មន្ត្រី​​ព័ត៌មាន និង​ជា​អ្នក​ដឹក​នាំ​ការ​ផលិត​ភាពយន្ត អំពី​ប្រវត្តិ​លោក ហ៊ុន សែន ទទួល​មរណភាព​ដោយសារ​ជំងឺ​កូវីដ-១៩

ដោយ មួង ណារ៉េត ម៉ៅ សុធានី
2021-04-15
Share
មន្ត្រី​​ព័ត៌មាន និង​ជា​អ្នក​ដឹក​នាំ​ការ​ផលិត​ភាពយន្ត អំពី​ប្រវត្តិ​លោក ហ៊ុន សែន ទទួល​មរណភាព​ដោយសារ​ជំងឺ​កូវីដ-១៩ លោក ម៉ៅ អាយុទ្ធ រដ្ឋលេខាធិការ​ក្រសួង​ព័ត៌មាន និង​ជា​អ្នក​ដឹក​នាំ​ការ​ផលិត​ខ្សែ​ភាពយន្ត អំពី​ប្រវត្តិ​លោក​នាយក​រដ្ឋមន្ត្រី ហ៊ុន សែន។
រូប៖ នាយកដ្ឋាន​ប្រយុទ្ធ​នឹង​ជំងឺ​ឆ្លង CDC

រដ្ឋលេខាធិការ​ក្រសួង​ព័ត៌មាន និង​ជា​អ្នក​ដឹក​នាំ​ការ​ផលិត​ខ្សែ​ភាពយន្ត អំពី​ប្រវត្តិ​លោក​នាយក​រដ្ឋមន្ត្រី ហ៊ុន សែន ទទួល​មរណភាព​ដោយសារ​ជំងឺ​កូវីដ-១៩។ លោក ម៉ៅ អាយុទ្ធ វ័យ ៧៧ឆ្នាំ បាន​ទទួលមរណភាព នៅ​មន្ទីរពេទ្យ​មិត្តភាព​ខ្មែរ​សូវៀត (ពេទ្យ​រុស្ស៊ី) កាល​ពី​ល្ងាច​ថ្ងៃ​ទី១៥ ខែ​មេសា ឆ្នាំ២០២១ ដោយសារ​ជំងឺ​កូវីដ-១៩។

លោក ម៉ៅ អាយុទ្ធ ជា​ប្រធាន​គណៈកម្មការ​ផលិតភាព​យន្ត​ភាគ​រឿង «កូន​ប្រុស​ក្រោម​ពន្លឺ​ព្រះចន្ទ​ពេញ​បូណ៌មី» ដែល​រៀបរាប់​អំពី​ប្រវិត្ត​លោក ហ៊ុន សែន។

លោក​គឺ​ជា​អ្នក​ជំងឺ​កូវីដ-១៩ ទី៣៨ ហើយ ដែល​ស្លាប់​ដោយសារ​ជំងឺ​នេះ។ ក្នុង​ពេល​ជាមួយ​គ្នា​នេះ ចំនួន​អ្នក​ឆ្លង​ជំងឺ​កូវីដ-១៩ ក្នុង​សហគមន៍ បាន​កើន​ឡើង​ដល់ ៤.៦៧៦នាក់ កាល​ពី​ថ្ងៃ​ទី១៤ ខែមេសា ក្រោយ​ពី​ក្រសួង​សុខាភិបាល រក​ឃើញ​ករណី​ឆ្លង​ថ្មី ៣៣៩នាក់​ទៀត។

គិតត្រឹមព្រឹកថ្ងៃទី១៥ មេសា កម្ពុជា​មាន​អ្នក​កើត​ជំងឺ​កូវីដ-១៩ ចំនួន ៥.២១៨នាក់ ក្នុង​នោះ​អ្នក​ជា​សះ​ស្បើយ​មាន ២.៣១៩នាក់ និង​អ្នក​កំពុង​សម្រាក​ព្យាបាល ២.៨៥៨នាក់។

ចំនួន​កើន​ឡើង​នេះ​អ្នក​ជំងឺ ធ្វើ​ឲ្យ​ក្រសួង​សុខាភិបាល ប្រឈម​នឹង​បញ្ហា​រក​កន្លែង​ដាក់​អ្នក​ជំងឺ​មិន​ទាន់ រួច​ក៏​ចេញ​សេចក្ដី​ណែនាំ​អំពី​របៀប​ថែទាំ និង​ព្យាបាល​ជំងឺ​ដោយ​ខ្លួន​ឯង​នៅ​តាម​ផ្ទះ។

ក្រសួងសុខាភិបាល កាល​ពី​ថ្ងៃ​ទី១៥ ខែ​មេសា បាន​ប្រាប់​ឈ្មោះ​ថ្នាំ​ពេទ្យ​ខ្លះ និង​ណែនាំ​របៀប​ព្យាបាល​ជំងឺ​កូវីដ-១៩ តាម​ផ្ទះ​នោះ។ ប៉ុន្តែ​ថ្នាំ និង​របៀប​ព្យាបាល​ជំងឺ​ដោយ​ខ្លួន​ឯង​នេះ ក្រសួង​ថា ធ្វើ​បាន​សម្រាប់​តែ​ករណី​អ្នក​ជំងឺ គ្មាន​ចេញ​រោគសញ្ញា និង​មាន​រោគ​សញ្ញា​ដែរ រោគ​សញ្ញា​ស្រាល។

បើ​អ្នក​ជំងឺ​ក្ដៅ​ខ្លួន​ក្រោម ៣៧,៥ អង្សា គ្មាន​ក្អក គ្មាន​ហៀរ​សំបោរ គ្មាន​ឈឺ​បំពង់​ក និង​សភាព​ទូទៅ​ធម្មតា មិន​ចាំបាច់​ប្រើ​ថ្នាំ​ព្យាបាល​ទេ។ ករណី​នេះ ចាត់​ទុក​ថា គ្មាន​រោគ​សញ្ញា។

បើ​អ្នក​ជំងឺ​ក្ដៅ​ខ្លួន​លើស ៣៧,៥ មាន​ឈឺ​សាច់​ដុំ ឬ​ឈឺ​បំពង់​ក ចាត់​ទុក​ថា មាន​រោគ​សញ្ញា​ស្រាល។ ករណី​បែប​នេះ ត្រូវ​ប្រើ​ថ្នាំ​ប៉ារ៉ាសេតាម៉ុល។

ករណី​មាន​សញ្ញា​បន្ថែម ដូច​ជា តឹង​ច្រមុះ ឬ ហៀរ​សំបោរ ឬ​ក្អក (មាន ឬ​មិន​មាន​ស្លេស្ម) ត្រូវ​ប្រើ​ថ្នាំ ប៉្រូម៉ិចស៊ីន (Bromhexine) ឬ​សេទីរីហ្ស៊ីន (Cetirizine)

ក្រសួង​បាន​ណែនាំ​បន្ថែម ឲ្យ​អ្នក​ជំងឺ​នៅ​ដាច់​ដោយ​ឡែក​ពី​គេ ហូប​អាហារ​មាន​ជីវជាតិ​គ្រប់គ្រាន់ និង​ពិសា​ទឹក​ឲ្យ​បាន​ច្រើន​ជា​ដើម។

ការ​ណែនាំ​នេះ ធ្វើ​ឡើង​ក្រោយ​តំណាង​អង្គការ​សុខភាព​ពិភពលោក (WHO) ប្រចាំ​កម្ពុជា​ថា កម្ពុជា​ស្ថិត​ដល់​មាត់​ជ្រោះ​មរណៈ និង​លោក​នាយក​រដ្ឋមន្ត្រី ហ៊ុន សែន ថា ស្ថានការណ៍​រីក​រាល​ដាល​នៃ​ជំងឺ​នេះ ទ្រាំទ្រ​លែង​បាន​ហើយ។

ក្រសួងសុខាភិបាល​ថា ដំណាក់​កាល​នេះ អ្នក​ជំងឺ​កូវីដ-១៩ នៅ​ក្នុង​រាជធានី​ភ្នំពេញ​កើន​ឡើង​ច្រើន លើស​ពី​ចំណុះ​របស់​មន្ទីរពេទ្យ។ អគារ​ធំៗ ជា​ច្រើន នៅ​ទីក្រុង​ភ្នំពេញ ដូច​ជា អគារ​កោះ​ពេជ្រ​ជា​ដើម ដែល​ធ្លាប់​ទទួល​ភ្ញៀវ​ការ ឥឡូវ​បាន​ប្រែក្លាយ​ទៅ​ជា​មណ្ឌល​សម្រាក​ព្យាបាល​អ្នក​ជំងឺ។ ប៉ុន្តែ ចំនួន​អ្នក​ជំងឺ​ថ្មី បន្ត​កើន​ឡើង លើស​គ្រែ​ពេទ្យ ដែល​អ្នក​ជំងឺ​ជា​ច្រើន មិន​ទាន់​រក​កន្លែង​សម្រាក​ព្យាបាល​ឃើញ​នៅ​ឡើយ។

អ្នក​ជំងឺ ១.៤៩៣នាក់ កំពុង​នៅ​ផ្ទះ រង់ចាំ​បុគ្គលិក​ពេទ្យ​ទាក់ទង​មក​ទទួល ដើម្បី​បញ្ជូន​ទៅ​កន្លែង ឬ​មណ្ឌល​សម្រាក​ព្យាបាល​អ្នក​ជំងឺ​កូវីដ​ណា​មួយ ដែល​មាន​គ្រែ​ទំនេរ។

ឱសថការី​ខ្មែ-អូស្រ្តាលី សាទរ​ចំពោះ​សេចក្ដីណែនាំ​របស់​ក្រសួង​សុខាភិបាល អំពី​វិធី​ថែទាំ​សុខភាព និង​ការ​ប្រើប្រាស់​ថ្នាំ​សម្រាប់​ព្យាបាល​ជំងឺ​តាម​ផ្ទះ​នេះ។ ប៉ុន្តែ​សេចក្ដី​ប្រកាស​នេះ ធ្វើ​ឡើង​ជាង​មួយ​ឆ្នាំ​ក្រោយ​ករណី​ផ្ទុះ​កូវីដ-១៩ នៅ​កម្ពុជា។ ឱសថការី លឹម សួរ ថា វិធានការ​នេះ រាង​យឺត​ពេល​បន្តិច​ទៅ​ហើយ។

រីឯ​ក្រសួង​ការងារ​ឯ​ណោះ ក្រសួង​នេះ​ជូន​ដំណឹង​ពី​តម្រូវ​ការ​ឯកសារ និង​ទី​កន្លែង​ស្នើសុំ «លិខិត​អនុញ្ញាត​ចេញ-ចូល» រោងចក្រ សហគ្រាស និង​សិប្បកម្ម​នានា ក្នុង​អំឡុង​ពេល​បិទ​ខ្ទប់​រាជធានី​ភ្នំពេញ និង​ក្រុង​តា​ខ្មៅ ចាប់ពីថ្ងៃទី១៤ ខែ​មេសា រហូត​ដល់​ថ្ងៃ​ទី២៨ ខែ​មេសា​ខាង​មុខ។

សេចក្ដី​ជូន​ដំណឹង​របស់​ក្រសួង​ការងារ កាលពីថ្ងៃទី១៥ ខែមេសា បញ្ជាក់​ថា ម្ចាស់​រោងចក្រ សហគ្រាស និង​សិប្បកម្ម​នានា ដែល​សាលា​ក្រុង​អនុញ្ញាត​ឲ្យ​បើក​ដំណើរ​ការ​អាជីវកម្ម ត្រូវ​ទៅ​ធ្វើ​លិខិត​សុំ​អនុញ្ញាត​ដោយ​យក​ឯកសារ​បើក​សហគ្រាស និង​បញ្ជី​ឈ្មោះ​កម្មករ​និយោជិត និង​បុគ្គលិក ចាំបាច់​ដែល​ត្រូវ​ធ្វើ​ដំណើរ​មក​បំពេញ​ការងារ ក្នុង​អំឡុង​ពេល​បិទ​ខ្ទប់។

ក្រសួង​បន្ត​ថា ម្ចាស់​រោងចក្រ សហគ្រាស សិប្បកម្ម នៅ​រាជធានី​ភ្នំពេញ ត្រូវ​ចាត់​តំណាង ១រូប មក​ស្នើសុំ​នៅ​ក្រសួង​ការងារ​នៅ​រាជធានី​ភ្នំពេញ។ ចំណែក​រោងចក្រ និង​សហគ្រាស សិប្បកម្ម នៅ​ក្រុង​តា​ខ្មៅ​វិញ ត្រូវ​មក​ស្នើសុំ​នៅ​មន្ទីរ​ការងារ​ក្នុង​ខេត្ត​កណ្ដាល។

សាលា​រាជធានី​ភ្នំពេញ បាន​ចេញ​សេចក្ដី​សម្រេច​ជា​បន្ទាន់​មួយ ដោយ​ប្រកាស​បិទ​រាជធានី​ភ្នំពេញ​ទាំង​ស្រុង និង​ក្រុង​តា​ខ្មៅ​រយៈ​ពេល ១៤ថ្ងៃ ចាប់​ពី​ពេល​នេះ​រហូត ដល់​ថ្ងៃ​ទី២៨ ខែមេសា ដើម្បី​ទប់ស្កាត់​ការ​រីក​រាល​ដាលខ្លាំងនៃជំងឺកូវីដ១៩៕



កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)

មើល​មតិ​ទាំង​អស់.

Anonymous says:
Apr 16, 2021 02:13 PM

ខ្មែរមិនសូវវង្វេងទៀតទេ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល