ក្រសួងសុខាភិបាលអំពាវនាវជាថ្មីឱ្យពលរដ្ឋប្រុងប្រយ័ត្នខ្ពស់ចំពោះជំងឺគ្រុនឈាម
2019.07.12
សូមលោកអ្នកនាងប្រុងប្រយ័ត្នខ្ពស់ ចំពោះស្ថានភាពជំងឺគ្រុនឈាម ដែលកំពុងកើនឡើងគួរឱ្យកត់សម្គាល់នៅកម្ពុជា។ ចាប់ពីដើមខែឧសភា រហូតដល់ដើមខែកក្កដានេះ មានពលរដ្ឋចំនួន២៥ នាក់ហើយ ដែលបានស្លាប់ដោយសារជំងឺនេះ ក្នុងចំណោមអ្នកជំងឺចំនួន១ ម៉ឺន ៥ ពាន់នាក់។ នេះបើយោងតាមសេចក្ដីជូនដំណឹងរបស់ក្រសួងសុខាភិបាល ដែលអាស៊ីសេរីទទួលបាន នៅថ្ងៃទី១០ កក្កដា។
ក្រសួងសុខាភិបាលបានអំពាវនាវឱ្យពលរដ្ឋ និងអាជ្ញាធរ ចូលរួមអនុវត្តវិធានការការពារជំងឺគ្រុនឈាម ឱ្យបានសកម្ម។ វិធានការទាំងនោះមានជាអាទិ៍ ការលុបបំបាត់ជម្រកមូសខ្លា ការដាក់ថ្នាំសម្លាប់ដង្កូវទឹក និងការទុកដាក់វត្ថុដែលអាចដក់ទឹកបានឱ្យបានត្រឹមត្រូវ និងមានរបៀបជាដើម។ ក្រៅពីនេះ ក្រសួងតម្រូវឱ្យការដ្ឋានសំណង់ទាំងអស់រក្សាអនាម័យល្អ និងកុំឱ្យមានកន្លែងដក់ទឹកដែលជាជម្រកមូសខ្លា។
ប្រសិនបើមានរោគសញ្ញាក្ដៅខ្លួនខ្លាំង ក្រសួងសុខាភិបាលណែនាំឱ្យលោកអ្នកនាង ត្រូវប្រញាប់នាំអ្នកជំងឺទៅរកសេវាថែទាំសុខភាពរដ្ឋ ដូចជា មណ្ឌលសុខភាព និងមន្ទីរពេទ្យ ដែលនៅជិតបំផុតឱ្យបានជាបន្ទាន់។ ក្រសួងហាមដាច់ខាតការព្យាបាលជំងឺគ្រុនក្ដៅខ្លាំងភ្លាមៗ ដោយខ្លួនឯង ឬក៏ទៅព្យាបាលជំងឺក្នុងសេវាឯកជន ដែលគ្មានសមត្ថភាពផ្នែកជំងឺគ្រុនឈាម។ មូលហេតុ គឺដោយសារតែជំងឺនេះអាចសម្លាប់អ្នកជំងឺបានគ្រប់ពេល ប្រសិនបើព្យាបាលយឺតយ៉ាវ ឬព្យាបាលមិនមានជំនាញ ឬក៏ព្យាបាលដោយប្រើប្រភេទថ្នាំអាស្ពីរីន (Aspirin)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។