ព្រះសង្ឃគង់នៅវត្តស្ទឹងមានជ័យប្រឈមដាច់ចង្ហាន់ ក្រោយផ្ទុះជំងឺកូវីដ១៩ នៅក្នុងវត្ត
2021.06.19
ព្រះសង្ឃគង់នៅវត្តចង្ក្រានតាព្រហ្មហៅវត្តស្ទឹងមានជ័យប្រឈមដាច់ចង្ហាន់ បន្ទាប់ពីផ្ទុះរាតត្បាតជំងឺកូវីដ១៩ខ្លាំងនៅក្នុងវត្ត ។ មន្ត្រីសង្គមស៊ីវិលយល់ថា អាជ្ញាធរពាក់ព័ន្ធគួរយកចិត្តទុកលើព្រះសង្ឃបន្ថែមទៀត ព្រោះពេលកំពុងធ្វើចត្តាឡីស័កដូច្នេះ ព្រះអង្គមិនអាចចេញបិណ្ឌបាត្រពីពុទ្ធបរិស័ទនោះទេ។
ព្រះសង្ឃនៅវត្តស្ទឹងមានជ័យអាចនឹងដាច់ចង្ហាន់ អំឡុងពេលធ្វើចត្តាឡីស័ក ប្រសិនបើអាជ្ញាធរមិនយកចិត្តទុកដាក់។ ព្រះសង្ឃដែលជួបបញ្ហានេះ ស្នើឱ្យរដ្ឋាភិបាលជួយដោះស្រាយបញ្ហាចង្ហាន់នេះជាបន្ទាន់។
ព្រះសង្ឃគង់នៅវត្តស្ទឹងមានជ័យ ព្រះតេជព្រះគុណ អ៊ិ ពុទ្ធី មានថេរដីកាថា មានអាចារ្យវត្តម្នាក់បានស្លាប់មុនពេលក្រុមគ្រូពេទ្យចុះយកសំណាកធ្វើតេស្តរកវីរុសកូវីដ១៩ ហើយព្រះសង្ឃមួយអង្គរកឃើញវិជ្ជមានកូវីដ១៩។ បន្ទាប់មកអាជ្ញាធរបានចុះមកយកសំណាកព្រះសង្ឃ និងគ្រហស្ថជាច្រើនទៀត ហើយលទ្ធផលបង្ហាញថា មានអ្នកឆ្លងជំងឺកូវីដ១៩ ច្រើនករណី។ គ្រូពេទ្យបានបញ្ជូនអ្នកកើតជំងឺនេះទៅព្យាបាលនៅមន្ទីរពេទ្យ ចំណែកអ្នកអវិជ្ជមានវិញ គ្រូពេទ្យដាក់ឱ្យធ្វើចត្តាឡីស័ក រីឯវត្តស្ទឹងមានជ័យត្រូវបិទទ្វារ។
ព្រះតេជព្រះគុណមានថេរដីកាបន្តថាព្រះសង្ឃ និងអ្នកស្នាក់នៅក្នុងវត្ត មានស្បៀងអាហារខ្សត់ខ្សោយ ហើយធម្មតាព្រះសង្ឃតែងតែរំពឹងលើការនិមន្តបិណ្ឌបាត្រពីពុទ្ធបរិស័ទ។ ប៉ុន្តែស្ថានភាពផ្ទុះរាលដាលជំងឺកូវីដ១៩នៅក្នុងវត្តនេះ ព្រះអង្គថា នឹងធ្វើឱ្យព្រះសង្ឃ និងកូនសិស្សដាច់ចង្ហាន់ និងស្បៀងអាហារ។ ព្រះតេជព្រះគុណក៏សំណូមពរនិងបិណ្ឌបាត្រទៅរដ្ឋាភិបាល និងក្រសួងពាក់ព័ន្ធ រួមទាំងពុទ្ធបរិស័ទទាំងអស់ជួយប្រគេនចង្ហាន់ និងស្បៀងអាហារដល់ព្រះសង្ឃ និងអ្នករស់នៅអាស្រ័យនឹងវត្តនេះផង៖ «ចម្រើនពរដល់ញាតិញោមពុទ្ធបរិស័ទប្រុសស្រីទាំងក្នុងនិងក្រៅប្រទេសទាំងអស់សុំជួយមើលការខុសត្រូវ និងការផ្គត់ផ្គង់ជាស្បៀងអាហារ ចង្ហាន់បិណ្ឌបាត្រដល់ព្រះសង្ឃនៅវត្តចង្ក្រានតាព្រហ្មស្ទឹងមានជ័យផងពរ ព្រោះឥឡូវនេះព្រះសង្ឃជាង ៣រយអង្គកំពុងជាប់ចត្តាឡីស័កយ៉ាងលំបាក ហើយក៏សូមអំពាវនាវដល់ពុទ្ធបរិស័ទទាំងអស់ និងគ្រប់វត្តទាំងអស់ត្រូវប្រុងប្រយ័ត្នផងដែរ»។
ជុំវិញបញ្ហានេះ អ្នកនាំពាក្យក្រសួងធម្មការ និងសាសនា លោក សេង សុមុនី ថ្លែងថា កន្លងមកអាជ្ញាធរមូលដ្ឋានបានប្រគេនអង្ករ និងត្រីខ ដល់ព្រះសង្ឃដែលខ្វះខាតចង្ហាន់ខ្លះដែរ ប៉ុន្តែករណីព្រះសង្ឃនៅវត្តស្ទឹងមានជ័យប្រឈមដាច់ចង្ហាន់នេះ លោករុញឱ្យទៅសួរអាជ្ញាធរមូលដ្ឋានវិញ៖ «ដូចជម្រាបអ៊ីចឹងជាសមត្ថកិច្ចរបស់អាជ្ញាធរមូលដ្ឋានដែលលោកទទួលខុសត្រូវកិច្ចការងារហ្នឹង កន្លងមកវត្តសារាវ័ន វត្តអីគឺអាជ្ញាធរដែនដីខាងសង្កាត់ ខាងគណៈកម្មការកូវីដ១៩ អាជ្ញាធរមូលដ្ឋានលោកបានសហការគ្នាល្អលើកិច្ចធ្វើការងារហ្នឹង»។
វិទ្យុអាស៊ីសេរីមិនអាចទាក់ទងអភិបាលរងខណ្ឌមានជ័យ លោក ឌី រ័ត្នខេមរុណ ដើម្បីសុំការបញ្ជាក់រឿងនេះបានទេ នៅថ្ងៃទី១៨ មិថុនា។
វត្តចង្ក្រានតាព្រហ្ម ហៅវត្តស្ទឹងមានជ័យ មានព្រះសង្ឃ ដូនជី តាជី និងគ្រហស្ថគង់នៅ និងស្នាក់នៅជាង៣រយអង្គ/នាក់ ហើយវត្តនេះក៏ធ្លាប់មានករណីអ្នកឆ្លងជំងឺកូវីដ-១៩ កាលពីខែឧសភាម្តងរួចមកហើយ។ បច្ចុប្បន្ន វត្តស្ទឹងមានជ័យកំពុងផ្ទុះរាលដាលជំងឺកូវីដ-១៩ ខ្លាំងដែលបណ្តាលឱ្យព្រះសង្ឃ និងគ្រហស្ថចំនួន ៤១ អង្គ/នាក់ ឆ្លងជំងឺនេះ គិតត្រឹមល្ងាចថ្ងៃទី ១៨មិថុនា។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា មានប្រសាសន៍ថា ព្រះសង្ឃអាស្រ័យលើចង្ហាន់ពុទ្ធបរិស័ទ ដូច្នេះអាជ្ញាធរព័ន្ធគួររួសរាន់ដោះស្រាយបញ្ហាកង្វះចង្ហាន់នេះ។ លោកបញ្ជាក់ថាអាជ្ញាធរពាក់ព័ន្ធក៏ត្រូវយកចិត្តទុកដាក់លើទីកន្លែងធ្វើចត្តាឡីស័ក ប្រគេនសេវាព្យាបាល និងថែទាំសម្រាប់ព្រះសង្ឃឱ្យបានត្រឹមត្រូវដែរ ដើម្បីឆ្លើយតបបន្ទាន់ជុំវិញការរីករាលដាលជំងឺកូវីដ១៩ នៅក្នុងវត្តអារាម៖«អ្វីទាំងអស់នេះវាសុទ្ធតែជាបទពិសោធន៍មានកន្លងមកហើយ មិនគួរណាទៅបណ្តែតបណ្តោយឱ្យព្រះអង្គក៏ដូចជាពុទ្ធបរិស័ទនៅខាងក្នុងអីទាំងអស់ហ្នឹងអ្នកដែលរស់នៅខាងក្នុងវត្តហ្នឹងមានភាពប្រឈមជាមួយការដាច់ស្បៀងអាហារ ឬក៏ចង្ហាន់អ៊ីចឹងទេ ព្រះសង្ឃលោកគឺជាឧត្តមភេទមិនមែនបុថុជ្ជនអីធម្មតាទេ អ៊ីចឹងគួរតែមានរៀបចំការយកចិត្តទុកដាក់ឱ្យបានខ្ពស់»។
ករណីព្រះសង្ឃដាច់ចង្ហាន់ និងស្បៀងអាហារ ឬថវិកានៅតាមវត្តនេះ បានកើតមានឡើងជាហូរហែ តាំងពីមានការរាតត្បាតជំងឺកូវីដ-១៩មក។ លោកនាយករដ្ឋមន្ត្រី ហ៊ុន សែន ធ្លាប់បានបញ្ជាឱ្យអាជ្ញាធរពាក់ព័ន្ធគិតគូរ និងដោះស្រាយបញ្ហាចង្ហាន់សម្រាប់ព្រះសង្ឃដែរ ប៉ុន្តែការអនុវត្តជាក់ស្តែងនៅមានភាពខ្វះចន្លោះច្រើន ខណៈការរាតត្បាតជំងឺកូវីដ១៩ ចេះតែបន្តអូសបន្លាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ