គុណប្រយោជន៍និងគុណវិបត្តិនៃអគ្គិសនីដើរដោយថាមពលជីវម៉ាសនៅសៀមរាប
2014.02.08
បន្ទប់តូចៗជាច្រើនដែលជាផ្នែកនៃរោងម៉ាស៊ីនដើរដោយថាមពលជីវម៉ាសនៅក្នុងស្រុកអង្គរជុំ ខេត្តសៀមរាប។
ក៏ប៉ុន្តែ អាជ្ញាធរមូលដ្ឋាន និងប្រជាពលរដ្ឋ នៅស្រុកអង្គរជុំ ខ្លះបែរជាយល់ថា រោងម៉ាស៊ីនអគ្គិសនីជីវម៉ាសនោះ តែងបង្ហុយផេះអង្កាម ព្រមទាំងភាយឧស្ម័នចេញមកលើពួកគេរៀងរាល់ថ្ងៃ ធ្វើឱ្យប៉ះពាល់សុខភាពទៅវិញ។
តើរោងម៉ាស៊ីនអគ្គិសនីជីវម៉ាសនោះ ពិតជាធ្វើឱ្យប៉ះពាល់ដល់ការរស់នៅប្រចាំថ្ងៃ ឬក៏បានផ្ដល់ផលប្រយោជន៍ឱ្យប្រជាពលរដ្ឋនៅតាមជនបទ?
អ្នកគ្រប់គ្រងក្រុមហ៊ុន អាយ.អ៊ី.ឌី អ៊ីនវេសថ៍ ខេមបូឌា (IED Invest Cambodia) ដែលជាម្ចាស់គម្រោងសាកល្បងអគ្គិសនីជនបទ ដើរដោយថាមពលជីវម៉ាស បានបដិសេធចោលការចោទប្រកាន់ដែលថា រោងម៉ាស៊ីនអគ្គិសនីនៅស្រុកអង្គរជុំ តែងបង្ហុយផេះអង្កាម និងក្លិនឧស្ម័ន ធ្វើឱ្យប៉ះពាល់ដល់សុខភាពប្រជាពលរដ្ឋនោះ។
ការបដិសេធធ្វើឡើងបន្ទាប់ពីក្រុមអាជ្ញាធរមូលដ្ឋាននៃស្រុកអង្គរជុំ និងឃុំចារឈូក ខ្លះព្យាយាមធ្វើរបាយការណ៍បញ្ជូនទៅថ្នាក់លើ ដើម្បីឱ្យជួយដោះស្រាយ ព្រមទាំងប្រជាពលរដ្ឋខ្លះបានដាក់ពាក្យបណ្ដឹងជុំវិញបញ្ហានោះ។
នាយកគ្រប់គ្រងក្នុងស្រុករបស់ក្រុមហ៊ុន អាយ.អ៊ី.ឌី គឺលោក គី ចាន់ថន។ លោកបានមានប្រតិកម្មថា លោកមិនអាចទទួលយកបានទេចំពោះការចោទប្រកាន់ទៅលើរោងម៉ាស៊ីនអគ្គិសនី ដើរដោយថាមពលជីវម៉ាសដុតអង្កាមនាស្រុកអង្គរជុំ ខេត្តសៀមរាប ដោយថាបានបង្ហុយផេះ និងភាយក្លិនឧស្ម័ន ធ្វើឱ្យប៉ះពាល់ដល់ប្រជាពលរដ្ឋ។
នាយកគ្រប់គ្រងក្រុមហ៊ុនដដែលបានបញ្ជាក់ថា រោងម៉ាស៊ីនអគ្គិសនីជីវម៉ាសនៅស្រុកអង្គរជុំ គឺជាម៉ាស៊ីនខ្នាតតូចសម្រាប់ទីជនបទ ដោយមានកម្លាំង ៧០គីឡូវ៉ាត់ មិនមានអ្វីធ្វើឱ្យប៉ះពាល់ដល់សុខភាពប្រជាពលរដ្ឋទេ។
លោក គី ចាន់ថន បានមានប្រសាសន៍បន្ថែមថា ផ្ទុយទៅវិញ រោងម៉ាស៊ីនអគ្គិសនីជនបទមួយនេះ បានជួយដល់ប្រជាពលរដ្ឋមួយកម្រិត ដោយបញ្ចុះតម្លៃភ្លើងដែលពីមុនធ្លាប់តែថ្លៃ ៣.៤០០រៀលក្នុង១គីឡូវ៉ាត់ម៉ោង ប៉ុន្តែបច្ចុប្បន្នចុះមកនៅត្រឹម ១.៧០០រៀល៖ «ម៉ាស៊ីនភ្លើងតូចមួយទេ! មិនមែនជាខ្នាតផៅវើផ្លាន (Power Plan) រាប់មេហ្គាវ៉ាត់ទេ ហើយឥឡូវហ្នឹងអាផេះចេញពីអង្កាមមិនមែនជាផេះ ដែលយើងដុតឡើងខ្ទេចតែម្ដងនោះទេ។ ផេះហ្នឹង គឺមូលៗ អង្កាមធ្លាក់មកខ្មៅៗរាល់ថ្ងៃហ្នឹង ប្រជាពលរដ្ឋនៅតាមហ្នឹងគេឱ្យដឹកយកទៅចាក់មុខផ្ទះគេ ហើយគេដឹកទៅចាក់តាមវាលស្រែ ព្រោះអាហ្នឹងវាជួយធ្វើជី ៥០% ឱ្យដីវាធូរ។ ក្រុមហ៊ុនដែលមកសាកល្បងតាំងពីភ្លើងតម្លៃ ៣.៤០០ ចុះរហូតដល់ជាង ១ពាន់រៀល ពិចារណាមើល គឺ ៣ខែចុះ ១០០ៗ សុទ្ធតែពន្យល់គាត់ទាំងអស់»។
រោងម៉ាស៊ីនដើរដោយថាមពលជីវម៉ាសសម្រាប់ផ្គត់ផ្គង់អគ្គិសនីនៅទីជនបទ នៃស្រុកអង្គរជុំ នេះ បានចាប់ដំណើរការកាលពីអំឡុងឆ្នាំ២០១១ ក្រោមជំនួយគាំទ្រ និងវិនិយោគពីក្រសួងឧស្សាហកម្ម រ៉ែ និងថាមពល រួមនិងអង្គការសហប្រជាជាតិ ដើម្បីអភិវឌ្ឍឧស្សាហកម្ម (UNDO)។ ក្រៅពីនោះ ក្រុមហ៊ុនមានដៃគូជាច្រើនទៀត ដើម្បីធានាដល់ប្រសិទ្ធភាពនៃថាមពលកកើតឡើងវិញ ព្រមទាំងផ្គត់ផ្គង់អគ្គិសនីទៅឱ្យអ្នកប្រើប្រាស់ឱ្យមានចិរភាព ដូចជាធនាគារពិភពលោក សហគមន៍អឺរ៉ុប រដ្ឋាភិបាលបារាំង និងភ្នាក់ងារបរិស្ថានជាដើម។
កាលពី ៣-៤ឆ្នាំមុន ប្រជាពលរដ្ឋជាច្រើននៅក្នុងស្រុកអង្គរជុំ ចម្ងាយជាង ៥០គីឡូម៉ែត្រភាគខាងលិចពីទីរួមខេត្តសៀមរាប ធ្លាប់តវ៉ាប្រឆាំងចំពោះបញ្ហាអគ្គិសនីថ្លៃ ៣.៥០០រៀលក្នុង១គីឡូវ៉ាត់ម៉ោង។ ក៏ប៉ុន្តែ ក្រោយមកអ្នកភូមិអស់កង្វល់ពីរឿងអគ្គិសនីថ្លៃទៀត បន្ទាប់ពីគម្រោងអគ្គិសនីដើរដោយថាមពលជីវម៉ាសបានកើតឡើង ហើយលក់ឱ្យប្រើប្រាស់ក្នុងតម្លៃ ១.៧០០រៀល។ រយៈពេលប្រមាណជិត ២ឆ្នាំចុងក្រោយនេះ អ្នកភូមិខ្លះក៏បានចាប់ផ្ដើមរអ៊ូរទាំជាមួយនឹងរោងម៉ាស៊ីនអគ្គិសនីដែលជួយផ្គត់ផ្គង់ឱ្យប្រើប្រាស់ក្នុងតម្លៃថោកនោះទៀត។
កាលពីថ្ងៃទី១៧ ខែមករា ឆ្នាំ២០១៤ កន្លងទៅ តំណាងអ្នកភូមិដូនស្វា បាននាំគ្នាមកទីរួមខេត្តសៀមរាប និងសុំឱ្យអង្គការក្រៅរដ្ឋាភិបាល ជួយធ្វើពាក្យបណ្ដឹង និងជួយបង្ហាញពីមធ្យោបាយខ្លះៗដើម្បីដោះស្រាយ ជុំវិញការប៉ះពាល់បណ្ដាលមកពីរោងម៉ាស៊ីនអគ្គិសនីនោះ។
តំណាងអ្នកភូមិដូនស្វា លោក ធាង ថៃ បានមានប្រសាសន៍ថា រោងម៉ាស៊ីនអគ្គិសនីជីវម៉ាសនោះ តែងបង្ហុយផេះអង្កាម និងក្លិនឧស្ម័នមកលើពួកគាត់ជារៀងរាល់ថ្ងៃ ធ្វើឱ្យប៉ះពាល់ដល់សុខភាព ដូចជាបង្កឱ្យឈឺក្បាល និងវិលមុខជាដើម។ លោក ធាង ថៃ មិនចង់ឱ្យរោងម៉ាស៊ីននោះបន្តដំណើរការទៀតទេ៖ «កាលណាតែភ្លើងនេះអត់បញ្ឆេះ វាអត់មានក្លិនធុំមានអីទេ សុខភាពយើងធម្មតាវាអត់មានឈឺក្បាលវិលមុខអីទេ»។
លោក ធាង ថៃ បានអះអាងថា បច្ចុប្បន្ន បើរោងម៉ាស៊ីននោះឈប់ដំណើរការក៏អ្នកភូមិមិនព្រួយបារម្ភពីការអត់ភ្លើងអគ្គិសនីប្រើដែរ ពីព្រោះគេអាចតភ្ជាប់បណ្ដាញអគ្គិសនីពីផ្លូវជាតិលេខ៥ មកប្រើប្រាស់បាន។
ទោះយ៉ាងណា ប្រជាពលរដ្ឋខ្លះបានទទួលស្គាល់ថា រោងម៉ាស៊ីនអគ្គិសនីដែលដើរដោយជីវម៉ាសនោះ គឺមានផលប្រយោជន៍ច្រើនជាងភ្លើងអគ្គិសនីដែលតមកពីប្រទេសថៃ។
លោក សុភាព គឺជាប្រជាពលរដ្ឋម្នាក់ដែលផ្ទះរបស់គាត់នៅជិតរោងម៉ាស៊ីនអគ្គិសនីជាងគេ បានមានប្រសាសន៍ថា មួយរយៈមកនេះ អគ្គិសនីដើរដោយជីវម៉ាសបានជួយគ្រួសាររបស់គាត់ជាច្រើន តាំងពីថ្លៃប្រើប្រាស់ថោក ព្រមទាំងគាត់បានផេះអង្កាម យកទៅធ្វើជីសម្រាប់ដាំដំណាំទៀតផង។ លោក សុភាព បញ្ជាក់ថា អង្កាមឆេះ គឺមានធុំក្លិនតិចតួចមែន ក៏ប៉ុន្តែវាមិនមានប៉ះពាល់សុខភាពទេ៖ «ផ្ទះខ្ញុំនៅក្បែររោងម៉ាស៊ីនដែរ ក្លិនវាមានតិចតួចដែរ ប៉ុន្តែវាអត់ប៉ះពាល់ទេ ព្រោះខ្ញុំដាំជីដាំអីកើត អង្កាមហ្នឹងខ្ញុំយកដាក់ជី ដាក់ស្រែខ្ញុំកើត»។
អ្នកស៊ើបអង្កេតនៃសមាគមការពារសិទ្ធិមនុស្សអាដហុក លោក សួស ណារិន ដែលធ្លាប់ទទួលពាក្យបណ្ដឹងពីប្រជាពលរដ្ឋជុំវិញការប៉ះពាល់ បានមានប្រសាសន៍ថា លោកមិនមានឯកទេសខាងអគ្គិសនីទេ ក៏ប៉ុន្តែក្នុងពាក្យបណ្ដឹងរបស់ប្រជាពលរដ្ឋ គឺសំណូមពរឱ្យក្រុមហ៊ុនផ្លាស់ប្ដូរទីតាំងរោងម៉ាស៊ីនអគ្គិសនីនោះ ទៅដាក់ឱ្យឆ្ងាយពីលំនៅឋានបន្តិច។លោក សួស ណារិន យល់ថា បើសិនជាមានបញ្ហាដូច្នេះ គួរតែក្រុមហ៊ុនពិចារណាលើការផ្លាស់ប្ដូរទីតាំង។
សាលាខេត្តសៀមរាប កំពុងរៀបចំបង្កើតគណៈកម្មការចម្រុះមួយ ដើម្បីចុះទៅពិនិត្យមើលរោងម៉ាស៊ីនអគ្គិសនីដើរដោយជីវម៉ាស នៅស្រុកអង្គរជុំ ក្នុងពេលឆាប់ៗ។
អនុប្រធានការិយាល័យពិនិត្យជាតិពុលនៃមន្ទីរបរិស្ថាន ខេត្តសៀមរាប លោក ណម គឹមអ៊ន ដែលធ្លាប់ចុះធ្វើការរឿងនោះបានមានប្រសាសន៍ថា គម្រោងសាកល្បងអគ្គិសនីជនបទ ដែលដើរដោយថាមពលជីវម៉ាសនេះ គឺពិភពលោកកំពុងមានការលើកទឹកចិត្តឱ្យកែច្នៃ ពីព្រោះការកែច្នៃថាមពលដែលដើរដោយជីវម៉ាស គឺមានសារសំខាន់ក្នុងការជួយដីបរិស្ថាននៃផែនដី។ ទោះយ៉ាងណា មន្ត្រីដដែលបានសង្ស័យថា ការបង្កឱ្យប៉ះពាល់ដល់ប្រជាពលរដ្ឋ ប្រហែលបណ្ដាលមកពីសំឡេង ហើយនិងក្លិនចំហេះដែលភាយចេញ៖ «បើតាមបច្ចេកទេសនេះ គឺជាការកែច្នៃសំណល់ឡើងវិញ ហើយការកែច្នៃឡើងវិញនេះ ត្រូវបានគេលើកទឹកចិត្តឱ្យធ្វើជាជីវម៉ាស សូម្បីតែរដ្ឋាភិបាលបច្ចុប្បន្ន ក៏មានការលើកទឹកចិត្តឱ្យកែច្នៃសំណល់ឡើងវិញដែរ។ សំណល់ដែលផ្ដោតធ្វើជីវម៉ាសនេះ គឺអង្កាមជួយដល់កសិកម្ម ដើម្បីកាត់បន្ថយការសាយភាយនៃឧស្ម័នផ្ទាំងកញ្ចក់ វាអត់ធ្វើឱ្យមានការកើនឡើងនៃកម្ដៅផែនដីនោះទេ»។
ក្រុមហ៊ុន អាយ.អ៊ី.ឌី ឱ្យដឹងថា អគ្គិសនីដើរដោយថាមពលជីវម៉ាសនេះ គឺមានសារសំខាន់ដែលអាចជួយដល់កសិករឱ្យបានភ្លើងប្រើប្រាស់ក្នុងតម្លៃថោក ព្រមទាំងអាចយកផេះ អង្កាមពីរោងម៉ាស៊ីននោះទៅធ្វើជាជីកសិកម្មទៀតផង។ នៅពេលខាងមុខ ក្រុមហ៊ុន អាយ.អ៊ី.ឌី មានគម្រោងនឹងធ្វើអគ្គិសនីដូចនេះមួយទៀត នៅតំបន់ដាច់ស្រយាលនៃខេត្តព្រះវិហារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ