សកម្មភាពជីករែងយករ៉ែមាសខុសច្បាប់កើនឡើងនៅខេត្តព្រះវិហារ
2013.08.31
បច្ចុប្បន្ន សកម្មភាពរែងយករ៉ែមាសខុសច្បាប់ទាំងនោះ កំពុងកើនឡើង ស្របពេលដែលរដ្ឋាភិបាលចាស់បានផុតអាណត្តិ ហើយកំពុងរង់ចាំការបង្កើតរដ្ឋាភិបាលថ្មី ក៏ប៉ុន្តែ ស្ថានការណ៍នយោបាយកំពុងជាប់គាំងនៅឡើយ។
ប្រភពពីប្រជាពលរដ្ឋនៅឃុំរមណី ស្រុករវៀង បានឱ្យដឹងថា ការជីកលុងភ្នំ ដើម្បីយករ៉ែមាសនៅក្រោមដី ដោយប្រើម៉ាស៊ីន កំពុងកើតមានជាច្រើនកន្លែងរយៈពេលជាច្រើនខែមកហើយ នៅក្នុងភូមិសាស្ត្រនៃឃុំរមទម្យ។
អ្នកភូមិបានអះអាងថា បើទោះបីជាសកម្មភាពជីករូងក្រោមដីយករ៉ែមាសជាច្រើនកន្លែងក៏ដោយ ក៏គេមិនទាន់ឃើញអាជ្ញាធរ ឬក៏សមត្ថកិច្ចមូលដ្ឋានណាមួយ ចេញមុខបង្ក្រាបទេ។
បុរសម្នាក់ជាអ្នកភូមិភ្នំដែក នៃឃុំរមណី គាត់បានមានប្រសាសន៍កាលពីរសៀលថ្ងៃសៅរ៍ ទី៣១ ខែសីហា ថា ជនជាតិវៀតណាម មួយចំនួន បាននាំគ្នាចូលទៅធ្វើសកម្មភាពជីករូងក្រោមដី ដើម្បីរែងយករ៉ែមាស។ បច្ចុប្បន្ននេះ ពួកគេកំពុងប្រើគ្រឿងម៉ាស៊ីនជីកយករ៉ែមាសជាច្រើនកន្លែង នៅភូមិរំដេង និងតំបន់ភ្នំលុង៖ «យួន អត់ចេះខ្មែរផង មកពីភ្នំពេញ មកពីស្រុកវាមកទំនាក់ទំនងជាមួយអាជ្ញាធរដែនដី វាជីកកកាយទៅ។ មានម៉ាស៊ីនពាក់កណ្ដាលស្វ័យប្រវត្តិ វាបញ្ឆេះម៉ាស៊ីនភ្លើងបាន វាលុងភ្នំ តភ្លើងចូលក្នុងរណ្ដៅវាតែម្ដង។ វាធ្វើជិតភ្នំលុង អាហ្នឹងយួន ដែរ ហើយមួយទៀតនៅភូមិរំដេង។ វាជីកច្រើនណាស់ ១ថ្ងៃបានប្រហែល ៣០តម្លឹង។ មួយទៀត គេហៅឧកញ៉ា ថន ហ្នឹងក៏ធ្វើដែរ។ ដីត្រង់ណាក៏ជារបស់ឧកញ៉ាដែរ ឱ្យតែប្រជាជនរាវឃើញមាស»។
ក្រុមប្រជាពលរដ្ឋបានរិះគន់ថា សកម្មភាពជីកយករ៉ែមាសខុសច្បាប់ទាំងនោះ គឺជនជាតិវៀតណាម ជនជាតិចិន និងអ្នកមានអំណាច ចេះតែធ្វើទៅបាន តែបើប្រជាពលរដ្ឋវិញ គ្រាន់តែទៅកើបយកអាចម៍ដីដែលគេជីកចោលមករែង ក៏គេគំរាមកំហែងដែរ។
ទោះយ៉ាងណា វិទ្យុអាស៊ីសេរី មិនអាចទាក់ទងជាមួយអាជ្ញាធរ និងសមត្ថកិច្ចស្រុករវៀង ដើម្បីសុំការអធិប្បាយជុំវិញបញ្ហានេះបានយ៉ាងណានៅឡើយ។
ចំណែកប្រធានមន្ទីរឧស្សាហកម្ម រ៉ែ និងថាមពល ខេត្តព្រះវិហារ លោក គង់ មករា បានមានប្រសាសន៍ថា ជារៀងរាល់ឆ្នាំនៅរដូវវស្សាដែលមានទឹកដក់គ្រប់ទីកន្លែង គឺប្រជាពលរដ្ឋខ្មែរនៅជិតតំបន់រ៉ែមាសនោះ តែងតែនាំគ្នាលួចរែង បើទោះបីជាអាជ្ញាធរចុះបង្ក្រាបជាញឹកញាប់មកហើយក៏ដោយ។ ក៏ប៉ុន្តែ លោកមិនទាន់បានទទួលព័ត៌មានដែលថា មានជនជាតិវៀតណាម បានមកជីកយករ៉ែមាសនៅតំបន់នោះនៅឡើយទេ៖ «រឿងថាជនជាតិវៀតណាម យ៉ាងណានោះ ខ្ញុំអត់ទាន់បានដឹងផង ចាំមើលថ្ងៃច័ន្ទ អី ខ្ញុំចូលធ្វើការវិញ ខ្ញុំនឹងចុះទៅមើល ក្រែងលោបានដឹង។ ប៉ុន្តែ អត់ឃើញខាងសមត្ថកិច្ច ប៉ូលិស អី គាត់នៅទីនោះរាយការណ៍មកខ្ញុំផង»។
ទោះយ៉ាងណា លោក គង់ មករា បានទទួលស្គាល់ថា កន្លងមកពិតជាមានជនជាតិវៀតណាម មួយចំនួនធ្លាប់ចូលទៅលួចជីកយករ៉ែមាសខុសច្បាប់នៅតំបន់នោះមែន។ កាលពីអំឡុងខែកុម្ភៈ កន្លងទៅ អាជ្ញាធរធ្លាប់ចាប់ខ្លួនជនជាតិវៀតណាម ជាង ១០នាក់ ដែលបានចូលទៅជីកយករ៉ែមាសខុសច្បាប់នៅតំបន់នោះ។
ជាច្រើនឆ្នាំកន្លងទៅ រហូតមកដល់ពេលនេះ មានក្រុមហ៊ុនចិន និងក្រុមឈ្មួញដែលការពារដោយអ្នកមានអំណាចខ្លះ នៅតែបន្តជីកយករ៉ែមាសនៅក្នុងស្រុករវៀង ចម្ងាយជាង ៤០គីឡូម៉ែត្រភាគខាងកើតឆៀងខាងត្បូងពីទីរួមខេត្តព្រះវិហារ។
កាលពីខែឧសភា កន្លងទៅ ដោយសារតែការជីករូងភ្នំ ដើម្បីយករ៉ែមាស គឺមានប្រជាពលរដ្ឋម្នាក់បានស្លាប់ដោយសារតែបាក់ដីសង្កត់៕