អ្នក​ធ្វើ​ការ​ទាក់ទង​ព្រៃឈើ​រិះគន់​លោក ហ៊ុន សែន ដែល​ព្រមាន​រុះ​ផ្ទះ​យក​ឈើ​ពី​មន្ត្រី​បក្ស​ប្រឆាំង

ដោយ សេក បណ្ឌិត
2019-01-16
អ៊ីម៉ែល
មតិ
Share
បោះពុម្ព
អាឡិកហាន់ដ្រូ ហ្គាន់ឡេស ដេវិតសិន (Alejandro Gonzalez Davidson) ប្រធាន​ចលនា​មាតា​ធម្មជាតិ ក្នុង​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​ទី​១៦ ខែ​កុម្ភៈ ឆ្នាំ​២០១៥។
អាឡិកហាន់ដ្រូ ហ្គាន់ឡេស ដេវិតសិន (Alejandro Gonzalez Davidson) ប្រធាន​ចលនា​មាតា​ធម្មជាតិ ក្នុង​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​ទី​១៦ ខែ​កុម្ភៈ ឆ្នាំ​២០១៥។
RFA

អ្នកធ្វើ​ការទាក់ទង​ព្រៃឈើ​លើកឡើង​ថា បទល្មើស​ព្រៃ​ដែល​បំផ្លាញ​ព្រៃ​កម្ពុជា​មិនមែន​កើតឡើង​ដោយសារ​ការ​កាប់​ឈើ​យក​ធ្វើ​ផ្ទះ​នោះ​ទេ ប៉ុន្តែ​ព្រៃឈើ​កម្ពុជា​វិនាស ព្រោះ​ឈ្មួញ​នាំ​យក​ទៅ​លក់​នៅ​ក្រៅ​ប្រទេស និង​ការប្រព្រឹត្ត​អំពើពុករលួយ​របស់​មន្ត្រី​មាន​អំណាច និង​ឈ្មួញ​ទុច្ចរិត។ ប្រតិកម្ម​នេះ​ក្រោយ​ពេល​មេដឹកនាំ​របប​ក្រុងភ្នំពេញ ព្រមាន​ចុះ​រុះ​ផ្ទះ​មន្ត្រី​​បក្ស​ប្រឆាំង​យក​ឈើ​មក​រក្សាទុក ព្រោះ​អ្នក​ទាំងនោះ​រិះគន់​លោក​ថា គ្មាន​សមត្ថភាព​ការពារ​ព្រៃឈើ។

អ្នក​ធ្វើ​ការងារ​ទាក់ទង​បរិស្ថាន​រិះគន់​ថា លោក ហ៊ុន សែន គ្មាន​សមត្ថភាព​ទប់ស្កាត់​បទល្មើស​ព្រៃឈើ​ទើប​បង្វែរ​ស្ថានការណ៍​ចោទ​ប្រកាន់​ថា មន្ត្រី​បក្ស​ប្រឆាំង​ជា​អ្នក​បំផ្លាញ ព្រៃឈើ​ទៅវិញ។ មន្ត្រី​កម្មវិធី​ពង្រឹង​សិទ្ធិ​អំណាច​សហគមន៍​មូលដ្ឋាន​នៃ​សមាគម​អាដហុក (ADHOC) លោក ប៉ែន បុណ្ណារ៍ សង្កេត​ឃើញ​ថា អ្នក​ដែល​មាន​ផ្ទះ​ធំៗ​ធ្វើ​ពី​ឈើ​ប្រណិត​មិនមែន ជា​មន្ត្រី​បក្ស​ប្រឆាំង​ទេ ប៉ុន្តែ​គឺជា​មន្ត្រី​នៃ​របប​លោក ហ៊ុន សែន និង​ក្រុម​ឧកញ៉ា​រកស៊ី​ឈើ។ លោក​បន្ត​ថា បើ​ការ​រុះ​ផ្ទះ​យក​ពី​មន្ត្រី​បក្ស​ប្រឆាំង ដែល​ជា​ការអនុវត្ត​ច្បាប់​របស់​របប​ក្រុងភ្នំពេញ​នោះ គួរតែ​អនុវត្ត​ឲ្យ​បាន​ស្មើភាព​គ្នា ដោយ​ត្រូវ​រុះ​យក​ពី​ផ្ទះ​ពី​មន្ត្រី​បក្ស​កាន់អំណាច និង​ឧកញ៉ា​ៗ​ទាំងនោះ​ផង៖ «ប្រសាសន៍​ថ្នាក់ដឹកនាំ​រដ្ឋ​យើង​រិះគន់​ការបាត់បង់​ព្រៃឈើ​គឺជា​រឿង​ពិត​សង្គម​ស៊ីវិល​យើង​ក៏​ប្រតិកម្ម​ច្រើន​ហើយ​ក្នុង​រឿង​ហ្នឹង យើង​ចង់​ឲ្យ​មានការ​អនុវត្ត​ច្បាប់​មិន​ថា គណបក្ស​ប្រឆាំង មិន​គណបក្សប្រឆាំង»

កាលពី​ថ្ងៃ​ទី​១៤ មករា លោក ហ៊ុន សែន បង្ហាញ​ការ​ខឹង​សម្បា​ទៅ​នឹង​មន្ត្រី​គណបក្សប្រឆាំង ដែល រិះគន់​លោក​រឿង​អសមត្ថភាព​ក្នុង​ការ​បង្ក្រាប​បទល្មើស​ព្រៃឈើ។ លោក ហ៊ុន សែន ថា ថ្ងៃ​ណាមួយ​លោក​នឹង​ទៅ​រុះ​ផ្ទះ​យក​ឈើ​ពី​មន្ត្រី​បក្ស​ប្រឆាំង​ទាំងនោះ​ដោយ​ទុក​តែ​ស៊ីម៉ងត៍។ លោក​ចោទ​ប្រកាន់​ថា ផ្ទះ​របស់​បក្ស​ប្រឆាំង​ទាំងនោះ ធ្វើ​សុទ្ធតែ​ពី​ឈើ ប្រណីត​ៗ ដូចជា៖ បេង ធ្នង់ នាងនួន ជាដើម៖ «ជេរ​ឯង​ថា​ធ្វើ​ឲ្យ​បាត់​ព្រៃឈើ​ក្នុងពេលដែល​ពួកវា​ធ្វើ​ចម្ការ ជេរ​ឯង​ថា​ធ្វើ​ឲ្យ​បាត់​ព្រៃ ឈើ​ក្នុង ពេល​ដែល​ពួកគេ​ផ្ទះ​វា​ជញ្ជាំង​សុទ្ធតែ​ឈើ​ខាងក្នុង​សុទ្ធតែ​ឈើ អ៊ីចឹង​ទេ​ឲ្យ​មុខ​សញ្ញា​ពួក​ប្រឆាំង ខ្ញុំ​ដើរ​ទៅ​រុះ​ផ្ទះ​ទាំងអស់​រុះ​ផ្ទះ​ហើយ​យក​ឈើ មកពី​អ្ហែង​ថា​អញ​ធ្វើ​បាត់ ឈើ​ចុះ​ឈើ​អ្ហែង ធ្វើ​ផ្ទះ​ហ្នឹង​បាន​ពី​ណា?»

ស្ថាបនិក​អង្គការ​មាតា​ធម្មជាតិ គឺ​លោក អាឡិកហាន់ដ្រូ ហ្គន់ហ្សាឡេស ដេវិតសិន (Alejandro Gonzalez Davidson) យល់​ថា ការប្រើប្រាស់​ព្រៃឈើ​សម្រាប់​តម្រូវការ នៃ​សាងសង់​ផ្ទះ វត្ត​អារាម ឬ​សាលារៀន មិន​បាន​ធ្វើ​ឲ្យ​បាត់បង់​ព្រៃឈើ​កម្ពុជា​ទេ ប៉ុន្តែ​លោក​ថា ព្រៃឈើ​ដែល​រង​ភាព​វិនាសកម្ម​នោះ​គឺ​ការ​នាំ​ឈើ​យក​ទៅ​លក់​ទៅ​ក្រៅ​ប្រទេស និង​ក្រុម​អ្នក​មានអំណាច​នាំ​គ្នា​ប្រមូល​ឈើ​ប្រណីត​មក​តុប​តែង​នៅផ្ទះ​ហួស​តម្រូវការ។ សកម្មជន​បរិស្ថាន​បរទេស​ដែល​ស្រលាញ់​ព្រៃឈើ​កម្ពុជា​រូប​នេះ យល់ថា បើ​លោក ហ៊ុន សែន មានបំណង​ទប់ស្កាត់​បទល្មើស​ព្រៃឈើ​មែន​នោះ​គឺ​ត្រូវ​ឲ្យ​មាន​អង្គការ​សង្គម​ស៊ីវិល​ជាតិ និង​អន្តរជាតិ​ចូលរួម៖ «បើ​សិន​គាត់ (លោក ហ៊ុន សែន​) មានបំណង​ពិតប្រាកដ​គាត់​មិន ចាំបាច់​ទៅ គំរាម​បក្ស​ប្រឆាំង​ឬ​ប្រជាជន​មូលដ្ឋាន​គាត់​គួរ​ទទួលស្គាល់​ជា​សាធារណៈ​ការ​ការពារ​ព្រៃឈើ​ហួស​ពី​សមត្ថភាព​រដ្ឋាភិបាល»

ទីភ្នាក់ងារ​ស៊ើបអង្កេត​បរិស្ថាន​ហៅ​កាត់​ថា EIA ដែល​មាន​មូលដ្ឋាន​នៅ​ប្រទេស​អង់គ្លេស កាល​ពី​ខែ​ឧសភា ឆ្នាំ​២១០៨ បាន​ផ្សាយ​របាយការណ៍​ស្រាវជ្រាវ​ថ្មី​មួយ ដាក់​ចំណងជើង​ថា ជនល្មើស​មុខ​ដដែលៗ​។ របាយការណ៍​នេះ​បង្ហាញ​ឲ្យ​ដឹង​ថា វៀតណាម​នៅតែ​ជា​មេ​ខ្លោង​ទិញ​ឈើ ពី​តំបន់​ការពារ​របស់​ប្រទេស​កម្ពុជា រួមមាន តំបន់​ព្រៃ​អភិរក្ស​ឧទ្យាន​ជាតិ​វីរជ័យ ក្នុង​ខេត្ត​រតនគីរី និង​ខេត្ត​ស្ទឹងត្រែង ទំនប់​សេសាន​ក្រោម​ពីរ ក្នុង​ខេត្ត​ស្ទឹងត្រែង និង​ដែន​ជម្រក​សត្វព្រៃ​ភ្នំ​ព្រិច ខេត្ត​មណ្ឌលគិរី កំពុង​ទទួលរង​ការ​កាប់​បំផ្លាញ​ព្រៃឈើ​ទ្រង់ទ្រាយ​ធំ ពី​សំណាក់​ក្រុមហ៊ុន​សម្បទាន និង​ឈ្មួញ​វៀតណាម ដែល​មាន​ការ​បើក​ដៃ​ពី​អាជ្ញាធរ​របស់​របប​លោក ហ៊ុន សែន។

ចំណែក អង្គការ Global Witness អះអាង​ថា ក្រុមហ៊ុន ទ្រី ភាព និង​បណ្ដាញ​របស់​ក្រុមហ៊ុន​នេះ កំពុង​បង្ក​វិនាសកម្ម​ព្រៃឈើ​នៅ​កម្ពុជា និង​បំផ្លាញ​ជីវភាព​រស់នៅ​របស់​ប្រជា​សហគមន៍​ជនជាតិ​ដើម។ យ៉ាងណាក៏ដោយ Global Witness លើកឡើង​ថា សមត្ថកិច្ច​នៃ​របប​ក្រុងភ្នំពេញ​មិន​ត្រឹមតែ​មិន​បញ្ឈប់​សកម្មភាព​របស់​ក្រុមហ៊ុន ទ្រី ភាព នោះ​ទេ តែ​ពួកគេ​បែរជា​ជួយ​ការពារ​ក្រុមហ៊ុន ទ្រី ភាព នេះ​ទៅវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

thuggish destroyed capitalism,feudalism,intellectual...and when they got power in hands they're very happier whatever they want....

Alex u have to read or researching more in world history website about Khmer history before 1970-1975-1979 to present and why khmer became as like today brother"no thousands years khmer history have anything like this".Let me tell u brother this horrible regime who risen from ashes,evildoer,satanism,barbarism,thuggish,radicalism,fascism,communism,gangster,thieves,crooks or authoritarianism or whatever that why the Cambodia became as like today.Just be patience brother or take a little well before everything could be back to normal like 1954 to 1970"independence".Today the whole entirely country are so desperate by violence thuggish that cause this small country face catastrophic ahead.If, all these crooks,thieves,gangster are still in power....there are no freedom,democracy,free speech,free press,free advertising or no liberty at all"those hardcore group came from all above backgrounds".It's hard to explain or tell them to understand because stupid or bully person hardest to understand that why like u take a cow to watch TV and say muuuuuuve...u know what i mean alex?or like a God said...a way to the heaven most pple hard to go...if a way to the hell...most pple like to go as like today.

Jan 16, 2019 02:28 PM

គេហទំព័រ​ទាំងមូល