ស្ថានភាពទឹកជំនន់ទន្លេមេគង្គនៅខេត្តមួយចំនួនមានសភាពធូរស្រាល
2014.08.09
ស្ថានភាពទឹកជំនន់ទន្លេមេគង្គ គិតមកដល់ថ្ងៃទី៩ សីហា នេះ មានភាពធូរស្រាលបន្តិចហើយ គឺមិនមានការកើនឡើងទេ ហើយស្ថានភាពទៅប៉ុន្មានថ្ងៃខាងមុខទៀត គឺនឹងមានភាពប្រសើរឡើងវិញ។ អាជ្ញាធរខេត្តមួយចំនួនបញ្ជាក់ថា ការខូចខាតមិនទាន់ធ្ងន់ធ្ងរទេ ព្រោះទឹកទើបតែឡើង ហើយឆាប់ស្រកទៅវិញ។
អាជ្ញាធរឱ្យដឹងថា ស្ថានភាពទឹកជំនន់ទន្លេមេគង្គ បានធូរស្រាលបន្តិចហើយ ហើយអាជ្ញាធរនៅតែបន្តតាមដានស្ថានភាពទឹកនេះបន្តទៀត ពិសេស គឺតាមដានដល់ការរស់នៅរបស់ប្រជាពលរដ្ឋនៅតាមដងទន្លេ និងនៅតាមខ្សែទឹកទាំងអស់។
អភិបាលរងខេត្តកំពង់ចាម លោក ជីម លាវ មានប្រសាសន៍ថា នាប៉ុន្មានថ្ងៃមកនេះ ទឹកទន្លេមេគង្គបានហក់ឡើងយ៉ាងឆាប់រហ័ស ដែលធ្វើឱ្យប្រជាពលរដ្ឋនៅតាមដងទន្លេ ដូចជា នៅស្រុកស្ទឹងត្រង់ កំពង់សៀម កោះសូទិន កងមាស ស្រីសន្ធរ ជាដើមនោះ ត្រូវបានជម្លៀសទៅកាន់ទីទួលសុវត្ថិភាពប្រមាណ ១.៥០០គ្រួសារហើយ។ លោកបន្តថា មនុស្សស្លាប់ចំនួន ៦នាក់ កុមារពីរនាក់ ផ្ទះសម្បែងមួយចំនួនត្រូវខូចខាតទាំងស្រុង។ ចំណែកឯផលប៉ះពាល់ផ្សេងទៀត អាជ្ញាធរមិនទាន់អាចកំណត់បានទេ ប៉ុន្តែយ៉ាងណា ផលប៉ះពាល់ទាំងនោះមិនទាន់មានអ្វីធ្ងន់ធ្ងរឡើយ។
លោកបញ្ជាក់ថា ខាងអាជ្ញាធរកំពុងតែតាមដានស្ថានភាពរស់នៅរបស់ប្រជាពលរដ្ឋបន្តទៀត៖ «ក្រោមការបញ្ជារបស់ឯកឧត្តមអភិបាលខេត្ត គឺឯកឧត្តម លន់ លឹមថៃ បានចាត់ឱ្យក្រុមការងារក្នុងជួររដ្ឋាភិបាលខេត្ត ចុះតាមដានជាប់ជាប្រចាំគ្រប់ស្រុកទាំងអស់ ដើម្បីក្តាប់ឱ្យបានសភាពការណ៍នៅតាមប្រជាជនយើងឱ្យទាន់ពេលវេលា។ បញ្ហាទាំងអស់ ត្រៀមហើយជាស្រេចការខ្វះខាត ដូចជា ថ្នាំសង្កូវ មធ្យោបាយដឹកជញ្ជូនស្បៀងអាហារ ដើម្បីដោះស្រាយនូវប្រជាជនដែលរងគ្រោះ»។
ចំណែកខេត្តត្បូងឃ្មុំ ស្ថានភាពទឹកជំនន់ក៏មានភាពប្រសើរហើយដែរ។ អភិបាលខេត្តត្បូងឃ្មុំ លោក ប្រាជ្ញ ច័ន្ទ មានប្រសាសន៍ថា ទឹកជំនន់កន្លងមក ធ្វើឱ្យប្រជាពលរដ្ឋប្រមាណ ២.៤០០គ្រួសារ ដែលស្នើនឹងចំនួនមនុស្សជាង ៧ពាន់នាក់ ត្រូវជម្លៀសទៅកាន់ទីទួលសុវត្ថិភាព។ ដោយឡែក កុមារពីរនាក់ស្លាប់ដោយទឹកជំនន់ ម្នាក់មានស្រុកកំណើតនៅខេត្តព្រៃវែង ហើយផលប៉ះពាល់ផ្សេងទៀតនោះ គឺមិនទាន់អាចកំណត់បានយ៉ាងណាទេ។
ដោយឡែក នៅខេត្តក្រចេះ ទឹកទន្លេកំពុងចាប់ផ្ដើមស្រកហើយ ប៉ុន្តែទឹកទន្លេដែលហក់ឡើងខ្លាំងប៉ុន្មានថ្ងៃមកនេះ ក៏បានធ្វើឱ្យមនុស្ស ៤នាក់ស្លាប់ ក្នុងនោះស្រីពីរនាក់ កុមារម្នាក់ និងបុរសវិកលចរិតម្នាក់។ ហើយប្រជាពលរដ្ឋជាច្រើនរយគ្រួសារផ្សេងទៀត ក៏ត្រូវជម្លៀសទៅកាន់ទីទួលសុវត្ថិភាពដែរ។ រីឯខេត្តស្ទឹងត្រែង វិញ ស្ថានភាពទឹកទន្លេក៏បានស្រកហើយដែរ ពិសេសដៃទន្លេមេគង្គធំៗបី គឺទន្លេសេសាន ទន្លេស្រែពក និងទន្លេសេកុង ប៉ុន្តែគ្រាន់តែទឹកស្ថិតនៅលើកម្រិតប្រកាសអាសន្ននៅឡើយ។
នាយករដ្ឋបាលសាលាខេត្តស្ទឹងត្រែង លោក ដួង ពៅ មានប្រសាសន៍ថា ទឹកដែលបានហក់ឡើងកន្លងមក ក៏បានធ្វើឱ្យប្រជាពលរដ្ឋបីនាក់ស្លាប់ ក្នុងនោះស្រីម្នាក់។ ចំណែកប្រជាពលរដ្ឋជាង ៣០០គ្រួសារផ្សេងទៀត ត្រូវជម្លៀសទៅកាន់ទីទួលសុវត្ថិភាព។ លោកបន្តថា អាជ្ញាធរកំពុងយកចិត្តទុកដាក់ចំពោះស្ថានភាពរស់នៅរបស់ប្រជាពលរដ្ឋ និងកំពុងឃ្លាំមើលស្ថានភាពទឹកទន្លេបន្តទៀត។
វិទ្យុអាស៊ីសេរី ព្យាយាមទាក់ទងទៅទេសរដ្ឋមន្ត្រី និងជាអនុប្រធាននៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ដើម្បីជម្រាបសួរពីផលប៉ះពាល់ និងចំនួនអ្នកស្លាប់ដោយគ្រោះទឹកជំនន់នៅទូទាំងប្រទេស ប៉ុន្តែលោកមិនទទួលទូរស័ព្ទឡើយនៅថ្ងៃទី៩ សីហា។
ទាក់ទងនឹងបញ្ហាទឹកជំនន់ទន្លេមេគង្គនេះ ប្រធាននាយកដ្ឋានជលសាស្ត្រ និងការងារទន្លេ លោក ម៉ៅ ហាក់ មានប្រសាសន៍ថា ស្ថានភាពទឹកទន្លេមកដល់ពេលនេះ គឺមានភាពប្រសើរជាងប៉ុន្មានថ្ងៃមុនហើយ ហើយនឹងអាចធូរស្រាលបន្តទៀតនាប៉ុន្មានថ្ងៃខាងមុខ ពិសេសខេត្តដែលជាប់ដងទន្លេមេគង្គខាងលើនៃប្រទេសកម្ពុជា រួមមានខេត្តស្ទឹងត្រែង ក្រចេះ កំពង់ចាម ជាដើម៖ «ទឹកហ្នឹងក្នុងរយៈប៉ុន្មាន? យើងត្រូវយល់ថាអ៊ីចេះ ក្នុងរយៈពេលប៉ុន្មានថ្ងៃខាងមុខនេះ ទឹកហ្នឹងនឹងធូរស្រាលបន្តិចហើយ ប៉ុន្តែយើងត្រូវគិតថា ស្ថានភាពទឹកទន្លេដល់ចុងខែប្រាំបួន ឬដើមខែដប់ បានវាឡើងអស់នៃការកើនឡើង។ អ៊ីចឹងតែយ៉ាងម៉េចក៏ដោយ នៅប៉ុន្មានហ្នឹង គឺធូរស្រាលហើយបាទ»។
លោកបន្ថែមថា ខាងក្រសួងធនធានទឹក នឹងបន្តតាមដានស្ថានភាពទឹកទន្លេបន្តទៀត ហើយបើមានការប្រែប្រួលយ៉ាងណានោះ ខាងក្រសួងនឹងជូនដំណឹងដល់ប្រជាពលរដ្ឋទាំងអស់ ពិសេសស្ថាប័នពាក់ព័ន្ធ ដើម្បីត្រៀមលក្ខណៈទុកជាមុន៕