"ក្រុមហ៊ុនធីង៉ាដែលម្ចាស់ភាគហ៊ុនជាជនជាតិវៀតណាម ជាប់ពាក់ព័ន្ធនឹងការរត់ពន្ធឈើឆ្លងដែន"
2020.02.17
សកម្មជនបរិស្ថានរកឃើញថា ក្រុមហ៊ុន ធីង៉ា អភិវឌ្ឍន៍ និងវិនិយោគ (THY NGA CO., LTD. DEVELOPMENT AND INVESTMENT) មានជាប់ពាក់ព័ន្ធ សកម្មភាពរត់ពន្ធឈើឆ្លងដែន ទៅលក់នៅក្រៅប្រទេស សហការជាមួយក្រុមហ៊ុនអង្គរប្លាយវូដ(Angkor Plywood) ។ សហគមន៍ព្រៃឡង់ និងសកម្មជនបរិស្ថានអះអាងថា ក្រុមហ៊ុននេះ បានលួចបន្លំកាប់ឈើពីខាងក្រៅ ដឹកចូលបរិវេណក្រុមហ៊ុន ដើម្បីលក់បន្តទៅឱ្យក្រុមហ៊ុន អង្គរប្លាយវូដ ដែលធ្លាប់មានរឿងអាស្រូវប្រមូលឈើខុសច្បាប់ចេញពីតំបន់ព្រៃឡង់ ក្នុងខេត្តក្រចេះ យកទៅលក់នៅក្រៅប្រទេស។
សកម្មជនបរិស្ថាន និង សហគមន៍ព្រៃឡង់បង្ហាញការសោកស្រាយយ៉ាងខ្លាំង ពីភាពព្រងើយកន្តើយអនុវត្តច្បាប់ព្រៃឈើ របស់រដ្ឋាភិបាល បើទោះបីជាពួកគេបានរាយការណ៍ និងបង្ហាញភស្តុតាងជាច្រើនបញ្ជាក់ថា ក្រុមហ៊ុន ធីង៉ា អភិវឌ្ឍន៍ និងវិនិយោគ ធ្វើអាជីវកម្មឈើទ្រង់ទ្រាយធំខុសច្បាប់ ក្នុងតំបន់ព្រៃឡង់ក្តី មកទល់ពេលនេះ នៅពុំទាន់ឃើញស្ថាប័នណាមួយ ចុះអនុវត្តច្បាប់ ឬផ្អាកសកម្មភាព ក្រុមហ៊ុននេះនៅឡើយទេ។
សកម្មជនបរិស្ថាន លោក ហេង ស្រស់ ដែលចុះអង្កេតរឿងនេះ ឱ្យដឹងនៅថ្ងៃទី១៧ កុម្ភៈថា ក្រុមហ៊ុនធីង៉ាអភិវឌ្ឍន៍ និងវិនិយោគ ជារបស់លោកជំទាវ សេង គាង កំពុងធ្វើសកម្មភាពប្រមូលឈើខ្នាតធំ ក្នុងតំបន់ព្រៃឡង់ ដើម្បីដឹកលក់បន្តឱ្យលោក ជា ពៅ ម្ចាស់ក្រុមហ៊ុនអង្គរប្លាយវូដ។ លោកថា ឧក្រិដ្ឋកម្មទ្រង់ទ្រាយធំនេះ មានអ្នកមានអំណាច និងមន្ត្រីជាន់ខ្ពស់ ក្នុងជួររដ្ឋាភិបាល នៅពីក្រោយខ្នង បានជាអាជ្ញាធរថ្នាក់ខេត្ត និងគណៈកម្មការជាតិ មិនហ៊ានអនុវត្តច្បាប់។ លោក ហេង ស្រស់ គិតទុកជាមុនថា ប្រសិនបើក្រសួងពាក់ព័ន្ធ និងរដ្ឋាភិបាលមិនចាត់វិធានការក្រុមហ៊ុននេះទេ ជោគវាសនាព្រៃឡង់ដែលនៅសល់ឈើខ្លះ នឹងរលាយហិចហោចនៅពេលដ៏ខ្លីខាងមុខ ៖ «សាវតារអ្នកទាំងអស់នេះ ត្រូវជាកូនត្រូវជាក្មួយ អ្នកដែលមានងារជាឧកញ៉ា យើងមិនទាន់បញ្ចេញទេថា ពួកគាត់ជាកូនចៅរបស់អ្នកណា? ដោយសារយើង កំពុងធ្វើការស៊ើបអង្កេតទៅលើពួកគាត់ដែរ។ បើគាត់នៅតែបន្តរកស៊ីកាប់បំផ្លាញព្រៃឈើបន្តទៀត ឬក៏គាត់ឈប់ត្រឹមហ្នឹង? ប្រសិនជាគាត់មិនឈប់ទេ យើងនឹងបង្ហាញពីមហិច្ឆតារបស់គាត់ ហើយបង្ហាញពីអ្នកនៅខាងក្រោយខ្នងរបស់គាត់។ ប្រហែលជាគាត់មានអ្នកអាង និងអ្នកមានការជួយការពារពីខាងក្រោយហើយ បានជាហ៊ានរកស៊ីកាប់បំផ្លាញព្រៃឈើ»។
កាលពីថ្ងៃទី១៦ ខែធ្នូ ឆ្នាំ២០០៨ ពីទីស្ដីការគណៈរដ្ឋមន្ត្រី និងក្រសួងកសិកម្ម បានអនុញ្ញាតឱ្យក្រុមហ៊ុន ធីង៉ា អភិវឌ្ឍន៍ និងវិនិយោគ ទទួលសិទ្ធិវិនិយោគដីសម្បទានសេដ្ឋកិច្ច មានទំហំជាង ៦ពាន់ហិកតារ (៦០៦០) ឋិតនៅឃុំរៀបរយ ស្រុករវៀង ខេត្តព្រះវិហារ។ ក្រុមហ៊ុននេះ វិនិយោគ ដំណាំ អាកាស្យា និងដំណាំកសិ-ឧស្សាហកម្មផ្សេងទៀត ដោយបែងចែកជា ៥អនុតំបន់។ ប៉ុន្តែរហូតដល់មកពេលនេះ សហគមន៍ព្រៃឡង់រកឃើញថា ក្រុមហ៊ុននេះមិនឃើញ អភិវឌ្ឍន៍ និងដាំដំណាំអ្វីជាដុំកំភួននៅឡើយទេ។
អាស៊ីសេរីនៅមិនទាន់អាចទាក់ទងម្ចាស់ក្រុមហ៊ុនធីង៉ា អភិវឌ្ឍន៍ និងវិនិយោគ គឺលោកជំទាវ សេង គាង និង លោក ជា ពៅ ម្ចាស់ក្រុមហ៊ុនអង្គរប្លាយវូដ ដើម្បីសុំការបំភ្លឺរឿងនេះបាននៅឡើយទេ នៅថ្ងៃទី១៧ កុម្ភៈ។
ចំណែក អ្នកនាំពាក្យក្រសួងកសិកម្ម លោក ស្រី វុឌ្ឍី រដ្ឋមន្ត្រីក្រសួងកសិកម្ម លោក វេង សាខុន អ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី អភិបាលខេត្តព្រះវិហារ លោក ប្រាក់ សុវណ្ណ ក៏មិនអាចទាក់ទងបានដែរដោយសារពួកលោកមិនលើកទូរស័ព្ទ នៅថ្ងៃដដែលនេះ។
កន្លងទៅ តំណាងឱ្យក្រុមហ៊ុន ធី ង៉ា អភិវឌ្ឍន៍ និងវិនិយោគ លោកមេធាវី ហេង សុទ្ធារ៉ា បានចេញមុខបដិសេធ ចំពោះសារព័ត៌មាន ក្នុងស្រុកមួយចំនួន ដែលបានផ្សាយ ចោទក្រុមហ៊ុនរបស់លោកថា បានឈូសឆាយ កាប់ឈើ និងដឹកជញ្ជូនឈើលក់ យ៉ាងអនាធិបតេយ្យនៅក្នុងខេត្តព្រះវិហា។
មេធាវីក្រុមហ៊ុនបានអះអាងថា ក្រុមហ៊ុនរបស់លោក ធ្វើសកម្មភាពឈូសឆាយនិងប្រមូលផល អនុផលព្រៃឈើតែនៅក្នុងរង្វង់ដែនដីសម្បទានសេដ្ឋកិច្ច ដែលក្រសួងកសិកម្មអនុញ្ញាត តែប៉ុណ្ណោះ ក្រុមហ៊ុនមិនបានធ្វើសកម្មភាព កាប់ឈើពីខាងក្រៅ ឬឈូសឆាយហួសដែនកំណត់ឡើយ ហើយឈើដែលក្រុមហ៊ុនប្រមូលបាន ក្រុមហ៊ុនមិនបានដឹកឈើលក់ឡើយ គឺដឹកជញ្ជូនចូលរោងចក្រ របស់ក្រុមហ៊ុនផលិតជាគ្រឿងសង្ហារិម និងក្ដារ កុងផ្លាកេលក់ ដើម្បីបើកប្រាក់ខែឱ្យបុគ្គលិកកម្មករ។
ឆ្លើយតបការលើកឡើងនេះ លោក ហេង ស្រស់ បដិសេធថា ក្រុមហ៊ុនទាំងនេះ សុទ្ធសឹងបានប្រព្រឹត្តល្មើសច្បាប់ សហការជាមួយក្រុមហ៊ុនអង្គរប្លាយវូដ ដើម្បីរត់ពន្ធឈើឆ្លងដែនទៅក្រៅប្រទេស។ លោកសង្ស័យថា ក្រសួងកសិកម្មបានឃុបឃិតជាមួយក្រុមហ៊ុនទាំងនេះ ដើម្បីទទួលប្រយោជន៍ជាថ្នូរអនុញ្ញាតឱ្យក្រុមហ៊ុនកាប់ឈើ ក្នុងព្រៃអភិរក្ស បែបអនាធិបតេយ្យ៖ «កន្លងមកប្រសិនជា ក្រុមឧក្រិដ្ឋជនមួយណា មិនបានផ្តល់នូវលាភសក្ការៈមិនបានផ្ដល់នូវជាទឹកប្រាក់ ដល់អ្នកមានអំណាចក្នុងជួររដ្ឋាភិបាលទេ អ្នកនោះត្រូវទទួលបានការបង្ក្រាបពីរដ្ឋាភិបាល។ ប្រសិនជាអ្នកណាមួយ បានផ្ដល់លាភសក្ការៈដល់អ្នកទាំងអស់ហ្នឹង គឺមិនទទួលបានការបង្ក្រាបទេ។ នេះគឺយើងមើលឃើញកន្លងមក ហើយទិដ្ឋភាពសព្វថ្ងៃគឺ វាអ៊ីចឹងឯង»។
ប្រធានសហគមន៍ព្រៃឡង់ ខេត្តកំពង់ធំ លោក ស្រី ថី ប្រាប់អាស៊ីសេរីថា មហិច្ឆតារបស់ក្រុមហ៊ុននេះ ដើម្បីបំផ្លាញទំហំព្រៃឡង់ទាំងមូល ព្រោះសហគមន៍ប្រទះឃើញ រថយន្តកែច្នៃ ៧គ្រឿង គោយន្តរាប់សិបគ្រឿង និងមានម៉ាស៊ីនអារច្រៀកឈើខ្នាតធំ ឋិតក្នុងផ្ទៃដីរបស់ក្រុមហ៊ុន កំពុងធ្វើអាជីវកម្មអារច្រៀកឈើ យ៉ាងគគ្រឹកគគ្រេង។ លោកថា ក្រុមល្បាតសហគមន៍ប្រទះឃើញ រថយន្តកែច្នៃជាច្រើនគ្រឿងដឹកជញ្ជូនឈើមូលធំៗ ចេញពីព្រៃឡង់ តម្រង់ចូលក្នុងក្រុមហ៊ុននេះ កាលពីពេលថ្មីៗនេះ៖ «ឈើគេបានបែងចែកជាពីរចំណែក។ ឈើទី១ អារពីរម៉ែត្រហ្នឹងគេធ្វើឧស ហើយឈើដឹកធំៗដាក់ឡាន គេដាក់ទៅនៅអូរឡង់ ហើយអារឈើមួយដាក់ឡាន គេទុកកែច្នៃផ្សេងៗ។ ឈើល្អមានឈើ ធ្នង់ ត្បែង ឈ្លីក ឈើល្អៗតើ។ ប្រសិនបើរដ្ឋាភិបាលមិនពង្រឹងផ្នែកច្បាប់ ឬហាមឃាត់ដីសម្បទានសេដ្ឋកិច្ចទេ យើងនឹងអាចមានហានិភ័យធំទៀត ដែលយើងការពារព្រៃអភិរក្សហ្នឹង»។
គេហទំព័រ អូផែន ខបផ័ររ៉េត្ស (open corporates) បង្ហាញពីរចនាសម្ព័ន្ធ ក្រុមហ៊ុនធីង៉ាអភិវឌ្ឍន៍ និងវិនិយោគ ដែលមានលោក ជា ពៅ ជាប្រធានក្រុមប្រឹក្សាភិបាល។ លោក ឡេង រិទ្ធី ជានាយកប្រតិបត្តិ និង លោក ផាន់ វ៉ាន់ង៉ា (Phan VAN NGA) ជាជនជាតិវៀតណាម ជាម្ចាស់ភាគហ៊ុន៕