យុវជនមាតាធម្មជាតិតែងខ្លួនជាខ្មោចដើរទៅដាក់ញត្តិទាមទារឱ្យក្រសួងបរិស្ថានដាក់កោះកុងក្រៅជាឧទ្យានជាតិ
2024.06.21
យុវជនបរិស្ថានដង្ហែក្បួន និងដាក់ញត្តិស្នើក្រសួងបរិស្ថានដាក់កោះកុងក្រៅជាឧទ្យានជាតិសមុទ្រ កាលពីថ្ងៃទី២០ មិថុនា ២០២៤។
រូប៖ ពលរដ្ឋផ្ដល់ឱ្យ
ក្រុមយុវជនចលនាមាតាធម្មជាតិតែងខ្លួនជាខ្មោច ដើរទៅដាក់ញត្តិនៅក្រសួងបរិស្ថាន ដើម្បីទាមទារឱ្យដាក់កោះកុងក្រៅជាឧទ្យានជាតិសមុទ្រ។ ការដាក់ញត្តិទាមទារជាថ្មីនេះ គឺដោយសារ យុវជនមើលឃើញថា ក្រសួងបរិស្ថាន អសមត្ថភាព ក្នុងការពារ កោះកុងក្រៅអស់រយៈពេលជាច្រើនឆ្នាំមកហើយ។
ក្រុមយុវជនស្រឡាញ់បរិស្ថានជាង២០នាក់ រួមទាំងព្រះសង្ឃផង នៅព្រឹកថ្ងៃទី២០ ខែមិថុនាបានតែងខ្លួនដោយស្លៀកពាក់ក្រណាត់ស និង គូសមុខ ធ្វើជាខ្មោច ដើរដង្ហែញត្តិ ចាប់ពីចំណុចមន្ទីរពេទ្យកុមារជាតិ ក្បែរសាលាតិចណូ ទៅដាក់នៅក្រសួងបរិស្ថាន ស្ថិតក្នុងសង្កាត់ទន្លេបាសាក់ ខណ្ឌចំការមន ដើម្បីទាមទារឱ្យក្រសួងដាក់កោះកុងក្រៅជា ឧទ្យានជាតិសមុទ្រ។
សកម្មជនចលនាមាតាធម្មជាតិ កញ្ញា មាន លីសា ប្រាប់វិទ្យុអាស៊ីសេរីនៅថ្ងៃទី២០ ខែមិថុនា ថា ការទាមទាររបស់យុវជនជាថ្មីនេះ ក្នុងគោលបំណង ដើម្បីជំរុញឱ្យក្រសួងបរិស្ថាន ដែលមានលោក អ៊ាង សុផល្លែត ជារដ្ឋមន្ត្រី ត្រូវគោរពពាក្យសន្យាដែលថា នឹងដាក់កោះកុងក្រៅជាឧទ្យានជាតិសមុទ្រនៅក្នុងឆ្នាំ២០២១ ហើយនឹងដកអាជ្ញាប័ណ្ណពីក្រុមហ៊ុនកោះកុង អេស អ៊ី ស្សិតខូអិលធីឌី (S.E.Z.Co.Ltd ) ក្រោមការអនុវត្តច្បាប់ភូមិបាល។
សកម្មជនបរិស្ថានវ័យក្មេងរូបនេះ បារម្ភថា ការមិនអើពើរបស់ក្រសួងបរិស្ថាន ដើម្បីរៀបចំដាក់កោះកុងក្រៅជាឧទ្យានជាតិ សមុទ្រក្នុងពេលឆាប់ៗ នេះ គឺ ជាឱកាស របស់ក្រុមអ្នកមានលុយមានអំណាចទុច្ចរិតមួយចំនួន ងាយច្បាមយក កោះធម្មជាតិមួយនេះ ធ្វើជាកម្មសិទ្ធិឯកជន តាមរយៈការផ្ដល់សិទ្ធិ ពីសំណាក់រដ្ឋាភិបាល ។
កញ្ញា មាន លីសា៖ «ការតុបតែងខ្លួនថ្ងៃនេះវាអាចជារឿងកំប្លែង គួរឱ្យអស់សំណើចមួយ តែយើងធ្វើជាខ្មោចដើម្បីតាមចងកម្មចងពៀរ ក្រសួងបរិស្ថានឱ្យឆ្លើយតបចំពោះញត្តិរបស់ពួកយើង តាមការស្នើសុំរបស់ពួកយើង។ អ្វីដែលគួរឱ្យ អាម៉ាស់ហ្នឹង គឺក្រសួងក្បត់ពាក្យសន្យា កុហកទាំងដែលខ្លួនឯង មានមុខងារជាអ្នកតំណាងឱ្យប្រជាពលរដ្ឋ»។
ជុំវិញរឿងនេះ អ្នកនាំពាក្យក្រសួងបរិស្ថាន លោក ខ្វែ អាទិត្យា ប្រាប់វិទ្យុអាស៊ីសេរី តាមបណ្ដាញសង្គមតេឡេក្រាម នៅថ្ងៃទី២០ ខែមិថុនា យ៉ាងខ្លីថា ក្រសួងបរិស្ថានកំពុងពិនិត្យមើលលើសំណើរបស់យុវជនទាំងនោះ។
ទោះជាយ៉ាងណា ចាប់តាំងពីឆ្នាំ២០២០ រហូតដល់ឆ្នាំ២០២៤នេះ សកម្មជនចលនាមាតាធម្មជាតិ បានធ្វើយុទ្ធនាការ និងទាមទារឱ្យក្រសួងបរិស្ថានដាក់កោះកុងក្រៅ ជាឧទ្យានជាតិជាច្រើនដងមកហើយ ប៉ុន្តែ ក្រសួងមិនដែលយកសំណើ ទាំងនោះទៅអនុវត្តឡើយ។ ផ្ទុយទៅវិញ ក្រសួងតែងតែចាត់ទុកយុវជនទាំងនោះ ថា ជាក្រុមបំពុលសង្គម និងមានចេតនាអាក្រក់ ដើម្បីវាយប្រហាររដ្ឋាភិបាលក្រោម លេសស្រឡាញ់បរិស្ថាន។
ក្នុងពេលដើរដង្ហែញត្តិនៅព្រឹកថ្ងៃទី២០ មិថុនា យុវជនខ្លះ កាន់រូបគំនូរទិដ្ឋភាពកោះកុងក្រៅ និងដៃកាន់ ទៀន ដូចនឹងការដើរដង្ហែសាកសពយកទៅបូជា។ ទោះជាយ៉ាងណា សកម្មភាពនេះ ពុំមានការឃ្លាំមើល ឬរារាំងពីមន្ត្រីអាជ្ញាធរដូចពេលមុនៗ នោះទេ។ រីឯ ក្រសួងបរិស្ថាន ក៏មានមន្រ្តី ចុះមកទទួលញត្តិពីក្រុមយុវជនផងដែរ។
យុវជនស្រឡាញ់បរិស្ថានទាំងនោះ សង្ឃឹមថា ក្រោយពីសកម្មភាព ដាក់ញត្តិ ជាថ្មីនេះ ក្រសួងបរិស្ថាន នឹងពិចារណាឡើងវិញ ដើម្បីដាក់កោះកុងក្រៅជាឧទ្យានជាតិសមុទ្រ។ ពួកគាត់ថា ការទាមទារនេះ មិនមែនដើម្បីបំពុលសង្គម ឬបម្រើផលប្រយោជន៍ជនណាមួយនោះឡើយ គឺធ្វើឡើងដើម្បីតែផលប្រយោជន៍ ប្រទេសជាតិតែប៉ុណ្ណោះ។
ទាក់ទិនរឿងនេះ ប្រធានកម្មវិធីបណ្ដាញ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍ លោក សាន់ ម៉ាឡា សង្កេតឃើញថា រយៈពេលជាច្រើនខែចុងក្រោយនេះ កោះកុងក្រៅ បានក្លាយជាតំបន់ទេសចរណ៍បែបធម្មជាតិសមុទ្រ ដ៏ទាក់ទាញសម្រាប់ប្រជាពលរដ្ឋទៅលេងកម្សាន្ត។ ដូច្នេះ លោកថា គួរតែ ដល់ពេលហើយ ដែលក្រសួងពាក់ព័ន្ធ ដាក់កោះកុងក្រៅជាឧទ្យានជាតិ តាមសំណើ របស់ប្រជាពលរដ្ឋ និងយុវជន។
លោក សាន់ ម៉ាឡា៖ «ប្រសិនបើតំបន់នេះក្លាយជាសណ្ឋាគារប្រណិត ហើយគ្រប់គ្រងដោយ ពួកអ្នកមានទាំងស្រុង នោះច្បាស់ណាស់ ប្រជាពលរដ្ឋខ្មែរនឹងបាត់បង់ឱកាស ក្នុងការទៅលេងកម្សាន្ត។ ការដាក់កោះកុងក្រៅជាឧទ្យានជាតិសមុទ្រ វាគឺជាផ្នែកមួយ ដែលបង្ហាញនូវឆន្ទៈ និងការប្ដេជ្ញាចិត្តរបស់រដ្ឋាភិបាល ដែលថាស្រឡាញ់ធនធានធម្មជាតិ ថាមានបំណងអភិរក្ស ច្រើនជាងអភិវឌ្ឍន៍ ដើម្បីចង់បានតែលុយ និងបម្រើតែផលប្រយោជន៍ពួកអ្នកមាន»។
កោះកុងក្រៅ ជាកោះធំជាងគេស្ថិតនៅក្នុងលំហសមុទ្រកម្ពុជា មានទីតាំងក្នុងឃុំជ្រោយប្រស់ ស្រុកកោះកុង ខេត្តកោះកុង។ កោះនេះ គ្របដណ្ដប់ដោយព្រៃឈើក្រាស់ឃ្មឹក អមដោយទឹកជ្រោះជាច្រើនកន្លែង មានជីវចម្រុះជាច្រើនប្រភេទ ជាពិសេសកោះនេះ មានឆ្នេរខ្សាច់សក្បុស និងទឹកសមុទ្រពណ៌ខៀវស្រងាត់។
យុវជនចង់ឃើញកោះនេះ ក្លាយជាឧទ្យានជាតិសមុទ្រ ដើម្បីផលប្រយោជន៍រួមរបស់ជាតិ តាមរយៈការបម្រើវិស័យទេសចរណ៍ដល់ភ្ញៀវជាតិ និងអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- តុលាការចោទប្រកាន់ជំនួយការផ្ទាល់លោក ហ៊ុន សែន គឺលោក ដួង តារា ពីបទ «ឆបោក»
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»