ស្ត្រីខ្មែរ៦នាក់ដែលត្រូវបានជួញដូរភេទនៅជប៉ុននឹងមកដល់កម្ពុជាវិញនៅរសៀលនេះ
2017.01.18
ស្ត្រីខ្មែរចំនួន ៦នាក់ នឹងវិលមកដល់កម្ពុជា វិញនៅរសៀលថ្ងៃទី១៩ ខែមករា បន្ទាប់ពីត្រូវជួយសង្គ្រោះអោយរួចផុតពីករណីជួញដូរផ្លូវភេទនៅក្នុងប្រទេសជប៉ុន។
ស្ត្រីខ្មែរ ៧នាក់ ត្រូវបានស្ថានទូតកម្ពុជា ប្រចាំនៅប្រទេសជប៉ុន ជួយសង្គ្រោះ នៅពេលពួកគេត្រូវបង្ខំអោយបម្រើសេវាផ្លូវភេទនៅក្នុងភោជនីយដ្ឋានមួយនៅក្នុងខេត្តហ្គុនម៉ា (Gunma) ប្រទេសជប៉ុន ហើយស្ត្រីម្នាក់ក្នុងចំណោមនោះបានវិលមកកម្ពុជា វិញ កាលពីចុងខែធ្នូ ឆ្នាំ២០១៦។
នេះជាករណីទី១ ដែលអាជ្ញាធរបានជួយសង្គ្រោះស្ត្រីរងគ្រោះពីប្រទេសជប៉ុន ក្នុងករណីជួញដូរផ្លូវភេទ។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី មានប្រសាសន៍នៅថ្ងៃទី១៨ ខែមករា ថា ស្ត្រីរងគ្រោះបានផ្ដល់ដំណឹងពីបញ្ហារបស់ពួកគេទៅស្ថានទូតខ្មែរប្រចាំនៅប្រទេសជប៉ុន តាមរយៈទំព័រហ្វេសប៊ុក (Facebook) របស់ស្ថានទូត ទើបស្ថានទូតសហការជាមួយអាជ្ញាធរជប៉ុន ជួយសង្គ្រោះ។
លោក ជុំ សុន្ទរី៖ «ស្ត្រីខ្មែរទាំង ៧នាក់ហ្នឹង មកស្នាក់នៅក្នុងស្ថានទូតក្នុងការថែរបស់ស្ថានទូត កាលពីខែធ្នូ ប៉ុន្តែដែលថា រហូតមកដល់ពេលនេះទើបបានធ្វើមាតុភូមិនិវត្តន៍ ដោយសារយើងត្រូវរៀបចំសំណុំឯកសារធ្វើការប្ដឹងផ្ដល់ទៅអាជ្ញាធរសមត្ថកិច្ចរបស់ជប៉ុន ដើម្បីស្វែងរកជនដែលបានប្រព្រឹត្តទោសឧក្រិដ្ឋហ្នឹងដើម្បីយកទៅផ្ដន្ទាទោស ហើយនិងដើម្បីទាមទារសំណង និងប្រាក់បៀវត្សដែលម្ចាស់ភោជនីយដ្ឋានមិនទាន់បានផ្ដល់ពួកគេបានគ្រប់គ្រាន់»។
នៅក្នុងសេចក្ដីថ្លែងការណ៍ចេញដោយក្រសួងការបរទេស កាលពីថ្ងៃទី១៧ ខែមករា អោយដឹងថា ស្ត្រីទាំង ៧នាក់នោះ មាន ២នាក់ ទៅពីភ្នំពេញ ២នាក់ពីខេត្តព្រៃវែង ម្នាក់ពីខេត្តពោធិ៍សាត់ ម្នាក់ពីខេត្តកំពង់ស្ពឺ និងម្នាក់ទៀតពីខេត្តតាកែវ។ ពួកគេត្រូវបានមេខ្យល់បោកបញ្ឆោតនាំទៅដល់ប្រទេសជប៉ុន កាលពីខែវិច្ឆិកា ឆ្នាំ២០១៦ ដោយមានការរៀបចំឯកសារសុំទិដ្ឋាការ និងសំបុត្រយន្តហោះ ពីបុរសជនជាតិជប៉ុន ម្នាក់ ដែលជាម្ចាស់ភោជនីយដ្ឋានមួយនៅក្នុងខេត្តហ្គុនម៉ា។ ពួកគេបានរៀបរាប់ប្រាប់ស្ថានទូតថា បុរសនោះបានសន្យាផ្ដល់ការងារធ្វើនៅភោជនីយដ្ឋាន ដែលមានប្រាក់ខែខ្ពស់ តែផ្ទុយទៅវិញ បានគំរាមកំហែង និងបង្ខំអោយពួកគេបម្រើសេវាផ្លូវភេទដល់ភ្ញៀវនៅភោជនីយដ្ឋានទៅវិញ ហើយថែមទាំងមិនបានផ្ដល់ប្រាក់បៀវត្សអោយទៀត។
លោក ជំ សុន្ទរី អំពាវនាវអោយពលរដ្ឋដែលមានបំណងទៅរកការងារនៅក្រៅប្រទេសប្រុងប្រយ័ត្នចំពោះការឆបោក ដោយសន្យាផ្ដល់ការងារមានប្រាក់ខែខ្ពស់៖ «ពីព្រោះបញ្ហាដែលយើងជួបប្រទះកន្លងមក គឺពលករខ្មែរ ចំណុចដែលសំខាន់គឺគាត់ត្រូវបានមេខ្យល់បោកប្រាស់ភូតកុហក ដោយសន្យាថា មានការងារល្អធ្វើ មានប្រាក់បៀវត្សខ្ពស់ អ៊ីចឹងសូមអំពាវនាវអោយប្រយ័ត្ន»។
លោកសង្ឃឹមថា នឹងមិនបញ្ហាបែបនេះកើតឡើងទៀតទេទៅលើស្ត្រីខ្មែរនៅក្នុងប្រទេសជប៉ុន។
ទាក់ទិននឹងការងារនៅក្នុងប្រទេសជប៉ុន កញ្ញា ហួត លីគៀង ដែលធ្លាប់ទៅធ្វើការងារនៅក្នុងប្រទេសជប៉ុន លើកឡើងថា ជារឿយៗ នៅទីនោះកញ្ញាតែងឮព័ត៌មានពីការជួញដូរផ្លូវភេទស្ត្រីខ្មែរ ដោយមេខ្យល់លួចលាក់នៅក្នុងប្រទេសជប៉ុន។ កញ្ញាបញ្ជាក់ថា បញ្ហាតែងកើតឡើងនៅពេលដែលពួកនាងត្រូវនិយោជកធ្វើបាបនៅកន្លែងការងារ ហើយលួចរត់គេចពីកន្លែងការងារ ទើបធ្លាក់ខ្លួនចាញ់បោកមេខ្យល់ដែលតែងសន្យារកការងារដែលមានប្រាក់ខែខ្ពស់៖ «អ៊ីចឹងទៅគាត់ជឿគេ គាត់ក៏រត់ខុសច្បាប់។ ស្ត្រីខ្មែរយើងពេលដែលគាត់រត់ខុសច្បាប់ពិបាកមែនទែន ទៅដល់រត់ខុសច្បាប់ គេអត់មានការងារអោយធ្វើពេញលេញទេ។ ក្នុងមួយខែមានការងារធ្វើ ១០ថ្ងៃអីទេ។ អ៊ីចឹងគាត់អត់លុយពេលហ្នឹងហើយដែលគាត់ធ្លាក់ក្នុងរឿងអាក្រក់»។
ស្របគ្នានេះ លីគៀង បានអំពាវនាវដល់ស្ត្រីខ្មែរដែលធ្វើការនៅក្រៅប្រទេសត្រូវហ៊ានតវ៉ា ដើម្បីទទួលបានលក្ខខណ្ឌការងារល្អ និងចៀសផុតពីគ្រោះថ្នាក់ផ្សេងៗដោយអំពើជួញដូរ។
របាយការណ៍របស់ក្រសួងការបរទេសអោយដឹងថា គេបានជួយសង្គ្រោះពលករដែលត្រូវរំលោភបំពាន ដោយការជួញដូរទៅក្រៅប្រទេសបានចំនួនជាង ៨០០នាក់ ក្នុងឆ្នាំ២០១៦ ពីប្រទេសសរុបចំនួន១៤៕