សហគមន៍ខេត្តព្រះវិហារថា ក្រុមហ៊ុនមួយយករថយន្តធំៗដឹកជញ្ជូនឈើចូលការដ្ឋានរបស់ខ្លួនជាប់តំបន់ព្រៃការពារ
2019.03.21
សហគមន៍ការពារព្រៃឈើរស់នៅឃុំគូលែនខាងជើង ស្រុកគូលែន ខេត្តព្រះវិហារអះអាងថា ដើមឈើធំៗឋិតក្នុងដែនជម្រកសត្វព្រៃគូលែនព្រហ្មទេព ដែលសហគមន៍នាំគ្នាថែរក្សា និងចុះល្បាត កំពុងទទួលរងការកាប់បំផ្លាញធ្វើអាជីវកម្មយ៉ាងខ្លាំងក្លា ពីសំណាក់ក្រុមហ៊ុន ប្លូ ហេវិន (Blue Haven)។ អាជីវកម្មឈើខ្នាតធំនេះកំពុងធ្វើឱ្យព្រៃការពារមួយនេះមិនសល់ព្រៃឈើធំៗទៀតទេ។
សហគមន៍ការពារព្រៃឈើនៅភូមិជីជ្រូក ភូមិគូលែន និងភូមិពោធិ៍រៀង ឃុំគូលែនខាងជើង ស្រុកគូលែន នៅថ្ងៃទី២០ មីនា ទទូចឱ្យរបបក្រុងភ្នំពេញ និងរដ្ឋមន្ត្រីក្រសួងបរិស្ថាន ជួយទប់ស្កាត់សកម្មភាពកាប់រំលំព្រៃឈើ និងឈើប្រណីតធំៗ ក្នុងដែនជម្រកសត្វព្រៃគូលែនព្រហ្មទេព ដែលជាកន្លែងដែលសហគមន៍ និងមន្ត្រីបរិស្ថានអភិរក្ស។ សហគមន៍ថា ក្រុមហ៊ុនសម្បទានសេដ្ឋកិច្ច ប្លូហេវិន បានយករថយន្តធំៗ បន្លំធ្វើសកម្មភាពលួចកាប់ និងប្រមូលឈើធំៗចេញពីព្រៃការពារនៅតំបន់នោះដោយដឹកជញ្ជូនចូលការដ្ឋានរបស់ក្រុមហ៊ុន ជាង៣សប្ដាហ៍មកហើយ។
តំណាងសហគមន៍ការពារព្រៃឈើភូមិជីជ្រូក លោក លឹម ស្នា ឱ្យដឹងថា ដើមឈើធំៗ រាប់ពាន់ម៉ែត្រត្រូវបានក្រុមហ៊ុន ប្លូ ហេវិន សម្រុកកាប់ និងដឹកជញ្ជូនចេញពីដែនជម្រកសត្វព្រៃគូលែនព្រហ្មទេព ចូលការដ្ឋានរបស់ក្រុមហ៊ុន ដើម្បីអាច្រៀកធ្វើអាជីវកម្ម។ លោកថា ព្រៃស្រោងដែលសំបូរដោយឈើធំៗគ្រប់ប្រភេទឋិតនៅចំណុចព្រៃទីប្រា ឬ ចំណុចដងស្ទឹងធំ ក្នុងដែនជម្រកសត្វព្រៃគូលែនព្រហ្មទេព ត្រូវបានក្រុមហ៊ុននេះយកគ្រឿងចក្រ និងកម្លាំងកម្មករចូលទៅអាររំលំ និងដឹកជញ្ជូនចេញក្រៅអស់មួយផ្នែកធំ៖ «ក្រុមហ៊ុនចូលកាប់កន្លែងដែលហាមឃាត់តឹងតែងពលរដ្ឋចូលកាប់ឈើផ្ទះអត់បានសូម្បីតែមុខ២០ និងមុខ៣០ ក៏មន្ត្រីបរិស្ថានមិនឱ្យកាប់ដែរឥឡូវក្រុមហ៊ុនចូលកាប់អស់រាប់ម៉ឺនម៉ែត្រគូប»។
បុរសដដែលសង្ស័យថា ការកាប់ឈើនៅក្នុងដែនជម្រកសត្វព្រៃនៃឧទ្យានជាតិគូលែនព្រហ្មទេព អាចជាប់ពាក់ព័ន្ធមន្ត្រីឧទ្យានុរក្សខ្លះ ទើបបានជាពុំមានការបង្ក្រាបអ្វីទាល់តែសោះ។ លោកថា ព្រៃឈើនៅតំបន់នោះ មានសារៈសំខាន់សម្រាប់ពលរដ្ឋរាប់រយគ្រួសារ អាស្រ័យផល និងជាជម្រកសត្វព្រៃកម្ររស់នៅ ដូចជា សត្វខ្ទីង ទន្សោង ឈ្លូស រមាំង និង ប្រើសជាដើម៖ «ឈើនៅ ៤ទៅ ៥រយកំណាត់ទៀតនៅក្រៅដេប៉ូ និងក្នុងដេប៉ូក៏មាន។ ព្រៃវាធំទើបកាប់បានមួយជ្រុងព្រៃទេ»។
ទោះជាយ៉ាងណា អាស៊ីសេរី មិនអាចទាក់ទង មន្ត្រីឧទ្យានុរក្សដែនជម្រកសត្វព្រៃគូលែនព្រហ្មទេព ប្រចាំស្រុកគូលែន និងមេការក្រុមហ៊ុន ប្លូ ហេវិន លោក សេដ ឡាំ ដើម្បីសុំការបំភ្លឺជុំវិញការចោទប្រកាន់នេះបានទេ នៅថ្ងៃទី២០ មីនា។ ចំណែកប្រធានមន្ទីរបរិស្ថាន ខេត្តព្រះវិហារ លោក អ៊ា សុខា បដិសេធមិនផ្ដល់បទសម្ភាសន៍ដល់អាស៊ីសេរីដោយលោកថា កំពុងជាប់រវល់៖ «អធ្យាស្រ័យបង បងទាក់ទងទៅប្រធានស្ដីទីគេ ខ្ញុំជាប់រៀន»។
អាស៊ីសេរីបានទាក់ទងអ្នកនាំពាក្យក្រសួងបរិស្ថាន លោក នេត្រ ភត្ត្រា និងអ្នកនាំពាក្យក្រសួងកសិកម្ម លោក ស្រី វុឌ្ឍី ដើម្បីសុំការអធិប្បាយរឿងនេះ តែទូរស័ព្ទហៅចូលគ្មានអ្នកទទួលនៅថ្ងៃដដែលនេះ។
ចំណែកមេឃុំគូលែន លោក ឆេង អ៊ួយ ប្រាប់អាស៊ីសេរីថា ព្រៃឈើនៅតំបន់នោះជាតំបន់ស្នូល គឺជាករណីកិច្ចរបស់មន្ត្រីឧទ្យានុរក្សនៃក្រសួងបរិស្ថានការពារ ហើយអាជ្ញាធរឃុំធ្លាប់ចាត់ឱ្យមន្ត្រីឃុំចុះទៅតំបន់នោះដែរ តែមន្ត្រីឧទ្យានុរក្សហាម។ លោកកត់សម្គាល់ថា អាជ្ញាធរឃុំក៏ធ្លាប់ទទួលដំណឹងថា មានសកម្មភាពកាប់ឈើនៅតំបន់នោះដែរ ក៏ប៉ុន្តែពួកគេមិនមានវិធានការអ្វីទេ ព្រោះតំបន់នោះ មានមន្ត្រីឧទ្យានុរក្សទទួលការពារ។ លោកចាំថា កន្លងទៅអាជ្ញាធរឃុំ និងសហគមន៍មូលដ្ឋាន ធ្លាប់ស្នើទៅក្រសួងបរិស្ថាន ចង់បង្កើតព្រៃតំបន់នោះ ជាព្រៃការពាររបស់សហគមន៍ តែក្រសួងបដិសេធ៖ «ខ្ញុំថាម៉េចបានអាជ្ញាធរមិនដឹង បើដឹងយ៉ាងណាបើដីឋិតក្នុងដែនរបស់ក្រសួងបរិស្ថានមានព្រះរាជក្រឹត្យគ្រប់គ្រងត្រឹមត្រូវយើងទៅគ្រប់គ្រងយ៉ាងម៉េចកើតយើងទៅការពារម៉េចកើតរឿងរបស់គាត់»។
មន្ត្រីសម្របសម្រួលសមាគមអាដហុក (Adhoc) ខេត្តព្រះវិហារ លោក ឡោ ចាន់ សង្កេតឃើញថា ក្រុមហ៊ុន ប្លូ ហេវិន ដែលទទួលសិទ្ធិវិនិយោគដីសម្បទានសេដ្ឋកិច្ចពីរបបក្រុងភ្នំពេញ បានរំលោភកិច្ចសន្យាវិនិយោគដោយបានកាប់ឈើធំៗក្នុងតំបន់ព្រៃការពារធ្វើអាជីវកម្មខុសច្បាប់។ ចំណែកអាជ្ញាធរពាក់ព័ន្ធ រួមទាំងក្រសួងបរិស្ថានផង មិនមានវិធានការច្បាប់ណាមួយដល់ក្រុមហ៊ុននេះជាយូរមកហើយ។ លោកសង្ស័យថា ក្រុមហ៊ុននេះ និងមន្ត្រីជំនាញខ្លះបានឃុបឃិតគ្នាក្នុងការកាប់ និងដឹកជញ្ជូនឈើខុសច្បាប់ ក្នុងតំបន់ព្រៃការពារធម្មជាតិគូលែនព្រហ្មទេព៖ «ក្រុមហ៊ុន ប្លូ ហេវិន កាប់ឈើនេះយើងឃើញថា អាជ្ញាធរហាក់បីដូចជាមិនបានយកចិត្តទុកដាក់ មិនបានមានវិធានការកាប់ និងដឹកជញ្ជូនរបស់ក្រុមហ៊ុនទេ។ ពលរដ្ឋ និងសហគមន៍ចេះតែរាយការណ៍មក ខាងក្រុមហ៊ុនកាប់ហើយដឹកហាក់ដូចជាត្រូវរ៉ូវគ្នា និងឃុបឃិតគ្នាជាមួយមន្ត្រីជំនាញណាមួយអ៊ីចឹងគាត់ដឹងបានដោយសេរីបែបនេះ»។
សហគមន៍ការពារព្រៃឈើថា ដែនជម្រកសត្វព្រៃនៃឧទ្យានជាតិគូលែនព្រហ្មទេព មានផ្ទៃដីជាង ៦ពាន់ហិកតារ (៦.៥០០) មានវិសាលភាពចាប់ពីស្រុកគូលែន ខេត្តព្រះវិហាររហូតដល់ ស្រុកត្រពាំងប្រាសាទ និងស្រុកអន្លង់វែង ខេត្តឧត្តរមានជ័យ។ អ្នកស្រុកបារម្ភថា ប្រសិនបើក្រសួងពាក់ព័ន្ធនៅតែបិទភ្នែកឱ្យក្រុមហ៊ុននេះ កាប់ឈើធ្វើអាជីវកម្មបន្តទៀត ព្រៃការពារធម្មជាតិមួយនេះនឹងបាត់បង់ដើមឈើធំៗ ទាំងស្រុងនៅពេលដ៏ខ្លីខាងមុខ៕