ក្រុម​​យុវជននិង​​ព្រះសង្ឃ​​ធ្វើ​​ធម្មយាត្រា​ ​ដើម្បី​​ការពារ​ព្រៃឈើ​នៅតំបន់​អារ៉ែង​ដែល​ប្រឈម​ការ​បាត់បង់

ដោយ ជី វិតា
2022.06.26
Share on WhatsApp
Share on WhatsApp
ក្រុម​​យុវជននិង​​ព្រះសង្ឃ​​ធ្វើ​​ធម្មយាត្រា​ ​ដើម្បី​​ការពារ​ព្រៃឈើ​នៅតំបន់​អារ៉ែង​ដែល​ប្រឈម​ការ​បាត់បង់ ព្រះសង្ឃ និង​យុវជន​ដើរ​ធម្មយាត្រា​ទៅតំបន់​អារ៉ែង​ដើម្បី​​​ផ្សព្វ​ផ្សាយ​ឱ្យ​​ពលរដ្ឋ​យល់​ដឹង​ពីសារៈ​សំខាន់​នៃព្រៃ​ឈើ និង​ចូល​រួម​​ទប់​ស្កាត់​បទ​ល្មើស​បំផ្លាញ​ធនធាន​ធម្មជាតិកាលពីថ្ងៃទី២៦ ខែមិថុនា ឆ្នាំ២០២២។
រូប៖ យុវជនខ្មែរថាវរៈ

ក្រុម​​យុវ​ជន និង​​ព្រះ​សង្ឃ​ជា​ច្រើន​​អង្គ​និង​នាក់​​កំពុង​ធ្វើ​​ធម្មយាត្រាការពារព្រៃឈើតំបន់អារ៉ែង​​ ដើម្បី​​ផ្សព្វ​ផ្សាយ​ឱ្យ​​ពលរដ្ឋ​យល់​ដឹង​ពីសារៈ​សំខាន់​នៃព្រៃ​ឈើ និង​ចូល​រួម​​ទប់​ស្កាត់​បទ​ល្មើស​បំផ្លាញ​ធនធាន​ធម្មជាតិ​ បន្ទាប់​ពី​ព្រៃឈើ​ក្នុង​តំបន់​នោះ ​បន្ត​ទទួល​រង​ការ​កាប់​ធ្វើ​អាជីវកម្ម​ដោយ​គ្មាន​អាជ្ញាធរ​ពាក់ព័ន្ធ​ចាត់​វិធានការ​ទប់ស្កាត់​ឱ្យ​មាន​ប្រសិទ្ធភាព។

ព្រះសង្ឃ និងក្រុម​​យុវជន​​ខ្មែរ​ថាវរៈប្រមាណ៣០​នាក់ ​ចាប់​ផ្ដើមធ្វើ​ធម្មយាត្រា​នៅ​តំបន់​អារ៉ែង​​ក្នុង​ស្រុក​​ថ្ម​បាំង ខេត្តកោះកុង ​នៅថ្ងៃ​ទី​២៦ ខែមិថុនានេះ។ ​​ព្រះសង្ឃ​ និង​ក្រុម​យុវជន​និមន្ត ឬ​ដើរ​ថ្មើរ​ជើង​ចម្ងាយ​​ប្រមាណ ១៥គីឡូម៉ែត្រ ដោយដៃ​កាន់​ទង់ជាតិ ទង់​ព្រះពុទ្ធ​សាសនា ព្រម​ទាំង​លើក​បដា​ដែល​សរសេរ​អំពី​ទស្សនៈ​ផ្សេងៗ ក្នុង​នោះ​មាន​សារ ស្នើ​ដល់​រដ្ឋាភិបាល​ឱ្យ​គោរពសិទ្ធិ​សេរីភាព​ និង​អនុញ្ញាត​ឱ្យ​ក្រុម​យុវជន​ចូលរួម​យ៉ាង​សកម្ម​ក្នុងការ​ការពារ​ថែ​រក្សា​សម្បត្តិ​ធម្មជាតិ​ បើ​អ្នក​បំផ្លាញ​ព្រៃឈើ​ស្មើ​នឹង​អ្នក​បំផ្លាញ​ជីវិត​របស់​អ្នក និង​សូម​បញ្ឈប់​បទល្មើស​ព្រៃឈើ ​អភិរក្ស​ព្រៃឈើ​គឺ​ជា​កាតព្វកិច្ច​របស់​យើង​ទាំង​អស់​គ្នា​ជាដើម។ ​ធម្មយាត្រា​នេះ ​​សមត្ថកិច្ចមូលដ្ឋាន​ខេត្ត​កោះកុង​ជា​ច្រើន​នាក់ចុះស្ទាក់​សួរ​នាំ និងថតរូបប្រមាណ៥នាទី​ ប៉ុន្តែ​អាជ្ញាធរ​មិន​បាន​ហាម​ឃាត់ ​ពិធី​ធម្មយាត្រា​របស់​ក្រុម​យុវជន​ទាំង​នេះ​ទេ​។

តំណាង​ក្រុម​យុវជន​ខ្មែរ​ថា​វរៈ​លោក ហ៊ុន វណ្ណៈ លើក​ឡើង​ថា គោលបំណង​នៃការ​រៀបចំ​កម្មវិធី​ធម្មយាត្រា​ដើរ​ឆ្លងកាត់​ភូមិ​មួយ​ចំនួន​លើក​នេះ ដើម្បី​ជំរុញ​ឱ្យ​ពលរដ្ឋ​យល់ដឹង​ពី​តម្លៃ​ធនធាន​ធម្មជាតិ​ដែល​ជា​សក្តានុពល​សំបូរ​បែប សម្រាប់​ទាក់ទាញ​ភ្ញៀវ​ទេសចរណ៍​ជាតិ​និង​អន្តរជាតិ​ រួមទាំង​ផ្តល់​ប្រភព​ចំណូល​មិនចេះ​រីងស្ងួត​ជួយដល់​ជីវភាព​របស់​ពលរដ្ឋ​ក្នុង​សហគមន៍​ឱ្យ​មាន​ជីវិត​រស់​នៅ​ប្រសើរ​ឡើង​និង​ថែរក្សា​ធនធាន​ទាំង​នោះឱ្យ​បាន​គង់​វង្ស​សម្រាប់​មនុស្ស​ជំនាន់​ក្រោយ។ លោក ហ៊ុន វណ្ណៈ ឱ្យ​ដឹង​ថា កន្លង​ទៅ​ក្រុម​យុវជន​​​រក​​​ឃើញ​​​ដើម​​គគីដែល​ដុះ​​តាម​​​បណ្តោយ​​ដង​ស្ទឹង​អារ៉ែង​​ ​រង​ការ​​កាប់​​ផ្តូល​​ ដឹងជញ្ជូនធ្វើ​​អាជីវ​កម្ម​​ ​ដោយ​​គ្មាន​​ការ​ទប់​ស្កាត់​។ ​

លើសពី​នេះ​លោក​ថា បច្ចុប្បន្ន​ការដឹក​ជញ្ជូន​ឈើ​ចេញ​ពី​តំបន់​អារ៉ែង មិន​ទាន់​ធូរស្រាល​នៅ​ឡើយ​ទេ ដែល​ទាមទារ​ឱ្យ​យុវជន​ដាក់​ផែនការ​ចុះប្រចាំ​ការ ដើម្បី​រួមជាមួយ​សហគមន៍​រក​វិធី​ទប់ស្កាត់​បទល្មើស​ព្រៃឈើ​ទាំង​នេះ៖ «ការ​សម្រេច​ចិត្ត​លះ​បង់​របស់​ព្រះ​សង្ឃ​និង​យុវជន​ចុះ​មក​ស្នាក់​នៅ និង​ប្រចាំ​ការការ​ពារ​ព្រៃ​ឈើ​នេះ ដោយ​សារ​ពួក​យើង​យល់​ពី​សារៈ​សំខាន់​ព្រៃ​ឈើ​ដែល​គេបាន​​កាប់​ជា​រៀង​រាល់​ថ្ងៃ​នេះ។ បើ​សិន​យុវ​ជន និង​ព្រះ​សង្ឃ​យើង​បាន​ចូល​រួមកាន់​តែ​ច្រើន ដូច្នេះ​យើង​អាច​ថែ​រក្សា​ការពារ​បាន​ខ្លាំង​ដែរ ក៏​ដូច​ជា​បាន​ផ្តល់​ឱកាស​ឱ្យពួកយើង​គិត​គូរ​និង​រក​មធ្យោ​បាយ​ជួយ​សហគមន៍​នេះ​តាម​រយៈ​សកម្ម​ភាព​ផ្សេងៗ​ទៀត»

វិទ្យុអាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​បរិស្ថាន​លោក នេត្រ ភក្រ្តា និង​អភិបាល​ខេត្តកោះកុង អ្នកស្រី មិថុនា ភូថង ដើម្បី​បំភ្លឺ​រឿងនេះ​បាន​ទេ​នៅ​ថ្ងៃទី២៦ ខែមិថុនា។

ទោះយ៉ាង​ណា​​អ្នក​ស្រី មិថុនា ភូថង ប្រាប់​វិទ្យុ​អាស៊ីសេរី​កាលពីថ្ងៃទី២៥ មិថុនា ថា​អាជ្ញាធរ​ខេត្ត​ស្វាគមន៍​វត្តមាន​យុវជន​​និង​ព្រះសង្ឃ​ធ្វើ​សកម្មភាព​ចូល​រួមចំណែក​ការ​ពារ​ធន​ធាន​ធម្ម​ជាតិ​នៅ​តំបន់​អារ៉ែង ដោយ​គ្មានការ​រារាំង​ពីសំណាក់​សមត្ថកិច្ច​នោះ​ទេ។ ម្យ៉ាងទៀតអ្នកស្រី​ជំរុញ​ឱ្យ​ក្រុម​យុវជន​រាយការណ៍​មក​អាជ្ញាធរ​មូលដ្ឋាន បើសិន​ពួកគេ​ជួប​ប្រទះ​ភាព​មិន​ប្រក្រតី ឬ​ការ​កាប់​ទន្រ្ទាន​ព្រៃ​ឈើនៅតំបន់នោះ ដើម្បី​អាជ្ញាធរ​ចាត់​វិធាន​​តាម​​ផ្លូវ​ច្បាប់។

ទាក់ទង​រឿង​នេះ មន្រ្តីជាន់ខ្ពស់​ផ្នែក​តស៊ូមតិ​គម្រោង​អ្នក​ការពារ​ព្រៃឈើ​នៃ​សមាគម​បណ្តាញ​យុវជន​កម្ពុជា (CYN) លោក សាន់ ម៉ាឡា ឱ្យដឹង​ថា បទល្មើស​ព្រៃឈើ​បន្តកើត​ឡើង​កន្លង​ទៅ​បណ្តាល​មក​ពី​រដ្ឋាភិបាល និង​អាជ្ញាធរពាក់ព័ន្ធ​ហាក់​គ្មាន​ឆន្ទៈការពារ​ និង​ថែរក្សា​ទុក​ឱ្យមនុស្ស​ជំនាន់​ក្រោយ តែ​បណ្ដោយ​ឱ្យ​ឈ្មួញ​មាន​លុយ​ឃុបឃិត​លួចកាប់​ឈើ​ខុសច្បាប់​ដោយ​ពុំចាត់​វិធានការ​តាម​ផ្លូវ​ច្បាប់។ លោក​បារម្ភថា ការបាត់​បង់​ព្រៃឈើ​នៅ​តំបន់​អារ៉ែង​នឹង​ប៉ះពាល់​ដល់​មុខ​របរ​ជា​ប្រពៃណី ​ឬ​អត្តសញ្ញាណ​របស់​ជនជាតិ​ដើម​ភាគ​តិច និង​បាត់បង់​ទាំង​ស្រុង​នូវ​ជីវចម្រុះ​ដ៏​សម្បូរ​បែប​នៅ​ទី​នោះ។ លោក សាន់ ម៉ាឡា ជឿជាក់ថា វត្តមាន​របស់​ក្រុម​យុវជន និង​ពលរដ្ឋ​ក្នុង​តំបន់អារ៉ែង​អាចចូល​រួម​ថែ​រក្សា​ការពារ​ធនធាន​ធម្មជាតិ​ដែល​នៅ​សេស​សល់​នៅ​ទី​នោះ​ឱ្យ​នៅ​គង់វង្ស៖ «ខ្ញុំ​លែង​មាន​ជំនឿ​លើ​ក្រសួង​បរិស្ថាន​ថា​អាច​កែ​ទម្រង់​កិច្ច​ការ​ពារ​របស់​ពួក​គាត់ហ្នឹង​ធ្វើ​ឡើង​ប្រកដ​ដោយ​ប្រសិទ្ធ​ភាព​ណាស់ ប៉ុន្តែ​អ្វី​ដែល​ខ្ញុំ​រំពឹង​រាល់​ថ្ងៃ​នេះ គឺការ​ចូល​រួម​របស់​យុវជន និង​ប្រជា​ពល​រដ្ឋ ហើយ​បើ​យើង​មើល​ឃើញ​ថា​ពួក​គាត់អត់​មាន​សមត្ថ​ភាព អត់​មាន​ឆន្ទៈ​ក្នុង​ការ​ការ​ពារ​ព្រៃ​ឈើ តើ​ក្នុង​នាម​យើង​ជាម្ចាស់​ធនធាន​ទាំង​អស់​ហ្នឹង តើ​បន្ត​នៅ​ស្ងៀម​ស្ងាត់​បែប​នេះ ទទួល​យក​ការ​កាប់បំផ្លាញ​ព្រៃ​ឈើ​ជា​ប្រក្រតី​ក្នុង​ជីវភាព​ប្រចាំ​ថ្ងៃ ឬ​ក៏​គួរ​ធ្វើ​អ្វី​ម្យ៉ាង​ទាំង​អស់​គ្នា ដើម្បីការ​ពារ​ទ្រព្យ​សម្បត្តិ​របស់​យើង​ដែល​គេ​កំពុង​លួច​រាល់​ថ្ងៃ»

កន្លង​ទៅ លោក​​នាយក​​រដ្ឋ​មន្ត្រី ហ៊ុន សែន ធ្លាប់​លើក​ឡើង​ថា បំណង​​របស់​លោកចង់​​រក្សា​​តំបន់​​អារ៉ែងទុក​​ឲ្យ​​ខ្មែរ​ជំនាន់​​ក្រោយ​​ជា​​អ្នក​​សម្រេច ថា​​តើ​​ត្រូវ​​ធ្វើ​ដូច​ម្ដេច។ ការ​លើក​ឡើង​នេះ ​ស្រប​​ទៅ​​នឹង​​អ្វី​​ដែល​​ក្រុម​​យុវជន​ខ្មែរ​ថាវរៈ ពល​រដ្ឋ និង ព្រះសង្ឃ ចង់​​រក្សា​​តំបន់​​ព្រៃ​​ភ្នំ​​អារ៉ែង​​នេះ ឲ្យ​​​គង់​វង្ស​យូរ​អង្វែង។

ជ្រលង​​ភ្នំ​អារ៉ែង គឺ​​ជា​ក​ន្លែង​​ដ៏​ស្រស់​​ស្អាត​​មួយ​​ក្នុង​​ខេត្ត​កោះ​កុង​ដែល​មាន​​ប្រភេទ​សត្វ​​ព្រៃ​​ដ៏​កម្រ អម​ដោយ​​ព្រៃ​​ឈើ​​ដ៏​​ស្រស់​​ត្រកាល បន្សល់​​ចុង​​ក្រោយ​​​នៅ​​កម្ពុជា។ តំបន់​នោះ​​ជា​​កន្លែង​​ដែល​​ជន​ជាតិ​​ដើម​​ភាគ​​តិច​​ជង​ជាង ១ ពាន់ ៥រយនាក់ (១.៥០០) កំពុង​​រស់​នៅ ជា​មួយ​នឹង​​បរិស្ថាន​ធម្មជាតិដ៏​ស្រស់​បំព្រង ​តាមបណ្តោយ​​ជ្រលង​​ភ្នំ​ ដែល​មាន​សត្វ​​ព្រៃ​​កម្រ​រស់​នៅ​រួមមាន សត្វ​​ក្រពើ​​ភ្នំ ត្រី​​នាគ ដំរី​​ធំៗ​ ជា​ដើម។ បច្ចុប្បន្ន​​ដើម​​គគីរ ​និង​ ដើមឈើ​​ទាល​​ជា​ដើម​ ដុះ​​តាម​​បណ្តោយ​ដង​​ស្ទឹង​អារ៉ែង ​ និង​​អត្ត​សញ្ញាណ​​ប្រពៃណី ​ជនជាតិ​​ដើម​ភាគ​តិច​ កំពុង​ប្រឈម​​ការ​​បាត់​បង់​​ទាំង​ស្រុង​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។