ដែន​ជម្រក​សត្វព្រៃ​ជាង​១០​នៅ​ខេត្ត​ភាគ​ឦសាន​ទទួលរង​ការ​កាប់​បំផ្លាញ​កាន់​តែ​ខ្លាំង

សុ ជីវី
2018-08-24
អ៊ីម៉ែល
មតិ
Share
បោះពុម្ព
សកម្មភាព​ដឹក​ជញ្ជូន​ឈើ​ពី​ក្នុង​ឧទ្យាន​ជាតិ​វីរជ័យ ក្នុង​ខេត្ត​រតនគិរី ប្រទេស​កម្ពុជា ទៅ​ប្រទេស​វៀតណាម កាល​ពី​ខែ​កុម្ភៈ ឆ្នាំ​២០១៧។ Photo courtesy of EIA
សកម្មភាព​ដឹក​ជញ្ជូន​ឈើ​ពី​ក្នុង​ឧទ្យាន​ជាតិ​វីរជ័យ ក្នុង​ខេត្ត​រតនគិរី ប្រទេស​កម្ពុជា ទៅ​ប្រទេស​វៀតណាម កាល​ពី​ខែ​កុម្ភៈ ឆ្នាំ​២០១៧។ Photo courtesy of EIA
Photo courtesy of EIA

ដែន​ជម្រក​សត្វព្រៃ​ជាង ១០​កន្លែង នៅ​ខេត្ត​ភាគ​ឦសាន រួម​ទាំង តំបន់​ឧទ្យាន​ជាតិ​វីរៈជ័យ ក្នុង​ខេត្ត​រតនគិរី និង​ខេត្ត​ស្ទឹងត្រែង សុទ្ធ​សឹង​ទទួលរង​ការ​កាប់​ឈើ​ធ្វើ​អាជីវកម្ម​ខ្លាំងក្លា ក្នុង​នោះ​មាន​ព្រៃ​ការពារ​ខ្លះ​ត្រូវ​បាត់បង់​ឈើ​មានតម្លៃ​ទាំងស្រុង។ អ្នកឃ្លាំមើល​បរិស្ថាន​ថា ក្រុម​ឧកញ៉ា​ច្រើន​រូប បាន​ប្រើ​គ្រប់​មធ្យោបាយ ប្រមូល​ឈើ​ខុសច្បាប់​ធំៗ ធ្វើ​អាជីវកម្ម​ទ្រង់ទ្រាយ​ធំ​ក្នុង​ព្រៃ​អភិរក្ស ដែល​ការពារ​ដោយ​ព្រះរាជក្រឹត្យ និង​អនុក្រឹត្យ។

អ្នកឃ្លាំមើល​បរិស្ថាន​រក​ឃើញ​ថា ប្រភព​ចម្បង​ដែល​នាំ​ឲ្យ​កើតមាន​បទល្មើស​ព្រៃឈើ​ក្នុង​ព្រៃ​អភិរក្ស គឺ​ការ​ផ្តល់​ដី​សម្បទាន​សេដ្ឋកិច្ច ឲ្យ​ក្រុមហ៊ុន​ឯកជន ក្នុង​ព្រៃ​ស្រោង​សម្បូរ​ដោយ​ធនធានធម្មជាតិ​មាន​តម្លៃ និង​ជា​កន្លែង​អាស្រ័យ​ផល​របស់​ជនជាតិ​ដើម​ភាគតិច​លក្ខណៈ​ប្រពៃណី។ ពួកគេ​រក​ឃើញ​ថា ក្រុមហ៊ុន​ដែល​ទទួល​បាន​ដី​សម្បទាន​សេដ្ឋកិច្ច​ទាំងនោះ មិន​អភិវឌ្ឍន៍​អ្វី​ក្រៅ​ធ្វើ​អាជីវកម្ម​ឈើ​ខុសច្បាប់​លក់​នៅ​ក្រៅ​ប្រទេស។

ទីប្រឹក្សា​បណ្ដាញ​សហគមន៍​ជនជាតិ​ដើម​ភាគតិច ខេត្ត​មណ្ឌលគិរី លោក ក្រើង តុលា អង្កេត​ឃើញ​ថា បើ​ទោះ​បី​ជា ដែន​ជម្រកសត្វព្រៃ​ចំនួន​៥ ក្នុង​ខេត្ត​នេះ​បាន​ចុះបញ្ជី​ជា​ព្រៃ​អភិរក្ស​ក្តី តែ​បទល្មើស​ព្រៃឈើ​នៅតែ​កើតមាន​ច្រើន ជាពិសេស​គឺ​ការ​ផ្តល់​ដី​សម្បទាន​សេដ្ឋកិច្ច។ លោក​អង្កេត​ឃើញ​ថា ដែន​ជម្រក​សត្វព្រៃ​ភ្នំ​ណាំលៀរ ដែន​ជម្រក​សត្វព្រៃ​ភ្នំព្រេច ដែន​ជម្រក​សត្វ​កែវ​សីមា​ដែល​ធ្លាប់​សំបូរ​ដោយ​ព្រៃស្រោង និង​ជាទី​តាំង​ជ្រក​របស់​សត្វព្រៃ​កម្រ​រស់នៅ ដូចជា សត្វ​ខ្ទីង និង​សត្វ​ដំរី​ព្រៃ​ជាដើម កំពុង​ទទួលរង​ការ​កាប់​យក​ឈើ​ឥត​ឈប់ឈរ ហើយ​ឈើ​ដែល​កាប់​ទាំងនោះ ភាគច្រើន​ដឹក​ជញ្ជូន​ទៅ​លក់​នៅ​ប្រទេស​វៀតណាម។ «»

លោក ក្រើង តុលា រំឭក​ថា កន្លងទៅ ក្រុមហ៊ុន​សម្បទាន​សេដ្ឋកិច្ច មេហ្គា ហ្វើស (Mega First Corporation Berhad) ធ្លាប់​មាន​ជម្លោះដីធ្លី​ជាមួយ​សហគមន៍​ជនជាតិ​ដើម​ភាគតិច​ព្នង ដោយសារ​ក្រុមហ៊ុន​នេះ ឈូសឆាយ​ដី​ប៉ះពាល់​តំបន់​កប់​សព ដី​ព្រៃ​អារក្ស និង​តំបន់​ប្រភព​ទឹកអូរ​ធម្មជាតិ​សហគមន៍ ដែល​ឋិត​ក្នុង​ដែន​ជម្រក​សត្វព្រៃ​ភ្នំ​ណាំលៀរ។

នៅ​ខេត្ត​មណ្ឌលគិរី មាន​ដែន​ជម្រក​សត្វព្រៃ​ចំនួន​៥ រួម​មាន ដែន​ជម្រក​សត្វព្រៃ​កែវសីមា ដែន​ជម្រក​សត្វព្រៃ​ភ្នំព្រេច ដែន​ជម្រក​សត្វព្រៃ​ស្រែពក ដែន​ជម្រក​សត្វព្រៃ​ភ្នំ​ណាំលៀរ និង​ដែន​ជម្រក​សត្វព្រៃ​លំផាត់។ ដែន​ជម្រក​សត្វព្រៃ​ទាំងនោះ គឺ​សុទ្ធ​សឹង​ទទួល​រង​ការ​កាប់​ឈើ​មានតម្លៃ​ជា​ប្រព័ន្ធ បើ​ទោះ​បី​ជា​របប​ក្រុងភ្នំពេញ បាន​បញ្ជូន​មន្ត្រី​ឧទ្យានុរក្ស​របស់​ក្រសួងបរិស្ថាន​ប្រចាំការ​ផ្ទាល់​នៅ​តំបន់​នោះ​ក្ដី។ សកម្មជន​បរិស្ថាន ថា មក​ទល់​ពេល​នេះ ដែន​ជម្រក​សត្វព្រៃ​ស្រែពក ត្រូវ​បាន​ក្រុម​ឧកញ៉ា​កាប់​ឈើ​មូល​ធំៗ​មានតម្លៃ​អស់ទាំង​ស្រុង រីឯ​ដែន​ជម្រក​សត្វព្រៃ​ភ្នំ​ណាំលៀរ ក៏​ទទួលរង​ការ​កាប់​ឈើ​ធំៗ អស់​ស្ទើរ​គ្មាន​សល់ ហើយ​បច្ចុប្បន្ន​នៅ​សេសសល់​តែ​ឈើ​មិនទាន់​គ្រប់​អាយុ និង​គ្មាន​តម្លៃ​អាច​ប្រើប្រាស់​បាន។

ដែន​ជម្រក​សត្វព្រៃ​ភ្នំ​ណាំលៀ ត្រូវ​បាន​អតីត​ព្រះមហាក្សត្រ នរោត្តម សីហនុ ចេញ​ព្រះរាជក្រឹត្យ ដាក់​ជា​តំបន់​អភិរក្ស កាល​ពី​ថ្ងៃ​ទី​១ វិច្ឆិកា ឆ្នាំ​១៩៩៣ ឋិត​នៅ​ក្នុង​ស្រុក​ពេជ្រាដា ខេត្ត​មណ្ឌលគិរី ដែល​មាន​ផ្ទៃ​ជាង ៤​ម៉ឺន​ហិកតារ (៤៧.៥០០)

រីឯ​ដែន​ជម្រក​សត្វ​ព្រៃភ្នំ​ព្រេច ត្រូវ​បាន​អតីត​ព្រះមហាក្សត្រ នរោត្តម សីហនុ កំណត់​ជា​តំបន់​អភិរក្ស តាម​ព្រះរាជក្រឹត្យ​កាលពី​ខែ​វិច្ឆិកា ឆ្នាំ​១៩៩៣ មាន​ផ្ទៃដី​ជាង ២២​ម៉ឺន​ហិកតារ (២២២.៥០០) ឋិត​នៅ​ស្រុក​កោះញ៉ែក ស្រុក​កែវសីមា ខេត្ត​មណ្ឌលគិរី និង​ស្រុក​ស្នួល ខេត្ត​ក្រចេះ។ តែ​មក​ទល់​ពេល​នេះ​ព្រៃ​អភិរក្ស​មួយ​នេះ បាន​ទទួលរង​ការ​កាប់​យក​ឈើ​មានតម្លៃ​យ៉ាង​ពេញទំហឹង ដែល​មាន​ក្រុម​ឧកញ៉ា​ជា​ច្រើន​រូប បង្កើត​ដេប៉ូ​អារ​ឈើ​នៅ​តំបន់​នោះ និង​មាន​រោងចក្រ​អារ​ឈើ ១៣​កន្លែង អារ​ច្រៀក​ឈើ​មូល​ធំៗ ដឹក​ទៅ​លក់​នៅ​ប្រទេស​វៀតណាម ឆ្លង​កាត់​ភូមិសាស្ត្រ​ស្រុក​ស្នួល ខេត្ត​ក្រចេះ។

ដែន​ជម្រក​សត្វព្រៃ​ស្រែពក ត្រូវ​បាន​ព្រះមហាក្សត្រ នរោត្តម សីហនុ កំណត់​ជា​តំបន់​អភិរក្ស​តាម​ព្រះរាជក្រឹត្យ កាល​ឆ្នាំ​១៩៩៣ មាន​ផ្ទៃដី​ជាង ៣​សែន ៧​ម៉ឺន​ហិកតារ (៣៧២.៩៧១) ដែល​មាន​ភូមិសាស្ត្រ​ឋិត​ក្នុងស្រុក​កោះញែក ស្រុក​កែវសីមា ក្រុង​សែនមនោរម្យ និង​ស្រុក​អូត​រាំង ខេត្ត​មណ្ឌលគិរី។ ព្រៃ​អភិរក្ស​មួយ​នេះ ក៏​ទទួលរង​ការ​កាប់​យក​ឈើ​ធំៗ អស់​ស្ទើរ​ទាំងស្រុង​ដែរ និង​ការ​កាប់​ទន្ទ្រាន​យក​ដី​ជា​សម្បត្តិ​បុគ្គល អស់​ជាច្រើន​ហិកតារ។

ដែន​ជម្រក​សត្វព្រៃ​កែវសីមា ត្រូវ​បាន​របប​លោក ហ៊ុន សែន កំណត់​ជា​អនុក្រឹត្យ​កាល​ពី​ខែ​ឧសភា ២០១៦ ស្ថិត​ក្នុង​ស្រុក​កែវសីមា ស្រុក​អូររាំង ខេត្ត​មណ្ឌលគិរី និង​ស្រុក​ស្នូល ខេត្ត​ក្រចេះ ដែល​មាន​ផ្ទៃ​ជិត ៣០​ម៉ឺន​ហិកតារ (២៩២. ៦៩០)។ រីឯ​ដែន​ជម្រក​សត្វព្រៃ​លំផាត់​ស្ថិត​ក្នុង​ស្រុក​លំផាត់ ខេត្ត​រតនគិរី និង​ស្រុក​កោះញែក ខេត្ត​មណ្ឌលគិរី ដែល​មាន​ផ្ទៃដី​ជាង ២៥​ម៉ឺន​ហិកតារ (២៥០.០០០) ត្រូវ​បាន​កំណត់​ជា​តំបន់​អភិរក្ស ដោយ​អនុក្រឹត្យ​ថ្ងៃ​ទី​៥ មករា ២០១៧។

ជនជាតិ​ដើម​ភាគតិច​ទំពួន រស់​នៅ​ឃុំ​សេដារ ស្រុក​លំផាត់ ខេត្ត​រតនគិរី លោក ខាំ និន អង្កេត​ឃើញ​ថា ដែន​ជម្រក​សត្វ​លំផាត់ កំពុង​ទទួលរង​កាប់​ទន្ទ្រាន​ឈូស​ឆាយ​យក​ដី ធ្វើ​កសិកម្ម​ខ្លាំងក្លា បែប​អនាធិបតេយ្យ គ្មាន​ការ​ទប់ស្កាត់ បង្ក​ឲ្យ​ដី​ព្រៃ​អភិរក្ស​មួយ​នេះ កាន់តែ​រួម​តូច​បន្តបន្ទាប់ រីឯ​ឈើ​មាន​តម្លៃ​នៅតែ​ទទួលរង​ការ​កាប់​ធ្វើ​អាជីវកម្ម​ឥត​ឈប់ឈរ។ លោក​ថា អ្នកភូមិ​ដែល​ប្រទះឃើញ ដើមឈើ​ត្រូវ​គេ​កាប់ រាយប៉ាយ​ពាសពេញ​ដី បាន​ស្រែក​ទ្រហោ​រយំ សោកស្ដាយ​ធនធានធម្មជាតិ​ត្រូវ​រលាយ​អស់​ស្ទើរ​ទាំងស្រុង បង្ក​ឲ្យ​ប៉ះពាល់​ជីវភាព​របស់​ពួកគេ គ្មាន​កន្លែង​អាស្រ័យ​ផល​បែប​ប្រពៃណី និង​បាត់បង់​វាលស្មៅ​ចិញ្ចឹម​គោក្របី​ជាដើម។ «»

អ្នកនាំពាក្យ​ទីស្តីការ​គណៈរដ្ឋមន្ត្រី​លោក ផៃ ស៊ីផាន បដិសេធ​មិន​ផ្ដល់​បទសម្ភាសន៍​ដល់​អាស៊ីសេរី​ទេ នៅ​ថ្ងៃ​ទី​២៤ សីហា ដោយ​លោក​បញ្ជាក់​យ៉ាង​ខ្លី​ថា គោលនយោបាយ​អភិរក្ស​ព្រៃឈើ​របស់​រដ្ឋាភិបាល​ថ្មី នៅ​មិន​ទាន់​បង្កើត​នៅ​ឡើយ ហើយ​ការ​ជម្រាប​ជួន​រឿង​នេះ​បាន ជា​កាតព្វកិច្ច​របស់​ក្រសួង​បរិស្ថាន។

អាស៊ីសេរី​បាន​ព្យាយាម​ទាក់ទង អ្នកនាំពាក្យ​ក្រសួង​បរិស្ថាន លោក សៅ សុភាព តែ​ទូរស័ព្ទ​ហៅ​ចូល​ច្រើនដង គ្មាន​អ្នកទទួល នៅ​ថ្ងៃ​ទី២៤ សីហា។

ចំណែក​ប្រធាន​មន្ទីរ​បរិស្ថាន​ខេត្ត​មណ្ឌលគិរី លោក កែវ សុភគ៌ ប្រាប់​អាស៊ីសេរី​នៅ​ថ្ងៃទី១៤ សីហា​ថា ដែន​ជម្រក​សត្វ​នៅ​ខេត្ត​មណ្ឌលគិរី មាន ៥​កន្លែង គ្រប់​ដណ្ដប់​លើ​ផ្ទៃដី​ជាង ១​លាន​ហិកតារ តែ​មន្ត្រី​ឧទ្យានុរក្ស មានតែ ១០៤​នាក់ ប៉ុណ្ណោះ មិន​អាច​ទប់ស្កាត់​បទ​ល្មើស​ក្នុង​ព្រៃ​ការពារ​បាន​គ្រប់​ជ្រុងជ្រោយ​នៅឡើយ​ទេ។ បញ្ហា​នេះ​ទាមទារ​ឲ្យ​មានការ​ឯកភាព​ពី​រដ្ឋាភិបាល​ក្នុង​ការ​បញ្ជូន​មន្ត្រី​ឧទ្យានុរក្ស​បន្ថែម​ទៀត និង​បន្ថែម​កញ្ចប់​ថវិកា​ជាតិ។ លោក​បន្ថែម​ថា មន្ទីរ​បរិស្ថាន​ខេត្ត បាន​សហការ​ជាមួយ​អង្គការ​ដៃ​គួរ​មួយ​ចំនួន និង​សហគមន៍​នៅ​មូលដ្ឋាន ក្នុង​ការ​ទប់ស្កាត់​បទ​ល្មើស​ព្រៃឈើ រួម​ទាំង​កម្លាំង​សហគមន៍​មូលដ្ឋាន​ផង តែ​ក៏​មាន​ពលរដ្ឋ​ខ្លះ បាន​រួម​ចំណែក​ប្រព្រឹត្ត​បទល្មើស​ព្រៃឈើ​ដែរ។ «»

កន្លងទៅ លោក ហ៊ុន សែន បាន​ថ្លែង​ទទួល​ស្គាល់​ថា ឧក្រិដ្ឋកម្ម​ព្រៃឈើ​កើត​មាន​ច្រើន​ក្នុង​ព្រៃ​អភិរក្ស ហើយ​លោក​ជំរុញ​ឲ្យ​មន្ត្រី​របស់​លោក​យកចិត្តទុកដាក់​សហការ​ជាមួយ​ពលរដ្ឋ​ឲ្យ​គ្រប់​ជ្រុងជ្រោយ ផ្ដល់​ដំណឹង​បទល្មើស​ព្រៃឈើ៖ «រដ្ឋបាល​ព្រៃឈើ និង​ក្រុម​បរិស្ថាន មនុស្ស ៥០​នាក់ ព្រៃ ៥​ម៉ឺន​ហិកតារ ពិបាក​ណាស់ ប៉ូលិស​មិន​ងាយ​រក​ចោរ​ទេ ប៉ុន្តែ​ជួន​កាល​ចោរ និង​ប៉ូលិស​សហការ​គ្នា​ទៀត អ្នក​កាប់​ឈើ និង​អ្នកការពារ​ព្រៃឈើ អា​ហ្នឹង​ងាប់​បណ្ដោយ»

ទោះជា​យ៉ាង​ណា​ក្តី ជាង​៣០​ឆ្នាំ​កន្លង​មក​នេះ ក្នុង​មុខតំណែង​ជា​នាយករដ្ឋមន្ត្រី លោក ហ៊ុន សែន ដែល​មាន​កាតព្វកិច្ច​ការពារ​ធនធានធម្មជាតិ មិន​អោយ​វិនាស​ហិនហោច​នោះ បាន​សន្យា​ច្រើន​រាប់​ភ្លេច​ថា លោក​នឹង​ប្រើ​សមត្ថកិច្ច​របស់​លោក​ទប់ស្កាត់ និង​លំ​បំបាត់​បទល្មើស​ព្រៃឈើ​អោយ​បាន ប៉ុន្តែ​ការ​សន្យា​ទាំងនោះ​គឺជា​សន្យា​ខ្យល់​ពីព្រោះ​មកដល់​ម៉ោង​នេះ បទល្មើស​ព្រៃឈើ ជាពិសេស​នៅ​ក្នុង​ព្រៃ​ការពារ​ដោយ​អនុក្រឹត្យ និង​ព្រះរាជក្រឹត្យ​នៅតែ​កើតមាន​យ៉ាង​ខ្លាំងក្លា។ ចំណែក​រដ្ឋសភា​ដែល​គេ​មើល​ឃើញ​ថា ចាំតែ​ប្រថាប់ត្រា​អោយ​លោក ហ៊ុន សែន នោះ ជាច្រើន​ឆ្នាំ​កន្លង​មក​នេះ បាន​ធ្វើ​ច្បាប់​ការពារព្រៃឈើ​ជាច្រើន​ដែរ ប៉ុន្តែ​ច្បាប់​ទាំងនោះ​បាន​ត្រឹម​តែ​នៅ​លើ​ក្រដាស។ តំណាងរាស្ត្រ​ដែល​មាន​តួនាទី​តាមដាន​ប្រសិទ្ធភាព​នៃ​ការអនុវត្ត​ច្បាប់ មិនដែល​ខ្វល់​អំពី​ភារកិច្ច​ដ៏​សំខាន់​នេះ​ដែល​មាន​ចែង​ក្នុង​រដ្ឋធម្មនុញ្ញ​ឡើយ។

តំបន់​ព្រៃ​អភិរក្ស​ដែល​ការពារ​ដោយ​ច្បាប់​ហើយ​ត្រូវ​បាន​បំពារបំពាន​យ៉ាង​ធ្ងន់ធ្ងរ​នោះ នៅ​មាន​ច្រើន​ទៀត ក្នុង​នោះ​ក៏​មាន តំបន់​អភិរក្ស​ឧទ្យាន​ជាតិ​វីរៈជ័យ ឋិត​ក្នុងស្រុក​សៀមប៉ាង ខេត្ត​ស្ទឹងត្រែង និង​ស្រុក​អណ្តូងមាស ស្រុក​តាវែង ក្នុង​ខេត្ត​រតនគិរី​ដែរ។ តំបន់​អភិរក្ស​ឧទ្យាន​ជាតិ​វីរៈជ័យ ត្រូវ​បាន​អតីត​ព្រះមហាក្សត្រ នរោត្តម សីហនុ ចេញ​ព្រះរាជក្រឹត្យ​កំណត់ ជា​ព្រៃ​អភិរក្ស ដែល​មាន​ផ្ទៃដី​ជាង ៣៣​ម៉ឺន​ហិកតារ (៣៣២.៥០០) កាលពី​ខែ​វិច្ឆិកា ឆ្នាំ​១៩៩៣។ ព្រៃ​អភិរក្ស​នេះ មាន​ព្រំប្រទល់​ជាប់​ប្រទេស​ឡាវ និង​វៀតណាម ហើយ​របប​លោក ហ៊ុន សែន បាន​បញ្ជូន​ឆ្មាំ​អភិរក្ស​ជាច្រើន​នាក់ ទប់ស្កាត់​បទល្មើស​ព្រៃឈើ​នៅ​តំបន់​នោះ អោយ​ល្អមើល​ដែរ​ប៉ុន្តែ​គ្មាន​ប្រសិទ្ធភាព។

សកម្មជន​បរិស្ថាន លោក ហេង ស្រស់ ដែល​ឃ្លាំមើល​បទល្មើស​ព្រៃឈើ​នៅ​តំបន់​នោះ ឲ្យ​ដឹង​នៅ​ថ្ងៃទី២២ សីហា ថា តំបន់​ឧទ្យាន​ជាតិ​វីរៈជ័យ មាន​ដេប៉ូ​ស្តុក​ឈើ​ក្រុមហ៊ុន​វៀតណាម ៦​កន្លែង ដែល​គេ​ប្រមូល​ឈើ​ធំៗ ចេញ​ពី​ព្រៃ​អភិរក្ស ដឹក​តាម​ច្រក​របៀង​តូចៗ ទៅ​ក្រៅ​ប្រទេស ដែល​មាន​មន្ត្រី​វីរៈព្រំដែន​ខ្មែរ​សម្របសម្រួល។ លោក​ថា ឆ្មាំ​អភិរក្ស​ឧទ្យាន​ជាតិ​វីរៈជ័យ​ម្នាក់ បាន​បង្ហើប​ថា មេ​របស់​គាត់​បាន​ទទួល​សំណូក​ពី​ឈ្មួញ​ឈើ​ខុសច្បាប់ ជា​ថ្នូរ​បើកដៃ​ឲ្យ​ជនល្មើស កាប់ និង​ដឹកជញ្ជូន​ឈើ​ឆ្លងដែន​ដោយ​សេរី។ លោក​ថា អាជ្ញាធរ​ខ្មែរ និង​ក្រុមហ៊ុន បាន​ឈូស​ឆាយ​ផ្លូវ​ខ្វាត់ខ្វែង ចូល​ព្រៃ​អភិរក្ស​មួយ​នេះ បំណង​ដឹកជញ្ជូន​ឈើ​ខុសច្បាប់ ក្នុង​ចន្លោះ​ច្រក​ព្រំដែន​បង្គោល​លេខ ០១ ដល់​លេខ ១០ ក្នុងស្រុក​តាវែង ខេត្ត​រតនគិរី និង​ច្រក​ព្រំដែន​មួយ​ចំនួន​ទៀត​ឋិត​ក្នុងស្រុក​អណ្តូងមាស។ លោក​បន្ថែម​ថា ច្រក​ព្រំដែន​ទាំងនោះ សម្រាប់​នាំ​ឈើ​ចេញ​ទៅ​ក្រៅ​ប្រទេស ដោយ​មាន​សមត្ថកិច្ច​ការពារ​ព្រំដែន យាម​តឹងតែង​មិន​ឲ្យ​មនុស្ស​ប្លែក​មុខ​ចូល។ «»

លោក ហេង ស្រស់ បន្ថែម​ថា សមត្ថកិច្ច​នៅ​តំបន់​នោះ និង​មន្ត្រី​បរិស្ថាន​ប្រដាប់​ដោយ​អាវុធ ធ្លាប់​បាន​ហាមឃាត់​ក្រុម​យុវជន​ការពារ​បរិស្ថាន មិន​ឲ្យ​ចុះទៅ​ទីនោះ​ទេ ដោយ​គំរាម​ពួកគេ​ចាប់​ដាក់គុក បើ​នៅ​តែ​មានៈ។ លោក​ថា មន្ត្រី​បរិស្ថាន និង​សមត្ថកិច្ច​ពាក់ព័ន្ធ ដែល​ប្រចាំការ​នៅ​តំបន់​នោះ បាន​ទទួល​សំណូក​ពី​ជនល្មើស ជា​ថ្នូរ​មិន​អនុវត្ត​ច្បាប់​ព្រៃឈើ​ស្ទើរ​ក្លាយ​ជា​ទម្លាប់​ទៅ​ហើយ។ «»

ចំណែក​នៅ​ខេត្ត​ព្រះវិហារ មន្ត្រី​តស៊ូ​មតិ នៃ​អង្គការ​ពន្លក​ខ្មែរ លោក ប៉ិច សោភ័ណ អង្កេត​ឃើញ​ថា ដែន​ជម្រក​សត្វព្រៃ​ព្រះរកា និង​ដែន​ជម្រក​សត្វព្រៃ​បឹងពែរ ក្នុង​ខេត្ត​ព្រះវិហារ ក៏​កំពុង​ប្រឈម​វិនាស​ហិនហោច ក្រោម​រូបភាព​ការ​ផ្តល់​ដី​សម្បទាន​សេដ្ឋកិច្ច និង​ឈ្មួញ​មាន​ងារ​ជា​ឧកញ៉ា​ខ្ចី​ដៃ​ពលរដ្ឋ កាប់​ឈើ​លក់​ឲ្យ​ខ្លួន។ លោក​ថា ករណី​នេះ ជា​ការ​រួមចំណែក​បំផ្លាញ​ធនធានធម្មជាតិ​យ៉ាង​សំខាន់ ដែល​មន្ត្រី​នគរបាល​យុត្តិធម៌​មិន​ហ៊ាន​អនុវត្ត​ច្បាប់។ «»

ចំណែក​ដែន​ជម្រក​សត្វព្រៃ​ព្រះ​រកា មាន​ផ្ទៃ​ជាង ៩​ម៉ឺន​ហិកតារ (៩០.៣៦១) ទទួល​ស្គាល់​ដោយ​អនុក្រឹត្យ​កាលពី​ខែ ឧសភា ឆ្នាំ ២០១៦ ឋិត​នៅ​ស្រុក​ឆែប ស្រុក​ត្បែងមានជ័យ និង​ស្រុក​ជាំ​ក្សាន្ត​របស់​ខេត្ត​ព្រះវិហារ ក៏​ទទួលរង​ការ​កាប់​ទន្ទ្រាន​យក​ដី​ធ្វើជា​កម្មសិទ្ធិ និង​ការ​កាប់​ឈើ​មានតម្លៃ​ពី​សំណាក់​ឈ្មួញ​មាន​ងារ​ជា​ឧកញ៉ា និង ក្រុមហ៊ុន​សម្បទាន​សេដ្ឋកិច្ច​ចិន​ជាដើម។

ចំណែក​ដែន​ជម្រក​សត្វព្រៃ បឹងពែរ មាន​ទីតាំងនៅ​ខេត្ត​សៀមរាប ព្រះវិហារ និង​កំពង់ធំ ដែល​មាន​ផ្ទៃក្រឡា​ជាង ២៤​ម៉ឺន​ហិកតារ (២៤២.៥០០) ចេញ​ដោយ​ព្រះរាជក្រឹត្យ ថ្ងៃ​ទី​០១ វិច្ឆិកា ឆ្នាំ​១៩៩៣។ ព្រៃ​អភិរក្ស​នេះ​មាន​ក៏​ក្រុមហ៊ុន​សម្បទាន​វិនិយោគ​ដី​ធ្វើ​កសិកម្ម និង​មាន​ឈ្មួញ​មាន​ឥទ្ធិពល​ខ្លះ កាប់​ឈើ​ធ្វើ​អាជីវកម្ម​ទ្រង់ទ្រាយ​ធំ ក្នុង​នោះ​ក៏​មាន​ក្រុមហ៊ុន ទ្រី ភាព ផង ចូល​កាប់​ឈើ​មាន​តម្លៃ​ជា​បន្ត​បន្ទាប់។

រីឯ​ដែន​ជម្រក​សត្វព្រៃ​ឡង់ ឋិត​ក្នុង​ចន្លោះ​ខែត្រ​ចំនួន​បួន គឺ​ខែត្រ​ក្រចេះ ស្ទឹងត្រែង ព្រះវិហារ និង​ខែត្រ​កំពង់ធំ ត្រូវ​រដ្ឋាភិបាល​ប្រកាស​បង្កើត​ជា​ដែន​ជម្រក​សត្វព្រៃ កាលពី​ថ្ងៃ​ទី​៩ ខែ​ឧសភា ឆ្នាំ​២០១៦ មាន​ផ្ទៃដី​ជាង ៤៣​ម៉ឺន​ហិកតារ (៤៣១.៦៨៣​ហិកតារ) ឋិត​ក្រោម​ការគ្រប់គ្រង​របស់​ក្រសួង​បរិស្ថាន ក៏​កំពុង​ទទួលរង​ការ​កាប់​យក​ឈើ​មានតម្លៃ​យ៉ាង​ពេញទំហឹង ហើយ​បច្ចុប្បន្ន​ឈ្មួញ​សម្រុក​កាប់​ដើមឈើ​ផលិត​ជ័រទឹក​ធ្វើ​អាជីវកម្ម បង្ក​ប៉ះពាល់​សេដ្ឋកិច្ច​ពលរដ្ឋ​រាប់ពាន់​គ្រួសារ។

ក្រុម​ស្នូលព្រៃ​ឡង់ ខេត្ត​ក្រចេះ លោក ឯក វណ្ណា អង្កេត​ឃើញ​ថា សហគមន៍​នៅ​មិន​ទាន់​មាន​ទំនុក​ចិត្ត​លើ​ការ​អភិរក្ស​ព្រៃឈើ​របស់​ក្រសួងបរិស្ថាន​នោះ​ទេ ខណៈ​ដែល​ពួកគេ​ប្រទះឃើញ ការ​ដឹក​ឈើ​តាម​គោយន្ត​ចេញ​ក្តៅ និង​មាន​ថៅកែ​ឈើ​ខ្លះ ជា​អ្នក​កាង​បទល្មើស​ក្នុង​ព្រៃ​តែម្ដង។ លោក​ថា អ្នក​ដឹកឈើ​ទាំងនោះ​ភាគច្រើន ឆ្លងកាត់​ស្នាក់​ការ​ឆ្មាំ​អភិរក្ស របស់​ក្រសួង​បរិស្ថាន។ «»

សកម្មជន​បរិស្ថាន ជនជាតិ​ដើម​ភាគតិច និង​មន្ត្រី​សង្គម​ស៊ីវិល ទទូច​ឲ្យ​របប លោក ហ៊ុន សែន ភ្ញាក់រឭក​ខ្លួន​ឡើង និង​ត្រូវ​រួមគ្នា​ការពារ​ព្រៃឈើ​ដោយ​ស្មោះ​ត្រង់​ចំពោះ​ជាតិ មិន​ត្រូវ​យក​ធនធាន​របស់​ជាតិ ជា​ល្បែង​លេងសើច បម្រើ​ប្រយោជន៍​ផ្ទាល់ខ្លួន​នោះ​ទេ ខណៈ​ដែល​ពួកគេ​រក​ឃើញ​ថា មនុស្ស​មាន​ងារ​ជា​ឧកញ៉ា ប្រព្រឹត្ត​ទង្វើ​ជា​ឧក្រិដ្ឋជន​បាន​បំផ្លាញ​ព្រៃឈើ​ជា​ប្រព័ន្ធ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

comrade Hing/Hun aiming psychos missiles to the west

Ta comrade Hing "B.Hieng" is trying to setup his long range"BM"missiles to aim to the west if they still bullying with him and boss Hussein"world economic sanctions/banned travel abroad",and it says...he"Hing" and Hun will not"chav=fearless",but later the RFEU and VOA made an interviewed with him on the airwave and then he claimed that he didn't say something like that and then he turned blame to others"not him",but instead the interviewer played his recorded voices and he still made rejected"watch out barbarian,crooks,thuggish,traitor,tyrannies,communism in 100% say something,just take only .99%"they were useless and worthless/disrespect/inhuman".

Aug 25, 2018 11:26 AM

គេហទំព័រ​ទាំងមូល