អង់គ្លេសផ្តល់មូលនិធិជិត ៦០ម៉ឺនដុល្លារ គាំទ្រដល់អង្គការសត្វព្រៃ និងរុក្ខជាតិអន្តរជាតិ
2022.07.29
រដ្ឋាភិបាលអង់គ្លេសបានផ្ដល់មូលនិធិជិត ៦០ម៉ឺនដុល្លារអាមេរិក សំរាប់គាំទ្រដល់អង្គការសត្វព្រៃនិងរុក្ខជាតិអន្តរជាតិ (Fauna & Flora International -Cambodia -FFI) រយៈពេល ៣ឆ្នាំ ដើម្បីពង្រឹងជីវភាព និងការគ្រប់គ្រងការអភិរក្សនៅក្នុងឧទ្យានជាតិវីរជ័យ ខេត្តរតនគីរី។
សេចក្តីប្រកាសព័ត៌មានរបស់ស្ថានទូតអង់គ្លេសប្រចាំនៅកម្ពុជា កាលពីថ្ងៃទី២៦ ខែកក្កដា ឲ្យដឹងថា គោលបំណងសំខាន់នៃមូលនិធិនេះ គឺដើម្បីជួយដល់ការអភិរក្សជីវសាស្ត្រដ៏សំខាន់ៗ ក្នុងតំបន់ និងជួយពង្រឹងសហគមន៍ជនជាតិដើមភាគតិច ព្រមទាំងគាំទ្រនិងលើកទឹកចិត្តឲ្យសហគមន៍ជនជាតិដើមភាគតិច ចូលរួមការពារប្រព័ន្ធអេកូឡូស៊ី ដែលគាំទ្រដល់ជីវភាពរស់នៅរបស់ពួកគេ។
ការប្រកាសផ្តល់ជំនួយនេះ ធ្វើឡើងក្រោយពីអនុប្រធានបេសកកម្មនៃស្ថានទូតអង់គ្លេសប្រចាំទីក្រុងភ្នំពេញ លោក ម៉ាក ថែរ (Marc Thayre) បានធ្វើទស្សនកិច្ចរយៈពេល ៦ថ្ងៃ គឺ ចាប់ពីថ្ងៃទី១០ ខែកក្កដា ដល់ថ្ងៃទី១៥ ខែកក្កដា ដើម្បីពិនិត្យមើលពីស្ថានភាព នៅតំបន់ឧទ្យានជាតិវីរជ័យ នៅខេត្តរតនគីរី និងបានជួបពិភាក្សាជាមួយមន្ត្រីរដ្ឋាភិបាល និងជួបពលរដ្ឋនៅតំបន់នោះ។
អង្គការសត្វព្រៃនិងរុក្ខជាតិអន្តរជាតិ (FFI) បានចាប់ផ្ដើមអនុវត្ដគម្រោងនៅក្នុងតំបន់ឧទ្យានជាតិវីរជ័យ តាំងពីឆ្នាំ២០០៨ ហើយគម្រោងបច្ចុប្បន្ន គឺកំពុងផ្ដោតលើការការពារជីវសាស្ត្រសំខាន់ៗ និងព្រៃតំបន់ត្រូពិក ដែលកំពុងរងការគំរាមកំហែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។