GW ទាមទារឲ្យក្រុមហ៊ុនវៀតណាមដោះស្រាយវិបត្តិបរិស្ថាននៅកម្ពុជា
2013.11.13
កុម្ភៈ-២០១៣៖ ដើមឈើច្បោះ ឬដើមឈើរបស់ពលរដ្ឋផលិតជ័រទឹកនៅក្នុងដែនជម្រកសត្វព្រៃលំផាត់ ខេត្តរតនគិរី ដែលប្រភពពីពលរដ្ឋអះអាងថា ត្រូវកាប់ដោយក្រុមហ៊ុន ហ័ង អាញ លំផាត់ (Hoang Anh Lumphat) ជាសាខារបស់ក្រុមហ៊ុន ហ័ង អាញ យ៉ាឡាយ (HAGL)។
អង្គការឃ្លាំមើលពិភពលោក (Global Witness) ដែលមានមូលដ្ឋានក្នុងប្រទេសអង់គ្លេស នៅថ្ងៃព្រហស្បតិ៍ នេះ បានទាមទារឱ្យក្រុមហ៊ុនវៀតណាម ឈ្មោះ ហ្វាង អាន់ យ៉ាឡាយ (Hoang Anh Gia Lai= HAGL) គោរពការសន្យារបស់ខ្លួនកាលពី ៦ខែមុន ក្នុងការដោះស្រាយវិបត្តិបរិស្ថាននៅក្នុងប្រទេសកម្ពុជា ដែលបណ្ដាលមកពីសកម្មភាពវិនិយោគរបស់ក្រុមហ៊ុននេះ។
អ្នកស្រី ម៉េកហ្កេន ម៉ាកឃីនណេស (Megan MacInnes) មន្ត្រីអង្គការឃ្លាំមើលពិភពលោក ថ្លែងប្រាប់វិទ្យុអាស៊ីសេរី តាមទូរស័ព្ទថា អស់រយៈពេល ៦ខែមកហើយ ក្រុមហ៊ុន ហ្វាង អាន់ យ៉ាឡាយ មិនបានគោរពតាមការសន្យារបស់ខ្លួន ក្នុងការកែលំអបញ្ហាបរិស្ថាននៅខេត្តរតនគិរី ឡើយ៖ «តាមការស្រាវជ្រាវរបស់យើងបង្ហាញថា ក្រុមហ៊ុន ហ្វាង អាន់ យ៉ាឡាយ មិនបានធ្វើឲ្យប្រសើរឡើងវិញនូវបញ្ហាបរិស្ថាន ដែលខ្លួនបានបង្កឡើងនោះទេ។ ហើយភាពអវិជ្ជមាននៃបរិស្ថាន ដោយសាររងឥទ្ធិពលសង្គម នៅតែបន្តក្នុងមូលដ្ឋានដដែល។ ហើយយើងជំរុញឲ្យក្រុមវិនិយោគទុនបរទេស ប្ដូរទិសដៅរបស់ខ្លួនក្នុងការដែលផ្តល់លុយឲ្យក្រុមហ៊ុន ហ្វាង អាន់ យ៉ាឡាយ ដោយសារក្រុមហ៊ុននេះមិនគោរពច្បាប់»។
កាលពីថ្ងៃទី១៣ ខែឧសភា អង្គការឃ្លាំមើលពិភពលោក បានបញ្ចេញរបាយការណ៍មួយមានចំណងជើងថា «រ៉ាប់ប៊ឺ បារ៉ិនស៍» (Rubber Barons) ទម្លាយឲ្យពិភពលោកដឹងអំពីសកម្មភាពបំពានច្បាប់ជាតិ បំផ្លាញធនធានធម្មជាតិ និងរំលោភសិទ្ធិមនុស្សនៅកម្ពុជា និងប្រទេសឡាវ ដោយក្រុមហ៊ុនដំណាំកៅស៊ូវៀតណាម ធំៗពីរ គឺក្រុមហ៊ុនឯកជន ហ្វាង អាន់ យ៉ាឡាយ និងក្រុមហ៊ុនរដ្ឋវៀតណាម រ៉ាប់ប៊ឺ គ្រូប (Vietnam Rubber Group=VRG)។
ក្រុមហ៊ុន ហ្វាង អាន់ យ៉ាឡាយ បានវិនិយោគលើវិស័យដំណាំកៅស៊ូនៅខេត្តរតនគិរី ក្នុងប្រទេសកម្ពុជា ជាប់ខេត្តយ៉ាឡាយ ប្រទេសវៀតណាម។ ក្រុមហ៊ុននេះកាន់កាប់ដីនៅខេត្តរតនគិរី ក្រោមផ្លាកសម្បទានដីសេដ្ឋកិច្ចចំនួនជិត ៥ម៉ឺនហិកតារ ខណៈដែលច្បាប់កម្ពុជា កំណត់មិនឲ្យលើសពី ១ម៉ឺនហិកតារ សម្រាប់ក្រុមហ៊ុនមួយ។ ចំណែកក្រុមហ៊ុន វៀតណាម រ៉ាប់ប៊ឺ គ្រូប វិញ មានអាជ្ញាប័ណ្ណដីសម្បទានសេដ្ឋកិច្ចសឹងពាក់កណ្ដាលប្រទេស គឺចាប់តាំងពីខេត្តរតនគិរី មណ្ឌលគិរី ក្រចេះ ស្ទឹងត្រែង ធ្លាយទៅដល់ខេត្តព្រះវិហារ និងខេត្តកំពង់ធំ។
វិទ្យុអាស៊ីសេរី មិនអាចសុំការបំភ្លឺពីក្រុមហ៊ុនវៀតណាម ទាំងពីរនេះបានទេ។
ទោះជាមានរបាយការណ៍នានាអំពីការបំផ្លិចបំផ្លាញបរិស្ថាននៅកម្ពុជា ដោយក្រុមហ៊ុនវិនិយោគបរទេសក៏ដោយ ក៏មន្ត្រីសឹងគ្រប់ជាន់ថ្នាក់របស់រដ្ឋាភិបាល តែងបដិសេធការអះអាងរបស់អង្គការឃ្លាំមើលពិភពលោកមួយនេះ។
តំណាងរាស្ត្ររបស់បក្សកាន់អំណាច លោក ឈាង វុន ថ្លែងថា អង្គការឃ្លាំមើលពិភពលោក នេះ ជាអង្គការមួយមិនដែលសរសេររបាយការណ៍ល្អអំពីកម្ពុជា នោះឡើយ។
ទោះបីជាយ៉ាងណាក៏ដោយ អនុប្រធានគណបក្សសង្គ្រោះជាតិ លោក កឹម សុខា បានទទួលស្គាល់ការងារដ៏មានវិជ្ជាជីវៈខ្ពស់របស់អង្គការឃ្លាំមើលពិភពលោក ហើយថា ក្រុមមន្ត្រីបក្សប្រជាជនកម្ពុជា ខ្វះការទទួលខុសត្រូវចំពោះបញ្ហាបរិស្ថានក្នុងប្រទេសខ្លួនដែលកំពុងជួបវិបត្តិធ្ងន់ធ្ងរ។
មន្ត្រីអង្គការឃ្លាំមើលធនធានធម្មជាតិលើពិភពលោក អ្នកស្រី ម៉េកហ្កេន ម៉ាកឃីនណេស បញ្ជាក់ថា ពលរដ្ឋខេត្តរតនគិរី បានបាត់បង់ដីស្រែចម្ការជាច្រើនហិកតារ បាត់បង់ព្រៃសហគមន៍ និងផ្ទះសម្បែង ដោយសារការបំពានរបស់ក្រុមហ៊ុនវៀតណាម ដែលមានការការពាររឹងមាំដោយកងកម្លាំងប្រដាប់អាវុធកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ