នាយករដ្ឋមន្ត្រីរិះគន់ការដាក់ស្លាកផ្សព្វផ្សាយអំពីការនេសាទខុសច្បាប់នៅជិតវិមានឯករាជ្យ
2015.07.01
លោកនាយករដ្ឋមន្ត្រី ហ៊ុន សែន ថ្លែងក្នុងថ្ងៃសម្ពោធបើកការដ្ឋានសាងសង់ស្ពានអាកាសស្តុបទួលគោក រាជធានីភ្នំពេញ នៅថ្ងៃទី០៩ ខែកញ្ញា ឆ្នាំ ២០១៤។
Photo: RFA
អង្គការមិនមែនរដ្ឋាភិបាល ដែលធ្វើកិច្ចការលើការការពារតំបន់អភិរក្សជលផល យល់ឃើញថា ប្រតិកម្មរបស់លោកនាយករដ្ឋមន្ត្រីប្រឆាំងការដាក់ស្លាកប៉ាណូផ្សព្វផ្សាយអំពីការនេសាទខុសច្បាប់ ដែលត្រូវគេដាក់ផ្សាយជាសាធារណៈនោះ គឺវាមិនសមហេតុផលឡើយ។
ការថ្លែងរិះគន់របស់អង្គការសង្គមស៊ីវិលនៅពេលនេះ ធ្វើឡើងនៅបន្ទាប់ពី លោក ហ៊ុន សែន ចំអកឲ្យមន្ត្រីជលផលដែលជាមន្ត្រីក្នុងជួររដ្ឋាភិបាលថា ស្លាកប៉ាណូដែលដាក់ក្បែររបងផ្ទះលោកជិតវិមានឯករាជ្យនោះ តើចង់និយាយពីអ្វីឲ្យប្រាកដ?
ប្រតិកម្មរបស់ លោក ហ៊ុន សែន នៅពេលនេះ គឺចំពេលនៃការប្រារព្ធទិវាមច្ឆជាតិក្នុងខេត្តកំពង់ចាម ក៏ប៉ុន្តែត្រូវបានអង្គការមិនមែនរដ្ឋាភិបាលរិះគន់ទៅវិញថា សារនយោបាយរបស់លោកនាយករដ្ឋមន្ត្រីនេះ គឺផ្ទុយពីគោលការណ៍ដែលធានាពីការផ្សព្វផ្សាយជាសាធារណៈ និងសិទ្ធិទទួលបានការចូលរួមដោយសេរី និងតម្លាភាពទៅវិញ។
ការរិះគន់ដ៏កម្ររបស់ លោក ហ៊ុន សែន ប្រឆាំងមន្ត្រីជំនាញជលផល ដែលជាសេនាធិការរបស់រដ្ឋាភិបាលនេះ គឺនៅបន្ទាប់ពីលោកបានឃើញផ្ទាំងប៉ាណូ ត្រូវគេចងក្បែរផ្ទះរបស់លោកជិតវិមានឯករាជ្យមុន ២ថ្ងៃនៃការប្រារព្ធទិវាមច្ឆជាតិក្នុងឆ្នាំនេះ។
ប្រធានគណបក្សប្រជាជនកម្ពុជា ដែលទើបតែឡើងកាន់តំណែងថ្មីៗ និងជានាយករដ្ឋមន្ត្រីផង លោក ហ៊ុន សែន ចំអកឲ្យមន្ត្រីជលផលថា តើការដាក់តាំងបង្ហាញនូវបម្រាមនេសាទខុសច្បាប់ចំកណ្ដាលទីក្រុងភ្នំពេញនេះ ឲ្យអ្នកណាឃើញ? លោកបន្ថែមទៀតថា ឬគិតថា ប្រជាពលរដ្ឋក្នុងទីក្រុងភ្នំពេញជាអ្នកប្រព្រឹត្តបទល្មើសនេសាទដែរ។ លោក ហ៊ុន សែន ថែមទាំងដាក់ចេញនូវបញ្ជាទៀតថា ផ្ទាំងប៉ាណូដែលបានដាក់តាំងរួចហើយនេះ ហាមដកចេញ គឺទុកបង្ហាញឲ្យសាធារណជនវាយតម្លៃសិនចុះ ថាតើដាក់តាំងបែបនេះវាជារឿងដែលត្រឹមត្រូវដែរទេ?។ លោកបន្តថា «ផ្លូវទៅខាងស្ដាំដៃគេដាក់ថា សូមកុំប្រើឧបករណ៍ខុសច្បាប់ក្នុងនេសាទ។ អ៊ីចឹងអ្នកភ្នំពេញជាអ្នកនេសាទគេដែរ? បិទខុសកន្លែងទេដឹង ឬឲ្យខ្ញុំឃើញ ចង់ឲ្យខ្ញុំនិយាយ។ អាហ្នឹងគួរតែដើរដាក់កន្លែងផ្សេងៗនៅគ្រប់កន្លែង ដាក់កន្លែងតំបន់នេសាទនេះ មិនមែនដាក់កន្លែងផ្ទះនាយករដ្ឋមន្ត្រីទេ»។
រដ្ឋាភិបាលកម្ពុជា បានធ្វើកំណែទម្រង់លើវិស័យជលផលលើកទី១ កាលពីចុងឆ្នាំ២០០០ ដោយសម្រេចលុប និងកាត់បន្ថយឡូនេសាទប្រមាណជាង ៥៦% នៃផ្ទៃឡូនេសាទទូទាំងប្រទេស ប្រគល់ជូនប្រជាពលរដ្ឋមូលដ្ឋានប្រើប្រាស់ និងគ្រប់គ្រងតាមរយៈការរៀបចំជាសហគមន៍នេសាទ។ ដំណាក់កាលទីពីរ កាលពីខែមីនា ឆ្នាំ២០១២ កន្លងទៅ លោកនាយករដ្ឋមន្ត្រី ហ៊ុន សែន បានដាក់ចេញអនុក្រឹត្យកាត់ឡូនេសាទពីលក្ខណៈឯកជន មកជាការប្រើប្រាស់ជាសហភាពវិញនៅទូទាំងប្រទេស។ បើទោះជាបែបនេះក៏ដោយចុះ ក៏អង្គការមិនមែនរដ្ឋាភិបាលដែលធ្វើកិច្ចការលើការអភិរក្សជលផល រកឃើញថា គោលនយោបាយកាត់ឡូរបស់រដ្ឋាភិបាលនេះ ពុំមែនជាការដោះស្រាយបញ្ហានោះទេ។ ផ្ទុយទៅវិញ រឿងនេះបានក្លាយជាបន្ទុកដ៏ធ្ងន់ធ្ងរសម្រាប់សហគមន៍ និងប្រជាពលរដ្ឋបន្ថែមទៀតទៅវិញ។
ជុំវិញបញ្ហានេះ មន្ត្រីសម្របសម្រួលកម្មវិធីតំបន់បឹងទន្លេសាប នៃអង្គការសម្ពន្ធភាពដើម្បីអភិរក្សធនធានជលផល លោក ម៉ិញ ប៊ុនលី ចាត់ទុកថា ការថ្លែងរបស់ លោក ហ៊ុន សែន នេះ វាហាក់ផ្ទុយពីខ្លឹមសាររួមដែលធានាពីការផ្សព្វផ្សាយ និងការចូលរួមជាសាធារណៈ ដែលកំណត់ដោយច្បាប់។ លោកយល់ឃើញថា វាមិនទាស់ខុសនោះឡើយ ព្រោះនេះជាការរួមចំណែកទប់ស្កាត់បទល្មើស ហើយជំរុញឲ្យសាធារណជនបានយល់ដឹងបន្ថែមពីគោលការណ៍ និងបទបញ្ញត្តិនានាផង ប្រឆាំងបទល្មើសនេសាទនេះ។ លោកបន្តថា «ខ្ញុំគិតថាដាក់ស្លាកអប់រំទាក់ទងបទល្មើសនេសាទ ឬក៏បញ្ហានេសាទនេះ គេអាចដាក់នៅគ្រប់ទីសាធារណៈ ដែលគិតថាជាកន្លែងដែលប្រជាពលរដ្ឋចេញចូល ដូច្នេះទីប្រជុំជនហ្នឹង»។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ឲ្យដឹងថា កំណើនត្រីចិញ្ចឹមបានកើនឡើងរហូតដល់ ៣០ម៉ឺនតោនកាលពីឆ្នាំ២០១៤។ តួលេខនេះ បើប្រៀបធៀបកាលពីឆ្នាំ២០១២ វិញ មានចំនួនត្រឹម ១២ម៉ឺនតោន។
ក្រៅពីការថ្លែងរិះគន់មន្ត្រីជលផលនេះ លោក ហ៊ុន សែន ថែមទាំងចំអកឲ្យរដ្ឋមន្ត្រីក្រសួងសុខាភិបាល គឺលោក ម៉ម ប៊ុនហេង ថែមទៀតផង។
លោកនាយករដ្ឋមន្ត្រីហៅការផ្សព្វផ្សាយពីរបៀបបំបៅដោះកូនដោយទឹកដោះម្ដាយ ថាមិនគួរផ្សព្វផ្សាយនៅតាមទីជនបទទេ។ ផ្ទុយទៅវិញ យុទ្ធនាការនេះគួរបំផុសឲ្យមានការយល់ដឹងនៅតាមទីប្រជុំ ឬទីក្រុងវិញល្អជាង ព្រោះពួកគេងាយបោះបង់ការបំបៅកូនដោយទឹកដោះម្ដាយមុនកាលកំណត់។ ដោយឡែក អ្នករស់នៅតាមជនបទវិញ ពុំមានលទ្ធភាពទិញទឹកដោះគោឲ្យកូនបៅនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ