អ្នកជំងឺកូវីដ ១១នាក់ទៀតបានស្លាប់ និងឆ្លងថ្មីជាង ៤រយនាក់
2021.08.31
អ្នកជំងឺកូវីដ-១៩ ចំនួន ១១នាក់ទៀតបានស្លាប់ ដែលធ្វើឱ្យករណីស្លាប់ដោយសារជំងឺនេះកើនឡើងដល់ជាង ១ពាន់ ៩រយនាក់ (១.៩០៣) ហើយ គិតត្រឹមថ្ងៃទី៣១ ខែសីហា។ ចំពោះករណីឆ្លងថ្មីវិញមានចំនួន ៤៣៩នាក់ ក្នុងនោះជាង ១០០នាក់ ជាករណីនាំចូលពីក្រៅប្រទេស។
ជាមួយគ្នានេះ ក្រសួងសុខាភិបាល បានរកឃើញមេរោគកូវីដ១៩ បំប្លែងថ្មី ដែនតា (Delta) បានកើនឡើងជិត ២ពាន់នាក់ហើយ គិតត្រឹមថ្ងៃទី៣១ ខែសីហា ក្រោយពេលរកឃើញអ្នកឆ្លងថ្មីចំនួន ៨៤នាក់ បន្ថែមទៀត នៅរាជធានីភ្នំពេញ ខេត្តបន្ទាយមានជ័យ ខេត្តបាត់ដំបង និងខេត្តមួយចំនួនទៀត។ រហូតមកទល់ពេលនេះមេរោគបំប្លែងថ្មីនេះ បានរាតត្បាតស្ទើរតែពាសពេញប្រទេសហើយ លើកលែងតែខេត្តកែប និងខេត្តក្រចេះប៉ុណ្ណោះ។
គិតត្រឹមព្រឹកថ្ងៃទី៣១ ខែសីហា កម្ពុជាមានអ្នកកើតជំងឺកូវីដ-១៩ ជាង ៩ម៉ឺន ៣ពាន់នាក់ (៩៣.០៥៣) ក្នុងនោះអ្នកជាសះស្បើយមានជិត ៨ម៉ឺន ៩ពាន់នាក់ (៨៨.៧៨៦)។ ចំពោះការចាក់វ៉ាក់សាំងបង្ការជំងឺកូវីដ១៩ វិញ ក្រសួងសុខាភិបាលប្រកាសថា គិតត្រឹមថ្ងៃទី៣០ ខែសីហា រដ្ឋាភិបាលចាក់វ៉ាក់សាំងជូនពលរដ្ឋបានជិត ៩២ភាគរយហើយ ក្នុងចំណោមអ្នកដែលត្រូវចាក់សរុប ១០លាននាក់។ ចំណែកកុមារ និងយុវជនដែលមានអាយុពី ១២ឆ្នាំ ដល់ ១៧ឆ្នាំវិញ ក្រសួងប្រកាសថា ចាក់វ៉ាក់សាំងបានជាង ៧៧ភាគរយ ក្នុងចំណោមអ្នកដែលត្រូវចាក់សរុបជិត ២លាននាក់។
ជាមួយគ្នានេះ រដ្ឋាភិបាលបាននាំចូលវ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) ចំនួន ២លានដូសបន្ថែមទៀត ដឹកមកដល់កម្ពុជាហើយនៅព្រឹកថ្ងៃទី៣១ ខែសីហា។ លោក ហ៊ុន សែន បានបង្ហោះសារនៅក្នុងហ្វេសប៊ុករបស់លោកថា វ៉ាក់សាំងដែលរដ្ឋាភិបាលបានបញ្ជាទិញពីប្រទេសចិននេះ ត្រៀមសម្រាប់ចាក់ដូសទី៣ ឬហៅថាដូសជំរុញ ជូនប្រជាពលរដ្ឋ។
គិតត្រឹមថ្ងៃទី៣១ ខែសីហា កម្ពុជា មានវ៉ាក់សាំងបង្ការជំងឺកូវីដ១៩ សរុបជាង ២៥លានដូសហើយ។ វ៉ាក់សាំងភាគច្រើនរដ្ឋាភិបាលបានទិញពីប្រទេសចិន និងមួយចំនួនទៀតជាជំនួយមនុស្សធម៌ពីប្រទេសជាមិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។