គំនរសំរាមនៅក្រោមស្ពានមិត្តភាពខ្មែរ-ថៃ នៃច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ បានជះក្លិនស្អុយប៉ះពាល់យ៉ាងខ្លាំងដល់ភ្ញៀវទេសចរ និងអ្នកធ្វើដំណើរចេញចូលតាមច្រកអន្តរជាតិនេះជាប្រចាំ ហើយអាជ្ញាធរពុំទាន់មានវិធានការបោសសំអាតនៅឡើយ។
ប្រជាពលរដ្ឋអំពាវនាវឲ្យប្រធានមន្ទីរបរិស្ថានខេត្តបន្ទាយមានជ័យ និងមន្ត្រីពាក់ព័ន្ធ រៀបចំសណ្ដាប់ធ្នាប់បោសសំអាតបរិស្ថានក្រោមស្ពាននោះ និងនៅតាមដងផ្លូវជាតិលេខ៥ ក្រុងឲ្យបានស្អាត ដើម្បីកុំឲ្យប៉ះពាល់សុខភាព និងអារម្មណ៍របស់អ្នកធ្វើដំណើរ។
ប្រជាពលរដ្ឋមួយចំនួនដែលធ្វើដំណើរចេញចូលតាមច្រកទ្វារអន្តរជាតិប៉ោយប៉ែត ភាគច្រើនយើងសង្កេតឃើញពួកគាត់ នៅពេលធ្វើដំណើរទៅដល់ចំណុចគល់ស្ពាននោះ តែងយកដៃក្ដោបច្រមុះ និងត្អូញត្អែរស្រដៀងគ្នាថា មានក្លិនស្អុយពិបាកដកដង្ហើម។
ក្រុមអ្នករត់ម៉ូតឌុបនៅគល់ស្ពានច្រកទ្វារអន្តរជាតិប៉ោយប៉ែត និងអ្នកធ្វើដំណើរថ្លែងថា ក្លិនស្អុយគំនរសំរាមនៅក្រោមស្ពានមិត្តភាពខ្មែរ-ថៃ នៅក្រុងប៉ោយប៉ែត បានជះក្លិនអាក្រក់ប៉ះពាល់ដល់សតិអារម្មណ៍អ្នកធ្វើដំណើរអស់ជាច្រើនខែមកហើយ ពុំមានសមត្ថកិច្ចណាបោសសំអាត ឬទប់ស្កាត់រៀបចំឲ្យមានកន្លែងទុកដាក់សំរាមឲ្យបានស្អាត និងសមរម្យនោះទេ។
អ្នកដំណើរថ្លែងខណៈឈប់តាមចិញ្ចើមថ្នល់មុខកាស៊ីណូ នៅច្រកទ្វារអន្តរជាតិប៉ោយប៉ែត ទៀតថា អាជ្ញាធរពាក់ព័ន្ធមិនគួរបណ្ដោយឲ្យច្រកទ្វារអន្តរជាតិ ដែលជាតំបន់ធ្វើដំណើរចេញចូលរបស់ភ្ញៀវទេសចរណ៍ជាតិ និងអន្តរជាតិមានក្លិនស្អុយប៉ះពាល់ដល់សុខភាពនោះទេ៖ «ខ្ញុំមកពីភ្នំពេញដែរ នៅពេលខ្ញុំចូលមកដល់ក្រុងប៉ោយប៉ែត ខ្ញុំមានអារម្មណ៍ថា ទីក្រុងនេះមានភាពកខ្វក់ មិនចង់ឲ្យរស់នៅទេ។ បាទ! ខាងសមត្ថកិច្ចមិនសូវរវីរវល់ទេរឿងបរិស្ថាន បានខាងក្រុមហ៊ុនកាស៊ីណូទេដែលគេធ្វើការបោសសំអាតខ្លះនោះ។ ខ្ញុំចង់ឲ្យសមត្ថកិច្ចធ្វើការផាកពិន័យទៅលើអ្នកចោលសំរាមអនាធិបតេយ្យ»។
វិទ្យុអាស៊ីសេរី ពុំអាចទាក់ទងប្រធានមន្ទីរបរិស្ថានខេត្តបន្ទាយមានជ័យ ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី២៤ ខែសីហា ដោយលេខទូរស័ព្ទដែលលោកប្រើប្រាស់នោះ ត្រូវបានអ្នកទទួលឆ្លើយយ៉ាងខ្លីថា ច្រឡំលេខ ហើយបិទទូរស័ព្ទវិញ។
ប៉ុន្តែអភិបាលក្រុងប៉ោយប៉ែត លោក ង៉ោ ម៉េងជ្រួន មានប្រសាសន៍ថា កន្លងទៅអាជ្ញាធរក្រុងតែងធ្វើការបោសសំអាតតាមច្រកទ្វារអន្តរជាតិប៉ោយប៉ែតនោះជាប្រចាំ។ លោកបញ្ជាក់ថា គំនរសំរាមនៅក្រោមស្ពានច្រកទ្វារចេញចូលមិត្តភាពខ្មែរ-ថៃនោះ ជាកំហុសរបស់ប្រជាពលរដ្ឋទេ ដែលពួកគាត់ច្រើននាំគ្នាយកសំរាមបោះចោលពាសវាលពាសកាល បង្កការលំបាកដល់អាជ្ញាធរសំអាតនោះ៖ «យើងមានកន្លែងឲ្យគាត់ដាក់សំរាមត្រឹមត្រូវ ប៉ុន្តែបងប្អូនមួយចំនួនគាត់អត់គោរពតាមទេ កន្លែងត្រង់ណាក៏ចោលសំរាមដែរ»។
យ៉ាងណាប្រជាពលរដ្ឋមួយចំនួននៅតែអះអាងថា ពួកគេក៏ចង់រួមចំណែកជាមួយសមត្ថកិច្ចធ្វើឲ្យក្រុងប៉ោយប៉ែត ស្រស់ស្អាតដែរ។ ប៉ុន្តែពួកគាត់បញ្ជាក់ថា សំរាមដែលជះក្លិនស្អុយតាមដងផ្លូវ និងក្រោមស្ពានច្រកទ្វារអន្តរជាតិប៉ោយប៉ែតនោះ ដោយសារអាជ្ញាធរមិនរៀបចំសណ្ដាប់ធ្នាប់ទុកដាក់ធុងសំរាមឲ្យបានល្អ ដើម្បីងាយស្រួលដល់ការទុកដាក់សំរាមរបស់ប្រជាពលរដ្ឋឡើយ៖ «បើសមត្ថកិច្ចមានបច្ចេកទេសដាក់ធុងសំរាមត្រឹមត្រូវ ដូចនៅប្រទេសគេនោះ បញ្ហាក្លិនស្អុយសំរាមវានឹងមិនកើតទៀតមានឡើយ។ សមត្ថកិច្ចចាត់វិធានការតែលើអ្នករត់ម៉ូតូឌុបទេ ចំពោះអ្នកដែលលក់ដូរតាមចិញ្ចើមថ្នល់ចោលសំរាមពាសវាលពាសកាល ដែលបានបង់ប្រាក់ឲ្យសមត្ថកិច្ច មិនបានដេញ ឬរៀបចំទុកដាក់សំរាមនោះទេ»។
ទាក់ទិននឹងបញ្ហានេះ លោក ង៉ោ ម៉េងជ្រួន មានប្រសាសន៍ ថា អាជ្ញាធរក៏ចង់ប្រើវិធានការក្ដៅផ្ដន្ទាទោសតាមផ្លូវច្បាប់ទៅលើប្រជាពលរដ្ឋណាដែលបោះកាកសំណល់ចោលពាសវាលពាសកាលតាមដងផ្លូវនោះដែរ ប៉ុន្តែដោយសារការយោគយល់អនុគ្រោះឲ្យប្រជាពលរដ្ឋទេ៖ «ច្បាប់បរិស្ថានគេមានតើ! គឺអ្នកដែលដាក់សំរាមពាសវាលពាសកាលជាប់គុកពី ៣ ទៅ ៦ខែ ក្នុងករណីណែនាំអ្នកចោលសំរាមហើយមិនស្ដាប់»។
យ៉ាងណាក៏ដោយ បញ្ហាក្លិនស្អុយសំរាមនេះ បើយើងប្រៀបធៀបទៅប្រទេសថៃវិញ ដែលមានព្រំប្រទល់ជាប់គ្នានឹងក្រុងប៉ោយប៉ែតនោះ គឺមានលក្ខណៈខុសគ្នាដាច់ស្រឡះ។ នៅប្រទេសថៃ ទាំងការរៀបចំទុកដាក់សំរាម និងការរៀបចំសណ្ដាប់ធ្នាប់ច្រកចេញចូល និងនៅតាមដងផ្លូវគេរៀបចំបានល្អ ហើយពុំមានក្លិនស្អុយដូចនៅក្រុងប៉ោយប៉ែតនោះទេ។ នៅលើដងផ្លូវ និងកន្លែងលក់ដូរនានារបស់ថៃ មានធុងទុកដាក់សំរាមគ្រប់គ្រាន់ និងសណ្ដាប់ធ្នាប់ ដែលខុសពីខាងកម្ពុជា នៅលើដងផ្លូវពាសពេញដោយសំរាមធំក្លិនស្អុយ ដែលភ្ញៀវទេសចរលាន់មាត់ស្ទើរតែគ្រប់គ្នាអំពីបរិស្ថានមិនស្អាតនៃច្រកចេញចូលអន្តរជាតិនេះ។
ទាក់ទងនឹងបញ្ហានេះដែរ មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ក្លិនស្អុយគំនរសំរាមតាមដងផ្លូវ និងនៅក្រោមស្ពានច្រកទ្វារអន្តរជាតិប៉ោយប៉ែត នោះ ពុំមែនជាកំហុសរបស់ប្រជាពលរដ្ឋនោះទេ។
លោកបញ្ជាក់ថា ករណីនេះជាកំហុសរបស់អាជ្ញាធរពាក់ព័ន្ធទៅវិញទេ ដែលខ្វះការយកចិត្តទុកដាក់ និងថែរក្សាបរិស្ថានឲ្យបានត្រឹមត្រូវនោះ៖ «អ៊ីចឹងលោកអភិបាលក្រុងគួរតែកែចិត្តកែគំនិតពិនិត្យមើលរឿងនេះសាជាថ្មី កុំឲ្យពិនិត្យមើលទៅលើកញ្ចប់លុយកាក់កាស៊ីណូអីច្រើនពេក! ពិនិត្យអ្វីដែលជាផលប្រយោជន៍សង្គមឲ្យបានច្រើនផង»។
ក្លិនស្អុយគំនរសំរាម និងការខ្វះអនាម័យតាមដងផ្លូវជាតិលេខ៥ នៅក្រុងប៉ោយប៉ែត ចាប់ពីគល់ស្ពានមិតភាពខ្មែរ-ថៃ រហូតដល់ផ្សារកណ្ដាល គឺមានគំនរសំរាម និងក្លិនស្អុយតាមដងផ្លូវជានិច្ច។ ក្លិនស្អុយនេះពិសេសធំក្លិនកាន់តែខ្លាំងនៅពេលភ្លៀងធ្លាក់ និងមានរុយរោមច្រើន។ កង្វះអនាម័យ និងរៀបចំឲ្យមានសណ្ដាប់ធ្នាប់នេះ គឺជាឧបសគ្គរបស់អ្នកលក់ដូរដែរ ដែលភ្ញៀវទេសចរមិនចង់ស្នាក់នៅកម្សាន្តនៅក្រុងប៉ោយប៉ែត នៅពេលពួកគាត់ធ្វើដំណើរឆ្លងកាត់ ឬទៅកម្សាន្តនៅប្រទេសថៃ ថែមទាំងភ្ញៀវទេសចរបរទេសផង។
លោក ស៊ុំ ច័ន្ទគា ពន្យល់ថា បញ្ហាទាំងនេះបានប៉ះពាល់ដល់សតិអារម្មណ៍ជាខ្លាំងដល់អ្នកធ្វើដំណើរឆ្លងកាត់តាមដងផ្លូវនោះ ដែលអាជ្ញាធរពាក់ព័ន្ធគួរមានវិធានការបោសសំអាតឲ្យបានស្អាត ដើម្បីជាមុខមាត់ដល់ប្រទេសជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។