ពលរដ្ឋនៅពោធិ៍សាត់បារម្ភពីការចិញ្ចឹមត្រីឆ្ដោរខុសច្បាប់របស់វៀតណាម
2014.01.07
ពលរដ្ឋបានអះអាងថា សកម្មភាពចិញ្ចឹមត្រីខុសច្បាប់នេះ បានកើតមានចាប់តាំងពីឆ្នាំ២០១៣ ហើយមកដល់បច្ចុប្បន្នកំពុងតែធ្វើសកម្មភាពជីកស្រះចិញ្ចឹមបន្ថែម ក៏ប៉ុន្តែពួកគាត់មិនឃើញមានអាជ្ញាធរ ឬមន្ត្រីជំនាញណាចុះមកហាមឃាត់ឡើយ។
ក្រុមប្រជាពលរដ្ឋបានបញ្ជាក់ប្រាប់វិទ្យុអាស៊ីសេរី នៅថ្ងៃទី៧ ខែមករា ថា ទីតាំងចិញ្ចឹមត្រីឆ្ដោរខុសច្បាប់ចំនួន ១០កន្លែង និងសកម្មភាពជីកស្រះបន្ថែមមួយចំនួនទៀត កំពុងតែកើតមាននៅភូមិក្រឡាញ់ នៃឃុំក្បាលត្រាច។ ពួកគាត់បន្តថា ផ្ទៃដីដែលគេជីកធ្វើស្រះចិញ្ចឹមត្រីទាំងនោះ គឺកម្មសិទ្ធិរបស់អភិបាលរងខេត្តពោធិ៍សាត់ម្នាក់ ហើយបានជួលទៅឲ្យជនជាតិវៀតណាម ដើម្បីចិញ្ចឹមត្រីតាំងពីឆ្នាំ២០១៣មក។
ប្រជាពលរដ្ឋម្នាក់រស់នៅភូមិក្រឡាញ់ អ្នកស្រី រឿន សុន មានប្រសាសន៍ថា អ្នកស្រីបានឃើញសកម្មភាពជីកស្រះបន្ថែមចំនួនពីរផ្សេងទៀតនៅក្បែរដីលោកអភិបាលរងខេត្តនោះ ក៏ប៉ុន្តែអ្នកស្រីមិនដឹងច្បាស់ថា ស្រះដែលជីកថ្មីនោះគឺជាកម្មសិទ្ធិរបស់នរណាឡើយ៖ «លោកគ្រូខ្ញុំអត់បានដឹងថា ជនជាតិវៀតណាមហ្នឹងប៉ុន្មានទេ ប៉ុន្តែគ្រាន់តែឃើញជនជាតិវៀតណាមហ្នឹង គេទៅជួលស្រះហ្នឹងប្រហែលជាគេហ៊ុនគេច្រើន ព្រោះអីក្នុងស្រះមួយម្ចាស់មួយៗ។ ចិញ្ចឹមត្រីហ្នឹងគាត់យកត្រីពីទន្លេទាំងឡានៗ យកមកធ្វើជាចំណីត្រីហ្នឹង»។
ចំណែកប្រជាសហគមន៍ម្នាក់ទៀត លោក គុជ វេង បានបញ្ជាក់ថា សកម្មភាពចិញ្ចឹមត្រីឆ្ដោរខុសច្បាប់នៅក្នុងឃុំរបស់លោក បានកើតមានជាយូរមកហើយ ក៏ប៉ុន្តែលោកមិនដែលឃើញមានអាជ្ញាធរ ឬមន្ត្រីជំនាញណាចុះមកបង្ក្រាបឡើយ។ លោកថា ប្រសិនបើគេនៅតែបណ្ដែតបណ្ដោយឲ្យសកម្មភាពខុសច្បាប់នេះ បន្តកើតមានទៀត នោះធនធានមច្ឆាជាតិនឹងត្រូវប៉ះពាល់ធ្ងន់ធ្ងរ ហើយលោកបានស្នើសុំដល់ស្ថាប័នពាក់ព័ន្ធជួយចុះអន្តរាគមន៍ចំពោះបញ្ហានេះជាបន្ទាន់។
ការចិញ្ចឹមត្រីឆ្ដោរ ឬត្រីរ៉ស់ គឺជាសកម្មភាពខុសច្បាប់ និងបង្កឲ្យមានផលប៉ះពាល់ដល់ធនធានមច្ឆាជាតិ និងប្រភេទត្រីកម្រមួយចំនួន ដោយសារតែសកម្មភាពចាប់យកត្រីទាំងតូចទាំងធំទៅធ្វើជាចំណីត្រីឆ្ដោរនៅតាមស្រះទាំងនោះ ក្នុង១ថ្ងៃៗរាប់រយគីឡូក្រាម។
ឆ្លើយតបនឹងបញ្ហានេះមេឃុំក្បាលត្រាច លោក ដួង សារិន មានប្រសាសន៍ថា លោកមិនអាចក្ដាប់បានអស់នូវសកម្មភាពចិញ្ចឹមត្រីនៅក្នុងមូលដ្ឋានរបស់លោកឡើយ។
លោកបន្តថា កាលពីឆ្នាំកន្លងទៅពិតជាមានសកម្មភាពចិញ្ចឹមត្រីឆ្ដោរមែន ក៏ប៉ុន្តែបច្ចុប្បន្នសកម្មភាពនេះត្រូវបានបញ្ឈប់ហើយ៖ «ចិញ្ចឹមមិនដឹងចិញ្ចឹមត្រីអីចិញ្ចឹមត្រីធម្មតា ឬក៏ធ្វើស្រះជួលសម្រាប់ឲ្យគេចិញ្ចឹម។ ពីមុនមកគេចិញ្ចឹមមួយសាទៅវាខាតទៅ វាឈប់អស់ហើយ ខ្ញុំមិនសូវបានទៅហ្នឹងដែរណា លឺសូរតែមេភូមិ និងប្រជាពលរដ្ឋអីគាត់រាយការណ៍មក»។
វិទ្យុអាស៊ីសេរីមិនអាចទាក់ទងប្រធានរដ្ឋបាលជលផលខេត្តពោធិ៍សាត់ លោក ភុំ វិមល ដើម្បីសុំការពន្យល់បន្ថែមជុំវិញបញ្ហានេះឡើយ នៅថ្ងៃទី៧ ខែមករា។ ចំណែកប្រធានមន្ទីរកសិកម្ម រុក្ខាប្រមាញ់និងនេសាទ ខេត្តពោធិ៍សាត់ លោក ឡាយ ពិសិដ្ឋ ក៏បានបដិសេធមិនធ្វើអត្ថាធិប្បាយជុំវិញបញ្ហានេះដែរ ដោយលោកប្រាប់ថា មិនបានដឹងអំពីសកម្មភាពជីកស្រះ និងការចិញ្ចឹមត្រីឆ្ដោរខុសច្បាប់ទាំងនោះឡើយ៕