អ្នកជំនាញសុខាភិបាល ស្នើសុំឱ្យពលរដ្ឋប្រុងប្រយ័ត្ន មុនទទួលទានស្រា ដើម្បីចៀសវាងគ្រោះថ្នាក់ស្លាប់
2021.06.29
អ្នកជំនាញសុខាភិបាល ស្នើឱ្យប្រជាពលរដ្ឋ នៅទូទាំងប្រទេសត្រូវប្រុងប្រយ័ត្នមុននឹងទទួលទានស្រាស ឬ ស្រាថ្នាំ ណាមួយ ត្រូវពិនិត្យមើលគុណភាព ឱ្យបានច្បាស់លាស់ដើម្បីចៀសវាងពុលស្លាប់។
ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី លើកឡើងបែបនេះ គឺបន្ទាប់ពីស្ត្រីវ័យក្មេង ២នាក់នៅក្នុងទីក្រុងភ្នំពេញ បានស្លាប់កាលពីថ្ងៃទី២៨ មិថុនា ដោយសារពុលស្រា។
លោកបន្តថា ស្ថាប័នពាក់ព័ន្ធដូចជា ក្រសួងសុខាភិបាល ក្រសួងកសិកម្ម និងក្រសួងឧស្សាហកម្មគួរតែទប់ស្កាត់ ដើម្បីកុំឱ្យនាំស្រាចូល ដែលមិនមានប្រភពច្បាស់លាស់ និង ការផលិត ស្រាស ស្រាថ្នាំ គ្រប់ប្រភេទដោយគ្មានបច្ចេកទេសត្រឹមត្រូវ ដើម្បីចៀសវាងគ្រោះថ្នាក់ដល់អាយុជីវិតរបស់ប្រជាពលរដ្ឋតទៅទៀត៖ «សូមបងប្អូនប្រយ័ត្នការញាំស្រានេះវា មានផលប៉ះពាល់ច្រើន ដែលធ្វើឱ្យយើងទី១ បាត់បង់ស្មារតី ទី២ វាអាចទៅជាអ្នកញៀនអាល់កុល វាអត់បានផឹក វាទៅជាញ័រ ដៃហើយភ្លេចភ្លាំង ហើយវាខូចសរសៃប្រាសាទយើង ប៉ះពាល់ដល់អ្នកមានកូនមានផ្ទៃពោះទៀត។ គួរណាស់បងប្អួនកាត់បន្ថយបានកាត់បន្ថយខ្លះ»។
សារព័ត៌មានភ្នំពេញប៉ុស្តិ៍ បានរាយការណ៍ថា វ័យក្មេងពីរនាក់អាយុចន្លោះពី១៩ ដល់ ២០ ឆ្នាំ បានស្លាប់ ក្រោយពីបានទទួលទានស្រា ក្រឡុក នៅក្នុងភោជនីយដ្ឋាន មួយកន្លែងក្នុង សង្កាត់ព្រែកព្នៅ ខណ្ឌព្រែកព្នៅ ក្រុងភ្នំពេញ។
ក្រោយពីទទួលទានស្រាក្រឡុក ភ្លាម ជនរងគ្រោះ មានអាការៈ មិនស្រួលខ្លួន និងវិលមុខ ហើយត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យកាល់ម៉ែត្រ ប៉ុន្តែដោយសារអាការៈធ្ងន់ធ្ងរពេក ជនរងគ្រោះ បានស្លាប់ នៅក្នុងមន្ទីរពេទ្យ។
វិទ្យុអាស៊ីសេរីបានព្យាយាមទាក់ទងអភិបាលខណ្ឌព្រែកព្នៅ លោក សុខ សម្បត្តិ តែលោកមិនលើកទូរស័ព្ទ។
ករណីពុលស្រាស្លាប់កើតឡើងជាបន្តបន្ទាប់ក្នុងមួយរយៈពេលចុងក្រោយ។ កាលពីដើមខែមិថុនា មានពលរដ្ឋចំនួន ១៣នាក់ស្លាប់ និង ៧៦ នាក់ផ្សេងទៀត ត្រូវដឹកទៅសង្គ្រោះបន្ទាន់ ដោយសារតែពុលស្រាស នៅស្រុក ក្រគរ ខេត្តពោធិ៍សាត់ ហើយហេតុការណ៍នេះ បានកើតឡើងជាប់ៗ គ្នាបន្ទាប់ពីខេត្តកណ្ដាលដែលបានបណ្ដាលឱ្យមនុស្ស ១២នាក់ស្លាប់ ៩នាក់សង្គ្រោះបន្ទាន់ និងខេត្តកំពត មានមនុស្ស ១០នាក់ស្លាប់ និង ៥៥នាក់ផ្សេងទៀតសង្គ្រោះបន្ទាន់។
ចាប់តាំងពីចុងឆ្នាំ២០១៦ រហូតមកដល់ចុងខែមិថុនា នេះមានមនុស្សពុលស្រាស្លាប់ជាង ៥០នាក់ និងជាង ៥០០នាក់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ ដែលក្នុងនោះភាគច្រើន ពុលស្រាស និងស្រាថ្នាំ ហើយកាលពីចុងឆ្នាំ២០១៨ ពលរដ្ឋរស់នៅស្រុកសំបូរ ខេត្តក្រចេះ ចំនួន ៧នាក់ស្លាប់ និង ១០០នាក់ បញ្ជូនទៅសង្គ្រោះបន្ទាន់នៅមន្ទីរពេទ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។