លោក ហ៊ុន សែន ទទួលស្គាល់ថា អាជ្ញាធរពិបាកគ្រប់គ្រងឱសថក្លែងក្លាយ ដែលលក់លើអ៊ីនធឹណិត
2018.11.06
មេដឹកនាំរបបក្រុងភ្នំពេញទទួលស្គាល់ថា អាជ្ញាធររបស់ខ្លួនមានការពិបាកក្នុងការគ្រប់គ្រងឱសថក្លែងក្លាយមួយចំនួន ដែលកំពុងធ្វើអាជីវកម្មតាមប្រព័ន្ធអ៊ីនធឹណិត។
មេដឹកនាំរបបនេះ ក៏អះអាងថា នឹងនៅតែបន្តនីតិវិធី និងចាត់វិធានការនានា ដើម្បីកាត់បន្ថយការធ្វើចរាចរណ៍ឱសថក្លែងក្លាយនៅកម្ពុជា។ សង្គមស៊ីវិលបានលើកឡើងថា ការហូរចូលនៃឱសថក្លែងក្លាយមកកម្ពុជាអាចមានជាប់ពាក់ព័ន្ធនឹងអំពើពុករលួយ និងការឃុបឃិតគ្នាជាប្រព័ន្ធ។
មេដឹកនាំរបបក្រុងភ្នំពេញលោក ហ៊ុន សែន លើកឡើងថា ឱសថក្លែងក្លាយមួយចំនួនដែលកំពុងធ្វើអាជីវកម្មតាមប្រព័ន្ធអ៊ីនធឹណិត មិនមានប្រភពច្បាស់លាស់ និងស្រដៀងទៅនឹងឱសថពិតប្រាកដ ដែលជាហេតុនាំឱ្យអាជ្ញាធរពិបាកក្នុងការគ្រប់គ្រង។
ថ្លែងកាលពីថ្ងៃទី៥ ខែវិច្ឆិកា ចំពោះមុខតំណាងស្ថាប័នជាតិ និងអន្តរជាតិជាច្រើន ក្នុងសន្និសីទថ្នាក់តំបន់ ស្តីពីការប្រយុទ្ធប្រឆាំងឱសថក្លែងក្លាយ និងអន់គុណភាព មេដឹកនាំរបបក្រុងភ្នំពេញ លោក ហ៊ុន សែន អះអាងថា ការរីករាលដាល ឱសថក្លែងក្លាយនៅកម្ពុជា អាចកើតឡើងទៅបានដោយសារតម្លៃឱសថក្លែងក្លាយមានតម្លៃទាប យន្តការគ្រប់គ្រងឱសថរបស់ខ្លួនគ្មានប្រសិទ្ធភាព និងជំនាញផ្នែកពិនិត្យឱសថក្លែងក្លាយនៅមានកម្រិត៖ «ការរីករាលដាលជំនួញឱសថក្លែងក្លាយ និងអន់គុណភាពនេះអាចបណ្តាលមកពីកត្តាជាច្រើន រួមមានតម្លៃឱសថពិតប្រាកដ ត្រឹមត្រូវមានតម្លៃខ្ពស់ យន្តការនៃការគ្រប់គ្រងគុណភាពឱសថក្នុងពេលផលិត និងចរាចរនៅលើទីផ្សារមិនមានប្រសិទ្ធិភាព ការបណ្តុះបណ្តាលមន្ត្រីសុខាភិបាលស្តីពីជំនាញត្រួតពិនិត្យគុណភាពឱសថ ព្រមទាំងការផ្សព្វផ្សាយដល់ប្រជាជន និងការត្រួតពិនិត្យឱសថដោយសមត្ថកិច្ចនៅមានកម្រិត។ កត្តាទាំងអស់នេះផ្តល់ឱកាសដល់ពួកឧក្រិដ្ឋជន អាចកេងយកប្រយោជន៍ពីសង្គមជាតិ ហើយបានគម្រាមកាន់តែធ្ងន់ធ្ងរដល់សុខុមាលភាព និងអាយុជីវិតរបស់ប្រជាជន»។
លោក ហ៊ុន សែន ក៏បានអះអាងថា របបរបស់លោកនឹងបន្តអនុវត្តន៍នូវយន្តការ និងវិធានការមួយចំនួនក្នុងវិស័យសុខាភិបាល ដើម្បីកាត់បន្ថយគ្រោះថ្នាក់ដែលបង្កដោយឱសថក្លែងក្លាយទាំងនេះ។
យន្តការទាំងនេះរួមមានការធ្វើបច្ចុប្បន្នកម្ម ផែនការយុទ្ធសាស្ត្រវិស័យសុខាភិបាលឆ្នាំ ២០១៦ ដល់ ២០២០ ការជំរុញវិសាលភាពគ្របដណ្តប់សុខភាពសកលនៅកម្ពុជាការលើកកម្ពស់គុណភាពសុវត្ថភាពប្រសិទ្ធភាពសេវាសុខភាព និងពង្រឹងការអនុវត្តន៍ច្បាប់ និងបទបញ្ញតិ្តស្តីពីការគ្រប់គ្រង ត្រួតពិនិត្យគុណភាព និងការប្រើប្រាស់ឱសថ។ ក្រៅពីនេះលោក ហ៊ុន សែន ក៏ស្នើសុំដល់តំណាងប្រទេសអាស៊ានឱ្យលើកយកបញ្ហាឱសថក្លែងក្លាយទាំងនេះដាក់ចូលទៅក្នុងក្របខណ្ឌនៃប្រទេសអាស៊ាន។
ពេលថ្មីៗ នេះ ក្រសួងសុខាភិបាលបានព្រមានជាបន្តបន្ទាប់ចំពោះម្ចាស់គណនីហ្វេសប៊ុកជាច្រើនដែលបានផ្សព្វផ្សាយលក់នូវផលិតផលឱសថតាមបណ្តាណសង្គមហ្វេសប៊ុក។
ឱសថដែលក្រសួងបានហាមឃាត់ ភាគច្រើនទាក់ទងនឹងថ្នាំចាក់ លេប និងថ្នាំលាប ដើម្បីជួយព្យាបាលសុខភាព ថែរក្សាសម្រស់ ថ្នាំជំនួយសុខភាព ថ្នាំបំប៉នផ្លូវភេទជាដើម។ ក្រសួងអះអាងថា ឱសថដែលបានធ្វើអាជីវកម្មតាមអ៊ីនធឹណិតទាំងនេះ មិនបានចុះបញ្ជិរការត្រឹមត្រូវ គ្មានការអនុញ្ញាតិពីក្រសួង ធ្វើការផ្សព្វផ្សាយលើកពីការពិត និងមានឱសថខ្លះមានផ្ទុកសាធាតុគីមី ដែលបណ្តាលឱ្យប៉ះពាល់សុខភាពរបស់ប្រជាពលរដ្ឋ។
ក្រសួងសុខាភិបាលបានព្រមានម្ចាស់គណនីទាំងនោះ តាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថ ប្រសិនបើនៅបន្តចរាចរឱសថក្លែងក្លាយទាំងអស់នេះ។
អាស៊ីសេរីក៏ធ្លាប់បានសុំការឆ្លើយបំភ្លឺពីម្ចាស់គណនីហ្វេសប៊ុកមួយចំនួន ដែលបានផ្សព្វផ្សាយលក់ផលិតផលឱសថទាំងនេះនៅលើអ៊ីនធឹណិតផងដែរ។ អ្នកលក់ឱសថតាមប្រព័ន្ធអ៊ីនធឺណិតខ្លះបានអះអាងថា មិនបានដឹងច្បាស់ថាឱសថដែលខ្លួនបានផ្សព្វផ្សាយមានច្បាប់អនុញ្ញាតិ ឬក៏យ៉ាងណានោះទេ ប៉ុន្តែបន្ទាប់ពីក្រសួងបានប្រកាសឱ្យបញ្ឈប់ពួកគេក៏លុបចោលការផ្សព្វផ្សាយរបស់ខ្លួនចោលវិញ៖ «ពីដំបូងខ្ញុំមិនបានដឹងនោះទេ ព្រោះដោយសារសួរគេទៅ គេថារបស់ហ្នឹងមានច្បាប់ត្រឹមត្រូវ មានការនាំចេញ នាំចូលត្រឹមត្រូវអ៊ីចឹង។ ដល់ពេលខ្ញុំដឹង ខ្ញុំក៏ឈប់លក់ទៅ ប៉ុន្តែខ្ញុំអត់ទាន់បានលក់ចេញដាច់ទេ។ ផេក (Page) ដែលខ្ញុំផ្សាយ (Boost) លក់ផលិតផលបុរសហ្នឹង ក៏ក្រុមហ៊ុនហ្វេសប៊ុកគេរាំងខ្ទប់ (Block) មិនឱ្យយើង Boost ដែរហ្នឹង។ វាជាប់ក្នុងបញ្ជីខ្មៅ (Blacklist) របស់ក្រុមហ៊ុនហ្វេសប៊ុក អ៊ីចឹងក៏គេមិនឱ្យ Boost ដែរ។ តាំងពីពេលនោះមក ខ្ញុំមិនដែលលក់ទៀតទេ។ ខ្ញុំទើបតែ Boost លើកទីមួយ ហើយក៏ក្រុមហ៊ុនហ្វេសប៊ុកចាប់ទៅ រាំងខ្ទប់ផេកទៅ ក៏ខ្ញុំលែងលក់ ខ្ញុំអត់ដែលលក់ទៀតទេឥលូវនេះ។ (ខ្ញុំ) ឈប់យូរហើយ»។
រដ្ឋធម្មនុញ្ញមាត្រា ៦៤ ចែងយ៉ាងច្បាស់ថា រដ្ឋត្រូវហាមឃាត់ និងផ្តន្ទាទោសជាទម្ងន់លើជនដែលនាំចូល ឬផលិតទំនិញក្លែងក្លាយ ប៉ះពាល់ដល់អាយុជីវិតរបស់អ្នកប្រើប្រាស់។
សង្គមស៊ីវិលស្នើដល់ក្រសួងសុខាភិបាល ចាត់វិធានការឱ្យបានតឹងរ៉ឹង ដោយនាំខ្លួនម្ចាស់ក្រុមហ៊ុន ឬអ្នកនាំចូលផលិតផលឱសថក្លែងក្លាយទាំងអស់ យកមកផ្តន្ទាទោស ប្រសិនបើរកឃើញថាពួកគេពិតជាបានធ្វើល្មើសច្បាប់មែននោះ មិនមែនគ្រាន់តែប្រកាសហាមឃាត់តែមួយមុខបែបនេះទេ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថាចំណាត់ការរបស់ក្រសួងទាក់ទងនឹងផលិតផលឱសថក្លែងក្លាយកន្លងទៅ គឺគ្រាន់តែជាការរត់តាមពីក្រោយក្រុមហ៊ុន ឬអ្នកចែកចាយតែប៉ុណ្ណោះ។ លោកបន្ថែមថាកន្លងទៅ ឃើញមានការរឹបអូស ផលិតផលឱសថក្លែងក្លាយ យកទៅបំផ្លាញចោលដែរ ប៉ុន្តែកម្រឃើញក្រសួងចាត់វិធានការ ចំពោះម្ចាស់អាជីវកម្ម ឬអ្នកនាំចូលទាំងនោះណាស់។
លោកជឿជាក់ថា មូលហេតុសំខាន់នៃការហូរចូលឱសថក្លែងក្លាយទាំងនេះ អាចជាប់ពាក់ព័ន្ធនឹងអំពើពុករលួយ និងការឃុបឃិតគ្នាជាប្រព័ន្ធ៖ «វាមានទិដ្ឋភាពថ្មីនៃការលេចចេញនូវរូបភាពប្រភេទពាក់កណ្តាលឱសថ ពាក់កណ្តាលអាហារបំប៉ន ហើយមួយទៀតពាក់ព័ន្ធជាមួយនឹងប្រភេទផលិតផលជួយកម្លាំងផ្លូវភេទជាដើម។ ពេលខ្លះការផ្សាយពាណិជ្ជកម្មមួយចំនួន គេបង្ហាញឱ្យឃើញថា វាអាចព្យាបាលជំងឺបាន ស្របពេលដែលប្រជាពលរដ្ឋកម្ពុជាយើងហ្នឹងគាត់កំពុងមានបញ្ហាហ្នឹងស្រាប់ អ៊ីចឹងទៅឮសូរគេផ្សព្វផ្សាយអំពីភាពអស្ចារ្យនៃផលិតផលនីមួយៗ ហ្នឹង ក៏ចាប់ផ្តើមរកទិញ។ ពេលដែលឱកាសនៃចែកចាយហ្នឹង វាទូលំទូលាយបែបនេះ គឺទាំង offline និង online ធ្វើឱ្យវិធានការនៃការបង្ក្រាបហ្នឹង វាមិនអាចធ្វើទៅបានទេ ដោយសារតែវិធានការបង្រ្កាបសព្វថ្ងៃនេះ នៅតែជាវិធានការបង្រ្កាបបែបប្រពៃណី»។
លោក សន ជ័យ ជំរុញឱ្យក្រសួងសុខាភិបាលដាក់ចេញនូវវិធានការផ្លូវច្បាប់ឱ្យបានតឹងរ៉ឹង និងជាក់ស្តែងជាងពេលបច្ចុប្បន្ននេះ ដើម្បីធានាថា ឱសថក្លែងក្លាយនឹងអាចចរាចរលើទីផ្សារកម្ពុជាបានតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។