អ្នកអភិរក្សនៅតំបន់ប្រើប្រាស់ច្រើនយ៉ាងសំឡូតបារម្ភបាត់បង់ព្រៃឈើនិងដីអភិរក្ស
2014.10.18
សកម្មភាពកាប់ឈើក្នុងតំបន់អភិរក្សប្រើប្រាស់ច្រើនយ៉ាងសំឡូត នៅចំណុចភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ រូបថតថ្ងៃទី១៥ ខែតុលា ឆ្នាំ២០១៤
អ្នកអភិរក្សព្រៃឈើរបស់អង្គការអន្តរជាតិ អិមជេភី (MJP) នៅតំបន់ប្រើប្រាស់ច្រើនយ៉ាងសំឡូត សម្ដែងការសោកស្ដាយចំពោះសកម្មភាពកាប់ព្រៃឈើលើដីអភិរក្ស ដើម្បីយកដីធ្វើជាកម្មសិទ្ធិឯកជនកាន់តែមានសភាពធ្ងន់ឡើងជាលំដាប់។
ចំណែកខាងអាជ្ញាធរដែនដីវិញ មិនឃើញមានវិធានការទប់ស្កាត់ចំពោះករណីនោះឡើយ។ នៅក្នុងករណីនេះដែរ សមត្ថកិច្ចបរិស្ថានខេត្តប៉ៃលិន បញ្ជាក់ថា សកម្មភាពកាប់ឈើនោះមានតិចតួច ហើយអាជ្ញាធរតែងតែយកចិត្តទុកដាក់លើការងារនេះ។
«ឥឡូវដូចយើងនៅឈរនៅក្នុងព្រៃទាំងអស់គ្នានេះ យើងអត់ឃើញមានសត្វព្រៃ យើងអត់មានឃើញសូម្បីបក្សាបក្សី អត់ឃើញមានហើរព្រោងព្រាតផង។ ផ្ទុយទៅវិញ បែរជាឃើញស្នាមកាប់ឈើថ្មី ឃើញកំណាត់ឈើដួលរនូតដដែលពេញព្រៃ ហើយឃើញវាលចម្ការដែលបានកាប់ហើយដាំដំណាំជំនួសព្រៃឈើវិញ»។
ដើមឈើតូចធំជាច្រើននៅតំបន់អភិរក្សចំណុចភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ត្រូវគេកាប់ថ្មីៗប្រមាណជា ២សប្ដាហ៍កន្លងទៅ ហើយផ្ដួលចោលពេញដីប្រហែលជាង ២០ហិកតារ។
ប្រធានអង្គការ អិមជេភី អភិរក្សព្រៃឈើនៅតំបន់ប៉ៃលិនបាត់ដំបង លោក ស្តាហ្វាន បុហ្គណា (Stephan Bognar) ថ្លែងគ្រវីក្បាលតតាត់ទៅកាន់ក្រុមមន្ត្រីអភិរក្ស បន្ទាប់ពីចុះត្រួតពិនិត្យរួមគ្នានៅតំបន់ព្រៃឈើចំណុចភ្នំដំបង តាមរយៈអ្នកបកប្រែថា លោកសោកស្ដាយជាខ្លាំងចំពោះដើមឈើដែលគេកាប់ផ្ដួលចោល ហើយយកដីធ្វើជាកម្មសិទ្ធិ។ លោកថា បញ្ហានេះមិនគួរកើតឡើងទាល់តែសោះ ពីព្រោះព្រៃឈើមានសារសំខាន់ណាស់ដល់អាយុជីវិតមនុស្ស។
លោកបន្តទៀតថា អាជ្ញាធរពាក់ព័ន្ធនៅខេត្តប៉ៃលិន និងបាត់ដំបង គួរមានវិធានការទប់ស្កាត់ជាបន្ទាន់ ចំពោះករណីនេះ បើពុំដូច្នោះទេ ព្រៃឈើនៅតំបន់អភិរក្សអាចនឹងហិនហោចអស់ក្នុងរយៈពេលដ៏ខ្លីខាងមុខជាពុំខាន៖ «ឥឡូវដូចយើងនៅឈរនៅក្នុងព្រៃទាំងអស់គ្នានេះ យើងអត់ឃើញមានសត្វព្រៃ យើងអត់មានឃើញសូម្បីបក្សាបក្សី អត់ឃើញមានហើរព្រោងព្រាតផង។ ផ្ទុយទៅវិញ បែរជាឃើញស្នាមកាប់ឈើថ្មី ឃើញកំណាត់ឈើដួលរនូតដដែលពេញព្រៃ ហើយឃើញវាលចម្ការដែលបានកាប់ហើយដាំដំណាំជំនួសព្រៃឈើវិញ»។
ឆ្លើយតបនឹងបញ្ហានេះ ប្រធានមន្ទីរបរិស្ថាន ខេត្តប៉ៃលិន លោក គីម សុខា មានប្រសាសន៍កាលពីថ្ងៃទី១៣ តុលា ថា ការកាប់បំផ្លាញព្រៃឈើនៅតំបន់អភិរក្សមានចំនួនតិចតួច ហើយថា បញ្ហាដែលកើតឡើងកន្លងមក អាជ្ញាធរតែងតែមានវិធានការទប់ស្កាត់ជាបន្តបន្ទាប់ គឺមិនបណ្ដោយពួកគេធ្វើសកម្មភាពតាមអំពើចិត្តឡើយ។ ទោះជាយ៉ាងនេះក្ដី លោកថា នឹងមានវិធានការលើការងារនេះបន្តទៀត៖ «យើងត្រួតពិនិត្យទៅយើងឃើញមានពីរគ្រួសារនៅភ្នំដំបង។ បាទ! ហើយអាដែងគាត់មកពីខាងខេត្តបាត់ដំបង ហើយពីរគ្រួសារទៀតនៅខាងប៉ៃលិន ដែលពួកខ្ញុំបានអនុវត្តច្បាប់កិច្ចសន្យា គាត់ហ្នឹងគឺមានតែ ៤ទេ សរុបទាំងបាត់ដំបង ហើយនិងប៉ៃលិន ហ្នឹង។ ហើយបើឲ្យមានអីច្រើនទៀត គឺមិនមានទេ បើតាមស្មានមើល ប្រហែលជាម៉ាហិត (ហិកតារ) ២ហិតទេ តែយើងទប់ស្កាត់ទាន់ពេលវេលា»។
ទោះជាយ៉ាងនេះក្ដី លោក ស្តាហ្វាន បុហ្គណា កត់សម្គាល់ថា ការបំផ្លាញព្រៃឈើកន្លងមក អាជ្ញាធរតែងតែឆ្លើយបដិសេធជានិច្ច ប៉ុន្តែភាពជាក់ស្ដែងពុំដូច្នោះឡើយ គឺការកាប់ព្រៃឈើពីមួយឆ្នាំទៅមួយឆ្នាំនៅតែកើនឡើងដដែល។
ទាក់ទងនឹងបញ្ហានេះដែរ មន្ត្រីផ្នែកឥណទានរបស់អង្គការ អិមជេភី ដែលធ្វើការនៅតំបន់អភិរក្សនោះថ្លែងថា សកម្មភាពប្រជាពលរដ្ឋដែលជាក្រុមអ្នកកាប់បំផ្លាញព្រៃឈើនៅតំបន់អភិរក្ស ភាគច្រើនកើតចេញពីការមិនទប់ស្កាត់របស់អាជ្ញាធរមូលដ្ឋាន។ លោកបន្តថា បើទោះជាកន្លងមក មានទីស្នាក់ការរបស់មន្ត្រីបរិស្ថានខេត្តប៉ៃលិន បានដាក់ប្រចាំការនៅតំបន់អភិរក្សខ្លះមែនក៏ដោយ ប៉ុន្តែប៉ុស្តិ៍ប្រចាំការទាំងនោះហាក់ធ្វើគធ្វើថ្លង់ បណ្ដោយឲ្យគេលួចកាប់ឈើអស់គ្មានសល់។ តំបន់ដែលធ្លាប់តែមានព្រៃក្រាស់ឃ្មឹក ប្រែក្លាយទៅជាទីវាលស្រឡះត្លេវបណ្ដើរៗទៅហើយ៖ «ហើយសួរថាឆ្ងាយពីប៉ុស្តិ៍អត់ជុំវិញប៉ុស្តិ៍ ហើយអ៊ីចឹងប្រជាជនចេះមើលបំណាំ។ អឺ! វាឈានរាលដាលមកខាងព្រៃសហគមន៍ផ្សេងៗ ដែលយើងខំការពារបង្កើតសហគមន៍ព្រៃឈើអីហ្នឹង។ គាត់ថាហឹ! អិមជេភី ការពារតែភ្នំខាងណេះ ផ្នែកតំបន់ការពារនោះកាប់បំផ្លាញអស់ហើយ។ អ៊ីចឹងការកាប់បំផ្លាញនៅតំបន់ហ្នឹងដែរ គឺអត់មានឃើញលទ្ធផល អឺពីមន្ត្រីបរិស្ថានជំនាញរបស់រដ្ឋាភិបាលហ្នឹង គាត់មានប្រតិកម្មថា តើគួរតែធ្វើយ៉ាងម៉េច? អត់ដែលមានរលីង តាំងពីខ្ញុំមកធ្វើការទីនេះ ប្រហែលជារយៈពេល ៥ឆ្នាំហើយ។ អត់ដែលមានឃើញមន្ត្រីរបស់រដ្ឋាភិបាលហ្នឹងចាត់វិធានការទៅលើជនល្មើសដែលកាប់ទន្ទ្រានយកដីហ្នឹង»។
លោកបន្តថា កន្លងមក ខាងមន្ត្រីអភិរក្សរបស់អង្គការ អិមជេភី តែងចុះល្បាតទប់ស្កាត់ និងតាមចាប់ក្រុមប្រជាពលរដ្ឋអ្នកកាប់ព្រៃឈើជាបន្តបន្ទាប់ រហូតមានពេលខ្លះចាប់ក្រុមអ្នកកាប់ព្រៃឈើទាំងនោះ ហើយបញ្ជូនទៅឲ្យអាជ្ញាធរចាត់វិធានការតាមផ្លូវច្បាប់ ប៉ុន្តែពុំមានចំណាត់ការពីខាងអាជ្ញាធរឡើយ៖ «ពេលដែលយើងចាប់បានមកទៅ គេមកដោះលែងទៅ គេមកសុំដោះលែង ផាកពិន័យបន្តិចបន្តួច ធ្វើកិច្ចសន្យាក៏ដោះលែងទៅ។ ប៉ុន្តែយើងមិនបានសិក្សាថាអ្នកកាប់ហ្នឹងកាប់ឲ្យអ្នកណា ភាគច្រើនអ្នកកាប់ដែលយើងចាប់បានហ្នឹង មួយទៀត គឺស៊ីឈ្នួលគេ ហើយអាជ្ញាធរក៏មិនបានស្រាវជ្រាវថា ឥឡូវហ្នឹងគាត់ស៊ីឈ្នួលឲ្យអ្នកណា អ្នកណាគេ បញ្ជាឲ្យគាត់កាប់។ ដូចនៅស្លែវបច្ចុប្បន្នអ៊ីចឹង ប៉ៃលិន គេថាដីរបស់គេ ចំណែក លោក ថន គឹមហុង ហ្នឹង នាយកតំបន់ហ្នឹង គាត់ឆ្លើយថា អាហ្នឹងតំបន់ចិរភាពអភិវឌ្ឍន៍ចិរភាពនៅក្នុងតំបន់ប្រើប្រាស់ច្រើនយ៉ាងហ្នឹង»។
របាយការណ៍របស់អង្គការ អិមជេភី បង្ហាញថា នៅឆ្នាំ២០០៨ ដល់ឆ្នាំ២០០៩ ផ្ទះរបស់ប្រជាពលរដ្ឋនៅតំបន់អភិរក្សភ្នំដំបង មានប្រមាណ ៦០ខ្នង ប៉ុន្តែផ្ទះដែលមានមនុស្សរស់នៅគឺមានប្រមាណ ៥០ផ្ទះ។ ក្រៅពីនោះ គឺផ្ទះដែលសង់ហើយ តែគ្មានមនុស្សរស់នៅទេ។ ចាប់ពីឆ្នាំ២០០៩ រហូតមកទល់ឆ្នាំ២០១៣ ចំនួនផ្ទះមានការកើនឡើងរហូតដល់ ១៩០ខ្នង។ របាយការណ៍បានឲ្យដឹងទៀតថា រហូតមកទល់ពេលនេះ អាជ្ញាធរ និងមន្ត្រីជំនាញ នៅតែមានការព្រងើយកន្តើយចំពោះបញ្ហាដែលកើតឡើងនោះនៅឡើយ។ បញ្ហាទាំងនេះហើយ ជាហេតុធ្វើឲ្យចំណុចភូមិសាស្ត្រនៅភ្នំដំបង បាត់បង់ដីព្រៃរាប់ពាន់ហិកតារពីតំបន់អភិរក្សការពារ។ ភូមិសាស្ត្រភ្នំដំបង ជាតំបន់មួយមានសក្ដានុពលយ៉ាងខ្លាំងក្លា ជាតំបន់ភ្នំមានព្រៃឈើធំៗយ៉ាងស្រស់ត្រកាល ជាតំបន់នៅជាប់មាត់ស្ទឹងសង្កែ ដែលជាប្រភពមួយការពារតំបន់អេកូឡូស៊ីដ៏សំខាន់ ជួយទប់ស្កាត់ការបាក់ដីហូរចូលក្នុងស្ទឹងសង្កែ។
តំបន់ប្រើប្រាស់ច្រើនយ៉ាងសំឡូត ជាជំនួយអភិរក្សឧបត្ថម្ភដោយតារាភាពយន្តហូលីហ្វូត (Hollywood) របស់អាមេរិកឈ្មោះ កញ្ញា អេនជេលីណា ចូលី (Angelina Jolie) ដែលអភិរក្សដោយអង្គការ អិមជេភី។ របាយការណ៍របស់អង្គការ អិមជេភី បង្ហាញថា នៅឆ្នាំ១៩៩៣ ចំនួនផ្ទៃដីព្រៃឈើនៅតំបន់អភិរក្សប្រមាណ ៦ម៉ឺនហិកតារ ហើយផ្ទៃដីមួយចំនួន បានបាត់បង់ដោយសារការកាប់ព្រៃឈើយកដីធ្វើជាកម្មសិទ្ធិខុសច្បាប់ប្រមាណ ៣០០ហិកតារក្នុងមួយឆ្នាំ។ បច្ចុប្បន្ន ព្រៃឈើដែលនៅសេសសល់មានប្រមាណ ៤ម៉ឺនហិកតារ។
តែយ៉ាងណា លោក ស្តាហ្វាន បុហ្គណា មានគម្រោងជួបពិភាក្សាជាមួយមន្ត្រីពាក់ព័ន្ធជាន់ខ្ពស់របស់ខេត្តបាត់ដំបង និងខេត្តប៉ៃលិន ក្នុងពេលឆាប់ៗ ដើម្បីរកដំណោះស្រាយរួមគ្នាមួយ ធ្វើយ៉ាងណាទប់ស្កាត់មិនឲ្យមានការរុករានកាប់ឆ្ការព្រៃ ការរុករករ៉ែត្បូង និងរ៉ែមាសនៅតំបន់អភិរក្សបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ