ខុទ្ទកាល័យ​នាយក​រដ្ឋមន្ត្រី​មិន​ទទួល​យក​វត្ថុ​តាង​ដែល​សហគមន៍​ព្រៃ​ឡង់​រឹប​អូស​បាន

ដោយ ប្រាជ្ញ ចេវ
2015-08-24
Share
រណារ​យន្ត​អារ​ឈើ ព្រៃ​ឡង់ ៦២០ បណ្ដាញ​សហគមន៍​ការពារ​ព្រៃ​ឡង់ យក​វត្ថុ​តាង​ជា​រណារ​យន្ត​អារ​ឈើ​ទៅ​ប្រគល់​ឲ្យ​មន្ត្រី​នៃ​ខុទ្ទកាល័យ​លោក​នាយក​រដ្ឋមន្ត្រី ហ៊ុន សែន កាល​ពី​ព្រឹក​ថ្ងៃ​ទី​២៤ ខែ​សីហា ឆ្នាំ​២០១៥។
RFA/Brach Chev

មន្ត្រី​ខុទ្ទកាល័យ​នាយក​រដ្ឋមន្ត្រី បដិសេធ​មិន​ទទួល​វត្ថុ​តាង​ដែល​ជា​រណារ​យន្ត​អារ​ឈើ ដែល​សកម្មជន​ការពារ​ព្រៃ​ឡង់​ផ្តល់​ឲ្យ​នោះ​ទេ បន្ទាប់​ពី​ពួក​គេ​បាន​ចាប់​រណារ​យន្ត​ចំនួន ១១​គ្រឿង​ពី​អ្នក​កាប់​ឈើ​ខុស​ច្បាប់​ក្នុង​តំបន់​ព្រៃ​ឡង់​នៅ​ក្នុង​ខេត្ត​ចំនួន​៤ គឺ​ខេត្ត​ក្រចេះ ស្ទឹងត្រែង កំពង់ធំ និង​ខេត្ត​ព្រះវិហារ។

ក្រោយ​ពី​មន្ត្រី​ខុទ្ទកាល័យ​លោក​នាយក​រដ្ឋមន្ត្រី ហ៊ុន សែន មិន​ទទួល​យក​វត្ថុ​តាង​ដែល​ជា​រណារ​យន្ត​អារ​ឈើ ក្រុម​សហគមន៍​បាន​បញ្ជូន​ឧបករណ៍​ទាំង​នោះ​ទៅ​កាន់​រដ្ឋបាល​ព្រៃ​ឈើ​វិញ។ សហគមន៍​ការពារ​ព្រៃ​ឡង់ សម្ដែង​ការ​សោកស្ដាយ​ចំពោះ​ការ​មិន​ផ្តល់​កិច្ច​សហការ​ពី​ខុទ្ទកាល័យ​នាយក​រដ្ឋមន្ត្រី​ក្នុង​ការ​បង្ក្រាប​បទល្មើស​ព្រៃ​ឈើ​បែប​នេះ ព្រោះ​ថា​ពួក​គេ​ចង់​ឲ្យ លោក ហ៊ុន សែន បាន​ឃើញ​វត្ថុ​តាង​ទាំង​នោះ។

ការ​បដិសេធ​មិន​ទទួល​វត្ថុ​តាង​ទាំង​នេះ ត្រូវ​មន្ត្រី​ខុទ្ទកាល័យ​របស់ លោក ហ៊ុន សែន គឺ​លោក ប៉ាល់ ចន្តារា ជា​ប្រធាន​គណៈកម្មការ​ចម្រុះ បញ្ជាក់​ប្រាប់​ទៅ​ក្រុម​អ្នក​ស្រឡាញ់​ធម្មជាតិ​ថា ស្ថាប័ន​មួយ​នេះ​ទទួល​តែ​ញត្តិ​ទេ។ មួយ​វិញ​ទៀត រណារ​អារ​ឈើ​ទាំង​នេះ គ្មាន​លក្ខណៈ​ផ្លូវ​ច្បាប់ ព្រោះ​គ្មាន​ការ​ចូលរួម​ពី​ព្រះរាជអាជ្ញា និង​សមត្ថកិច្ច។ មន្ត្រី​រូប​នេះ ស្នើ​ឲ្យ​ក្រុម​សហគមន៍​យក​របស់​ទាំង​នោះ​ទៅ​រក្សា​ទុក​នៅ​សហគមន៍ ឬ​អាជ្ញាធរ​មាន​សមត្ថកិច្ច​ជំនួស​វិញ៖ «ខ្ញុំ​ថត​រូប​នេះ​ទុក ប៉ុន្តែ​បង​ប្អូន​សហគមន៍​ជា​អ្នក​ថែ​រក្សា​វត្ថុ​តាង ខាង​ខ្ញុំ​អ្នក​រាយការណ៍ គឺ​តាម​ឯកសារ មិន​មែន​លើក​ម៉ាស៊ីន​ទៅ​ទេ»

នៅ​ក្នុង​សន្និសីទ​សារព័ត៌មាន​មួយ​នៅ​រាជធានី​ភ្នំពេញ កាល​ពី​ព្រឹក​ថ្ងៃ​ទី​២៤ ខែ​សីហា ក្រៅ​ពី​បង្ហាញ​ឧបករណ៍​កាប់​បំផ្លាញ​ព្រៃ​ឈើ ដែល​សហគមន៍​រឹប​អូស​បាន ពួក​គេ​លើក​ឡើង​ថា បទល្មើស​ព្រៃ​ឈើ​ក្នុង​តំបន់​ព្រៃ​ឡង់​កំពុង​តែ​បង្ក​ក្តី​បារម្ភ។

តំណាង​សហគមន៍​ការពារ​ព្រៃ​ឡង់​មក​ពី​ខេត្ត​ក្រចេះ លោក ថៃ ប៊ុនលៀង និយាយ​ថា មន្ត្រី​ខុទ្ទកាល័យ​មិន​ព្រម​ទទួល​យក​វត្ថុ​តាង​នៅ​ពេល​នេះ គឺ​ជា​ឥរិយាបថ​មិន​បង្ហាញ​ការ​ចូលរួម​ការពារ​ព្រៃ​ឡង់។ លោក​បន្ត​ថា ការ​ទាមទារ​របស់​មន្ត្រី​ខុទ្ទកាល័យ​ស្នើ​ឲ្យ​សហគមន៍ មាន​កិច្ច​សហការ​ជាមួយ​សមត្ថកិច្ច ឬ​ស្ថាប័ន​តុលាការ​លើ​រឿង​នេះ គឺ​ជា​ការ​ដាក់​បន្ទុក​ទៅ​លើ​ក្រុម​លោក ព្រោះ​មន្ត្រី​ថ្នាក់​ក្រោម​មិន​បាន​ផ្តល់​កិច្ច​សហការ​នឹង​លោក​ទេ៖ «ខ្ញុំ​ចង់​ឲ្យ​ឃើញ​នេះ ព្រោះ​ភស្តុតាង​ដាក់​ជាច្រើន​ឆ្នាំ​មក​ហើយ​នៅ​ថ្នាក់​ក្រោម ប៉ុន្តែ​ថ្នាក់​លើ​អត់​បាន​ដឹង​រឿង​នេះ​ទេ ចឹង​ហើយ​ទើប​ខ្ញុំ​ចង់​ផ្តល់​ទៅ​ខុទ្ទកាល័យ​នាយក​រដ្ឋមន្ត្រី»

របាយការណ៍​របស់​បណ្ដាញ​សហគមន៍​ព្រៃ​ឡង់ បង្ហាញ​ថា ចាប់​ពី​ខែ​មករា ដល់​ខែ​សីហា ឆ្នាំ​២០១៥ នេះ បទល្មើស​ព្រៃ​ឈើ​នៅ​ក្នុង​ខេត្ត​ទាំង​៤ គឺ​ខេត្ត​កំពង់ធំ ក្រចេះ ស្ទឹងត្រែង និង​ខេត្ត​ព្រះវិហារ បទល្មើស​ព្រៃ​ឈើ​កើត​ឡើង​ជាង ២​ពាន់​ករណី កើន​ឡើង​ជាង​ឆ្នាំ​មុន បើ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​២០១៤ មាន​ជិត ២​ពាន់​ករណី។

អ្នក​សម្រប​សម្រួល​បណ្ដាញ​សហគមន៍ លោក សេង សុងហេង ឲ្យ​ដឹង​ថា មូលហេតុ​ក្រុម​សហគមន៍​សម្រេច​ចិត្ត​បង្ក្រាប​បទល្មើស​ដោយ​ខ្លួន​ឯង ព្រោះ​បទល្មើស​កំពុង​កើត​ឡើង ប៉ុន្តែ​ពុំ​សូវ​ឃើញ​មាន​ការ​បង្ក្រាប​ពី​សមត្ថកិច្ច​នោះ​ឡើយ។ លោក​អ្នក​នៅ​ពី​ក្រោយ​បទល្មើស​ទាំង​នេះ គឺ​ជា​មន្ត្រី​ធំ អ្នក​មាន​លុយ​ដែល​មាន​ងារ​ជា​ឧកញ៉ា៖ «ពេល​យើង​ចុះ​រួម​ទាំងអស់​គ្នា​នៅ​ក្នុង​ទាំង​បួន គឺ​ខេត្ត​ក្រចេះ ស្ទឹងត្រែង កំពង់ធំ និង​ខេត្ត​ព្រះវិហារ បើ​យើង​មិន​ដក​ហូត​ឧបករណ៍​បទល្មើស​ទាំងអស់​នោះ​ទេ នឹង​បង្ក​ផល​លំបាក​កាន់​តែ​ខ្លាំង»

ក្រុម​អ្នក​ស្រឡាញ់​បរិស្ថាន​លើក​ឡើង​ថា បទល្មើស​ព្រៃ​ឈើ​ក្នុង​តំបន់​ព្រៃ​ឡង់ កើត​ឡើង​ជា​ការ​បរាជ័យ​របស់​រដ្ឋាភិបាល ក្នុង​ការ​បង្ក្រាប​បទល្មើស​ព្រៃ​ឈើ។ ក្រុម​សហគមន៍​ផ្តល់​អនុសាសន៍​ពីរ​ចំណុច​ធំៗ គឺ​ស្នើសុំ​ឲ្យ​លោក​នាយក​រដ្ឋមន្ត្រី ចាត់​វិធានការ​ជា​បន្ទាន់​ទប់ស្កាត់​បទល្មើស​នៅ​តំបន់​ព្រៃ​ឡង់ និង​មាន​វិធានការ​លើ​ឈ្មួញ​រក​ស៊ី​ព្រៃ​ឈើ​ដែល​មាន​លុយ និង​មាន​អំណាច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល