រោងចក្រថ្នាំបង្ការជំងឺកូវីដ-១៩ (Covid19) លើកដំបូងនៅកម្ពុជានឹងចាប់ផ្ដើមបើកការដ្ឋានសាងសង់នៅក្នុងខែវិច្ឆិកា ខាងមុខ។
រដ្ឋលេខាធិការក្រសួងសុខាភិបាល អ្នកស្រី យក់ សម្បត្តិ ថ្លែងក្នុងសន្និសីទសារព័ត៌មាន ស្ដីពី សមិទ្ធផលសម្រេចបានរយៈពេល៥ឆ្នាំ របស់ក្រសួងសុខាភិបាល កាលពីថ្ងៃទី១៥ ខែកញ្ញាថា ក្រសួងសុខាភិបាលបានធ្វើការងារជាច្រើនជាមួយក្រុមហ៊ុនផលិតវ៉ាក់សាំងរបស់ចិន ស៊ីណូវ៉ាក់ (Sinovac) ហើយមកដល់ពេលនេះមានក្រុមហ៊ុនឯកជនក្នុងស្រុក ដែលទទួលសិទ្ធិផលិតឱសថ កំពុងរៀបចំដីសម្រាប់សាងសង់។
រោងចក្រវ៉ាក់សាំងនេះនឹងត្រូវសាងសង់នៅលើដីទំហំប្រហែល ៥ហិកតារ ក្នុងភូមិទួលអំពិល ឃុំពញាឮ ស្រុកពញាឮ ខេត្តកណ្ដាល។
អ្នកស្រី យក់ សម្បត្តិ ឱ្យដឹងទៀតថា ជំហានដំបូងរោងចក្រនេះមានសង្វាក់ផលិតកម្មផ្នែកច្រក និងវេចខ្ចប់វ៉ាក់សាំង ទៅតាមស្តង់ដារ និងបច្ចេកវិទ្យារបស់ក្រុមហ៊ុនស៊ីណូវ៉ាក់។
ទាក់ទងនឹងស្ថានភាពជំងឺកូវីដ-១៩ កាលពីថ្ងៃទី១៤ ខែកញ្ញា ក្រសួងរកឃើញអ្នកឆ្លងថ្មីចំនួន ៦នាក់ ដែលជាប្រភេទអូមីក្រុង ហើយដែលជាលទ្ធផលបញ្ជាក់ដោយម៉ាស៊ីន PCR។ ក្នុងចំណោមអ្នកឆ្លងថ្មីទាំង៦នាក់ នោះមានម្នាក់ជាករណីនាំចូលពីក្រៅប្រទេស និងក្រៅពីនោះសុទ្ធសឹងជាករណីឆ្លងក្នុងសហគមន៍។
គិតមកដល់ពេលនេះកម្ពុជាមានអ្នកឆ្លងជំងឺកូវីដ-១៩ សរុបជាង ១សែន ៣ម៉ឺន ៧ពាន់នាក់ (១៣៧.៧៤៥) អ្នកជាសះស្បើយចំនួនជាង ១សែន ៣ម៉ឺន ៤ពាន់នាក់ (១៣៤.៦៣៣) និងអ្នកស្លាប់ចំនួន ៣ពាន់ ៥៦នាក់ (៣.០៥៦)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។