បណ្ដាញយុវជនកម្ពុជាស្នើសុំក្រុមហ៊ុនបំភ្លឺគម្រោងសង់ទំនប់វារីអគ្គិសនីស្ទឹងអារ៉ែង
2014.05.08
បណ្ដាញយុវជនកម្ពុជា បានដាក់សំណើទៅក្រុមហ៊ុន ស៊ីណូហាយត្រូ (Sinohydro) ឲ្យបំភ្លឺជុំវិញគម្រោងសាងសង់ទំនប់វារីអគ្គិសនីនៅតំបន់ស្ទឹងអារ៉ែង ស្រុកថ្មបាំង ខេត្តកោះកុង។
ប្រធានបណ្ដាញយុវជនកម្ពុជា លោក ទឹម ម៉ាឡៃ ថ្លែងនៅថ្ងៃទី៨ ឧសភា ថា បណ្ដាញយុវជន និងចលនាមាតាធម្មជាតិ ព្រមទាំងក្រុមការងារអភិរក្សធនធានធម្មជាតិ បានជ្រើសយកថ្ងៃទី១២ ខែឧសភា ដើម្បីជួបពិភាក្សាវែកញែកអំពីផលប៉ះពាល់នៃគម្រោងសាងសង់ទំនប់វារីអគ្គិសនីនៅតំបន់ស្ទឹងអារ៉ែងនេះ។
លោកថា ក្រុមហ៊ុនបានទទួលយកលិខិតរបស់ពួកគេហើយ ប៉ុន្តែនៅពុំទាន់ឆ្លើយតបចំពោះសំណើសុំជួបពិភាក្សានេះនៅឡើយទេ៖ «មូលហេតុចម្បងដែលត្រូវដាក់ទៅក្រុមហ៊ុន បើសិនជាក្រុមហ៊ុនពិតជាក្រុមហ៊ុនស្មោះត្រង់ ក្រុមហ៊ុនមួយដែលគោរពច្បាប់ប្រទេសកម្ពុជា គោរពនូវច្បាប់ទាក់ទងនឹងការសាងសងជាមុននោះ ត្រូវចុះពិគ្រោះយោបល់។ យើងចង់សួរមតិយោបល់ជាមួយគាត់ ព្រោះយើងមានសំណួរច្រើនពេលដែលប្រជុំជាមួយក្រសួង គាត់អត់បានឆ្លើយទេ គាត់ចាត់ទុកថា សំណួររបស់យើងជាសំណួរកូនក្មេង។ ចង់ឲ្យក្រុមហ៊ុនគាត់បំភ្លឺឲ្យច្បាស់មើលតើ គាត់មានជំហរបែបណាទៅលើការសាងសង់ទំនប់វារីអគ្គិសនីបន្តឬចុះសិក្សាហ្នឹង»។
កាលពីថ្ងៃទី២ ខែឧសភា ក្រសួងរ៉ែ និងថាមពល តំណាងក្រុមហ៊ុនស៊ីណូហាយត្រូ ព្រមទាំងបណ្ដាញយុវជន និងចលនាមាតាធម្មជាតិ បណ្ដាញព្រះសង្ឃឯករាជ្យ ព្រមទាំងក្រុមការងារអភិរក្សធនធានធម្មជាតិ បានជួបពិភាក្សាគ្នាម្ដងរួចមកហើយ ប៉ុន្តែបណ្ដាញយុវជនបានរិះគន់ថា ភាគីក្រុមហ៊ុនមិនឆ្លើយសំណួររបស់ពួកគេ ហើយក្រសួងជាអ្នកឆ្លើយជំនួសរហូត។ គម្រោងសាងសង់ទំនប់នេះត្រូវបានគេប៉ាន់ប្រមាណថា រងផលប៉ះពាល់ដល់ពលរដ្ឋជិត ៥០០គ្រួសារ។ ប៉ុន្តែរបាយការណ៍ក្រសួងរ៉ែ និងថាមពល ថាប៉ះពាល់ពលរដ្ឋជាង ៣០០គ្រួសារ ក្នុងឃុំចំនួន៣ គឺឃុំប្រឡាយ ឃុំជុំនាប់ និងឃុំថ្មដូនពៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
