ក្រសួងកសិកម្មថាការផ្ទុះវីរុសផ្ដាសាយបក្សីនៅខេត្តស្វាយរៀងមិនមានមនុស្សឆ្លងទេ
2017.02.01
ស្ត្រីម្នាក់កំពុងដាក់ចំណីឲ្យមាន់។
ក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា វីរុសគ្រុនផ្ដាសាយបក្សី H5N1 បានផ្ទុះឡើងនៅខេត្តស្វាយរៀង ក៏ប៉ុន្តែមកដល់ពេលនេះ មិនមានមនុស្សត្រូវបានគេរាយការណ៍ថាបានឆ្លងវីរុសនេះទេ។
អ្នកនាំពាក្យក្រសួងកសិកម្ម លោក ឡោ រស្មី ប្រាប់អាស៊ីសេរីនៅថ្ងៃទី១ កុម្ភៈ ថា កាលពីថ្ងៃទី២៥ មករា មានសត្វមាន់ដែលប្រជាពលរដ្ឋចិញ្ចឹមលក្ខណៈគ្រួសារចំនួន ៦៨ក្បាលបានឈឺងាប់នៅក្បែរវត្តប៉ាយ៉ាប ក្នុងភូមិប៉ាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង។
ក្រសួងកសិកម្ម បានយកសំណាកមាន់ដែលងាប់ចំនួន៣ ទៅពិសោធវិភាគ ហើយរកឃើញថាមានផ្ទុកវីរុស H5N1។ ក្រសួងកសិកម្ម បានកម្ទេចមាន់ចំនួន ៣២២ក្បាលផ្សេងទៀតនៅក្នុងតំបន់នោះដើម្បីបង្ការការរាតត្បាត។
លោក ឡោ រស្មី ឲ្យដឹងថា តំបន់ដែលផ្ទុកវីរុសគ្រុនផ្ដាសាយបក្សីនោះ ហ៊ុមព័ទ្ធដោយព្រៃឈើមានសត្វស្លាបដែលលោកថា អាចជាមូលហេតុនៃការឆ្លង។ លោកអះអាងថា ក្រសួងអាចគ្រប់គ្រងស្ថានភាពនៃការឆ្លងបានហើយ ដោយដាក់ប្រកាសហាមឃាត់ការចរាចរបក្សីក្នុងភូមិប៉ាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង រយៈពេល ៣០ថ្ងៃ ដើម្បីពិនិត្យតាមដាន។
ទោះបីជាយ៉ាងណា លោកស្នើឲ្យប្រជាពលរដ្ឋបង្កើនការប្រុងប្រយ័ត្នការពារការឆ្លងវីរុស H5N1៖ «ផ្អាកជាបណ្ដោះអាសន្នការទិញ ការលក់បក្សីគ្រប់ប្រភេទក្នុងរង្វង់ ៣គីឡូម៉ែត្រ។ បីគីឡូម៉ែត្រដូចថាកន្លែងផ្ទុះហ្នឹង យើងចាត់ទុកថាជាអង្កត់ផ្ចិត។ ចឹងយើងរាប់ពីកន្លែងអង្កត់ផ្ចិតទៅជុំវិញហ្នឹង ៣គីឡូម៉ែត្រ។ ដាច់ខាតមិនឲ្យចរាចរសត្វនៅទីនោះទេ។ ឥឡូវក្រសួងកសិកម្ម បានចាត់វិធានការគ្រប់សព្វបែបយ៉ាងអស់ហើយ»។
ការផ្ទុះឡើងវីរុសគ្រុនផ្ដាសាយបក្សី H5N1 ចុងក្រោយនៅប្រទេសកម្ពុជា បានកើតឡើងកាលពីខែឧសភា ឆ្នាំ២០១៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ