ជនជាតិភាគតិចទំពួនថា មេភូមិឃុបឃិតជាមួយឈ្មួញកាប់ព្រៃអភិរក្សដែនជម្រកសត្វព្រៃលំផាត់
2018.08.25
ជនជាតិដើមភាគតិចទំពួន រស់នៅភូមិកែងសាន់ ឃុំសេដា ស្រុកលំផាត់ ខេត្តរតនគិរី បារម្ភជាថ្មីទៀត ពីជោគវាសនាព្រៃការពារ ដែលនៅសេសសល់ចុងក្រោយប្រមាណ ១ពាន់ហិកតារ កំពុងទទួលរងការកាប់ទន្ទ្រានយកដី ធ្វើអាជីវកម្មទ្រង់ទ្រាយធំ ពីសំណាក់មេភូមិ និងឈ្មួញ គ្មានការបង្ក្រាប។ អ្នកភូមិថា មេភូមិកែងសាន់ បានដើរកៀរគរពលរដ្ឋឲ្យចូលព្រៃអភិរក្ស កាប់ទន្ទ្រានព្រៃយកដី ដោយត្រូវបង់ប្រាក់ឲ្យខ្លួនក្នុងមួយគ្រួសារ ៧រយដុល្លារ។
ជនជាតិដើមភាគតិចទំពួន ឲ្យដឹងនៅថ្ងៃទី២៤ សីហា ថា មេភូមិកែងសាន់ លោក ញ៉ួត កួត បានប្រកាសឲ្យអ្នកភូមិនៅមូលដ្ឋានចូលព្រៃអភិរក្ស កាប់ទន្ទ្រានព្រៃយកដីធ្វើអាជីវកម្ម ហើយលោកនឹងធ្វើពាក្យស្នើសុំកាន់កាប់ដីធ្លីឲ្យពលរដ្ឋទាំងនោះ តែត្រូវបង់ប្រាក់ឲ្យលោកក្នុងមួយគ្រួសារជាង ២លានរៀល ឬស្មើ ៧រយដុល្លារ។
ប្រជាសហគមន៍ការពារព្រៃឈើ ភូមិកែងសាន់ លោក ហាន ឆាន ព្រួយចិត្តជាថ្មីទៀត ពីវិនាសកម្មព្រៃឈើ ក្នុងដែនជម្រកសត្វព្រៃលំផាត់ ទទួលរងការកាប់ទន្ទ្រានយកដីឥតឈប់ឈរ គ្មានការអនុវត្តច្បាប់។ សកម្មភាពកាប់ទន្ទ្រាននោះ ក្រុមកម្មករបានប្រើម៉ាស៊ីនអារឈើជាច្រើនគ្រឿង អាររំលំឈើទាំងយប់ថ្ងៃ នៅចំណុចអូរព្នៀង និងអូរក្រែង ទល់បឹងណាំជា អស់ជាច្រើន។ លោកអង្កេតឃើញថា ពលរដ្ឋដែលឈឺឆ្អាលរឿងបទល្មើសព្រៃឈើ ព្យាយាមគ្រប់មធ្យោបាយ ក្នុងបំណងលប់បំបាត់បទល្មើសព្រៃឈើរួមមាន បានផ្តល់ដំណឹងទៅអាជ្ញាធរដែនដី សមត្ថកិច្ច និងមន្ត្រីបរិស្ថាន តែគ្មានប្រសិទ្ធភាព។ លើសពីនេះ ពួកគេបានដាក់ពាក្យប្ដឹងអាជ្ញាធរមូលដ្ឋាន និងមន្ត្រីពាក់ព័ន្ធសរុប ១០នាក់ទៅតុលាការ ពីបទអនុគ្រោះ នាំឲ្យកើតមានបទល្មើសព្រៃឈើ ក្នុងដែនសមត្ថកិច្ចរបស់ខ្លួន តែរហូតមកទល់ពេលនេះពុំឃើញមាន ចំណាត់ការផ្លូវច្បាប់ណាមួយ ពីតុលាការនៅឡើយទេ។ «»
ពលរដ្ឋម្នាក់ទៀតលោក ខាំ និន ថា មេភូមិកែងសាន់ លោក ញ៉ួត កួត គឺជាមេខ្លោងលក់ដីព្រៃអភិរក្ស ឲ្យឈ្មួញកាប់ទន្ទ្រានយកដីធ្វើអាជីវកម្មខុសច្បាប់ ធ្វើឲ្យព្រៃសហគមន៍ភូមិកែងសាន់ ដែលជាជង្រុកអនុផលព្រៃឈើបាត់បង់ជាបន្តបន្ទាប់។ លោកថា កម្មករច្រើនក្រុមប្រដាប់ដោយម៉ាស៊ីនអារឈើជាង ១០គ្រឿង បានអាររំលំឈើអស់ ប្រមាណ ៨០ ហិកតារជាថ្មីទៀត ដែលមានប្រជាការពារភូមិ និងមេសហគមន៍អង្គុយចាំយាមផ្លូវ។ «»
លោក ខាំ និន បន្ថែមថា បទល្មើសព្រៃឈើ ពុំមែនកើតឡើងតែភូមិកែងសាន់នោះទេ នៅភូមិសមុទ្រក្រោម ក្នុងតំបន់ភ្នំអាត ក៏ទទួលរងការកាប់ទន្ទ្រានយកដីលក់ហ៊ុមព័ទ្ធភ្នំ បង្កបាត់បង់ទីតាំងជ្រកសត្វព្រៃរស់នៅ។ លោកថា ព្រៃសហគមន៍ភូមិកែងសាន់ មានផ្ទៃដីជាង ៤ពាន់ហិកតារ ត្រូវគេកាប់ធ្វើអាជីវកម្មអស់ប្រមាណ ៣ពាន់ហិកតារនៅរយៈពេលប៉ុន្មានឆ្នាំចុងក្រោយនេះ ហើយមកទល់ពេលនេះនៅសេសសល់ តែ ១ពាន់ហិកតារ កំពុងរងការកាប់ទន្ទ្រានយ៉ាងខ្លាំង។ «»
មេភូមិកែងសាន់ លោក ញ៉ួត កួត បដិសេធមិនផ្ដល់បទសម្ភាសន៍ដល់អាស៊ីសេរីនៅថ្ងៃទី២៤ សីហា។ រីឯមេឃុំសេដា លោក អង់ ប៊ុនធៀង ក៏មិនអាចទាក់ទងបានដែរ។ តែលោកធ្លាប់ប្រាប់អាស៊ីសេរី កាលពីថ្ងៃទី១៩ សីហាថា អាជ្ញាធរមូលដ្ឋានមិនជាប់ពាក់ព័ន្ធកាប់ទន្ទ្រានព្រៃធ្វើអាជីវកម្មនេះទេ ហើយកន្លងទៅ មន្ត្រីបរិស្ថានបានកំណត់ដីតំបន់ព្រៃនៅតំបន់នោះ ជាដែនជម្រកសត្វព្រៃ និងធ្វើការផ្សព្វផ្សាយហាមឃាត់មិនឲ្យកាប់ទន្ទ្រាន។
មន្ត្រីឃ្លាំមើលបញ្ហាព្រៃឈើ នៃសមាគមអាដហុក (Adhoc) ខេត្តរតនគិរី លោក ឌិន ខន្នី អង្កេតឃើញថា ជនជាតិដើមភាគតិចទំពួនហាក់ឆ្អែតចិត្តរឿង អាជ្ញាធរមិនអើពើទប់ស្កាត់បទល្មើសព្រៃឈើ បើទោះបីជា អ្នកភូមិធ្លាប់លើកគ្នាតវ៉ា និងដាក់ពាក្យបណ្ដឹងក្ដី ក៏គ្មានវិធានការផ្លូវច្បាប់ណាមួយ ស្វែងរកជនល្មើសឲ្យមកទទួលខុសត្រូវនោះឡើយ។ «»
ព្រៃសហគមន៍ភូមិកែងសាន់ គឺជាផ្នែកមួយនៃដែនជម្រកសត្វព្រៃលំផាត់ មានផ្ទៃដីជាង ៤ពាន់ហិកតារ គឺជាព្រៃនៅសល់ចុងក្រោយធំជាងគេ ក្នុងចំណោមទំហំព្រៃឈើទាំងមូលឋិតក្នុងដែនជម្រកសត្វព្រៃលំផាត់រាប់ម៉ឺនហិកតារក្នុងខេត្តរតនគិរី។ អ្នកភូមិបារម្ភថា ដើមអាណត្តិទី៦ អំឡុងឆ្នាំ២០១៨នេះ គឺជាឆ្នាំចុងក្រោយ នៃវិនាសកម្មព្រៃសហគមន៍ភូមិកែងសាន់ នឹងត្រូវបាត់បង់ទាំងស្រុង បើអាជ្ញាធរនៅតែជិះសេះបែរខ្នង ធ្វើមិនដឹងមិនឮ បង្កឲ្យពួកគេគ្មានវាលស្មៅចិញ្ចឹមគោក្របី បាត់បង់ព្រៃឈើ បឹង និងអូរធម្មជាតិជាដើម។
អាស៊ីសេរីបានព្យាយាមទាក់ទង អ្នកនាំពាក្យក្រសួងបរិស្ថាន លោក សៅ សុភាព តែទូរស័ព្ទហៅចូលច្រើនដងគ្មានអ្នកទទួលនៅថ្ងៃទី២៤ សីហា។
ទោះបីជារបបលោក ហ៊ុន សែន អះអាងថា បានបង្កើតក្រុមកិច្ចការពិសេសរបស់ស្ថាប័ន កងរាជអាវុធហត្ថ ក្នុងការបង្ក្រាបបទល្មើសព្រៃឈើ នៅទូទាំងប្រទេស ក៏ប៉ុន្តែ តាមរបាយការណ៍របស់អង្គការអន្តរជាតិ ស្ដីពីបរិស្ថាន រកឃើញថា នៅតែមានការកាប់បំផ្លាញព្រៃឈើនៅកម្ពុជា៕