បុគ្គលិកកាស៊ីណូណាហ្គាវើលដ៍ស្នើសុំក្រុមហ៊ុនអនុញ្ញាតឱ្យមេសហជីពម្នាក់ចូលធ្វើការវិញ
2019.09.22
កាស៊ីណូ ខ្នាតផ្កាយ៥ ឈ្មោះណាហ្គាវើល (Naga World) ក្នុងចំណោមកាស៊ីណូ ជាច្រើនទៀតនៅភ្នំពេញ។
បុគ្គលិកក្រុមហ៊ុនកាស៊ីណូ ណាហ្គា វើលដ៍ (Naga World) ទាមទារឱ្យក្រុមហ៊ុនអនុញ្ញាតឱ្យ ប្រធានសហជីពប្រចាំក្រុមហ៊ុនណាហ្គា វើលដ៍ ចូលធ្វើការវិញ។ ការទាមទារនេះ បន្ទាប់ពីក្រុមហ៊ុន បានព្យួរការងារប្រធានសហជីពរូបនេះបណ្ដោះអាសន្ន ក្រោយពីមានគម្រោងធ្វើយុទ្ធនាការទាមទារ ឱ្យក្រុមហ៊ុនដំឡើងប្រាក់ឈ្នួលបុគ្គលិកឱ្យបានសមរម្យ។
បុគ្គលិករបស់ក្រុមហ៊ុនកាស៊ីណូ ណាហ្គា វើលដ៍ សម្ដែងការខឹងសម្បាយ៉ាងខ្លាំង បន្ទាប់ពីក្រុមហ៊ុនមិនទាន់ដំឡើងប្រាក់ឈ្នួលសម្រាប់បុគ្គលិកផង ប៉ុន្តែថែមទាំងព្យួរការងារប្រធានសហជីពរបស់ពួកគេថែមទៀត។
បុគ្គលិកផ្នែកភោជនីយដ្ឋាននៅក្នុងក្រុមហ៊ុន ណាហ្គា វើលដ៍ លោកស្រី ណុប ទិត្យបូរ៉ាវី ស្នើសុំឱ្យ ក្រុមហ៊ុនណាហ្គា វើលដ៍ អនុញ្ញាតឱ្យប្រធានសហជីព កញ្ញា ឈឹម ស៊ីថរ ចូលបំពេញការងារក្នុងកាស៊ីណូ ជាធម្មតាវិញ ព្រោះលោកស្រីយល់ថា ប្រធានសហជីពរូបនេះមិនបានប្រព្រឹត្តខុសនោះទេ។ អ្នកស្រីយល់ថា ការព្យួការងារមេសហជីពបែបនេះ អាចជាចេតនារបស់ក្រុមហ៊ុន មិនចង់ដំឡើង ប្រាក់ខែដល់បុគ្គលិក ខណៈបុគ្គលិក កំពុងគ្រោងធ្វើយុទ្ធនាការទាមទារដំឡើងប្រាក់ឈ្នួលបន្ថែម៖ «យើងទាមទារឱ្យផ្ដល់យុត្តិធម៌ដល់អ្នកស្រីប្រធានរបស់ពួកយើងវិញ ដើម្បីឱ្យគាត់បានចូលធ្វើការធម្មតា។ គ្រាន់តែយើងទាមទាររំកិលប្រាក់ឈ្នួលសម្រាប់ កម្មករសោះ ក៏ក្រុមហ៊ុនចាប់ផ្ដើមព្យួរការងាររបស់គាត់។ ពិតជាអយុត្តិធម៌ណាស់»។
បុគ្គលិករូបនេះរៀបរាប់ថា កាលពីយប់ថ្ងៃទី២០ ឈានចូលថ្ងៃទី២១ ខែកញ្ញា សន្តិសុខក្រុមហ៊ុន បាន ឆែកកាបូបបុគ្គលិកម្នាក់ ហើយឃើញអាវដែលមានសរសេរថា «ក្រុមហ៊ុនរីកចម្រើន បុគ្គលិកត្រូវការប្រាក់ខែរស់នៅសមរម្យ»។ បន្ទាប់មកសន្តិសុខបានដកហូតអាវនោះ ហើយប្រធានសហជីព កញ្ញា ឈឹម ស៊ីថរ ទៅជួបចរចារជាមួយតំណាងក្រុមហ៊ុនភ្លាមៗ ប៉ុន្តែត្រូវបានក្រុមហ៊ុនដកហូតកាតការងារ និងព្យួរការងាររបស់កញ្ញាជាមួយបុគ្គលិកប្រមាណ ២៧នាក់ផ្សេងទៀត។ ក្នុងពេលនោះ បុគ្គលិកទាំងអស់ ក៏បានប្រមូលផ្តុំគ្នាតវ៉ាដែរ ហើយខាងក្រុមហ៊ុនសម្រេចអនុញ្ញាតឱ្យបុគ្គលិកប្រមាណ ២៧នាក់នោះចូលធ្វើការវិញ នៅសល់តែកញ្ញា ឈឹម ស៊ីថរ មួយប៉ុណ្ណោះ។
អាស៊ីសេរីមិនទាន់អាចទាក់ទងតំណាងក្រុមហ៊ុនណាហ្គា វើលដ៍ ដើម្បីឆ្លើយតបបាននៅឡើយទេ។
សកម្មជនជាន់ខ្ពស់នៃសហជីពប្រចាំកាស៊ីណូ ណាហ្គា វើលដ៍ លោក គង់ គា ថ្លែងថា ការព្យួរការងារ របស់ប្រធានសហជីពនេះ គឺធ្វើឡើងស្របពេលបុគ្គលិក កំពុងរួមគ្នាធ្វើយុទ្ធនាការ ''ក្រុមហ៊ុនរីក ចម្រើន បុគ្គលិកត្រូវការប្រាក់ខែរស់នៅសមរម្យ''។ លោកបន្តថា បុគ្គលិកទាំងអស់ នឹងនៅតែបន្ត ទាមទារឱ្យប្រធានសហជីពបានចូលបំពេញការងារវិញ ហើយនឹងធ្វើយុទ្ធនាការទាមទារឱ្យក្រុមហ៊ុន ជួយដំឡើងប្រាក់ខែជូនបុគ្គលិកដដែល៖ «យុទ្ធនាការយើងនៅតែធ្វើជាបន្ត គឺយើងអត់ឈប់ទេរហូតដល់ក្រុមហ៊ុនទទួលយកលោកស្រីប្រធានចូលធ្វើការវិញស្របតាមច្បាប់។ ការទាមទារប្រាក់នេះគឺ យើងធ្វើជាពីរផ្នែកដោយសារតែក្រុមហ៊ុនមានកាស៊ីណូ និងអូតែល។ សម្រាប់ផ្នែកសណ្ឋាគារ (Hotel) យើងសុំរំកិលពីប្រាក់បច្ចុប្បន្នភាព ទៅដល់ ៣០០ដុល្លារហើយសម្រាប់ផ្នែកកាស៊ីណូវិញ យើងស្នើសុំ រំកិលពីបច្ចុប្បន្នភាពទៅដល់៥០០ដុល្លារ ហើយដំណែងចាប់ពីថ្នាក់ដឹកនាំឡើងទៅគឺយើងស្នើសុំដំឡើង៥០ភាគរយនៃប្រាក់ខែរបស់គាត់»។
ក្រុមហ៊ុនកាស៊ីណូ Naga World បានបង្ហាញពីប្រាក់ចំណេញសុទ្ធកើនឡើងយ៉ាងខ្លាំងកាលពីឆ្នាំមុន គឺចំណេញបន្ទាប់ពីបង់ពន្ធរួចមានរហូតដល់ជិត ៤០០លានដុល្លារ (៣៩០,៦លាន) កាលពីឆ្នាំ ២០១៨ កើនឡើង ៥៣ភាគរយ។ ប្រាក់ចំណេញនេះ ស្ទើរតែប្រហាក់ប្រហែលនឹងប្រាក់ចំណេញ ១ឆ្នាំពេញរបស់គ្រឹះស្ថានធនាគារពាណិជ្ជនៅកម្ពុជាទាំងអស់បូកបញ្ចូលគ្នា។
ទោះបីជាក្រុមហ៊ុន ណាហ្គា វើលដ៍ នេះ ទទួលបានប្រាក់ចំណូលច្រើនបែបនេះក្ដី ប៉ុន្តែបុគ្គលិកជាច្រើន នៅតាមផ្នែកផ្សេងៗ ធ្លាប់ត្អូញត្អែរថា ពួកគាត់ប្រឈមនឹងការកេងប្រវ័ញ្ចកម្លាំងពលកម្ម ដោយទទួលបានប្រាក់ឈ្នួលទាប ខណៈធ្វើការងារធ្ងន់ និងច្រើនម៉ោង។
ក្រុមបុគ្គលិកអះអាងថា ប្រសិនបើក្រុមហ៊ុនណាហ្គា វើលដ៍ មិនអនុញ្ញាតឱ្យប្រធានសហជីពចូលធ្វើ ការងារវិញ និងមិនព្រមដំឡើងប្រាក់ឈ្នួលតាមសំណើនោះទេ ពួកគេនឹងប្រមូលផ្តុំគ្នាតវ៉ារហូតទាល់ តែមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
