ជនជាតិ​ចិន​ម្នាក់​ស្លាប់​ពេល​ព្យាបាល​ជំងឺ​កូវីដ តែ​ក្រសួង​សុខាភិបាល​ថា ស្លាប់​ដោយសារ​ញៀន​ថ្នាំ

ដោយ មួង ណារ៉េត
2021-03-05
Share
ជនជាតិ​ចិន​ម្នាក់​ស្លាប់​ពេល​ព្យាបាល​ជំងឺ​កូវីដ តែ​ក្រសួង​សុខាភិបាល​ថា ស្លាប់​ដោយសារ​ញៀន​ថ្នាំ អ្នកនាំពាក្យ​ក្រសួង​សុខាភិបាល អ្នកស្រី ​ឱ វណ្ណឌីន។
រូប​ពី​ហ្វេសប៊ុក

ជនជាតិ​ចិន​ម្នាក់ ស្លាប់​ពេល​កំពុង​សម្រាក​ព្យាបាល​ជំងឺ​កូ​វីដ​-១៩ តែ​ក្រសួង​សុខាភិបាល អះអាង​ថា អ្នកជំងឺ​ស្លាប់​ដោយសារ​ញៀន​ថ្នាំ។ ជនជាតិ​ចិន​រូប​នេះ ស្ថិត​ក្នុង​ចំណោម​ជនជាតិ​ចិន​សរុប ៣០២ នាក់ ដែល​សុទ្ធ​តែ​មាន​ផ្ទុក​ជំងឺ​កូវីដ​-១៩ ដែល​ឆ្លង​ក្នុង​ព្រឹត្តិការណ៍​សហគមន៍ ២០ កុម្ភៈ។

រដ្ឋមន្ត្រី​ក្រសួងសុខាភិបាល​លោក ម៉ម ប៊ុនហេង សន្និដ្ឋាន​ថា អ្នកជំងឺ​ចិន​រូប​នេះ ស្លាប់​ភ្លាមៗ ដោយសារ​ភាព​រើ​មេ​ថ្នាំញៀន​ធ្ងន់ធ្ងរ បណ្ដាល​ឱ្យ​គាំងបេះដូង​ភ្លាមៗ​តែម្ដង​។ រដ្ឋមន្ត្រី​ក្រសួង​សុខាភិបាល​រូប​នេះ អះអាង​ទៀត​ថា សេចក្តី​សន្និដ្ឋាន​នេះ ធ្វើឡើង​ក្រោយ​លទ្ធផល​ពិនិត្យ​ទឹកនោម​របស់​អ្នក​ជំងឺ បង្ហាញ​ថា មាន​ធាតុ​ថ្នាំញៀន​ប្រភេទ​មេតំហ្វេតាមីន​ខ្ពស់ ដែល​លោក​ថា បុគ្គល​នេះ បាន​ប្រើប្រាស់​សារធាតុ​ញៀន​ប្រភេទ​នេះ ក្នុង​រយៈពេល​យូរ​មក​ហើយ។

បុរស​ជនជាតិ​ចិន​រូប​នោះ មានឈ្មោះ ឡាយ ប៊ិន​ស៊ា​ង (Lay Binxiang) អាយុ ៣៤ ឆ្នាំ មក​កម្ពុជា​កាលពី​ខែ​តុលា ឆ្នាំ ២០១៩ ប៉ុន្តែ​ទើបតែ​ឆ្លង​ជំងឺ​កូវីដ​-១៩ នៅ​ចុងខែ កុម្ភៈ​កន្លង​ទៅ​នេះ​។ លោក​បាន​សម្រាក​ព្យាបាល​ជំងឺ​ពី​ថ្ងៃ​ទី១ ខែ​មីនា នៅ​មណ្ឌល​ព្យាបាល​ជំងឺ​កូ​វីដ​-១៩ ព្រែកភ្នៅ រាជធានី​ភ្នំពេញ​។ លោក​ស្លាប់​នៅ​ថ្ងៃ​ទី៤ ខែមីនា។

ទោះបីជា​ករណី​អ្នក​ផ្ទុក​ជំងឺ​កូវីដ-១៩ នៅ​កម្ពុជា​មាន​ចំនួន ៩០៩ នាក់ និង​មាន​អ្នក​កំពុង​សម្រាក​ព្យាបាល​ជំងឺ​នេះ​ចំនួន ៤៨៤ នាក់ គិត​ត្រឹម​ថ្ងៃ​ទី៤ ខែ​មីនា ការ​ស្លាប់​របស់​អ្នកជំងឺ​ក្នុង​ពេល​កំពុង​សម្រាក​ព្យាបាល​ជំងឺ​នេះ គឺជា​ករណី​ដំបូង​មួយ​នៅ​កម្ពុជា។

ទោះ​រដ្ឋមន្ត្រី​ក្រសួង​សុខាភិបាល សន្និដ្ឋាន​ថា​ការ​ស្លាប់​នេះ គឺ​បណ្តាល​មក​ពី​អ្នកជំងឺ​រើ​មេ​ថ្នាំញៀន​ក៏ដោយ ក៏​សិក្សា​ស្រាវជ្រាវ​វេជ្ជសាស្ត្រ​នៅ​អាមេរិក ថា មាន​ករណី​ជាច្រើន ដែល​អ្នកជំងឺ​កូវីដ​-១៩ ស្លាប់​ដោយសារ​គាំង​ប្រព័ន្ធ​ផ្លូវ​ដង្ហើម ឬ​គាំង​បេះដូង។

អ្នក​ជំនាញ​ថា បើ​ទោះបីជា​អ្នកជំងឺ​កូវីដ​-១៩ ភាគច្រើន មាន​បញ្ហា​រលាក​សួត​ធ្ងន់ធ្ងរ និង​ដំណើរ​គាំង​ផ្លូវ​ដង្ហើម ជា​បញ្ហា​ចម្បង​នៃ​ការ​វាយ​លុក​របស់​ជំងឺ​កូវីដ​-១៩​ក៏ដោយ ក៏​ជំងឺ​នេះ​អាច​ធ្វើ​ឱ្យ​ឈាមកក ដែល​បណ្ដាល​ឱ្យ​អ្នកជំងឺ​ដាច់​សរសៃ​ឈាម​ក្នុង​ខួរក្បាល និង​គាំងបេះដូង​ដែរ។

ក្រោយ​ផ្ទុះ​ព្រឹត្តិការណ៍​ចម្លង​ក្នុង​សហគមន៍​លើក​ទី​បី កាលពី​ថ្ងៃ​ទី២០ ខែ​កុម្ភៈ មន្ត្រី​សុខាភិបាល​ព្រមាន​អំពី​គ្រោះថ្នាក់​ដល់​អាយុជីវិត ប្រសិនបើ​ពលរដ្ឋ​មិន​ប្រុងប្រយ័ត្ន​ខ្ពស់។ អ្នកនាំពាក្យ​ក្រសួង​សុខាភិបាល​អ្នកស្រី ឱ វណ្ណឌីន ថ្លែង​ក្នុង​សន្និសីទ​សារព័ត៌មាន កាលពី​ថ្ងៃទី២៣ ខែ កុម្ភៈ ថា​អ្នក​ឆ្លង​ជំងឺ​កូវីដ​-១៩ នៅ​ពេល​នេះ អាច​ស្លាប់៖ «កុំ​គិត​ថា អ្ហេ​ឥឡូវ​កម្ពុជា​អត់​មាន​អ្នក​ស្លាប់​ផង ទៅ​ភ័យ​អី​! កុំ​មើលស្រាល​ទៅលើ​លទ្ធភាព​នៃ​ការ​វាយ​លុក​របស់​វីរុស​កូវីដ​-១៩ ជាពិសេស អា​ប្រភេទ​បំប្លែង​ថ្មី​នេះ វា​នឹង​អាច​ធ្វើ​ឱ្យ​អ្នក​ជំងឺ​វិវត្ត​ទៅ​រក​សេចក្ដី​ស្លាប់​បាន ប្រសិនបើ​បុគ្គល​នោះ មិន​ទទួល​បាន​នូវ​ការ​ពិនិត្យ​ព្យាបាល បាន​ទាន់​ពេល​វេលា ហើយ​មាន​ការ​ថែទាំ​ត្រឹមត្រូវ ពី​ក្រុម​គ្រូពេទ្យ​របស់​យើង​ទេ​នោះ»

ទោះជា​មាន​ការ​ថែទាំ និង​ព្យាបាល​ត្រឹមត្រូវ​ពី​គ្រូពេទ្យ​ជំនាញ​ក៏ដោយ ក៏​អ្នកជំងឺ​កូវីដ​-១៩ ជាច្រើន​នៅ​លើ​សាកលលោក បាន​ស្លាប់​ដោយសារ​ជំងឺ​នេះ។ គិត​ត្រឹម​ថ្ងៃ​ទី៤ ខែ មីនា អ្នក​ស្លាប់​បាន​កើន​ឡើ​ដល់ ជិត ២​លាន ៦​សែន (២ ៥៧៥ ៣៩៤) នាក់ ក្នុងចំណោម​អ្នក​ផ្ទុក​ជំងឺ​នេះ ជិត ១១៦​លាន​នាក់ (១១៥ ៩៨៥ ៣៣៥)

ទោះជា​យ៉ាង​នេះ​ក្ដី ចំនួន​នៃ​អ្នក​ឆ្លង​ជំងឺ​នេះ បាន​ថយ​ចុះ​យ៉ាង​គំហុក​នៅ​ប្រទេស ដែល​បាន​ចាក់​វ៉ាក់សាំង​ជូន​ពលរដ្ឋ ដូចជា​នៅ​សហរដ្ឋអាមេរិក​ជាដើម​។ ចំនួន​អ្នក​ឆ្លង​ជំងឺ​នេះ​នៅ​សហរដ្ឋអាមេរិក បាន​ថយ​ចុះ​ពី​ប្រមាណ ២​សែន ៥​ម៉ឺន​នាក់​ក្នុង​មួយថ្ងៃ កាលពី​ចុង​ខែ​មករា មក​នៅ​ត្រឹម​ប្រមាណ ៦​ម៉ឺន​នាក់​ក្នុង​មួយថ្ងៃ​នៅ​ដើមខែ​កុម្ភៈ​នេះ​។ មក​ទល់​ពេល​នេះ មាន​ពលរដ្ឋ​អាមេរិក​ជាង ៧០​លាន​នាក់​ហើយ បាន​ទទួល​វ៉ាក់សាំង​បង្ការ​ជំងឺ​នេះ។

ចំណែក​នៅ​ឯ​កម្ពុជា​ឯណោះ​វិញ រដ្ឋាភិបាល​លោក ហ៊ុន សែន កំពុង​សម្រុក​ចាក់​វ៉ាក់សាំង​ចិន ជូន​ពលរដ្ឋ ដែល​មាន​អាយុ​ក្រោម ៦០​ឆ្នាំ និង​ចាប់​ផ្ដើម​ចាក់​វ៉ាក់សាំង​អង់គ្លេស ជូន​ពលរដ្ឋ​អាយុ​ចាប់ពី ៦០ ឆ្នាំ​ឡើង។ ក្នុង​ពេល​ជាមួយគ្នា​នេះ រដ្ឋសភា​ឯក​បក្ស​នៃ​របប​នេះ នឹង​ប្រជុំ​នៅ​ថ្ងៃ​ទី៥ ខែ​មីនា​នេះ ដើម្បី​អនុម័ត​សេចក្ដី​ព្រាងច្បាប់ ដាក់​ពិន័យ​ជា​ប្រាក់​រហូតដល់ ២០​លាន​រៀល ឬ ៥ ០០០ ដុល្លារ និង​ដាក់​ពន្ធនាគារ​រហូតដល់ ២០​ឆ្នាំ ចំពោះ​ជន​ណា ដែល​ល្មើស​វិធានការ​សុខាភិបាល ស្ដីពី​ការ​បង្ការ​ជំងឺ​កូវីដ-១៩៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល