អ្នកជំងឺកូវីដចំនួន ១០នាក់ទៀតបានស្លាប់
2021.10.07
អ្នកស្លាប់ដោយសារជំងឺកូវីដ-១៩ បានកើនឡើងដល់ ២.៤៤១នាក់ហើយ បន្ទាប់ពីអ្នកជំងឺចំនួន ១០នាក់ទៀតបានស្លាប់។ ចំណែកករណីឆ្លងថ្មីវិញ ក្រសួងសុខាភិបាលប្រកាសថាមាន ២២៤នាក់ ដែលជាលទ្ធផលបញ្ជាក់ដោយម៉ាស៊ីនពិសោធន៍ភីស៊ីអា (PCR)។
ក្នុងរយៈពេលមួយសប្តាហ៍មកនេះ តួលេខអ្នកឆ្លងថ្មីដែលក្រសួងបានប្រកាសមានជាង ២រយនាក់ក្នុងមួយថ្ងៃ ប៉ុន្តែតួលេខនេះមិនបានរាប់បញ្ចូលលទ្ធផលដែលពិនិត្យតាមឧបករណ៍តេស្ដរហ័ស ឬរ៉ាពីដតេស្ដ (Rapid Test) នោះទេ។ តួលេខឆ្លងជាក់ស្ដែងអាចមានចំនួនលើសពីនេះ ពីព្រោះអំឡុងបុណ្យភ្ជុំបិណ្ឌប៉ុន្មានថ្ងៃនេះ ពលរដ្ឋបានជួបជុំគ្នាច្រើន និងខ្លះទៀតនាំគ្នាទៅកម្សាន្តតាមរមណីយដ្ឋានទេសចរណ៍ ដែលជាហេតុនាំឱ្យមានមនុស្សច្រើនកកកុញតាមតំបន់មួយចំនួន។
គិតត្រឹមព្រឹកថ្ងៃទី៧ តុលា កម្ពុជាមានអ្នកកើតជំងឺកូវីដ-១៩ ជាង ១១ម៉ឺននាក់ (១១៤.១៤៨) ក្នុងនោះអ្នកជាសះស្បើយមានប្រមាណ ១សែននាក់ (១០៦.២៩២)។
ក្រសួងសុខាភិបាលប្រកាសថា គិតត្រឹមថ្ងៃទី៦ តុលា រដ្ឋាភិបាលចាក់វ៉ាក់សាំងជូនពលរដ្ឋគ្រប់អាយុបានជិត ១០លាននាក់ហើយ។ ចំណែកកុមារ និងយុវជនដែលមានអាយុពី ៦ឆ្នាំ ដល់ ១៧ឆ្នាំវិញ ក្រសួងបញ្ជាក់ថា ចាក់វ៉ាក់សាំងបានជាង ៣លាន ៥សែននាក់ ក្នុងចំណោមអ្នកដែលត្រូវចាក់សរុបជិត ៤លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។