លោក ហ៊ុន សែន ប្ដេជ្ញារក្សាដំណើរការមន្ទីរពេទ្យគន្ធបុប្ផាមិនឲ្យដួលរលំ
2017.07.24
ក្រុមគ្រួសារយកកុមារមកព្យាបាលជំងឺនៅមន្ទីរពេទ្យគន្ធបុប្ផា អង្គុយរង់ចាំនៅខាងមុខមន្ទីរពេទ្យ កាលពីព្រឹកថ្ងៃទី១០ សីហា ឆ្នាំ២០១៥។
លោកនាយករដ្ឋមន្ត្រី ហ៊ុន សែន ប្រកាសសន្យាថានឹងរក្សាដំណើរការមន្ទីរពេទ្យគន្ធបុប្ផា មិនឲ្យដួលរលំឡើយ បើទោះជាមិនមានជំនួយបន្តទៀតពីប្រទេសស្វីស (Switzerland) ឬដៃគូពាក់ព័ន្ធក្តី។
ថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការក្របខ័ណ្ឌគោលនយោបាយជាតិគាំពារសង្គមឆ្នាំ២០១៦-២០២៥ នាវិមានសន្តិភាព នៅព្រឹកថ្ងៃទី២៤ កក្កដា លោក ហ៊ុន សែន បញ្ជាឲ្យក្រសួងសេដ្ឋកិច្ច និងហិរញ្ញវត្ថុ សហការជាមួយក្រសួងសុខាភិបាល រៀបចំផែនការផ្តល់ការគាំទ្រផ្នែកហិរញ្ញវត្ថុ ដើម្បីធានានិរន្តរភាពកិច្ចដំណើរការនៃមន្ទីរពេទ្យគន្ធបុប្ផា។
លោក ហ៊ុន សែន ថាកម្ពុជា មានលទ្ធភាពធ្វើកិច្ចការងារនេះ ដែលវានឹងផ្តល់ប្រយោជន៍យ៉ាងច្រើនដល់កុមារកម្ពុជា។ លោក ហ៊ុន សែន ក៏ទទួលស្គាល់ដែរថា មន្ទីរពេទ្យគន្ធបុប្ផា ជាមន្ទីរពេទ្យដែលមានវិន័យល្អ មានគុណភាព សេវាខ្ពស់ និងផ្តល់ការព្យាបាលដល់កុមារកម្ពុជា ដោយមិនគិតថ្លៃ៖ «ដូច្នេះរវាងក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល ត្រូវតែធានាថា មន្ទីរពេទ្យមួយនេះ បើទោះជាអត់ជំនួយពីស្វីស អត់ជំនួយពីខាងផ្នែកដៃគូ យើងនៅតែធានាថា មន្ទីរពេទ្យនេះនៅតែជាមន្ទីរពេទ្យដែលធានានូវសេវាធម្មតាដូចពេលនេះ»។
ការប្រកាសធានាការបន្តដំណើរការនៃមន្ទីរពេទ្យគន្ធបុប្ផា ជាថ្មីទៀតនៅពេលនេះ ស្របពេលដែលស្ថាបនិកមន្ទីរពេទ្យគន្ធបុប្ផា ដែលជាជនជាតិស្វីស គឺវេជ្ជបណ្ឌិត បេអាត រិចឆ្នឺរ (Dr. Beat Richner) កំពុងឈឺធ្ងន់ និងសម្រាកព្យាបាលនៅក្រៅប្រទេស។
កាលពីថ្ងៃទី២៨ មីនា ក្រុមប្រឹក្សាភិបាលរបស់មូលនិធិគន្ធបុប្ផា នៅទីក្រុងហ្សូរិក (Zurich) ប្រទេសស្វីស ឲ្យដឹងថា លោកវេជ្ជបណ្ឌិត បេអាត រិចឆ្នឺរ បានធ្លាក់ខ្លួនឈឺធ្ងន់ និងប្រកាសលាលែងពីតំណែងប្រធានគ្រប់គ្រងមន្ទីរពេទ្យនេះ ហើយតែងតាំងអនុប្រធានក្រុមប្រឹក្សាភិបាលរបស់មូលនិធិគន្ធបុប្ផា គឺលោកវេជ្ជបណ្ឌិត ភីធីរ ស្ទូដឺរ (Peter Studer) មកគ្រប់គ្រងជំនួសជាបណ្ដោះអាសន្ន ដើម្បីឲ្យមន្ទីរពេទ្យនេះដំណើរការដោយឯករាជ្យ ផ្ដល់សេវាថែទាំសុខភាពកុមារ និងមាតាដោយឥតគិតប្រាក់ និងធានានូវគុណភាពខ្ពស់។
ដោយសារតែសេវាប្រកបដោយគុណភាពល្អរបស់មន្ទីរពេទ្យគន្ធបុប្ផា មន្ទីរពេទ្យនេះត្រូវបានពលរដ្ឋចាត់ទុកថា ជាមន្ទីរពេទ្យគំរូមួយដែលមន្ទីរពេទ្យរដ្ឋផ្សេងទៀតគួរយកគំរូតាមក្នុងការផ្តល់សេវាព្យាបាលជូនពលរដ្ឋ។
ក្នុងរយៈពេលប្រមាណ ២៥ឆ្នាំមកនេះ មន្ទីរពេទ្យគន្ធបុប្ផា បានចំណាយថវិកាអស់ជាង ៥៥០លានដុល្លារអាមេរិក សម្រាប់ព្យាបាលកុមារក្រីក្រនៅទូទាំងប្រទេសកម្ពុជា។ ថវិកាទាំងនោះបានមកពីរដ្ឋាភិបាលស្វីស រដ្ឋាភិបាលកម្ពុជា និងពីសប្បុរសជនទាំងក្នុង និងក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ