កម្មករខ្មែរក្រោមមួយក្រុម ត្រូវបានរោងចក្រផលិតគ្រឿងសង្ហារិមនៅខេត្តដុងណាយ
2020.07.09
ផែនទីនៃទឹកដីកម្ពុជាក្រោម។
កម្មករខ្មែរក្រុមមួយក្រុមធ្វើការនៅរោងចក្រផលិតសង្ហារិមមួយ នៅសួនឧស្សាហកម្មក្នុងខេត្តវាលប្រើស ដែលវៀតណាមដាក់ឈ្មោះថ្មីថា ដូនណៃ (Dong Nai) ត្រូវបានរោងចក្របណ្ដេញចេញពីការងារបន្ទាប់ពីអាជ្ញាធរបានចោទប្រកាន់ថា ពួកគេពាក់ព័ន្ធនឹងរឿងនយោបាយ និងធ្វើខូចសណ្ដាប់ធ្នាប់សាធារណៈ។
អង្គការសង្គមស៊ីវិលខ្មែរក្រោមហៅថា ជារឿងរំលោភសិទ្ធិមនុស្ស និងរើសអើងជាតិសាសន៍។ និងទាមទារឱ្យវៀតណាមកែប្រែឥរិយាបថនេះ ។
កម្មករខ្មែរក្រោមម្នាក់ឈ្មោះ យឿង ខាយ ក្នុងចំណោមកម្មកររាប់សិបនាក់ទៀតដែលត្រូវបានរោងចក្រផលិតសង្ហារិម ឈ្មោះ សាលីម ភូនីទ័រ (Sanlim Funiture) ប្រាប់អាស៊ីសេរីនៅថ្ងៃទី៦ កក្កដាថា លោកត្រូវបានដេញចេញពីការងារតាំងពីដើមខែកុម្ភៈរហូតមកដល់ពេលនេះ។
លោក យឿង ខាយ រៀបរាប់បន្តថា កាលពីដើមខែមករា ឆ្នាំ២០២០ នគរបាលខេត្តឃ្លាំងដែលវៀតណាមដាក់ឈ្មោះថ្មីថា សុក ត្រាំង (Soc Trang) សហការជាមួយនគរបាលខេត្តវាលប្រើសដែលវៀតណាមដាក់ឈ្មោះថ្មីថា ដូន ណៃ (Dong Nai) កោះហៅលោកទៅសម្លុត គំរាមកំហែងថា លោកឃុបឃិតនឹងខ្មែរក្រោមនៅក្រៅស្រុកចង់ផ្ដួលរំលំ រដ្ឋាភិបាលវៀតណាម។
លោក យឿង ខាយ ខំរៀបរាប់បន្តថា ទីបំផុតនគរបាលវៀតណាមចោទប្រកាន់លោកថា ធ្វើឲ្យវឹកវរក្នុងសង្គម ព្រោះលោកបានបង្ហោះសារឯកសារប្រវត្តិសាស្ត្រទឹកដីកម្ពុជាក្រោម ហើយនិងទាក់ ទងជាមួយខ្មែរក្រោមនៅក្រៅស្រុក។
លោក យឿង ខាយ បានបញ្ជាក់ថា លោកបានបង្ហោះវីដេអូ ទាក់ទងនឹងប្រវត្តិសាស្ត្រកម្ពុជាក្រោម និងមានទំនាក់ទំនង ជាមួយបងប្អូនខ្មែរនៅក្រៅស្រុក ជាធម្មតាប៉ុណ្ណោះ មិនមែនធ្វើរឿងនយោបាយ ដូចវៀតណាមចោទប្រកាន់នោះទេ៖ «ដូចថាកូនបង្ហោះព័ត៌មាន ប្រវត្តិសាស្ត្រ ប្រវត្តិអី និយាយរឿងទឹកដីកម្ពុជាក្រោមអីចឹង ដល់ហើយនគរបាលខេត្តខាងសន្តិសុខជាតិ គេចោទអ៊ីចឹង ចោទថា ទោសមាន នយោបាយ ខាងនយោបាយ ធ្វើឲ្យប្រទេសជាតិ រំជើបរំជួល អីហ្នឹង»។
ចំណែកកម្មករខ្មែរក្រោមម្នាក់ទៀតឈ្មោះចៅ ជា ធ្វើជាងសំណង់នៅខេត្ត ប៊ិញ យឿង (Binh Duong) អះអាងថា មិនមែនមានតែរោងចក្រសង្ហារិមនៅខេត្ត វាលប្រើ ឬ ដូន ណៃ (Dong Nai) ហ្នឹងមួយទេ រោងចក្រនៅកន្លែងដទៃទៀតក៏គេរើសអើងខ្មែរក្រោមអ៊ីចឹងដែរ៖ «ក្រុមហ៊ុនខ្លះ ឃើញខ្មែរយើងចូលទៅសុំធ្វើការងារ អត់ទទួលទេ ពេលមើលអាលិខិតសុំចូលធ្វើការហ្នឹង គ្រាន់តែឃើញថាខ្មែរគេមិនទទួលហើយ ។ តិចនឹងមានខ្មែរយើងធ្វើហោង បានធ្វើប្រធានក្រុមហ្នឹង មេការ ឬក៏ធ្វើធំអី បានលុយច្រើន តិចណាស់ ។ ពេលខ្លះខ្មែរក្រោម ទៅធ្វើការបាន ដោយសារតែកន្លែងស្គាល់ ឬកន្លែងណា ដែលខ្មែរធ្លាប់ចូលធ្វើបានទេ តែក្រុមហ៊ុនដែលល្បីៗ ខ្មែរមិនងាយបានចូលទេ»។
អគ្គលេខាធិការសមាគមខ្មែរកម្ពុជាក្រោមដើម្បីសិទ្ធិមនុស្សនិងអភិវឌ្ឍន៍លោក សឺន ជុំជួន បានលើកឡើងថា ទង្វើនេះ គឺជាទង្វើរើសអើងជនជាតិដើម និងរំលោភសិទ្ធិមនុស្ស។
លោក សឺន ជុំ ជួនបន្ថែមថា វៀតណាមជាប្រទេសហត្ថលេខីទទួលស្គាល់សិទ្ធិមនុស្សជាសកល ហើយពិសេសបានទទួលស្គាល់សិទ្ធិជនជាតិដើមទៀតផង។ លោកទាមទារឱ្យថៅកែរោងចក្រ និងរដ្ឋាភិបាលវៀតណាម ឈប់ប្រកាន់រើសអើងជនជាតិដើមខ្មែរក្រោម ដែលជាម្ចាស់ទឹកដីខ្មែរក្រោម៖ «សុំសំណូមពរដល់រដ្ឋាភិបាលវៀតណាមណា គួរស្វែងរកដំណោះស្រាយនូវអ្វី ដែលជាការ អន្តរាគមន៍របស់យុវជន ឬក៏ពិចារណានូវអ្វី ដែលជាការស្នើ ឬក៏ការអន្តរាគមន៍ របស់អង្គការសមាគមខ្មែរក្រោម ដែលយើងមានមូលដ្ឋាននៅក្រៅប្រទេស អាជ្ញាធរគួរពិនិត្យ ពិចារណានៅលើចំណុចល្អនេះ បើមិនដូច្នោះទេ ការតស៊ូរបស់ខ្មែរក្រោមនៅតែមានការកើតឡើង សម្រាប់វៀតណាមជានិច្ច នេះជាការលើកឡើងបន្ថែមរបស់ខ្ញុំ ជូនទៅដល់រដ្ឋាភិបាលវៀតណាម»។
យោងតាមប្រភពសារព័ត៌មានព្រៃនគរផ្សាយថា ចាប់ទាំងពីឆ្នាំ២០១៧ រហូតមកដល់ពេលនេះ សួនឧស្សាហកម្ម ក្នុងខេត្ដ ដុង ណាយ បានដេញកម្មករខ្មែរក្រោម ជាង ២០០នាក់មកហើយ ក្រោមហេតុផលនយោបាយ និងធ្វើឲ្យខូចសណ្ដាប់ធ្នាប់សាធារណៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
