តំបន់ខ្លះនៃខេត្តចំនួន៨ រាំងស្ងួតខ្លាំង និងខ្វះទឹកប្រើប្រាស់ ខណៈភ្នំពេញមានទឹកប្រើប្រាស់ធម្មតា
2019.02.23
តំបន់ខ្លះ នៃខេត្តចំនួន៨ទូទៅប្រទេសនៅកម្ពុជា កំពុងជួបគ្រោះរាំងស្ងួត និងខ្វះខាតទឹកប្រើប្រាស់ខ្លាំង ដោយសារបាតុភូត អែលនីណូ (El Nino) ដែលបណ្ដាលឱ្យអាកាសធាតុក្ដៅហួតហែងខ្លាំង។ រដ្ឋាករទឹកស្វយ័តក្រុងភ្នំពេញថា សម្រាប់រាជធានីភ្នំពេញ មិនមានបញ្ហាចោទទេ។ ឯកសិករខ្លះបារម្ភ បាត់បង់ចំណូល នៅពេលរដ្ឋាភិបាលប្រកាសមិនឱ្យធ្វើស្រែប្រាំងលើកទី២ ព្រោះតែបញ្ហាកង្វះទឹក។ ក្រសួងធនធានទឹក និងឧតុនិយម អះអាងថា ក្រសួងបានប្រើប្រាស់គ្រប់មធ្យោបាយ និងសម្ភារៈ ថ្មីៗ ដោយបានផ្ដល់រថយន្តស្ទូចចំនួន ២០គ្រឿង ដល់មន្ទីរធនធានទឹក និងឧតុនិយមតាមបណ្ដាខេត្ត ដើម្បីងាយស្រួលក្នុងការអន្តរាគមន៍ ជួយពលរដ្ឋ ប្រឈមនឹងការខ្វះខាតទឹកប្រើប្រាស់។ ដោយឡែក
ខេត្តចំនួន៨ ដែលខ្វះខាតទឹកប្រើប្រាស់ខ្លាំង គឺខេត្តបាត់ដំបង បន្ទាយមានជ័យ ឧត្តរមានជ័យ កំពង់ធំ ព្រៃវែង ព្រះវិហារ ប៉ៃលិន និងខេត្តកោះកុង។
ក្រសួងធនធានទឹក ចុះផ្សាយតាមហ្វេសប៊ុក (Facebook) ថា នៅខេត្តបាត់ដំបង ទឹកក្នុងអាងកំពីងពួយ នៅសល់ប្រមាណជា ២០លានម៉ែត្រគីបប៉ុណ្ណោះ ដោយសារបានបើកស្រោចស្រពស្រូវជាបន្តបន្ទាប់ ចាប់តាំងពីរដូវវស្សា រហូតដល់រដូវប្រាំងនេះ។ ទឹកនៅសល់ គឺត្រូវបន្តជួយផ្គត់ផ្គង់ស្រោចស្រពលើផ្ទៃដីស្រូវ ដែលកំពុងដាំដុះប្រមាណ២ពាន់ (២.០០០) ហិកតារទៀត។ ចំណែកស្ថានភាពតម្រូវការទឹកនៅទីប្រជុំជនស្រុកមោងឬស្សី និងស្រុកគាស់ក្រឡ ត្រូវបញ្ជូនទឹកពីស្រុក
រតនៈមណ្ឌល តាមទំនប់ពហុបំណង សម្រាប់ការប្រើប្រាស់ប្រចាំថ្ងៃរបស់ពលរដ្ឋប្រមាណ២ម៉ឺន ៨ពាន់ (២៨.០០០) គ្រួសារ ឱ្យមានទឹកប្រើប្រាស់គ្រប់គ្រាន់ឡើងវិញ។ ការបញ្ជូនទឹកនេះ មានចម្ងាយប្រមាណ ១០០គ.ម។ ឯស្ទឹងចាស់ៗ ចំនួន ៩កន្លែង ស្ថិតក្នុងឃុំតាប៉ុន ស្រុកសង្កែ ក៏ត្រូវបានស្ដារឡើងវិញដែរ។
នៅខេត្តបន្ទាយមានជ័យ ក្រសួងធនធានទឹក បានកាយប្រឡាយនាំទឹកពីអាងស្ទឹងស្រែង ចូលក្នុងអាងត្រពាំងថ្ម ដើម្បីទ្រទ្រង់ដល់ការប្រើប្រាស់ប្រចាំថ្ងៃ។ នៅខេត្តឧត្តរមានជ័យ និងខេត្តព្រះវិហារ ខ្វះខាតទឹកប្រើប្រាស់ខ្លាំង សម្រាប់ក្នុងពន្ធនាគារខេត្ត នៅក្រុងសំរោង និងក្រុងព្រះវិហារ។ ពន្ធនាគារខេត្តឧត្តរមានជ័យ ត្រូវដឹកទឹកចំនួន ១០ម៉ែត្រគីបក្នុងមួយថ្ងៃ ដើម្បីផ្គត់ផ្គង់។ ឯពន្ធនាគារខេត្តព្រះវិហារ ក្រសួងធនធានទឹក សម្រេចបុកអណ្ដូងទឹកខ្នាតធំមួយ ដើម្បីផ្គត់ផ្គង់ទឹកនៅទីនោះ។
ស្ថានភាពខ្វះទឹកប្រើប្រាស់នៅខេត្តព្រៃវែងវិញ ក្រសួងធនធានទឹកឱ្យដឹងថា កើតឡើងនៅស្រុកមេសាង ស្រុកពារាំង និងស្រុកស្វាយអន្ទរ។ ក្រសួងធនធានទឹក អះអាងថា ដើម្បីដោះស្រាយបញ្ហាខ្វះទឹកនៅខេត្តព្រៃវែង គឺបានខួងអណ្ដូងចំនួន១២ ឱ្យអ្នកស្រុកមេសាង ប្រើម៉ាស៊ីនបូមទឹកពីទន្លេតូច
បញ្ចូលបឹងទ្រាំង នៅស្រុកពារាំង ដើម្បីសង្គ្រោះស្រូវប្រាំងជាង ៣រយ (៣២០) ហិកតារ និងនៅស្រុកស្វាយអន្ទរ ត្រូវបូមទឹកពីអាងទឹកស្នេហ៍សង្គ្រោះស្រូវប្រាំង ៩៥ហិកតារ។
ខេត្តប៉ៃលិន និងខេត្តកោះកុង ក្រសួងធនធានអះអាងថា ពលរដ្ឋខ្វះខាតទឹកប្រើប្រាស់ប្រចាំថ្ងៃ ដូច្នេះក្រសួងបានដឹកទឹកតាមរថយន្តបំពាក់ស៊ីទែន ផ្គត់ផ្គង់ឱ្យពលរដ្ឋនៅស្រុកសាលាក្រៅ និងក្រុងខេមរភូមិន្ទ។
អាស៊ីសេរីបានព្យាយាមសុំការបញ្ជាក់ពីអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា និងអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ជាច្រើនដង នៅថ្ងៃទី២២ កុម្ភៈ តែមិនលើកទូរស័ព្ទ។ ទោះបែបណា ក្រសួងធនធានទឹក ធ្លាប់ប្រកាសថា នៅរដូវប្រាំង
ឆ្នាំនេះ កម្ពុជានឹងជួបគ្រោះរាំងស្ងួត ក្ដៅហួតហែងខ្លាំង ពិសេសក្នុងអំឡុងខែមេសា និងឧសភា កម្ដៅអាចនឹងហក់ឡើងដល់ ៤០ ទៅ ៤២អង្សាសេ។
អគ្គនាយករដ្ឋាករទឹកស្វយ័តក្រុងភ្នំពេញ លោក ស៊ឹម ស៊ីថា ប្រាប់អាស៊ីសេរីថា សម្រាប់រាជធានីភ្នំពេញ នឹងមិនជួបបញ្ហាខ្វះទឹកប្រើប្រាស់ ដូចនៅតាមបណ្ដាខេត្តទេ ព្រោះមានទន្លេមេគង្គជាប្រភពទឹក៖ «ដូចជា មិនបញ្ហាអ្វីទេ ព្រោះប្រភពទឹកមានគ្រប់គ្រាន់ពីទន្លេមេគង្គ»។
មេដឹកនាំរបបក្រុងភ្នំពេញ លោក ហ៊ុន សែន កាលពីថ្ងៃទី១៧ ខែមករា ចេញសារាចរ អនុញ្ញាតឱ្យកសិករធ្វើស្រូវប្រាំងតែ ១ដងគត់ នៅឆ្នាំនេះ និងត្រូវដាំដំណាំរួមផ្សំផ្សេងទៀត ដើម្បីទុកផ្គត់ផ្គង់សម្រាប់តែការប្រើប្រាស់ប្រចាំថ្ងៃប៉ុណ្ណោះ និងអំពាវនាវដល់អាជ្ញាធរ និងប្រជាពលរដ្ឋត្រូវចាត់វិធានការថែរក្សាទឹក ទុកសម្រាប់ប្រើប្រាស់នៅពេលចាំបាច់។
អតីតប្រធានសមាគមកសិករប្រើប្រាស់ទឹក នៅស្រុកបាភ្នំ ខេត្តព្រៃវែង លោក ស៊ឹម ស្រូយ ឱ្យដឹងថានៅតាមស្រែដែលគ្មានប្រភពទឹក កសិករមួយចំនួន នាំគ្នាបុកអណ្ដូង ក្នុងស្រែ ដើម្បីបូមទឹកពីក្រោមដី យកមកស្រោចស្រពស្រែប្រាំង។ លោកថា វិធីនេះ អាចជួយឱ្យកសិករ មានទឹកស្រោចស្រពមួយរយៈ ប៉ុន្តែ នៅពេលកសិករនាំគ្នា បូមទាំងអស់គ្នាខ្លាំងពេក អាចធ្វើឱ្យអណ្ដូងខ្លះ មិនសូវចេញទឹក៖ «នៅតំបន់ខ្ញុំ (ភូមិទង់នាគ ឃុំស្ដៅកោង) នេះ ឥឡូវធ្វើស្រូវប្រាំងច្រើនណាស់។ ដោយសារតែខ្សត់ខ្សោយទឹក តែឥឡូវក្រោយពេលគាត់ច្រូតកាត់រួចរាល់ហើយ មិនបញ្ហាទេ... នៅជាប់អា
ប្រព័ន្ធខ្ញុំហ្នឹង គេ (កសិករ)ចាប់ផ្ដើមធ្វើប្រហែលជាម្ភៃ សាមសែសិបហិកតារដែរ ដោយសារយើងយកអាប្រព័ន្ធទឹកហ្នឹងមក។ កាលមុនគេប្រើម៉ាស៊ីន ឥឡូវគេប្រើម៉ូទ័រ។ គេបូមមកពីអាកន្លែងឈើកាច់នោះ»។
កសិករ ស៊ឹម ស្រូយ ឱ្យដឹងទៀតថា ទោះរដ្ឋាភិបាល ណែនាំឱ្យកសិករធ្វើស្រែប្រាំងតែម្ដងក៏ដោយ ក៏កសិករខ្លះ ប្រាប់ថា ពួកគេនឹងព្យាយាមធ្វើស្រែប្រាំង លើកទី២ទៀត ព្រោះពួកគេ មិនអាចរកចំណូលបានទេ ប្រសិនបើមិនធ្វើស្រែ៕