ក្រោយចប់ពិធីបុណ្យព្រៃឡង់សមាជិកបណ្ដាញសហគមន៍ព្រៃឡង់ព្រួយបារម្ភថាព្រៃឡង់នៅតែរងការបំផ្លាញ
2019.02.19
បណ្ដាញសហគមន៍ព្រៃឡង់បង្ហាញការព្រួយបារម្ភថា បទល្មើសព្រៃឈើ និងការកាប់បំផ្លាញព្រៃឡង់នៅបន្តកើតឡើងដដែល។ កង្វល់របស់អ្នកស្រឡាញ់ព្រៃ ឈើបែបនេះ ក្រោយពេលពួកគេបានចូលរួមប្រារព្ធបុណ្យព្រៃឡង់ និងពិធីបំបួសដើមឈើ រកឃើញថា ឃើញបទល្មើសព្រៃឈើកើតឡើងដដែលក្នុងតំបន់ព្រៃឡង់។
បណ្ដាញសហគមន៍ព្រៃឡង់ និងអ្នកស្រឡាញ់ព្រៃឈើអះអាងថា ទោះបុណ្យព្រៃឡង់ និងពិធីបំបួសដើមឈើបានបិទបញ្ចប់ទៅដោយជោគជ័យក្តី ក៏បទល្មើសព្រៃឈើនៅតែកើតឡើងពេញព្រៃដដែល។ សកម្មជនព្រៃឈើឲ្យដឹងទៀតថា ក្រុមជនល្មើសហាក់បានដឹងថា ពួកគេចុះល្បាតព្រៃឈើ ដោយអ្នកខ្លះបានឈប់កាប់បំផ្លាញព្រៃឈើក្នុងពេលពួកគេចុះល្បាត និងជួបជុំគ្នាប្រារព្ធពិធីបុណ្យព្រៃឡង់ ហើយពួកគេស្លុតចិត្តនៅពេលឃើញ ដើមឈើធំត្រូវជនខិលខូចកាប់រំលំ។
ព្រះតេជព្រះគុណ អូន ឡុង ដែលបានដើរល្បាតព្រៃឈើ និងជាអ្នកដឹកនាំពិធីបំបួសដើមឈើឲ្យអាស៊ីសេរីដឹងថា ក្នុងពេលចុះល្បាតពលរដ្ឋចាប់បានឈើ ម៉ាស៊ីនអារឈើ និងអ្នកកាប់ឈើប៉ុន្តែរបាយការណ៍រួមព្រះអង្គមិនទាន់អាចបញ្ជាក់ក្នុងពេលនេះនៅឡើយទេ។ ព្រះអង្គឲ្យដឹងទៀតថា ក្រុមពលរដ្ឋចាប់បានឈើធំៗ បីគោយន្តដោយរក្សាទុកមួយកន្លែង ដើម្បីបន្តដំណើរទៅ កន្លែងផ្សេងទៀត ប៉ុន្តែពេលត្រឡប់មកវិញ ឈើដែលចាប់បាននោះត្រូវបានបាត់មិនដឹងថា អ្នក ណាលួចដឹកយកទៅណា?៖ «យើងបានធ្វើកម្មវិធីចប់ហើយ ប៉ុន្តែបទល្មើសព្រៃឈើនៅតែកើតឡើង។ មនុស្សចាប់បានប៉ុន្តែយើងមិនធ្វើអីទេ គ្រាន់តែអប់រំសួរនាំអ្នកណាជាអ្នកបញ្ជាគាត់ និងឲ្យគាត់ធ្វើកិច្ចសន្យា»។
បណ្ដាញសហគមន៍ព្រៃឡង់ខេត្តព្រះវិហារ លោក ស្រី ថី ឲ្យដឹងថា បទល្មើសព្រៃឈើខ្លះ ពិបាកក្នុងការបង្ក្រាបដោយសារក្រុមជនល្មើសប្រព្រឹត្តនៅក្នុងព្រៃឈើនៅពេលយប់ ហើយមានទាំងអាវុធកែច្នៃទៀតផង។ លោកបន្តទៀតថា បទល្មើសកើតឡើង ប៉ុន្តែអ្នកការពារមាន តិចតួច ហើយសមត្ថកិច្ចនៅក្នុងខេត្តក៏មិនបានផ្ដល់កិច្ចសហការជាមួយពលរដ្ឋនោះដែរ៖ «ការព្រួយបារម្ភរបស់ខ្ញុំនៅតែមានជានិច្ច ព្រោះកម្លាំងតិចតួចមិនអាចដើរបានសព្វព្រៃ»។
កង្វល់របស់បណ្ដាញសហគមន៍ព្រៃឡង់ និងអ្នកស្រឡាញ់ព្រៃឈើបែបនេះ ក្រោយពេលពួកគេចុះល្បាតការពារព្រៃឡង់ជាច្រើនថ្ងៃ និងបាននាំគ្នាប្រារព្ធបុណ្យព្រៃឡង់ និងពិធីបំបួសដើម ឈើកាលពីថ្ងៃទី១៦ និងថ្ងៃទី១៧ ខែកុម្ភៈកន្លងទៅ។ ក្រុមសហគមន៍ព្រៃឡង់ទាំង ៤ខេត្ត និងអ្នកការពារព្រៃឈើបានប្រារព្ធបុណ្យព្រៃឡង់ និងពិធីបំបួសដើមឈើនៅចំណុច (វាលតានូ) ក្នុងតំបន់ព្រៃឡង់ ភូមិសាស្ត្រព្រំប្រទល់ខេត្តកំពង់ធំ ក្រចេះ និងស្ទឹងត្រែង។
អ្នករៀបចំពិធីបុណ្យព្រៃឡង់ម្នាក់លោក ម៉ិញ នី ដែលជាបណ្ដាញសហគមន៍ព្រៃឡង់ខេត្ត កំពង់ធំឲ្យដឹងថា ពិធីនេះមានអ្នកចូលរួមជិត ៤០០នាក់ ក្នុងនោះមានព្រះសង្ឃ ១៥អង្គ អាជ្ញាធរដែនដី និងមន្ត្រីក្រសួងបរិស្ថានផងដែរ។ លោកយល់ថា បើមនុស្សគ្រប់រូបបានយល់ដឹងពី សារសំខាន់នៃព្រៃ និងចេះស្រលាញ់ព្រៃឈើនោះបទល្មើសព្រៃឈើមិនកើតទេ៖ «ក្នុងចិត្តសប្បាយចិត្តរីករាយមែនទែនបានបង្កើតកម្មវិធីឡើងជោគជ័យព្រៃឈើព្រៃឡង់យើងទទួលបានប្រយោជន៍ពីព្រៃត្រូវតែរំលឹកពីបុព្វគុណព្រៃ»។
ពិធីបុណ្យព្រៃឡង់នេះត្រូវបានគេប្រារព្ធឡើងក្នុងគោលបំណងឧទ្ទិសរំឭកគុណដល់ព្រៃឈើ និងបួងសួងសុំឱ្យព្រៃឡង់នៅគង់វង្ស ដើម្បីរក្សានូវអត្តសញ្ញាណរបស់ជនជាតិដើមភាគតិចកួយ ដែលរស់នៅពឹងអាស្រ័យនឹងព្រៃឈើនេះ។
កម្មវិធីបុណ្យដែលមានរយៈពីរថ្ងៃនេះនឹងធ្វើឡើងតាមទំនៀមពីដើមរៀងមក ដោយថ្ងៃទី១ គឺថ្ងៃទី១៦ កុម្ភៈ គេធ្វើពិធីសែនព្រេនតាមជំនឿជនជាតិដើមភាគតិចកួយ និងពិធីក្រុងពិលី។ ចំណែកនៅពេលរសៀលព្រះសង្ឃសូត្រមន្តចម្រើនព្រះបរិត្ត និងស្ដាប់ព្រះធម៌ទេសនា។ រីឯថ្ងៃទី២ ដែលជាថ្ងៃបញ្ចប់ គឺជាកម្មវិធីបំបួសដើមឈើ ដើម្បីរំលឹកគុណព្រៃឈើ។
ព្រះតេជព្រះគុណ អូន ឡុង ដែលដឹកនាំពិធីបំបួសដើមឈើមានថេរដីកាឲ្យដឹងថា ព្រះអង្គ និង ព្រះសង្ឃផ្សេងទៀតបំបួសដើមឈើបានជិត ៤០ដើម។ ព្រះអង្គបន្តថា ពិធីនេះមានអត្ថ ប្រយោជន៍ច្រើន ព្រោះបានបង្ហាញនូវវប្បធម៌ទំនៀមទម្លាប់របស់ខ្មែរផង ព្រមទាំងបានបង្ហាញ ឲ្យពលរដ្ឋបានដឹងបានឃើញពីបទល្មើសព្រៃឈើផង និងបានបណ្ដុះគំនិតឲ្យយុវជនចូលរួម ថែរក្សាព្រៃឈើបន្តទៀត៖ «យើងមើលឃើញថា យើងធ្វើពិធីបុណ្យនេះ ដើម្បីរំលឹកដល់ជីដូនជីតា ឬចាស់ពីដើម ដែលគាត់បានបន្សល់ទុកម៉្យាងទៀតប្រជាជនក៏ដូចយុវជន ដែលគាត់បានលះបង់ពេលវេលាមានតម្លៃចូលរួមអ៊ីចឹងដល់ថ្ងៃក្រោយទៀតគាត់ហៅមិត្តភ័ក្ដិមកចូលរួមបុណ្យព្រៃឡង់»។
ពិធីបំបួសដើមឈើនេះចាប់ផ្ដើមពីព្រះសង្ឃសូត្រធម៌កាន់ស្បង់ និងនិមន្តកាន់ស្បង់រុំជុំវិញដើមឈើ ប៉ុន្តែគ្រប់ដើមឈើទាំងអស់មិនមែនសុទ្ធតែត្រូវព្រះសង្ឃរុំស្បង់ទាំងអស់នោះទេ។ ដើមឈើដែលត្រូវបំបួសនោះភាគច្រើនជាដើមឈើធំៗ ឬប្រភេទឈើកម្រ។
ហេតុផលមួយទៀតនៃពិធីបំបួសដើមឈើត្រូវបានគេលើកឡើងថា ដើមឈើដែលបានបំបួស អាចចៀសផុតពីការកាប់ទន្ទ្រានពីសំណាក់ឈ្មួញ ព្រោះពេលឃើញស្បង់ព្រះសង្ឃដែលរុំជាប់ នៅនឹងដើមឈើទាំងនោះអាចធ្វើឲ្យពួកគេនឹងប្រែចិត្តឈប់កាប់ដោយសារដើមឈើដែល បំបួសនោះជាដើមឈើការពារតាមជំនឿពុទ្ធសាសនា។
ប៉ុន្តែ ទោះឈើទាំងនោះត្រូវព្រះសង្ឃបំបួសហើយក្តី ក៏នៅតែមាន ជនខិលខូចលួចកាប់ជួញដូរ ដោយបន្សល់ត្រឹមស្បង់ព្រះសង្ឃជាប់គល់ឈើប៉ុណ្ណោះ។ ព្រះសង្ឃខ្លះដាក់បណ្ដាសាអ្នកបំផ្លាញព្រៃឈើទាំងនោះ។
បណ្ដាញសហគមន៍ព្រៃឡង់ ព្រះសង្ឃ និងពលរដ្ឋដែលស្រលាញ់ធនធានធម្មជាតិអះអាងថា ពួកគេនឹងចូលរួមបុណ្យព្រៃឡង់ និងពិធីបំបួសដើមឈើនៅឆ្នាំក្រោយជាបន្តទៀត ដើម្បីចូលរួមការពារព្រៃឈើ។
របាយការណ៍ជាតិ និងអន្តរជាតិបានបង្ហាញជាបន្តបន្ទាប់ថា ព្រៃឈើកម្ពុជា និងព្រៃឡង់នៅតែបន្តរងការកាប់រំលំពីសំណាក់ឈ្មួញទុច្ចរិត។ របាយការណ៍របស់បណ្ដាញសហគមន៍ព្រៃឡង់បង្ហាញថា ទំហំព្រៃឡង់បច្ចុប្បន្ននៅសល់តែប្រមាណ៣៦ម៉ឺនហិកតារ ដែលពីមុននៅក្នុងអនុក្រឹត្យ ស្ដីពីការបង្កើតតំបន់ព្រៃការពារ និងអភិរក្សជីវៈចម្រុះព្រៃឡង់គឺមានផ្ទៃដីទំហំជាង៦១ម៉ឺនហិកតារលាតសន្ធឹងចាប់ពីខេត្តកំពង់ធំ ព្រះវិហារ ក្រចេះ ដល់ខេត្តស្ទឹង ត្រែង។ សកម្មជនបរិស្ថានការពារព្រៃ ឲ្យដឹងថា របបក្រុងភ្នំពេញក្រោមការដឹកនាំរបស់លោក ហ៊ុន សែន បរាជ័យក្នុងការការពារព្រៃឈើ និងធនធានធម្មជាតិកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។