ឈើ​ប្រណីត​ជាង​២០​ម៉ែត្រ​គូប​ត្រូវ​រឹប​អូស​ពី​កន្លែង​ស្ដុក​ឈើ​ខុស​ច្បាប់​នៅ​រតនគិរី

អាជ្ញាធរ​ខេត្ត​រតនគិរី បាន​បង្ក្រាប​កន្លែង​ស្តុក​ឈើ​ប្រណីត​ខុស​ច្បាប់​ក្នុង​ក្រុង​បានលុង ដែល​ឈ្មួញ​លាក់​ទុក​ដើម្បី​លួច​នាំ​ចេញ​ទៅ​ទីផ្សារ។ ការ​បង្ក្រាប​នេះ ធ្វើ​ឡើង​ខណៈ​ដែល​ចលនា​ដឹក​ជញ្ជូន​ឈើ​ប្រណីត​ឆ្លង​ដែន​តាម​ច្រក​របៀង​ទៅ​លក់​នៅ​ប្រទេស​វៀតណាម បាន​កើត​មាន​ជា​ហូរហែ។
ដោយ រដ្ឋា វិសាល
2013-12-17
Share

ឈើ​ប្រណីត​ប្រភេទ​ឈើ​ធ្នង់ នាងនួន ជាង ២០​ម៉ែត្រ​គូប ត្រូវ​បាន​ក្រុម​សមត្ថកិច្ច​ចម្រុះ​រឹប​អូស​ពី​កន្លែង​ស្តុក​ឈើ​ខុស​ច្បាប់ ៣​កន្លែង នៅ​សង្កាត់​បឹងកន្សែង ក្រុង​បានលុង។

ការ​បង្ក្រាប​ទីតាំង​លាក់​ទុក​ឈើ​ប្រណីត​ខុស​ច្បាប់​នេះ ធ្វើ​ឡើង​ចាប់​ពី​ថ្ងៃ​ទី​១៣ រហូត​មក​ទល់​នឹង​ថ្ងៃ​ទី​១៦ ខែ​ធ្នូ ក៏ប៉ុន្តែ​ក្រុម​សមត្ថកិច្ច​មិន​បាន​ចាប់​ឃាត់​ខ្លួន​ជន​ពាក់ព័ន្ធ​ជា​ម្ចាស់​លាក់​ទុក​ឈើ​ខុស​ច្បាប់​នេះ​ទេ។

មន្ត្រី​ដឹក​នាំ​ការ​បង្ក្រាប ព្រះរាជ​អាជ្ញា​អម​តុលាការ​ខេត្ត​រតនគិរី លោក លាវ ស្រេង មាន​ប្រសាសន៍​បញ្ជាក់​ថា ឈើ​ជា​វត្ថុ​តាង​ទាំងអស់​បាន​ប្រគល់​ជូន​មន្ត្រី​ជំនាញ​រដ្ឋបាល​ព្រៃ​ឈើ ដើម្បី​ចាត់​វិធាន​ការ​តាម​ច្បាប់​ព្រៃ​ឈើ។ លោក​បន្ត​ថា ជន​ពាក់ព័ន្ធ​ជា​ម្ចាស់​ឈើ​ហ្នឹង ត្រូវ​កោះ​ហៅ​ឲ្យ​ចូល​ទៅ​បំភ្លឺ​នៅ​ខណ្ឌ​រដ្ឋបាល​ព្រៃ​ឈើ ពី​ករណី​ចោទ​ប្រកាន់​ថា​បាន​ធ្វើ​សន្និធិ​ឈើ​ខុស​ច្បាប់។

ទាក់ទិន​ការ​បង្ក្រាប​នេះ​ដែរ នាយ​រង​ខណ្ឌ​រដ្ឋបាល​ព្រៃ​ឈើ​ខេត្ត​រតនគិរី លោក ផាន់ ភិន មាន​ប្រសាសន៍​បញ្ជាក់​ថា វត្ថុ​តាង​ឈើ​ប្រណីត​ទាំងអស់​នឹង​ត្រូវ​រឹប​អូស​ជា​សម្បត្តិ​រដ្ឋ ចំណែក​ជន​ពាក់ព័ន្ធ​ស្តុក​ឈើ នឹង​ត្រូវ​ទទួល​ការ​ពិន័យ​អន្តរការណ៍​តាម​ច្បាប់​ព្រៃ​ឈើ។ លោក​បន្ត​ថា ប្រាក់​ពិន័យ​អន្តរការណ៍​ទាក់ទិន​ការ​ស្តុក​ឈើ​ប្រណីត​នេះ មាន​បរិមាណ​បី​ដង​ទៅ​នឹង​តម្លៃ​ទីផ្សារ​ឈើ​ប្រណីត​ទាំងអស់​នេះ៖ «បី​ករណី​នេះ​នៅ​ដៃ​ផ្នែក​នៅ​ឡើយ មិន​ទាន់​ដល់​ខណ្ឌ​ទេ។ តាម​ផ្លូវ​ច្បាប់ បើ​សិន​ជា​ម្ចាស់​ហ្នឹង​គាត់​ព្រម​បង់​ពិន័យ បាន​ន័យ​ថា ព្រម​សារភាព​ទោស​កំហុស គឺ​អត់​បញ្ជូន​ទៅ​តុលាការ​ទេ អា​ហ្នឹង​មាត្រា​៩៦។ ប៉ុន្តែ បើ​សិន​ណា​គាត់​មិន​ព្រម​បង់​ពិន័យ​ទេ សំណុំ​រឿង​ទាំង​បី​ហ្នឹង គឺ​អាច​បញ្ជូន​ទៅ​តុលាការ ដើម្បី​ចាប់​បង្ខំ​គាត់​ឲ្យ​អនុវត្ត​ច្បាប់​តែ​ម្តង»

សេចក្តី​រាយការណ៍​របស់​មន្ត្រី​ឃ្លាំ​មើល​បញ្ហា​ព្រៃ​ឈើ​នៃ​សមាគម​ការពារ​សិទ្ធិ​មនុស្ស​អាដហុក (Adhoc) ខេត្ត​រតនគិរី កត់​សម្គាល់​ថា ឈើ​ប្រណីត​ត្រូវ​បាន​ឈ្មួញ​ប្រមូល​ទិញ​ពី​ប្រជាពលរដ្ឋ​អ្នក​ចូល​ព្រៃ​កាប់​ឈើ​ពី​បណ្ដា​ស្រុក រួម​មាន ស្រុក​វ៉ឺនសៃ តាវែង លំផាត់ អណ្ដូងមាស និង​អូរយ៉ាដាវ។ ឈើ​ប្រណីត​ដែល​ឈ្មួញ​ប្រមូល​ទិញ​មួយ​ចំណែក ត្រូវ​គេ​យក​ទៅ​ស្តុក​ទុក​ក្នុង​បរិវេណ​ដី​សម្បទាន​សេដ្ឋកិច្ច​របស់​ក្រុមហ៊ុន​មួយ​ចំនួន។ ឈើ​ខ្លះ​ទៀត ត្រូវ​ឈ្មួញ​លាក់​ទុក​នៅ​តាម​ចម្ការ ឬ​ឃ្លាំង​ស្តុក​ឈើ​លួច​លាក់​នៅ​តាម​បណ្ដា​កន្លែង​ស្តុក​ឈើ​តាម​ទី​រួម​ស្រុក ឬ​ក្រុង និង​ឈើ​មួយ​ចំណែក​ទៀត ត្រូវ​គេ​ដឹក​ជញ្ជូន​ឆ្លង​ដែន​តាម​ច្រក​របៀង​ទៅ​លក់​ឲ្យ​ឈ្មួញ​នៅ​ប្រទេស​វៀតណាម នៅ​វេលា​យប់។

មន្ត្រី​សម្រប​សម្រួល​សមាគម​អាដហុក ខេត្ត​រតនគិរី លោក ឆាយ ធី មាន​ប្រសាសន៍​បញ្ជាក់​ថា ក្រៅ​ពី​ទីតាំង​ស្តុក​ឈើ​ប្រណីត​នៅ​ខេត្ត​នេះ មាន​រោង​សិប្បកម្ម​ផលិត​គ្រឿង​សង្ហារិម​ធ្វើ​ពី​ឈើ​ប្រណីត ដែល​ច្បាប់​បាន​ហាម​ឃាត់​រាប់​សិប​កន្លែង។ លោក​កត់​សម្គាល់​ថា ឈើ​ប្រណីត​មាន​តម្លៃ​រាប់​ពាន់​រាប់​ម៉ឺន​ដុល្លារ ត្រូវ​បាន​គេ​ផលិត​ជា​គ្រឿង​សង្ហារិម​ពាក់​កណ្ដាល​សម្រេច ឬ​សម្រេច​ដាក់​តាំង​លក់​ជា​សាធារណៈ និង​គ្មាន​ការ​បង្ក្រាប៖ «នៅ​មិន​ទាន់​មាន​ការ​បង្ក្រាប​ជា​ទ្រង់ទ្រាយ​ធំ ហើយ​ឲ្យ​បាន​គ្រប់​កន្លែង​ឲ្យ​បាន​ស្មើ​ភាព​គ្នា​នៅ​ឡើយ។ យើង​ឃើញ​មាន​ចន្លោះ​ប្រហោង​បទ​ល្មើស​ព្រៃ​ឈើ​មាន​ច្រើន​កន្លែង ដូច​ជា​នៅ​ក្នុង​ដី​សម្បទាន​នៅ​ក្នុង​សិប្បកម្ម​មួយ​ចំនួន​ធំ ក៏​ជា​បទ​ល្មើស​ព្រៃ​ឈើ​ធ្ងន់ធ្ងរ​ផង​ដែរ។ជាពិសេស ការ​លក់​គ្រឿង​សង្ហារិម​នៅ​កណ្ដាល​ក្រុង​បានលុង ក៏​ជា​ផ្នែក​មួយ​នៃ​បទ​ល្មើស​ព្រៃ​ឈើ។ រោង​សិប្បកម្ម​មួយ​ចំនួន​មាន​តែ​ច្បាប់​សិប្បកម្ម​ទិញ​ឈើ​ខុស​ច្បាប់»

តួលេខ​របស់​អាជ្ញាធរ​ប៉ូលិស​ក្រុង​បានលុង ឲ្យ​ដឹង​នៅ​ក្រុង​បានលុង មាន​រោង​សិប្បកម្ម​ផលិត​គ្រឿង​សង្ហារិម​ពី​ឈើ​ប្រណីត ៥២​កន្លែង ក្នុង​នោះ​រោង​សិប្បកម្ម​មាន​ច្បាប់​អនុញ្ញាត ១២​កន្លែង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។