ប្រធានមន្ទីរកសិកម្មខេត្តស្ទឹងត្រែងទទួលស្គាល់ថា មានការលក់សត្វព្រៃហើយពិបាកបង្ក្រាប
2018.10.19
ប្រធានមន្ទីរកសិកម្ម ខេត្តស្ទឹងត្រែង ទទួលស្គាល់ថា ការសម្លាប់សត្វព្រៃ យកមកដាក់លក់លើទីផ្សារនៅតែបន្តកើតឡើង។ ប្រធានមន្ទីរកសិកម្ម លោក លាង សេង ថ្លែងប្រាប់អគ្គនាយកដ្ឋានវិទ្យុជាតិកម្ពុជា កាលពីថ្ងៃទី១៦ ខែតុលា ថា សមត្ថកិច្ចលំបាកបង្ក្រាប ករណីការសម្លាប់សត្វព្រៃដាក់លក់លើទីផ្សារ។
លោកថា ពេលដែលសមត្ថកិច្ចចុះបង្ក្រាបការលក់សត្វព្រៃលើទីផ្សារ អ្នកលក់ខ្លះបានរត់បាត់ និងខ្លះទៀតហាក់ចង់តដៃជាមួយសមត្ថកិច្ចទៀតផង។ ការបកស្រាយទាក់ទងនឹងការដាក់លក់សត្វព្រៃនៅលើទីផ្សារនេះ ធ្វើឡើងបន្ទាប់ពីអ្នកប្រើប្រាស់បណ្ដាញសង្គមមួយចំនួនបានចែកចាយតគ្នា នូវរូបភាពជាច្រើនសន្លឹកនៃការលក់សាច់ព្រៃ ដោយភ្ជាប់ជាមួយនូវខ្លឹមសារបញ្ជាក់អំពីតម្លៃនៃសត្វព្រៃទាំងនេះដូចជាតម្លៃសាច់ឈ្លូសក្នុងមួយគីឡូ បួនម៉ឺនរៀល សាច់ជ្រូកព្រៃ មួយគីឡូតម្លៃពីរម៉ឺនរៀល និងសត្វត្រកួតរស់ មួយគីឡូ ពីរម៉ឺនប្រាំពាន់រៀលជាដើម។
ប្រធានមន្ទីរកសិកម្ម លោក លាង សេង អះអាងថា សមត្ថកិច្ច នឹងពង្រឹងការអនុវត្តច្បាប់បន្ថែមទៀតដើម្បីប្រឆាំង និងទប់ស្កាត់សកម្មភាពសម្លាប់សត្វព្រៃ មកលក់នៅទីផ្សារនេះ។ ការយកសត្វព្រៃ ដែលខ្លះជាសត្វជិតផុតពូជផងនោះ មកដាក់លក់លើទីផ្សារមិនមែនកើតមានតែក្នុងខេត្តស្ទឹងត្រែងប៉ុណ្ណោះទេ ករណីនេះក៏កើតមាននៅតាមបណ្ដាខេត្តផ្សេងៗផងដែរ។
កាលពីថ្ងៃទី១៣ ខែតុលា ក្រុមល្បាតព្រៃ នៅខេត្តកោះកុង ក៏បានរឹបអូសសត្វព្រៃមួយចំនួន ដែលជនមិនស្គាល់មុខបានលាក់ទុកនៅក្នុងព្រៃ ក្នុងនោះមានសត្វត្រកួត សត្វកន្ត្រង និងសត្វអណ្ដើកផងដែរ។
ចំណែកនៅខេត្តក្រចេះវិញ ពលរដ្ឋនៅឃុំកំពង់ចាម ស្រុកសំបូរ ខេត្តក្រចេះ លោក វ៉ន ត្រៃ ឱ្យដឹងថានៅក្នុងតំបន់របស់លោក ក៏មានការដាក់អន្ទាក់សត្វខ្លះដែរ ប៉ុន្តែមិនសូវកើតមានញឹកញាប់នោះទេ។ លោកថា ពលរដ្ឋក្នុងឃុំរបស់លោក មួយចំនួនប៉ុណ្ណោះ ដែលប្រកបរបរនេះ ដោយសារតែត្រូវការប្រាក់សម្រាប់ផ្គត់ផ្គង់ជីវភាព៖ «មានតែប្រជាពលរដ្ឋដែលទីទ័លក្រ គាត់មិនដឹងរកអី គាត់ទៅរកអាហ្នឹងតិតក់ៗ វាមិនមែនរាល់ថ្ងៃទេ យូរៗមានម្តង មួយអាទិត្យ ឬដប់ថ្ងៃមានមួយ ហើយអត់មានសត្វធំទេ មានតែឈ្លូស ឬជ្រូកព្រៃតែប៉ុណ្ណឹងឯង តែបើសត្វតូចៗវិញមានតែត្រកួត ដូចជាអណ្ដើក ប៉ុន្តែដូចទន្សោង ដូចជាខ្ទីង និងប្រើសអី អត់មានអ្នកណាគេចាប់យកមកទេ ព្រោះគេដាក់តែអន្ទាក់តូចតាច ដូចជាហ្វ្រាំងកង់ អញ្ចឹងដាក់សត្វធំអី គឺមិនអាចទេ»។
ទោះយ៉ាងណា លោក វ៉ន ត្រៃ បន្ថែមថា កន្លងទៅលោកបានជួយប្រាប់ទៅពលរដ្ឋផ្សេងទៀតអំពីសារៈសំខាន់នៃជីវិតសត្វព្រៃនេះដែរ ប៉ុន្តែពលរដ្ឋមួយចំនួនមិនព្រមស្តាប់ ដោយសារតែនេះជាតម្រូវការរបស់ពួកគាត់។
កាលពីថ្ងៃទី១១ ដល់ថ្ងៃទី១២ ខែតុលា រដ្ឋមន្ត្រីក្រសួងមហាផ្ទៃ លោក ស ខេង ដែលបានទៅចូលរួមក្នុងសន្និសីទ ស្ដីពីការជួញដូរសត្វព្រៃខុសច្បាប់ នៅទីក្រុងឡុងដ៍ ចក្រភពអង់គ្លេស ហាក់បំភ្លេចពីការជួញដូរសត្វព្រៃនៅក្នុងប្រទេសកម្ពុជា ដោយលើកឡើងតែថា កម្ពុជាជាប្រទេសដែលក្រុមឧក្រិដ្ឋជនដឹកជញ្ជូន សត្វព្រៃឆ្លងកាត់តែប៉ុណ្ណោះ។
ទោះយ៉ាងណា នៅចំពោះមុខអន្តរជាតិ លោក ស ខេង ថ្លែងថា កម្ពុជាមិនអនុញ្ញាតឱ្យមានការជួញដូរសត្វព្រៃ និងប្រើប្រាស់សត្វព្រៃសម្រាប់តម្រូវការប្រចាំថ្ងៃនោះទេ។ លោកក៏បានប្រកាសប្ដេជ្ញាអនុវត្តន៍នូវវិធានការចាំបាច់មួយចំនួនដើម្បីទប់ស្កាត់ និងបង្ក្រាបការជួញដូរសត្វព្រៃខុសច្បាប់៕