ផល​ប៉ះពាល់​ពី​ការ​ប្រែប្រួល​អាកាស​ធាតុ​ចំពោះ​វិស័យ​កសិកម្ម

ការ​ប្រែប្រួល​អាកាស​ធាតុ បាន​ជះ​ឥទ្ធិពល​មក​លើ​ប្រទេស​កម្ពុជា ដូច​ជា​ទឹក​ភ្លៀង​ធ្លាក់​មិន​ទៀងទាត់ ទឹក​ជំនន់ រាំង​ស្ងួត ខ្យល់​ព្យុះ សត្វ​ល្អិត ជំងឺ​បំផ្លាញ​ដំណាំ និង​សត្វ​ចិញ្ចឹម និង​កើន​ឡើង​កម្ពស់​ទឹក​ប្រៃ​ហូរ​ចូល​ស្រែ​ចម្ការ ដែល​បណ្ដាល​ឲ្យ​មាន​ផលិតភាព​កសិកម្ម​ទាប និង​មាន​ផល​ប៉ះពាល់​ដល់​សន្តិសុខ​ស្បៀង និង​ភាព​ក្រីក្រ។
ដោយ អ៊ុក សាវបូរី
2013-10-19
Share
វេទិកា​កសិករ​ថ្នាក់​ជាតិ​លើក​ទី​៤ ៦១០ វេទិកា​កសិករ​ថ្នាក់​ជាតិ​លើក​ទី​៤ ក្រោម​ប្រធាន​បទ រួម​គ្នា​ធ្វើ​ឲ្យ​ប្រសើរ​ឡើង​នូវ​សមត្ថភាព​បន្ស៊ាំ​ទៅ​នឹង​ការ​ប្រែប្រួល​អាកាស​ធាតុ​របស់​កសិករ ដើម្បី​ធានា​បាន​នូវ​សន្តិសុខ​ស្បៀង នា​សាល​ចតុមុខ រាជធានី​ភ្នំពេញ កាល​ពី​ថ្ងៃ​ទី១៨ ខែ​តុលា ឆ្នាំ​២០១៣។
RFA/Ouk Savborey

បញ្ហា​នេះ ទើប​កសិករ​ជាតិ និង​កសិករ​អាស៊ាន សង្គម​ស៊ីវិល រួម​ទាំង​ស្ថាប័ន​រដ្ឋាភិបាល ស្វែង​រក​ដំណោះស្រាយ​ដោយ​បច្ចេកទេស​បន្ស៊ាំ​ការ​ដាំដុះ ការ​ចិញ្ចឹម​សត្វ និង​បញ្ហា​ផ្សេង​ទៀត ដើម្បី​ឲ្យ​វិស័យ​កសិកម្ម​នៅ​តែ​អាច​ធានា​បាន​សន្តិសុខ​ស្បៀង។

វេទិកា​កសិករ​ថ្នាក់​ជាតិ​លើក​ទី​៤ រយៈពេល ២​ថ្ងៃ គឺ​ថ្ងៃ​ទី​១៧ និង​ថ្ងៃ​ទី​១៨ ខែ​តុលា បាន​ចែក​រំលែក​សកម្មភាព​ដែល​នឹង​ត្រូវ​អនុវត្ត​បន្ត និង​យន្តការ​តាម​ដាន​ជំរុញ​បច្ចេកទេស​កសិកម្ម​បែប​ថ្មី ដើម្បី​ធានា​នូវ​សន្តិសុខ​ស្បៀង និង​ការ​បន្ស៊ាំ​ទៅ​នឹង​ការ​ប្រែប្រួល​អាកាស​ធាតុ។

មន្ត្រី​មន្ទីរ​ធនធាន​ទឹក​ខេត្ត​កែប លោក ជា ម៉េង ថ្លែង​ថា នឹង​ធ្វើ​ការ​សិក្សា​ទៅ​លើ​បញ្ហា​ទំនប់ និង​ការ​គ្រប់គ្រង​ទឹក​ឲ្យ​មាន​ខួប​ប្រាំង និង​វស្សា ដើម្បី​ជួយ​ដល់​ការ​ស្រោចស្រព​នៅ​ពេល​រាំង​ស្ងួត៖ «ជា​ពិសេស ស្រែ​កសិករ​ដែល​បាន​ស្ទូង​ហើយ ជិត​បាន​ផល​នោះ គឺ​ខ្មែរ​យើង​ថា​ខែ​កត្តិក ក្នុង​ខែ​១១ ១២ ហ្នឹង គឺ​មាន​ជំនោរ​ជោរ​ខ្លាំង។ ពេល​ជោរ​ខ្លាំង​ហ្នឹង គឺ​ស្រូវ​យើង​ដាក់​គ្រាប់ ចេញ​ដាក់​គ្រាប់ ពេល​ទឹក​ប្រៃ​ចូល​ធ្វើ​ឲ្យ​ស្រូវ​នោះ​ងាប់។ តែ​បើ​សិន​ជា​យើង​បាន​សាងសង់​ទំនប់​ការពារ​ទឹក​ប្រៃ​បាន តាម​បញ្ហា​ដែល​ចោទ​ហ្នឹង គឺ​យើង​នឹង​អាច​ការពារ​ស្រូវ​បាន​រាប់​ពាន់​ហិកតារ មិន​រយ​ទេ ធ្វើ​ឲ្យ​ទឹក​សមុទ្រ​ដែល​ជោរ​មក គឺ​យើង​អាច​ការពារ​បាន»

ប្រធាន​នាយកដ្ឋាន​ផ្សព្វផ្សាយ​កសិកម្ម លោក ម៉ាក់ សឿន ថ្លែង​ថា ដើម្បី​ធានា​ថា​ព័ត៌មាន​កសិកម្ម​បាន​ផ្សព្វផ្សាយ​បាន​ទៅ​ដល់​កសិករ ក្រសួង​កសិកម្ម នឹង​បង្កើត​មណ្ឌល​កសិកម្ម​តាម​ឃុំ ដើម្បី​ងាយ​ស្រួល​ផ្សព្វផ្សាយ​បច្ចេកទេស​កសិកម្ម​ថ្មី បន្ស៊ាំ​ការ​ប្រែប្រួល​អាកាស​ធាតុ ដើម្បី​ធានា​សន្តិសុខ​ស្បៀង។

កសិករ​មក​ពី​ខេត្ត​កំពង់ស្ពឺ លោក សូ ទិត្យ មក​ពី​ឃុំ​កាហែង ស្រុក​សំរោងទង ថ្លែង​ថា ដី​ស្រែ​គាត់​តែង​តែ​ខ្វះ​ទឹក​ជា​ប្រចាំ​ក្នុង​ការ​ដាំ​ដុះ។ ការ​ប្រែប្រួល​អាកាស​ធាតុ​នៅ​ឆ្នាំ​២០១៣ រឹត​តែ​ធ្វើ​ឲ្យ​តំបន់​នោះ​មិន​សូវ​មាន​ទឹក​ភ្លៀង​ថែម​ទៀត។ មន្ត្រី​កសិកម្ម​បង្រៀន​គាត់​ឲ្យ​ធ្វើ​ស្រែ ប.វ.ស ព្រោះ​ប្រើ​ទឹក​តិច។ គាត់​មិន​ដឹង​ថា ផល​ស្រូវ​នឹង​បាន​ច្រើន ឬ​អត់​ទេ ព្រោះ​ដាំ​ស្រូវ​តែ​មួយ​ដើម៖ «ស្រូវ​១​ដើម​ហ្នឹង​វា​ធន់​នឹង​ការ​រាំង​ស្ងួត​បាន​យូរ ព្រោះ​អី​ក្នុង​គុម្ព​របស់​វា​ហ្នឹង វា​មាន​កម្លាំង​អាច​ស្រូប​យក​ជីជាតិ​ពី​ក្នុង​ដី វា​មិន​ចាំបាច់​ជា​ទឹក​ច្រើន​ប៉ុន្មាន​ទេ ព្រោះ​អី​អា​ហ្នឹង​ឲ្យ​តែ​មាន​ដី​សើមៗ ហើយ​យើង​ឧស្សាហ៍​បោច​ស្មៅ​បន្ធូរ​ដី​អី​វា​ទៅ​វា​ទទួល​បាន​ផល​អ្វី​ដែល​យើង​ចង់​បាន»

ចំណែក​កសិករ​មក​ពី​ឃុំ​ជីខលើ ស្រុក​ស្រែអំបិល ខេត្ត​កោះកុង លោកស្រី ផាវ ញឺង ថ្លែង​ថា ការ​ប្រែប្រួល​អាកាស​ធាតុ​កើត​ចេញ​ពី​ការ​បំផ្លាញ​ព្រៃ​ឈើ។ ក្នុង​តំបន់​គាត់ ការ​បំផ្លាញ​ព្រៃ​ឈើ​យក​ទៅ​ធ្វើ​ចម្ការ​អំពៅ​ច្រើន​ពាន់​ហិកតារ រឹត​តែ​បង្ក​គ្រោះ​ថ្នាក់​ដល់​ការងារ​កសិកម្ម។

ថ្លែង​បិទ​វេទិកា​កសិករ​ថ្នាក់​ជាតិ​លើក​ទី​៤ ក្រោម​ប្រធាន​បទ រួម​គ្នា​ធ្វើ​ឲ្យ​ប្រសើរ​ឡើង​នូវ​សមត្ថភាព​បន្ស៊ាំ​ទៅ​នឹង​ការ​ប្រែប្រួល​អាកាស​ធាតុ​របស់​កសិករ ដើម្បី​ធានា​បាន​សន្តិសុខ​ស្បៀង ត្រូវ​បាន​ប្រធាន​ក្រុម​ប្រឹក្សា​ស្ដារ​អភិវឌ្ឍន៍​វិស័យ​កសិកម្ម និង​ជនបទ និង​ជា​ឧបនាយករដ្ឋមន្ត្រី លោក យឹម ឆៃលី ថ្លែង​ថា ការ​ប្រែប្រួល​អាកាស​ធាតុ​នៅ​ឆ្នាំ​២០១៣ នេះ ប្រទេស​កម្ពុជា បាន​រងគ្រោះ​ទឹក​ជំនន់ ១៧​ខេត្ត ដែល​រង​ផល​ប៉ះពាល់​ដល់​សន្តិសុខ​ស្បៀង៖ «ប៉ះពាល់​នៃ​ការ​ប្រែប្រួល​អាកាស​ធាតុ បាន​បង្ក​ជា​ផល​ប៉ះពាល់​ដល់​ក្រុម​កសិករ​ងាយ​រងគ្រោះ និង​ទន់​ខ្សោយ ដូច​ជា កសិករ​ខ្នាត​តូច​បាន​បណ្ដាល​ឲ្យ​មាន​ភាព​រងគ្រោះ​កាន់​តែ​ធ្ងន់ធ្ងរ​ទៅៗ ព្រោះ​ជីវភាព​រស់​នៅ​របស់​ពួក​គាត់ គឺ​ពឹង​ផ្អែក​ទាំង​ស្រុង​តែ​លើ​វិស័យ​កសិកម្ម។ តែ​កម្ពុជា ការ​ប្រែប្រួល​អាកាស​ធាតុ​ឆ្នាំ​នេះ ២០១៣ ទេវតា​ព្រមាន​ហើយ ប៉ះពាល់​ដល់ ១៧​ខេត្ត។ ហើយ​ធ្ងន់ធ្ងរ​ជាង​គេ គឺ​ខេត្ត​កំពង់ធំ និង​ខេត្ត​បន្ទាយមានជ័យ។ ខេត្ត​បន្ទាយមានជ័យ ហ្នឹង លិច ២​ខែ​ហើយ ធ្ងន់ធ្ងរ​ណាស់។ នេះ គឺ​ជា​ព័ត៌មាន​ពិត​ដែល​យើង​ទាំងអស់​គ្នា​បាន​ឮ​ពី​មាត់​កសិករ»

យោង​របាយការណ៍​ពី​ក្រសួង​កសិកម្ម ក្នុង​វេទិកា​កសិករ​ថ្នាក់​ជាតិ​លើក​ទី​៤ បង្ហាញ​ថា ផល​ប៉ះពាល់ និង​ខូចខាត​លើ​តែ​ដំណាំ​ស្រូវ ព្រោះ​ការ​ប្រែប្រួល​អាកាស​ធាតុ​នៅ​ឆ្នាំ​២០១៣ ដោយ​រាំង​ស្ងួត ស្រូវ​ខូច​ទាំង​ស្រុង​ចំនួន ២៥០​ហិកតារ។ ចំណែក​ផល​ប៉ះពាល់​ពី​ទឹក​ជំនន់ មិន​ទាន់​មាន​តួលេខ​នៅ​ឡើយ។

ក្រុម​ពិភាក្សា ២​ថ្ងៃ ក្នុង​វេទិកា​ថ្នាក់​ជាតិ​លើក​ទី​៤ ទាក់ទង​នឹង​បញ្ហា​សន្តិសុខ​ស្បៀង និង​ការ​បន្ស៊ាំ​ទៅ​នឹង​ការ​ប្រែប្រួល​អាកាស​ធាតុ បាន​រក​ឃើញ​ថា ដើម្បី​ឲ្យ​វិស័យ​កសិកម្ម​នៅ​តែ​អាច​ធានា​បាន​សន្តិសុខ​ស្បៀង គឺ​ការ​ដាំដុះ ត្រូវ​ប្រើ​ជី​ធម្មជាតិ ការ​គ្រប់គ្រង​ទឹក​ឲ្យ​បាន​ល្អ និង​ការ​ចងក្រង​កសិករ​ជា​ក្រុម ក្នុង​ការ​កំណត់​តម្លៃ​លក់​កសិផល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល