បុគ្គលិក​ណាហ្គាវើលដ៍ (NAGAWORLD) ២សាខា ជាង ៨ពាន់​នាក់ មិន​ចូល​ធ្វើ​ការ​នៅ​ថ្ងៃ​ទី២៦ កុម្ភៈ​ក្រោយ​ផ្ទុះ​ជំងឺ​កូវីដ-១៩ ឆ្លង​ចូល​សហគមន៍

ដោយ ខែ សុណង
2021-02-26
Share
បុគ្គលិក​ណាហ្គាវើលដ៍ (NAGAWORLD) ២សាខា ជាង ៨ពាន់​នាក់ មិន​ចូល​ធ្វើ​ការ​នៅ​ថ្ងៃ​ទី២៦ កុម្ភៈ​ក្រោយ​ផ្ទុះ​ជំងឺ​កូវីដ-១៩ ឆ្លង​ចូល​សហគមន៍ (រូប​ឯកសារ) អគារ​កាស៊ីណូ ណាហ្គាវើលដ៍ (NAGAWORLD) នៅ​រាជធានី​ភ្នំពេញ ថត​កាល​ពី​ថ្ងៃ​ទី៨ ខែមករា ឆ្នាំ២០២០។
រូប៖ បុគ្គលិកផ្ដល់ឱ្យ

បុគ្គលិក​ណាហ្គាវើលដ៍ (NAGAWORLD) ២សាខា ជាង ៨ពាន់​នាក់ មិន​ចូល​ធ្វើ​ការ​នៅ​ថ្ងៃ​ទី២៦ កុម្ភៈ​នេះ។ ពួក​គេ​ទាមទារ​ឲ្យ​ក្រុមហ៊ុន​អនុវត្ត​វិធានការ​របស់​ក្រសួង​សុខាភិបាល ក្រោយ​សង្ស័យ​ថា មាន​ភ្ញៀវ​ជិត ១០នាក់ រក​ឃើញ​វិជ្ជមាន​ជំងឺ​កូវីដ-១៩ នៅ​យប់ថ្ងៃទី២៥ កុម្ភៈ។

ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ នៃ​ក្រុមហ៊ុន​កាស៊ីណូ ណាហ្គា វើលដ៍ កញ្ញា ឈឹម ស៊ីថរ ថ្លែង​ថា បុគ្គលិក​កំពុង​ព្រួយ​បារម្ភ​ពី​សុវត្ថិភាព​ខ្លួន​ឯង និង​ក្រុម​គ្រួសារ បន្ទាប់​ពី​អាជ្ញាធរ​ហាម​មិន​ឲ្យ​បុគ្គលិក និង​ភ្ញៀវ​ផ្អាក​ចេញ​ចូល​ណាហ្គា វើលដ៍ ២ ជា​បណ្ដោះអាសន្ន។ កញ្ញា​បន្ត​ថា ​ក្រោយ​បិទ​តែ​៣ម៉ោងប៉ុណ្ណោះ ក្រុមហ៊ុន​បាន​កោះ​ហៅ​បុគ្គលិក​ចូល​ធ្វើ​ការ​វិញ។ កញ្ញា​បញ្ជាក់​ថា បុគ្គលិក​ទាំង​២​សាខា ស្នើ​ឲ្យ​ស្ថាប័ន​ជំនាញ​រដ្ឋាភិបាល ជំរុញ​ឲ្យ​ថ្នាក់​ដឹក​នាំ​ក្រុមហ៊ុន​នេះ បាញ់​ថ្នាំ​សម្លាប់​មេរោគ​គ្រប់​ទី​កន្លែង​ទាំង​អស់​នៅ​ក្នុង​អាគារ​ទាំង​ពីរ​នៃ​ក្រុមហ៊ុន​កាស៊ីណូ ណាហ្គា វើលដ៍ និង​សុំ​ឲ្យ​ធ្វើ​តេស្ត​លើ​បុគ្គលិក​ទាំង​អស់ មុននឹង​បង្គាប់​ឲ្យ​ពួក​គាត់​វិល​ចូល​ធ្វើ​ការ​វិញ៖ «កន្លែង​ហ្នឹង​ហើយ ដែល​ធ្វើ​ឲ្យ​បុគ្គលិក​គាត់​ទ្រាំ​អត់​បាន គឺ​តាម​ពិត​យើង​ជជែក​ជាមួយ​ក្រុមហ៊ុន​ហូរហែ​មក​ច្រើន​ដង​ច្រើន​សា​ហើយ មិនមែន​ទើប​លើក​ទី១ ហ្នឹង​ទេ មុន​ពេល​ផ្ទុះ​ឆ្លង​ចូល​សហគមន៍​ហ្នឹង​ទេ គ្រាន់​តែ​កន្លង​មក​យើង​ចេះ​តែ​ព្យាយាម​អត់ធ្មត់​ក្នុង​ការ​ជជែក​ជាមួយ​ក្រុមហ៊ុន ព្រោះ​ដោយ​សារ​វា​អត់​ទាន់​ចូល​មក​ដល់​កន្លែង​យើង។ ឥឡូវ​លក្ខណៈ​ថា វា​ទឹក​ចូល​ដល់​ច្រមុះ​ដែរ ព្រោះ​វា​ឆ្លង​ចូល​ដល់​កន្លែង​ធ្វើការ​យើង​ហើយ យើង​អត់​អាច​រង់ចាំ​ក្រុមហ៊ុន​ទៀត​ទេ យើង​មើល​ឃើញ​ថា គាត់​អត់​មាន​ឆន្ទៈ​គិតគូរ​ពី​សុវត្ថិភាព​បុគ្គលិក​ជា​ចម្បង​នៅ​កន្លែង​ធ្វើការ​ទេ គ្រាន់​តែ​ខ្វល់​ពី​ប្រាក់​ចំណូល​ប្រាក់​ចំណេញ​គាត់​ច្រើន​ជាង​សុវត្ថិភាព​បុគ្គលិក»

កម្ពុជា​បន្ត​រក​ឃើញ​ករណី​ឆ្លង​ជំងឺ​កូវីដ១៩ ចំនួន ៤៤ករណី​បន្ថែម​ទៀត​នៅ​ថ្ងៃ​ទី២៦ កុម្ភៈ។ ក្នុង​ចំណោម​នេះ ៤០នាក់​ជា​ករណី​ឆ្លង​ក្នុង​សហគមន៍​ដែល​រដ្ឋាភិបាល​ហៅ​ថា ព្រឹត្តិការណ៍ ២០ កុម្ភៈ ដែល​ភាគ​ច្រើន​អ្នក​ឆ្លង​ជា​ជនជាតិ​ចិន ស្នាក់​នៅ​កម្ពុជា។ ចំណែក ៤​នាក់​ផ្សេង​ទៀត ជា​ករណី​នាំ​ចូល​ពី​បរទេស។

គិត​ត្រឹម​ថ្ងៃ​ទី២៦ កុម្ភៈ កម្ពុជា​រក​ឃើញ​អ្នក​ឆ្លង​ជំងឺ​កូវីដ១៩ សរុប ៧៤១នាក់ ខណៈ​អ្នក​ជា​សះ​ស្បើយ​វិញ ៤៧៧នាក់ និង ២៦៤នាក់ កំពុង​សម្រាក​ព្យាបាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល