ពលរដ្ឋនៅស្វាយរៀងចងក្រងសហគមន៍ដើម្បីអភិរក្សព្រៃឈើ
2014.12.07
ប្រជាពលរដ្ឋនៅក្នុងឃុំក្រសាំង ស្រុករមាសហែក ខេត្តស្វាយរៀង បាននាំគ្នាចងក្រងសហគមន៍ដើម្បីអភិរក្សព្រៃឈើរបស់សហគមន៍មួយកន្លែងទុកបម្រើផលប្រយោជន៍រួមនៅក្នុងឃុំ។ ពលរដ្ឋដែលជាអ្នកការពារព្រៃឈើទាំងនោះ ឲ្យដឹងថា ព្រៃឈើទាំងនោះ ក្រៅតែពីមានប្រយោជន៍ផ្នែកបរិស្ថានវាក៏ជាទីកន្លែងដែលពលរដ្ឋនៅក្នុងសហគមន៍អាចទាញយកអនុផលព្រៃឈើផងដែរ។
ពលរដ្ឋជាសកម្មជនស្រលាញ់ និងការពារព្រៃឈើប្រមាណ ១០០នាក់ បាននាំគ្នាដើរមើលព្រៃសហគមន៍ ដែលពួកគាត់បានស្នើសុំពីអាជ្ញាធរដើម្បីអភិរក្សនៅក្នុងឃុំក្រសាំង ស្រុករមាសហែក ខេត្តស្វាយរៀង។ ព្រៃឈើសហគមន៍ក្រសាំងដែលមានទំហំប្រមាណជាង ៥០០ហិកតារនេះ គឺពួកគាត់បានថែរក្សារយៈពេល ៥ឆ្នាំមកហើយរហូតមកដល់ពេលនេះ។
លោក ប៊ូ សាមុជ ជាប្រធានសហគមន៍ការពារព្រៃឈើក្រសាំង នេះបានថ្លែងថា បច្ចុប្បន្ននេះគឺពលរដ្ឋដែលនៅជុំវិញព្រៃក្រសាំងនេះ គឺបាននាំគ្នាការពារដូចជាសម្បត្តិផ្ទាល់ខ្លួន ដើម្បីឲ្យវានៅគងវង់ទុកឲ្យក្មេងជំនាន់ក្រោយមានព្រៃឈើប្រើប្រាស់៖ «បើយើងរង់ចាំដីនេះឲ្យបានមកសហគមន៍ដោយស្របច្បាប់នោះវាមិនងាយទេ ប៉ុន្តែយើងពង្រីកសមាជិកសហគមន៍ ឬគណៈកម្មការឲ្យជួយការពារដីគ្នា។ ក្រុមមន្ត្រីផ្ដាំមកថា ត្រូវតែការពារហើយពួកគាត់ក៏ជួយដែរ»។
ព្រៃសហគមន៍ក្រសាំងនេះ ជាព្រៃដែលមានប្រភេទឈើធំៗល្មមអាចកាប់ដើម្បីសាងសង់ផ្ទះសម្បែងបាននៅពេលអនាគត។ ម្យ៉ាងទៀតពលរដ្ឋដែលនៅជុំវិញនោះ គឺអាចរកអនុផលពីព្រៃសហគមន៍ការពារទាំងនោះបានដែរ។
អ្នកស្រី គឹម ផល រស់នៅក្នុងភូមិព្រៃផ្ដៀក ឃុំក្រសាំង ស្រុករមាសហែក ខេត្តស្វាយរៀង បានថ្លែងថា បើគិតពីបច្ចុប្បន្នគឺព្រៃសហគមន៍ជាដង្ហើមរស់របស់ពលរដ្ឋជាច្រើនដូចជាកន្លែងសម្រាប់សត្វពាហនៈ ហើយអាចទាញយកផលនានា ពីព្រៃឈើមកចិញ្ចឹមជីវភាពបានផង៖ «ព្រៃឈើនេះទុកសម្រាប់កូនចៅទៅជំនាន់ក្រោយៗផង កុំឲ្យវាចេះតែបាត់បង់ដីព្រៃអ៊ីចឹង គឺទុកឲ្យវានៅយូរអង្វែង។ ទុកព្រៃនេះគ្រាន់ឃ្វាលគោក្របី ឬបោចវល្លិ៍ជាដើម»។
,/p>
ទោះយ៉ាងណាពលរដ្ឋដែលចូលរួមការពារ និងអភិរក្សព្រៃឈើសហគមន៍នោះ គឺនៅតែព្រួយបារម្ភពីការងាយរងគ្រោះសម្រាប់ព្រៃសហគមន៍ ដោយសារតែការផ្ដល់សម្បទានសេដ្ឋកិច្ចរបស់រដ្ឋាភិបាលទៅក្រុមហ៊ុនឯកជនដើម្បីធ្វើការអភិវឌ្ឍ។
លោក ពៅ ឈឹន ជាក្រុមប្រឹក្សាឃុំក្រសាំង បានថ្លែងថា កន្លងមកមានក្រុមហ៊ុន ឬឈ្មួញឯកជនចេះតែមកហាក់ចង់ទិញដីព្រៃទាំងនោះ ក៏ប៉ុន្តែមិនមានអ្នកណាអាចហ៊ានលក់បានឡើយ ហើយម្យ៉ាងទៀតពលរដ្ឋដែលនៅក្នុងសហគមន៍គឺប្ដេជ្ញាការពារព្រៃឲ្យគង់៖ «បាទ! កន្លងមកក្រុមហ៊ុនចេះតែចូលមកចង់បានដីរបស់សហគមន៍ហ្នឹង។ តាមពិតដីរបស់សហគមន៍គឺមានតាំងពីដើមមក ប៉ុន្តែមិនទាន់ជាផ្លូវការ មានច្បាប់ទម្លាប់អីត្រឹមត្រូវ ប៉ុន្តែឥឡូវយើងបានទទួលស្គាល់ដល់ស្រុកហើយ»។
បើសិនជាមានការអភិវឌ្ឍនោះ គឺពលរដ្ឋនៅជុំវិញព្រៃសហគមន៍ក្រសាំង និងរងគ្រោះខ្លាំង ហេតុដូច្នេះហើយទើបពលរដ្ឋត្រូវអភិរក្សទុកប្រើប្រាស់ជាសមូហភាព។ លោក ប៊ូ សាមុជ ជាប្រធានសហគមន៍ការពារព្រៃឈើក្រសាំង នេះបានបញ្ជាក់បន្ថែម៖ «ដូចលោកដឹងស្រាប់ហើយ បើបានដីទៅក្រុមហ៊ុនវិញនោះ គឺសូម្បីតែសត្វក្របី គោ ឬមនុស្សដែលធ្លាប់ទទួលផលអនុផលព្រៃឈើ នោះគឺអត់បានចូលទៀតទេ គឺមិនបានចូលកាត់ដីគេទៀតទេ ហើយមិនដឹងទៅរកអ្វីថែមទៀតបើអស់ព្រៃទៅហើយនោះ។ ម្យ៉ាងទៀតគេចាប់ក្របី ឬគោ ត្រូវពរលដ្ឋបង់លុយកាក់ឲ្យគេទៀត។ ធនធានព្រៃឈើរបស់យើងគឺកាន់តែរេចរឹលទៅ ជាពិសេសគឺនៅស្រុករមាសហែក ខេត្តស្វាយរៀង នេះ គឺនៅសល់តិចបំផុត»។
ផលប៉ះពាល់ប្រសិនបើមិនមានការអភិរក្សព្រៃឈើក្រសាំង នេះ ត្រឹមត្រូវទេ ក្រៅពីប៉ះពាល់ដល់ពលរដ្ឋនៅក្នុងសហគមន៍ គឺប៉ះពាល់ដល់សត្វព្រៃផ្សេងៗទៀតដែលកំពុងតែឈានដល់ផុតពូជនៅពេលខាងមុខផង។
លោកបញ្ជាក់ទៀតថា សត្វព្រៃចាប់ផ្ដើមសំបូរឡើងវិញខ្លះៗហើយ ក្រោយពេលដែលអ្នកភូមិជួយការពារក្នុងរយៈពេល ៥ឆ្នាំកន្លងមកនេះ៖ «ពលរដ្ឋគឺពឹងលើអនុផលព្រៃឈើហ្នឹងហើយ បេះផ្លែឈើបន្លែបង្ការជាដើម គឺមាននៅក្នុងព្រៃនេះ ហើយផលប្រយោជន៍គឺនៅសល់សត្វព្រៃដើម្បីឲ្យកូនក្មេងជំនាន់ក្រោយបានមើល និងស្គាល់ផង»។
ទោះយ៉ាងណាពលរដ្ឋដែលរស់នៅជុំវិញព្រៃឈើសហគមន៍នេះសង្ឃឹមថា កូនៗរបស់ពួកគាត់នឹងនៅតែស្គាល់ព្រៃឈើ និងសត្វព្រៃនៅពេលដែលពួកគេធំដឹងក្ដីនៅពេលខាងមុខ៕