ម្ដាយទារកដែលកើតជំងឺស្លេកស្លាំងចូលបំភ្លឺលើបណ្ដឹងប្រឆាំងក្រុមហ៊ុនម្សៅទឹកដោះនូទ្រីលែត
2021.01.07
ម្ដាយឪពុកទារករងគ្រោះបន្តស្នើឱ្យតុលាការពន្លឿនការដោះស្រាយបណ្ដឹងរបស់ពួកគាត់ប្រឆាំងក្រុមហ៊ុននាំចូលម្សៅទឹកដោះគោនូទ្រីលែត។ សំណើនេះធ្វើឡើង ក្រោយតំណាងអយ្យការបានកោះហៅក្រុមគ្រួសារទារករងគ្រោះទៅសាកសួរជាលើកដំបូង កាលពីថៃ្ងទី៤ និងទី៥ មករា។ មន្ត្រីសិទ្ធិមនុស្សយល់ថា តុលាការគួរពន្លឿននីតិវិធីតាមការស្នើសុំនេះ ដើម្បីពង្រឹងការអនុវត្តច្បាប់ និងបង្ហាញពីតម្លាភាព។
ម្ដាយឪពុកទារកកើតជំងឺស្លេកស្លាំង ជំរុញឱ្យតុលាការក្រុងភ្នំពេញបន្តនីតិវិធីលើបណ្ដឹងរបស់ពួកគេឱ្យបានឆាប់រហ័ស ដើម្បីរកយុត្តិធម៌ដល់ទារក និងកុមាររងគ្រោះ ហើយអនុវត្តច្បាប់ឱ្យកាន់តែមានប្រសិទ្ធភាពជាងនេះ។ ពួកគេនៅតែរក្សាជំហរដដែលនៅតុលាការចំពោះការទាមទារសំណងពីក្រុមហ៊ុននាំចូលម្សៅទឹកដោះគោនូទ្រីលែត (Nutrilatt)។
ឪពុកទារករងគ្រោះលោក សៅ សីហា ឱ្យអាស៊ីសេរីដឹងថា តំណាងអយ្យការមិនបានសួរនាំលោកច្រើននោះទេ ដោយគ្រាន់តែសួរនាំអំពីជំហរក្នុងការទាមទារសំណង និងបញ្ហាសុខភាពកូនៗ របស់ពួកលោកបន្តិចបន្តួចតែប៉ុណ្ណោះ។ លោកបន្តថា ក្រុមមាតាបិតាកំពុងរង់ចាំអំពីនីតិវិធីបន្ទាប់របស់តុលាការ។ ក្រៅពីនេះ លោកទទូចឱ្យក្រសួងសុខាភិបាល និងស្ថាប័នពាក់ព័ន្ធផ្សេងទៀត គួរត្រួតពិនិត្យមើលរាល់ទំនិញនាំចូលទាំងអស់ឱ្យបានត្រឹមត្រូវ និងមានស្តង់ដារសុវត្ថិភាពត្រឹមត្រូវជាមុនសិន មុននឹងផ្ដល់អាជ្ញាប័ណ្ណ ឬមុននឹងឱ្យពួកគេចែកចាយផលិតផលទាំងនោះនៅក្នុងទីផ្សារប្រទេសកម្ពុជា៖ «សុំឱ្យតុលាការចាត់ការទៅតាមអ្វីដែលសមស្របទៅលើពាក្យបណ្តឹងរបស់យើង ព្រោះអី នេះមិនមែនជាករណីដែល ១ថ្ងៃ ២ថ្ងៃអាចដោះស្រាយបាន ហើយកូនរបស់យើងក៏មិនមែន ១ខែ ២ខែ អាច Recover បានដែរ ព្រោះអី យើងបានជជែកជាមួយកន្លែងគាំពារមាតា និងទារកដែរថា នេះគឺជាបញ្ហាកង្វះជាតិដែក ហើយនឹងជាតិស័ង្កសី គឺធ្វើឱ្យកុមារប៉ះពាល់រហូតដល់គាត់មានអាយុចូលរៀន»។
ដូចគ្នានេះដែរ ម្ដាយទារករងគ្រោះ លោកស្រី ចាន់ ផល្គុន សង្ឃឹមថា តុលាការក្រុងភ្នំពេញ នឹងដោះស្រាយបណ្ដឹងរបស់គ្រួសារទារករងគ្រោះ ដោយឈរលើតម្លាភាព និងគិតគូរដល់ផលប៉ះពាល់លើទារករងគ្រោះទាំងនោះ៖ «បើសិនជាទឹកដោះគោនៅតែអាចចរាចរ ឬក៏អាចបង្ហោះលើបណ្ដាញសង្គមហ្នឹង មានន័យថា អូ!ទឹកដោះគោហ្នឹង គេអាចលក់វិញបានហើយ អ៊ីចឹងប្រជាពលរដ្ឋខ្លះគាត់អត់ទុកចិត្តទៅលើប្រព័ន្ធដោះស្រាយវិវាទហ្នឹង ខណៈដែលរឿងក្តីវាមិនទាន់ចប់ចុងចប់ដើម អ៊ីចឹងកុមារផ្សេងទៀតគាត់អាចនឹងមានហានិភ័យដូចគ្នា ទោះបីជាម៉ាកវាខុសគ្នា ប៉ុន្តែអាទំនុកចិត្តវាបាត់បង់ទាំងស្រុងទៅហើយបង»។
ចំណែក ម្ដាយទារករងគ្រោះមួយរូបទៀត លោកស្រី ចាន់ សុផានី បញ្ជាក់ថា លោកស្រីមិនចង់ឱ្យតុលាការអូសបន្លាយការដោះស្រាយបញ្ហានេះឱ្យកាន់តែយូរជាងនេះទេ។ លោកស្រីថ្លែងថា លោកស្រីខកចិត្តចំពោះក្រសួងសុខាភិបាល និងស្ថាប័នមួយចំនួនដែលមិនផ្សព្វផ្សាយអំពីករណីដែលប៉ះពាល់ដល់សុខភាពកុមារ និងប្រជាពលរដ្ឋឱ្យបានច្រើននោះទេ។ លោកស្រីស្នើឱ្យអង្គការជាតិ និងអន្តរជាតិ ដែលធ្វើការលើបញ្ហាសុខភាពកុមារ ជួយជំរុញបន្ថែមទៅតុលាការ និងតាមដានដំណើររឿងនេះឱ្យបានដិតដល់៖ «ពួកគាត់អត់មានទំនួលខុសត្រូវហ្មងបង។ បើសិនជាគាត់មានទំនួលខុសត្រូវមិនមែនអ្វីដែលខាង ក.ប.ប បញ្ជាក់ថា ទឹកដោះគោគាត់មានបញ្ហាមកពីមន្ទីរពិសោធន៍ខាងសិង្ហបុរី (Singapore) ប៉ុណ្ណឹងហើយ គឺគាត់នៅតែប្រកែកមិនទទួលស្គាល់ដល់ចុងក្រោយបានគាត់ទទួលស្គាល់។ ហើយពេលដែលគាត់ទទួលស្គាល់ហើយ គាត់សុំពេលសម្របសម្រួលជាមួយអ្នករងគ្រោះ គឺមានតែ២គ្រួសារទេ ក្នុងចំណោម ២៤គ្រួសារដែលគាត់ហៅទៅហ្នឹង។ គាត់ហៅទៅ របៀបដោះស្រាយរបស់គាត់មួយគ្រួសារគឺ ១ពាន់ដុល្លារ។ យើងមើលទៅតាមដំណោះស្រាយទទួលរបស់គាត់ជាមួយអ្នករងគ្រោះដូចជាអត់មានសោះហ្មងបង»។
ក្រុមគ្រួសារទារករងគ្រោះអះអាងថា ពួកគេទុកពេលឱ្យតុលាការធ្វើការស៊ើបអង្កតរឿងនេះជាមុនសិន ហើយពួកគេនឹងបន្តនីតិវិធីផ្សេងទៀត ដើម្បីជំរុញរឿងនេះ ប្រសិនបើតុលាការយឺតយ៉ាវក្នុងការដោះស្រាយ។
កាលពីថ្ងៃទី៤ និងទី៥ មករា ព្រះរាជអាជ្ញារងអមសាលាដំបូងរាជធានីភ្នំពេញ លោក សេង ហៀង បានកោះហៅម្ដាយឪពុកទារករងគ្រោះ ឱ្យចូលបំភ្លឺបន្ថែមលើបណ្ដឹងរបស់ពួកគេ ដែលប្ដឹងទាមទារសំណងពីក្រុមហ៊ុន អេស អេន ធីខេ ត្រេឌីង (S&TK trading Co.,LTD) ដែលនាំចូលម្សៅទឹកដោះគោនូទ្រីលែត។
អាស៊ីសេរីបានព្យាយាមទាក់ទងទៅអ្នកនាំពាក្យអយ្យការអមតុលាការក្រុងភ្នំពេញ លោក គុជ គឹមឡុង ដើម្បីសួរនាំបន្ថែមអំពីរឿងនេះ នៅថ្ងៃទី៦ មករា តែលោកបញ្ជាក់ថា កំពុងរវល់ប្រជុំ រួចក៏ចុចផ្ដាច់ទូរស័ព្ទ។
កាលពីដើមខែកញ្ញា ក្រសួងពាណិជ្ជកម្មបានបញ្ជាឱ្យផ្អាកចរាចរ និងប្រមូលត្រឡប់មកវិញនូវម្សៅទឹកដោះគោ នូទ្រីលេត ចំនួន ៦លេខកូដ (487 488 536 537 538និង 539) និងបញ្ឈប់ការនាំចូលម្សៅទឹកដោះគោប្រភេទនេះចូលទីផ្សារក្នុងប្រទេស។ ការចាត់វិធានការក្តៅនេះ បន្ទាប់ពីក្រសួងរកឃើញថា ផលិតផលទាំងនេះ ខ្វះសារធាតុចិញ្ចឹមគ្រប់គ្រាន់ ដែលបង្កគ្រោះថ្នាក់ធ្ងន់ធ្ងរដល់សុខភាពរបស់កុមារ និងទារក ដែលទទួលទានម្សៅទឹកដោះគោះនេះ។
ក្រុមហ៊ុនម្សៅទឹកដោះគោនូទ្រីលែត បានប្រកាសសូមទោសជាសាធារណៈ ហើយអះអាងថា ក្រុមហ៊ុនមិននឹកស្មានថា ម្សៅទឹកដោះគោដែលក្រុមហ៊ុនកំពុងនាំចូល និងចែកចាយអស់រយៈពេល ៩ឆ្នាំ មានបញ្ហាបច្ចេកទេស លើធាតុផ្សំនៃម្សៅទឹកដោះគោ លេខកូដទាំង ៦នេះទេ។
ទោះជាយ៉ាងណា ភាគីក្រុមហ៊ុនមិនព្រមបង់សំណងតាមការទាមទាររបស់ឪពុកម្ដាយកុមាររងគ្រោះនោះទេ ទោះជាមានការសម្របសម្រួលពីក្រសួងពាណិជ្ជកម្មក៏ដោយ ហេតុដូច្នេះទើបករណីនេះត្រូវបានបញ្ជូនទៅតុលាការក្រុងភ្នំពេញ។
អាស៊ីសេរីមិនអាចទាក់ទងតំណាងក្រុមហ៊ុន អេស អេន ធីខេ ត្រេដឌីង (S&TK trading Co.,LTD) ដែលនាំចូលម្សៅទឹកដោះគោនូទ្រីលែត ដើម្បីសាកសួរអំពីជំហររបស់ក្រុមហ៊ុនក្នុងដំណើររឿងក្តីនេះទេ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា តុលាការគួរដោះស្រាយបណ្ដឹងនេះឱ្យបានឆាប់រហ័ស ដើម្បីពន្លឿនការស្វែងរកយុត្តិធម៌ជូនគ្រួសារទារករងគ្រោះ និងផ្ដន្ទាទោសលើអ្នកដែលប្រព្រឹត្តខុសច្បាប់។ លោកបន្តថា ការឆកល្វែងក្នុងការត្រួតពិនិត្យឱ្យបានម៉ត់ចត់លើគុណភាពផលិតផលទាំងនោះ ធ្វើឱ្យកើតមានបញ្ហាលើទារកតូចៗ៖ «ឆ្លងកាត់នូវបទពិសោធន៍នេះ រដ្ឋាភិបាលគួរតែមានការដាក់វិធានការឱ្យតឹងរ៉ឹងចំពោះបណ្ដាក្រុមហ៊ុនដែលនាំចូលនូវផលិតផលទាំងអស់ហ្នឹង ដើម្បីបញ្ចៀសនូវការប៉ះពាល់ទៅដល់សុខុមាលភាពរបស់ប្រជាពលរដ្ឋ។ អ៊ីចឹងបើសិនជាមានករណីហ្នឹងមានការប៉ះពាល់ហ្នឹងត្រូវតែមានការចាត់វិធានការ ដើម្បីឱ្យក្រុមហ៊ុនទាំងអស់ហ្នឹងទទួលខុសត្រូវ ហើយឱ្យជាគំរូមួយទៅ ដើម្បីកុំឱ្យមានការនាំចូលដែលធ្វើឱ្យមានការប៉ះពាល់ទៅដល់សុខុមាលភាពរបស់ប្រជាពលរដ្ឋបន្តទៀត»។
ម្ដាយឪពុកទារករងគ្រោះស្នើឱ្យក្រសួងសុខាភិបាលគួរបញ្ឈប់ការចែកចាយផលិតផលម្សៅទឹកដោះគោនូទ្រីលែតគ្រប់ម៉ាក ដោយរង់ចាំចំណាត់ការរបស់តុលាការលើបណ្ដឹងរបស់ពួកគេជាមុនសិន មុននឹងអនុញ្ញាតឱ្យក្រុមហ៊ុនបន្តការចែកចាយផលិតផលម្សៅទឹកដោះគោផ្សេងទៀតនៅលើទីផ្សារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។