អ្នកភូមិស្រែគរនិងក្បាលរមាសស្រុកសេសានដាក់ញត្តិនៅក្រសួងរ៉ែនិងថាមពល
2017.08.25
អ្នកភូមិស្រែគរ និងភូមិក្បាលរមាស មកពីស្រុកសេសាន ខេត្តស្ទឹងត្រែង ចំនួន ៧នាក់ នាំគ្នាទៅដាក់ញត្តិនៅក្រសួងរ៉ែ និងថាមពល នៅព្រឹកថ្ងៃទី២៥ ខែសីហា ដោយស្នើសុំផ្ដល់ដំណោះស្រាយមួយចំនួនដល់ពួកគេ នៅពេលដែលពលរដ្ឋក្នុងភូមិទាំងពីរនេះចំនួន ១៤៣គ្រួសារ កំពុងរងផលប៉ះពាល់ពីការបិទទ្វារទឹកក្នុងសំណង់ទំនប់វារីអគ្គិសនីសេសានក្រោមពីរ។
អ្នកភូមិដែលភាគច្រើនជាស្ត្រីមានមួយចំនួនស្លៀកពាក់ជារបៀបជនជាតិដើមភាគតិចព្នង និងមិនពាក់ទ្រនាប់ជើង ក្នុងដៃកាន់បដាដែលសរសេរពីសំណូមពរមួយចំនួន លើកបង្ហាញនៅខាងមុខក្រសួងរ៉ែ និងថាមពល ក្នុងនោះរួមមានបញ្ឈប់ការជម្លៀសចេញដោយបង្ខំ វារីអគ្គិសនីបំផ្លាញអត្តសញ្ញាណជនជាតិដើមភាគតិច និងបញ្ឈប់ការរើសអើងជនជាតិដើមភាគតិច ជាដើម។
តំណាងម្នាក់ លោក ឡាត់ វិបុល ថ្លែងថា នៅក្នុងញត្តិ អ្នកភូមិស្នើឲ្យក្រសួងមានវិធានការចំនួន ៥ចំណុច គឺធ្វើយ៉ាងណាឲ្យពួកគាត់អាចរស់នៅក្នុងភូមិឋានដែលមានតាំងពីដូនតាមក បើគាត់ចាកចេញ គឺមានន័យថាធ្វើឲ្យបាត់បង់អត្តសញ្ញាណ វប្បធម៌ និងទំនៀមទម្លាប់ពួកគាត់ទាំងស្រុង៖ «តំបន់ហ្នឹងពួកគាត់អត់អាចចាកចេញទៅនៅភូមិថ្មីទេ ពីព្រោះពួកគាត់មានខាងជំនឿបែបជនជាតិដើមភាគតិច គឺគាត់កាន់ខាងផ្នូរដូនតារបស់ពួកគាត់ គឺពួកគាត់អត់អាចបាត់អត្តសញ្ញាណ តែកាលណាពួកគាត់ចេញទៅ គឺវាបាត់អត្តសញ្ញាណទាំងស្រុង ហើយជនជាតិភាគតិច គឺអាស្រ័យទៅលើព្រៃឈើ កាលណាអត់មានព្រៃឈើ គឺហាក់បីដូចជាសម្លាប់ពួកគាត់ទាំងស្រុង។ ខ្ញុំសង្ឃឹមថាក្រសួង គាត់នឹងរកវិធីរកវិធានការដើម្បីដោះស្រាយដល់ពួកគាត់»។
ក្រុមហ៊ុនសាងសង់ទំនប់វារីអគ្គិសនីសេសានក្រោមពីរ បានបិទទ្វារទឹកសាកល្បងកាលពីដើមខែសីហា ធ្វើឲ្យទឹកជន់លិចភូមិស្រែគរ នៅតំបន់ទំនាបកម្ពស់ពីកន្លះម៉ែត្រទៅមួយម៉ែត្រ ខណៈទឹកក្នុងអាងកើនឡើងកម្រិត ៧១ម៉ែត្រធៀបនឹងនីវ៉ូទឹកសមុទ្រ។
អ្នកភូមិម្នាក់ទៀត លោកស្រី សារ៉ុន សុខុម លើកឡើងថា អ្នកភូមិសុខចិត្តរស់នៅក្នុងទីតាំងចាស់។ លោកស្រីស្នើអាជ្ញាធរកុំឲ្យរំខានការរស់នៅរបស់ពួកគាត់ តាមរយៈការដាក់កងកម្លាំងរាំងផ្លូវចេញចូលភូមិ បញ្ឈប់ចោទប្រកាន់អ្នកភូមិថាចង់បង្កើតតំបន់អបគមន៍ប្រឆាំងគម្រោងអភិវឌ្ឍន៍ និងស្នើរដ្ឋាភិបាលកាត់បន្ថយកម្លាំងថាមពលអគ្គិសនីនៅទំនប់សេសានក្រោមពីរ ដែលលោកស្រីថានឹងមិនធ្វើឲ្យប៉ះពាល់ធ្ងន់ធ្ងរដល់ជីវភាពអ្នកភូមិ រួមទាំងធនធានធម្មជាតិក្នុងប្រព័ន្ធទន្លេក្នុងតំបន់៖ «ជារួមចឹង ខ្ញុំមិនត្រូវការសំណងអ្វីទាំងអស់ សូម្បី ២ម៉ឺនដុល្លារ ឬ ៥ម៉ឺនដុល្លារ ក៏ខ្ញុំមិនចេញពីផ្នូរដូនតារបស់ខ្ញុំដែរ។ ខ្ញុំស៊ូថារស់នៅកន្លែងនេះរហូត ហើយខ្ញុំសូមសំណូមពរទៅរដ្ឋាភិបាល ថាវារីអគ្គិសនីហ្នឹងវាប៉ះពាល់ដល់ពួកខ្ញុំមែន ហើយសុំសំណូមពរឲ្យគាត់កាត់បន្ថយ ៤០០មេហ្គាវ៉ាត់មកទុកត្រឹម ២៥០មេហ្គាវ៉ាត់ហ្នឹង ខ្ញុំអាចរស់បានហើយ»។
មន្ត្រីជាតំណាងក្រសួងរ៉ែ និងថាមពល លោក សួ ប៉ុណ្ណារិទ្ធ បានចេញមកជួបអ្នកភូមិ និងទទួលយកញត្តិរបស់ពួកគេ ដោយអះអាងត្រឹមថា នឹងយកសំណើពលរដ្ឋទៅជូនមន្ត្រីថ្នាក់លើរបស់លោក។ លោកថា មន្ត្រីក្រសួងអាចនឹងចុះទៅភូមិទាំងពីរនេះ ដើម្បីជជែកពីដំណោះស្រាយ៖ «ទទួលញត្តិហ្នឹង គឺដើម្បីដាក់ជូនថ្នាក់ដឹកនាំខ្ញុំ ដើម្បីឆ្លងយោបល់គាត់ ហើយគាត់នឹងសម្រេចថាយ៉ាងម៉េចៗ គឺទៅដោះស្រាយនៅខេត្តជាមួយអាជ្ញាធរខេត្ត»។
ក្រុមហ៊ុនសាងសង់ទំនប់វារីអគ្គិសនីសេសានក្រោមពីរ គ្រោងបិទទ្វារទឹកជាផ្លូវការទាំងអស់ចំនួន ១០ទ្វារ ដើម្បីទប់ទឹកបញ្ចូលអាងនៅថ្ងៃទី២៥ ខែកញ្ញា ហើយពេលនោះ ទឹកនឹងឡើងខ្លាំង ដែលនឹងជន់លិចភូមិស្រែគរ ទាំងស្រុង។ អាជ្ញាធរខេត្តស្ទឹងត្រែង បានចុះផ្សព្វផ្សាយដើម្បីឲ្យប្រជាពលរដ្ឋរស់នៅភូមិស្រែគរ ប្រុងប្រយ័ត្ន និងសម្រេចចិត្តជាថ្មីទាក់ទិនគម្រោងទទួលយកសំណង ហើយចាកចេញទៅរស់នៅទីតាំងថ្មី។
បើទោះជាយ៉ាងណា ពលរដ្ឋនៅតែប្រកាន់ជំហរមិនចាកចេញ។ លើសពីនេះ នៅក្នុងញត្តិដែលដាក់ទៅក្រសួងរ៉ែ និងថាមពល អ្នកភូមិទាំង ១៤៣គ្រួសារមកពីភូមិស្រែគរ ឃុំស្រែគរ និងភូមិក្បាលរមាស ឃុំក្បាលរមាស ក៏បានសុំចុះបញ្ជីសមូហភាពសហគមន៍ និងព្រៃសហគមន៍ពួកគេផងដែរ៕