េត ថ្លែងប្រាប់អាស៊ីសេរីនៅថ្ងៃទី២៩ មេសាថា ទូកនេសាទត្រីរបស់ជនជាតិវៀតណាម ប្រមាណពី ៥ទៅ ១០គ្រឿងក្នុងមួយថ្ងៃ ធ្វើនេសាទដោយប្រើឧបករណ៍យ៉ាងកាវ ហៅអួនក្រឡាញឹក នាំគ្នាអូសចាប់ត្រីទាំងតូចទាំងធំនៅបឹងទន្លេសាបក្នុងឃុំកោះជីវាំង ដោយពុំមានអាជ្ញាធរណាទប់ស្កាត់នោះទេ។ អ្នកស្រីបន្តថា ពលរដ្ឋខ្មែររស់នៅទីនោះមិនអាចធ្វើនេសាទជាលក្ខណៈគ្រួសារបានទេ ព្រោះអ្នកនេសាទជនជាតិវៀតណាមទាំងនោះបើកកាណូតបុកលិចទូក នឹងបើកកាត់ផ្ដាច់មងរបស់ពួកគាត់ជាប្រចាំ៖ «មានទាំងអស់កាន់តែខ្លាំងលើសដើម អ្នកណាមកភូតខ្ញុំ ហើយខ្ញុំបើចង់ដឹងមកខ្ញុំនាំទៅមើល ឥឡូវទន្លេចង់ដុះដីហើយ ដោយសារមងនេសាទជនជាតិវៀតណាម។អីចឹងនិយាយទៅធ្វើអីឱ្យវាជាក់ស្ដែងឱ្យមានការពិតដើម្បីឱ្យប្រជាពលរដ្ឋមានសង្ឃឹមទៅលើសមត្ថកិច្ចផង ដល់តែសមត្ថកិច្ចនិយាយយករួចតែខ្លួនគឺពួកខ្ញុំនៅបឹងទន្លេសាបអស់ទឹកចិត្តហើយ»។
អ្នកស្រីបន្តទៀតថា អាជ្ញាធរពាក់ព័ន្ធប្រចាំនៅបឹងទន្លេសាបសុទ្ធតែដឹងបញ្ហានេះ តែមិនចាត់វិធានការនោះទេ ដោយបណ្ដោយឱ្យជនជាតិវៀតណាមធ្វើនេសាទដោយសេរី ហើយអាជ្ញាធរច្រើនតែមានវិធានការចំពោះបទល្មើសតូចតាចដែលពលរដ្ឋខ្មែរធ្វើនេសាទទៅវិញ។
ប្រជានេសាទនៅឃុំកោះជីវាំងម្នាក់ទៀត ថ្លែងសុំមិនបញ្ចេញឈ្មោះថា សព្វថ្ងៃពួកគាត់ធ្វើនេសាទរកប្រាក់ដោះស្រាយជីវភាពគ្រួសារមិនបានទេ ដោយសារបរិមាណត្រីកាន់តែថយចុះ។លោកបន្តថា ជនជាតិវៀតណាមសម្រុកធ្វើនេសាទខុសច្បាប់នៅក្នុងទន្លេសាបជារៀងរាល់ថ្ងៃ ដោយសារត្រូវរ៉ូវគ្នាជាមួយសមត្ថកិច្ចពាក់ព័ន្ធប្រចាំការនៅបឹងទន្លេសាប៖ «និយាយពីធនធានត្រីគឺចប់ហើយ គឺវាអស់សូន្យតែម្ដង បើអាជ្ញាធរបណ្ដោយឱ្យអ្នកនេសាទសុខច្បាប់ដូចសព្វថ្ងៃ។ រឿងនេះដោយសារការឃុបឃិតគ្នាជាមួយអាជ្ញាធរពាក់ព័ន្ធ ហើយពេលឃុបឃិតគ្នារួចពួកគេចុះទៅនេសាទត្រីមានកាណូត១០គ្រឿងអីចឹងទៅ ហើយយើងទូកតូចមិនអាចធ្វើអីគេបានទេ»។
ឆ្លើយតបនឹងបញ្ហានេះ ប្រធានរដ្ឋបាលជលផលខេត្តបាត់ដំបង លោក ជួង សុភាព ប្រាប់អាស៊ីសេរីថា លោកទើបដឹកនាំសមត្ថកិច្ចចុះបង្ក្រាបការធ្វើនេសាទខុសច្បាប់កាលពីដើមសប្ដាហ៍កន្លងទៅ ហើយរឹបអូសបានឧបករណ៍នេសាទមួយចំនួនទៀតផង។ទោះជាយ៉ាងណាលោកថា សមត្ថកិច្ចមិនទាន់ចាប់ជនជាតិវៀតណាមធ្វើនេសាទខុសច្បាប់បាននៅឡើយទេ ដោយសារពួកគេធ្វើនេសាទនៅពេលយប់ ហើយមានកាណូតធំដែលធ្វើឱ្យសមត្ថកិច្ចពិបាកក្នុងការចុះបង្ក្រាប៖ «ប៉ុន្តែអាធំៗ ខ្ញុំគិតថាបើនៅក្រៅលំហមានបើនៅកន្លែងអភិរក្សពុំមានទេ ព្រោះទឹករីងនៅសល់កម្ពស់តែមួយម៉ែត្រមិនអាចធ្វើនេសាទកើតទេ ហើយបើធ្វើប៉ះមងពលរដ្ឋប្ដឹងមានរឿងហើយ ព្រោះឥឡូវឱ្យតែមានបទល្មើសពលរដ្ឋគាត់រាយការណ៍មកខ្ញុំភ្លាម ហើយបើសិនជាពលរដ្ឋដឹងព័ត៌មានច្បាស់ឱ្យគាត់ទូរស័ព្ទមកខ្ញុំមក ដើម្បីខ្ញុំបញ្ជូនកម្លាំងទៅឱ្យទាន់។ បាទគ្រាន់តែឃុំកោះជីវាំងមួយនឹងយើងមានសង្កាត់រដ្ឋបាលជលផល ២កន្លែង ហើយឃុំព្រៃចាស់ ក៏យើងសង្កាត់រដ្ឋបាលជលផលដែរ និយាយរួមនៅក្រុងឯកភ្នំមួយយើងមាន ៤សង្កាត់ សម្រាប់ទប់ទល់បទល្មើសនេសាទ ហើយនឹងមានផ្នែកមួយទៀត»។
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបាត់ដំបងលោក យិន ម៉េងលី យល់ថា ការធ្វើនេសាទខុសច្បាប់នេះ ដោយសារតែកន្លងមកអាជ្ញាធរពាក់ព័ន្ធច្រើនធ្វើការបដិសេធនឹងការលើកឡើងរបស់ប្រជាពលរដ្ឋ ដែលតែងតែស្នើសុំឱ្យមានការទប់ស្កាត់បទល្មើសនេសាទ និងខ្វះកិច្ចសហការល្អជាមួយសហគមន៍ និងពលរដ្ឋក្នុងមូលដ្ឋាន។លោកបន្តថា បញ្ហានេះនឹងនៅតែកើតមានបន្តប្រសិនបើមន្ត្រីថ្នាក់លើនៅតែបណ្ដោយឱ្យអាជ្ញាធរអនុវត្តច្បាប់ដូចសព្វថ្ងៃនោះ៖ «សម្រែកស្រែកយំរបស់ពលរដ្ឋវាកើតមានស្ទើរតែរាល់ថ្ងៃ ដូច្នេះយើងត្រូវធ្វើការពិនិត្យវិញ ចំណុចសំខាន់ដែលខ្ញុំមើលឃើញគឺខ្វះការគ្រប់គ្រងខ្វះការត្រួតពិនិត្យទៅលើបញ្ហាទាំងនេះ ហើយច្រើនតែបណ្ដោយ និងជាពិសេសមួយទៀតវាអាចមានអំពើពុករលួយដែរបានជាបញ្ហានេះនៅតែកើតមានដដែលនោះ»។
ប្រជាពលរដ្ឋនៅបឹងទន្លេសាបភាគស្រុកឯកភ្នំភាគច្រើនទទូចឱ្យរបបក្រុងភ្នំពេញ បញ្ជូនជនជាតិវៀតណាមទាំងនោះចេញពីបឹងទន្លេសាប ដើម្បីដោះស្រាយការធ្វើនេសាទខុសច្បាប់។មន្ត្រីសង្គមស៊ីវិលលើកឡើងថា ប្រសិនបើអាជ្ញាធរមិនឆាប់ទប់ស្កាត់បញ្ហានេះទេ នឹងធ្វើឱ្យត្រីនៅតំបន់បឹងទន្លេសាបកាន់តែហិនហោចឆាប់រហ័ស ហើយបានប៉ះពាល់ដល់ការរកប្រាក់ចំណូលរបស់ពលរដ្ឋរាប់ពាន់គ្រួសារនៅតំបន់បឹងទន្លេសាបស្រុកឯកភ្នំ ប្រឈមការធ្វើចំណាកស្រុកកាន់តែច្រើន ព្រោះពួកគាត់គ្មានដីធ្វើស្រែដាំដុះដូចពលរដ្ឋនៅតំបន់ផ្សេងឡើយ ដោយពួកគាត់ពឹងផ្អែកទាំងស្រុងទៅលើរបរធ្វើនេសាទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ