យុទ្ធនាការជិះកង់ថ្ងៃទី៨ របស់ក្រុមអ្នកស្រឡាញ់បរិស្ថានប្រទះឃើញបទល្មើសព្រៃឈើក្នុងព្រៃឡង់
2022.05.18
យុទ្ធនាការជិះកង់ នៅជុំវិញតំបន់ព្រៃឡង់ និងព្រៃព្រះរកា របស់ក្រុមអ្នកស្រឡាញ់បរិស្ថាន បានធ្វើដំណើរដល់ ឃុំទំរីង ស្រុកសណ្តាន់ ខេត្តកំពង់ធំហើយ នៅ រសៀល ថ្ងៃទី១៨ ឧសភា។ ក្រុមយុវជន ២៥នាក់ បានចាប់ផ្ដើមជិះកង់ ដោយចេញដំណើរពីទីរួមខេត្តកំពង់ធំ កាលពីថ្ងៃទី១០ ឧសភា មកទល់ពេលនេះ ធ្វើដំណើរបានប្រវែងជាង ៤០០គីឡូម៉ែត្រហើយ។
ក្រុមយុវជនចូលរួមជិះកង់ គឺ ម៉ាចិត្រា ប្រាប់វិទ្យុអាស៊ីសេរីនៅថ្ងៃទី១៨ ឧសភាថា ក្នុងពេលដែលពួកលោក កំពុងជិះកង់តាមផ្លូវ ក្នុងខេត្តព្រះវិហារ ស្ទឹងត្រែង និងខេត្តក្រចេះ ត្រូវបានអាជ្ញាធរមកសួរនាំជាហូរហែ ក្នុងន័យការពារសន្តិសុខសុវត្ថិភាព ពុំមែនគំរាមកំហែង និងរារាំងនោះឡើយ។
លោកថា គ្រាន់តែពួកលោកជិះកង់កាត់ក្នុងតំបន់ព្រៃឡង់ ខេត្តស្ទឹងត្រែង និងខេត្តក្រចេះ ប្រទះឃើញ សកម្មភាពកាប់ឈើ និងដឹកឈើប្រភេទឈ្លីច មុខកាត់ ២ តឹកឡើងទៅ ប្រវែង ជាង ៣ម៉ែត្រឡើង។ ទន្ទឹមនឹងនេះ នៅគ្រាដែលឈើប្រណីត កាន់តែខ្សត់ សូម្បីតែឈើឈ្លីច ក៏កំពុងត្រូវប៉ាន់នៅលើទីផ្សារ ហើយឈ្មួញកំពុងតែប្រមូលទិញយកដែរ។
យុវជនរូបនេះ ទទូចជាថ្មីទៀត ស្នើឱ្យក្រសួងបរិស្ថាន និង រដ្ឋាភិបាល ត្រូវបើកលំហសេរីភាព ឱ្យប្រជាសហគមន៍មូលដ្ឋាន និងអង្គការសង្គមស៊ីវិលចូលទៅល្បាតព្រៃឡើងវិញ ដើម្បីជាភ្នែកច្រមុះ ការពារព្រៃសម្បត្តិជាតិទាំងអស់គ្នា៖ «
ក្រុមអ្នកស្រឡាញ់បរិស្ថានទាំងនោះមកពីសមាគម អង្គការសង្គមស៊ីវិល និង ប្រជាសហគមន៍មូលដ្ឋាន ចំនួន ១៥ស្ថាប័ន បានចាប់ផ្ដើមជិះកង់រយៈពេល ១០ថ្ងៃ គិតចាប់ពីថ្ងៃទី១០ រហូតដល់ថ្ងៃទី២០ ខែឧសភា ក្រោមប្រធានបទ “លើកកម្ពស់កិច្ចការពារបរិស្ថាន ដើម្បីចិរភាពធនធានធម្មជាតិ និងសុខុមាលភាពមនុស្សជាតិ”។
ក្រុមអ្នកជិះកង់ ២៥នាក់ ក្នុងនោះមានស្ត្រី ៧នាក់ បានពាក់ឯកសណ្ឋានអាវកាន់ពណ៌លឿងភ្ជាប់ពាក្យស្លោកថា លើកកម្ពស់កិច្ចការពារបរិស្ថាន ដើម្បីចិរភាពធនធានធម្មជាតិ អមដោយទង់ជាតិខ្មែរ ដោតជាប់នឹងកង។
ឆ្លើយតបការលើកឡើងនេះ អ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់វិទ្យុអាស៊ីសេរីថា យុទ្ធនាការជិះកង់ របស់ក្រុមយុវជន គឺជាសិទ្ធិរបស់ពួកគាត់ តែត្រូវធ្វើឡើងស្របតាមច្បាប់។
យុទ្ធនាការនេះ ក្រុមអ្នកជិះកង់ បានកំណត់រយៈចម្ងាយចន្លោះពី ៦០គីឡូម៉ែត្រ ដល់ ៧០គីឡូម៉ែត្រ ក្នុងមួយថ្ងៃ ទើបឈប់សម្រាកនៅពេលយប់ ដោយពុំបានកំណត់ទីកន្លែងស្នាក់នៅនោះទេ ពោលប្រសិនបើធ្វើដំណើរដល់កន្លែងណា មានវត្តអារាម ឬផ្ទះអ្នកស្រុក ពួកគេនឹងសុំផ្ទះអ្នកភូមិស្នាក់នៅជាបណ្ដោះអាសន្ន។
ព្រឹត្តិការណ៍នេះ ក្រុមយុវជន បានបែងចែកយុទ្ធនាការជា ៣សកម្មភាព ដើម្បីអបអរទិវាបរិស្ថានពិភពលោក ឆ្នាំ២០២២ នេះ គឺទី១ នឹងជិះកង់ចម្ងាយ ៦០០គីឡូម៉ែត្រ រយៈពេល ១០ថ្ងៃ។ ទី២ យុទ្ធនាការតាមបណ្ដាញសង្គម ដើម្បីផ្សព្វផ្សាយបញ្ហាព្រៃឈើ និងការបម្រែបម្រួលអាកាសធាតុ និងសកម្មភាពទី៣ រៀបចំសិក្ខាសាលាធំមួយ នៅរាជធានីភ្នំពេញ ដើម្បីលើកកម្ពស់កិច្ចការពារធនធានធម្មជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។